Bareta kan mga Parabalangibog kan Kahadean

An Nakalilinig na Puersa kan Tataramon nin Dios

IBINABARETA na kadaklan sa mga adikto sa droga minabuelta sa saindang mga bisyo pakaluwas sa mga klinika sa rehabilitasyon. Alagad an Tataramon nin Dios nakagigibo kan sa parate dai nagigibo kan mga klinika. (Hebreo 4:12) Dakol na an natabangan kan Tataramon asin espiritu nin Dios na mapangganahan an adiksion sa droga asin iaplikar an hatol: “Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.”​—2 Corinto 7:1.

Ipinaghahalimbawa ini nin sarong eksperyensia hale sa Myanmar. An sarong lalaki na nakipagtusayan sa adiksion sa droga sa laog nin dakol na taon nagsasaysay: “Ako nagin adikto sa droga kan tin-edyer pa ako. Dakol na beses na prinobaran kong tumalingkas, alagad dai ko kaya. Tanganing masustentohan an sakong pagdodroga, naghabon ako. Bilang resulta, kan 1988, nabilanggo ako sa laog nin sarong taon.

“Pakaluwas ko sa bilanggoan, kinontak ko giraray an dating mga katood. Dai nahaloy pakalihis kaiyan buminuelta ako sa pagdodroga. An nakararaot sa sadiri na pamumuhay na ini an nagin dahelan na putolon kan mga miembro kan pamilya an gabos na pakiibaiba sa sako. Dugang pa, an sakong rebeldeng aktitud nagcausa na dakol sa komunidad an matakot sa sako, asin sinda man nagpoon nang likayan ako.

“Dangan sarong aldaw nangyari an dai malilikayan​—nasobrahan ako nin dosis sa droga. Ibinalik ako sa bilanggoan, na ngonyan sa laog nin tolong taon. Minsan ngani masakit an buhay sa bilanggoan, minsan paano nakatagal ako.

“Pakapuli sa harong hale sa bilanggoan, naghagad ako nin kapatawadan sa sakong pamilya para sa nakaaging mga sala. Maboot nindang inako liwat ako, alagad sa giraray, sinutsutan ako nin mga katood na bumuelta sa sakong dating pamumuhay.

“Sa katapustapusi, irinekomendar kan sakong lola sa sarong lokal na pastor na umatender ako sa sarong eskuelahan sa Biblia. Uminoyon an pastor. Minsan siring, bago ako magpoon sa pag-atender, nagsabi an sakong inaon, na saro sa Mga Saksi ni Jehova, na kun talagang gusto kong makanood sa Biblia, maninigo akong makipag-adal sa mga Saksi.

“Nagduman ako sa Kingdom Hall asin ipinamidbid ako sa sarong lalaki na uminoyon na makipag-adal kan Biblia sa sako. An dakol sa nag-atender mainit na tinaratara ako asin inistimar ako.

“Pakapoon kong mag-adal kan Biblia asin umatender sa Kristianong mga pagtiripon, an paghimuyawot para sa droga nasalidahan nin pagmawot na dumayupot sa Dios. Pakalihis nin sarong taon nag-oswag ako sagkod sa punto nin pagdusay kan sakong buhay ki Jehova Dios, asin sinimbolisaran ko an pagdusay na iyan paagi sa bautismo sa tubig.

“Dai pa sana nahahaloy, mantang naghaharongharong, nanompongan ko an saro sa sakong dating kairiba sa pagdodroga. Dai nia masabotan an pambihirang pagbago ko. Binuksan kaini an pinto para sa sarong pagpatotoo, asin nakaolay ko sia manongod sa paglaom sa Kahadean.

“Sa kahurihurihi nanompongan ko an tunay na katuyohan asin kahulogan sa buhay. Sa tabang nin Dios asin kan hatol gikan sa saiyang Tataramon, natatabangan ko na ngonyan an iba na mahale an nakararaot sa moral na bisyo nin pagdodroga.”