Naheling Ko “an Sadangoton” na Magin “Makosog na Nasyon”
ISINAYSAY NI WILLIAM DINGMAN
An taon 1936; an lugar, Salem, Oregon, E.U.A. Nag-aatender ako kaidto sa sarong pagtiripon nin Mga Saksi ni Jehova. Ihinapot: “Saen an dakulang kaburonyogan?” (Kapahayagan 7:9, King James Version) Ako sana an bagohan, kaya gabos sinda itinokdo ako asin sinabi, “Uto sia!”
SA KABANGAAN kan dekada 1930, medyo kakadikit sana sa Mga Saksi ni Jehova an igwa kan paglaom sa Biblia na mabuhay sagkod lamang digdi sa daga sa Paraiso. (Salmo 37:29; Lucas 23:43) An mga bagay dramatikong nabago poon kaidto. Alagad togoti ako na isaysay an mga pangyayari na suminagkod sa pagigin presente ko sa pagtiripon na idto sa Salem, Oregon.
An sakong ama suskritor kan The Golden Age, an mas naenot na ngaran kan magasin na Awake! Kan ako tin-edyer pa, naogma akong basahon iyan, asin nakombensir ako na igwa iyan nin mahalagang katotoohan sa Biblia. Kaya sarong aldaw ipinadara ko an sarong kupon na maheheling sa likod kan Golden Age. Nag-alok iyan sa parabasa nin 20 pulyeto, sarong libro, asin kan ngaran kan pinakaharaning kongregasyon kan Mga Saksi ni Jehova. Pakaresibi ko kan literatura, nagharongharong ako asin ikinapasakamot ko an gabos na pulyeto saka an libro.
Kaidto mayo nin siisay man na nakipag-adal sa sako sa Biblia. An totoo, dai pa ako noarin man nakapakipag-olay sa saro sa Mga Saksi ni Jehova. Alagad ngonyan, kapot an adres kan pinakaharaning Kingdom Hall, nagmaneho ako nin mga 40 kilometros pasiring sa Salem, Oregon, tanganing umatender sa pagtiripon. Duman kaidto, kan 18 anyos pa sana ako, na napili ako bilang “an dakulang kaburonyogan.”
Maski haros mayo ako nin preparasyon para sa ministeryo, nagpoon akong maghulit kaiba kan Kongregasyon nin Salem. Inenkaminar ako na iiba an tolong pundamental na punto sa sakong pagpatotoo. Enot, na si Jehova Dios; ikaduwa, na si Jesu-Cristo iyo an saiyang ninombrahan na Hade; asin ikatolo, na an Kahadean iyo an solamenteng paglaom para sa kinaban. Pinagmaigotan ko na ihiras an mensaheng iyan sa kada pinto.
Makalihis an duwang taon na pakikiasosyar ko sa Mga Saksi ni Jehova sa Salem, nabautismohan ako kan Abril 3, 1938. An mga katood sa Salem naogma na maheling an nagkapira sa samo na kabilang sa “dakulang kaburonyogan” na nabautismohan. Kan Pebrero 1939, nagin akong payunir, o bilog na panahon na ministro. Kan Disyembre kan taon na idto, inako ko an imbitasyon na magbalyo sa Arizona, kun saen igwa nin mas dakulang pangangaipo sa mga parabalangibog kan Kahadean.
Pagpapayunir sa Arizona
An gibohon kan Mga Saksi ni Jehova bago sa Arizona, asin dakol an salang pakasabot mapadapit sa samo, kaya kan an Estados Unidos maglaog sa Guerra Mundial II, nakaeksperyensia kami nin grabeng paglamag. Halimbawa, mantang naglilingkod ako sa Stafford, Arizona, kan 1942, igwa nin huringhuding nin pagsururog tumang sa samo nin sarong grupo nin mga Mormon. An sakong mga kapadis na payunir asin ako nanongod na nag-iistar harani sa harong nin sarong obispong Mormon na iginagalang kami asin nagtaram: “Kun an mga misyonerong Mormon siring kaaktibo kan mga Saksi, may maaabot kutana an Iglesiang Mormon.” Kaya sa simbahan sia nagtaram asin nagsabi: “Nadangog ko na igwa nin huringhuding nin pagsururog tumang sa mga solteritong Saksi. Bueno, nag-iistar ako harani sa mga solteritong iyan, asin kun igwa nin pagsururog, magkakaigwa nin eskopeta sa mismong kudal. An eskopetang iyan gagamiton—pero bakong tumang sa mga Saksi. Gagamiton iyan tumang sa mga nagsusururog. Kaya kun gusto nindong magsururog, aram na nindo kun ano an mangyayari.” An pagsururog nungkang nag-abot.
Durante kan tolong taon ko sa Arizona, inarestar kami asin ilinaog sa bilanggoan nin nagkapirang beses. Makasaro na prineso ako sa laog nin 30 aldaw. Tanganing malabanan an panriribok kan pulisiya sa samong ministeryo, nag-organisar kami kan inapod niamo na garo naglulupad sa rikas na iskuad. An Saksi na namamahala sinabihan kami: “Kun ano an ngaran niato, arog kita kaiyan. Mapoon kita sa alas singko o alas sais nin aga, mawalat nin tract o pulyeto sa kada pinto, dangan dali-dali kitang mahale.” An samong “garo naglulupad sa rikas na iskuad” nalakopan an dakol-dakol na parte kan estado nin Arizona. Minsan siring, hinale iyan sa katapustapusi huli ta an paaging iyan nin paghuhulit dai nagtogot sa samuya na tumao nin tabang sa mga interesado.
Paadalan nin Gilead Asin Espesyal na Paglilingkod
Kan Disyembre 1942, kabilang ako sa nagkapirang payunir sa Arizona na nag-ako nin surat nin imbitasyon sa bagong paadalan para sa mga misyonero na ineestablisar kan Mga Saksi ni Jehova. An paadalan sa kaenot-enote inapod na Kolehio sa Biblia kan Watchtower sa Gilead. Sa huri an ngaran sinalidahan nin Paadalan sa Biblia kan Watchtower sa Gilead. An kampus haros 4,800 kilometros an rayo harani sa siudad nin Itaca sa amihanan na Nueva York.
Pagkatapos nin halipot na pagsongko sa Oregon, kan Enero 1943, an nagkapira sa samong mga payunir binayaan an init kan Desierto nin Arizona sakay nin autong Greyhound. Makalihis an pirang aldaw nag-abot kami sa samong destinasyon asin nanompongan mi an niebe kan tiglipot sa amihanan na Nueva York. An paadalan nagbukas kan Pebrero 1, 1943, kan an presidente kaiyan, si Nathan H. Knorr, magsabi sa saiyang pahayag sa inagurasyon sa sanggatos na estudyante: “BAKONG katuyohan kan kolehiong ini na andamon kamo na magin ordenadong mga ministro. Dati na kamong mga ministro asin aktibo sa ministeryo sa laog na nin mga taon. . . . An kurso sa kolehio para sa esklusibong katuyohan na andamon kamo na magin may orog na kakayahan na mga ministro sa mga teritoryo na dudumanan nindo.”
Mantang limitado an sakong sekular na inadalan, kan enot an pagmate ko garo ako dai bagay sa Gilead. Alagad ta an mga paratokdo nagin marahayon sa sako, asin naogma na akong marhay sa sakong pag-adal. An samong klase naggradwar pakalihis nin limang bulan na sigidong pagpatood. Pagkatapos, an nagkapira sa samo ipinadara sa pankinaban na opisina prinsipal kan Mga Saksi ni Jehova sa Brooklyn, Nueva York, na duman nag-ako kami nin dugang pang pagpatood tanganing andamon kami na maglingkod sa gibohon na nagbibiahe bilang mga paraataman sa sirkito. An sakong enot na destino iyo an Carolina del Norte asin del Sur.
Kan enot na mga aldaw na idto, an paraataman sa sirkito haros daing ontok sa pagbiahe. Minapirme kami nin sarong aldaw sa sarong sadit na kongregasyon o duwang aldaw kun dakula. An kadaklan na kongregasyon kan panahon na idto saradit. Kaya pakatapos nin aldaw na pano nin aktibidad, asin sa parate dai pinatotorog sagkod na haros matanga na huli sa pagbisita asin pagsimbag sa mga hapot, minabangon ako nin alas singko sa sunod na aga tanganing magbiahe pasiring sa sunod na kongregasyon. Naglingkod ako sa gibohon sa sirkito nin mga sarong taon, dangan nagpayunir ako sa halipot na panahon sa Tennessee asin Nueva York.
Pasiring sa Cuba Dangan Pa-Puerto Rico
Kan Mayo 1945, kaibanan nin nagkapira pa, sinugo ako sa sakong enot na destino bilang misyonero sa ibang nasyon, an Cuba! Kan banggi na mag-abot kami sa Havana, an kabisera kan Cuba, nagluwas kami para sa gibohon na pagmamagasin. Nagpirme kami sa Havana sagkod na makakua kami nin harong sa Santa Clara. An samong bulanan na paragastos $25 sana sa kada saro para sa gabos na pangangaipo, kaibanan na an pagkakan asin arkila. Hinaman niamo an mga higdaan asin muebles hale sa materyales na makukua asin ginamit an mga kahon nin mansanas bilang samong mga bugtakan na may mga sulong-sulong.
Kan suminunod na taon idinestino ako sa gibohon sa sirkito. Kaidto an bilog na Cuba sarong sirkito sana. Huling an paraataman sa sirkito na sinundan ko haralaba an tabay asin gustong-gustong maglakaw, an mga tugang na lalaki asin babae talagang kaipuhan na dumalagan tanganing makasabay sa saiya. Minalataw na inisip ninda na arog man ako kaiyan, kaya plinano na ninda an gabos para sa sakong songko. Dai sinda gabos nagruluwas sa ministeryo sa sarong aldaw kundi nagbarangabanga sa mga grupo asin nagbarobalyo sa pag-iba sa sako. Kan enot na aldaw an sarong grupo dinara ako sa sarong harayong teritoryo; kan suminunod na aldaw an saro naman na grupo dinara ako sa saro pang harayong teritoryo, asin padagos. Pagal-pagal ako pagkatapos kan songko, alagad naogma ako. Igwa ako nin mahal na marhay na mga memorya manongod sa kongregasyon na iyan.
Kan 1950 igwa kami nin labi sa 7,000 na parahayag kan Kahadean sa Cuba, haros kapareho kan kabilangan sa Mejico. Kan Hulyo kan taon na idto, nag-atender ako sa Pag-oswag kan Teokrasya na internasyonal na kombension sa Yankee Stadium sa Siudad nin Nueva York. Pagkatapos, inako ko an bagong destino bilang misyonero, an Puerto Rico. Kabilang sa bagong mga misyonero hale sa ika-12 klase nin Gilead si Estelle asin Thelma Weakley, na kaibanan ko sa sakong paglayog pa-Puerto Rico.
Makalihis an walong taon si Estelle asin ako kinasal sa sarong simpleng seremonya sa Bayamón, Puerto Rico, na ginibo sa plataporma sa oras nin intermisyon kan samong pansirkitong asamblea. Kapwa bago asin pagkatapos kan samong kasal, naglingkod ako sa gibohon sa sirkito. Durante kan labing sampulong taon niamo sa Puerto Rico, kami ni Estelle nakaheling nin dakulang mga pag-oswag—poon sa kulang nin 500 na parahayag sagkod sa labing 2,000. Nakatabang kami sa dakol sagkod sa punto nin pagdusay asin bautismo, asin nakikabtang kami sa pag-establisar nin nagkapirang bagong kongregasyon.
Kan Disyembre 1960, si Milton Henschel hale sa pankinaban na opisina prinsipal kan Mga Saksi ni Jehova sa Brooklyn, Nueva York, nagsongko sa Puerto Rico asin nakipag-olay sa mga misyonero. Naghapot sia kun an iba gustong magboluntaryo sa ibang destino. Kabilang kami ni Estelle sa mga nagboluntaryo.
An Samong Istada sa Republika Dominica
An bago niamong destino iyo an Republika Dominica, asin itinalaan niamo an Hunyo 1, 1961, bilang an petsa kan samong pagbalyo. Kan Mayo 30 an diktador sa Republika Dominica, si Rafael Trujillo, inasesinar, asin kinanselar an mga biahe nin eroplano sa nasyon. Pero dai nahaloy ipinagpadagos an mga biahe nin eroplano, asin nakalayog kami pasiring sa Republika Dominica kan Hunyo 1 siring sa nakaplano.
An nasyon nasa grabeng kariribokan kan kami mag-abot, asin medyo dakol an aktibidad militar. Kinahahandalan an sarong rebolusyon, asin rinerekisa kan mga soldados an kada saro sa tinampo. Pinapondo kami sa nagkapirang lugar nin inspeksion, asin sa kada lugar rinerekisa an samong bagahe. An gabos ilinuwas sa samong mga maleta, maski an pinakasadit na mga bagay. Idto an enot na pakaeksperyensia niamo sa Republika Dominica.
Nagpirme kami sa kabisera, an Santo Domingo, nin nagkapirang semana bago magduman sa enot niamong destino sa La Romana. Durante kan diktadura ni Trujillo, sinabi sa publiko na an Mga Saksi ni Jehova mga Komunista asin an pinakamaraot na klase nin mga tawo. Bilang resulta, an mga Saksi pinaglamag nin grabe. Pero, luway-luway na napangganahan niamo an prehuwisyo.
Pakapaghulit sa La Romana sa halipot na panahon, sa giraray kami nagpoon na maglingkod sa gibohon sa sirkito. Dangan, kan 1964, idinestino kami bilang mga misyonero sa siudad nin Santiago. Kan suminunod na taon an Republika Dominica nagkarebolusyon, asin sa giraray an nasyon nasa grabeng karibarawan. Durante kan iriwal na idto ibinalyo kami sa San Francisco de Macoris, sarong banwaan na midbid sa politikal na aktibismo kaiyan. Minsan siring, suelto kaming nakapaghulit na mayo nin olang. Sa ibong kan politikal na kariribokan, nakaorganisar pa ngani kami nin sarong bagong kongregasyon. Sa mga taon na nagsurunod, nakaeksperyensia kami nin dugang pang mga pagbabago nin destino bago kami ibalik sa samong presenteng istada sa Santiago.
Talagang naheling niamo an bendisyon ni Jehova sa gibohon digdi sa Republika Dominica. Kan kami mag-abot kan 1961, mga 600 an Saksi asin 20 an kongregasyon. Ngonyan haros 20,000 na an parahayag na naghuhulit kan maogmang bareta kan Kahadean nin Dios sa labing 300 na kongregasyon. An posibilidad sa dugang pang pag-oswag dakulaon, siring kan pinatutunayan kan nag-atender na 69,908 sa Memorial kan kagadanan ni Cristo kaining 1996. Haros tolo may kabangang doble iyan sa kabilangan kan mga parahayag!
Ngonyan Saro Nang Makosog na Nasyon
Minsan ngani an kamugtakan kan kinaban padagos na nagbabago, an mensahe kan Biblia na ihinuhulit kan Mga Saksi ni Jehova dai naliliwat. (1 Corinto 7:31) Si Jehova Dios pa man giraray, si Cristo Hade pa man giraray, asin an Kahadean orog na naririsa kisa kasuarin pa man na iyo an solamenteng paglaom kan kinaban.
Kadungan kaiyan, may makangangalas na pagliliwat na nangyari sa banwaan ni Jehova poon kan mag-atender ako sa pagtiripon na idto sa Salem, Oregon, mga 60 taon na an nakaagi. An dakulang kaburonyogan, o dakulang kadaklan, tunay na nagin dakula, na labi nang limang milyon an kabilangan. Siring man nanggad iyan sa ihinula ni Jehova manongod sa saiyang banwaan: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.”—Isaias 60:22.
Pakalihis nin haros 60 taon sa bilog na panahon na ministeryo, maogma ako sa pagkaigwa kan kagayagayahan na padagos na maghulit asin magtokdo sa sakong destino bilang misyonero. Sarong marahayon na pribilehio na magkaigwa nin kabtang sa gibohon na iyan asin maheling na “an sadangoton” nagigin “makosog na nasyon”!
[Retrato sa pahina 21]
Kaiba an sakong agom, sa Republika Dominica