Maogmang Pag-ako sa Pagdirehir ni Jehova
ISINAYSAY NI ULYSSES V. GLASS
Idto sarong pambihirang okasyon. May 127 sanang estudyante sa naggradwar na klase, alagad yaon an entusiastikong nag-atender na may kabilangan na 126,387, na hale sa dakol na nasyon. Idto an gradwasyon kan ika-21 klase kan Paadalan sa Biblia kan Watchtower sa Gilead, na ginibo sa Yankee Stadium kan Siudad nin Nueva York kan Hulyo 19, 1953. Taano iyan ta makahulogan na marhay na pangyayari sa sakong buhay? Togoti nindo ako na magtao nin dikit na kasaysayan sa likod.
NAMUNDAG ako sa Vincennes, Indiana, E.U.A., kan Pebrero 17, 1912, mga duwang taon bago mamundag an Mesiyanikong Kahadean, na ilinadawan sa Kapahayagan 12:1-5. Kan sinundan na taon pinonan kan sakong mga magurang na pag-adalan an Biblia kaiba an mga tomo kan Studies in the Scriptures. Kada Domingong aga, binabasahan ni Tatay an pamilya hale sa saro sa mga librong iyan, dangan pinag-oolayan mi iyan.
Ginamit ni Nanay an nanonodan nia na makatabang sa pagporma kan kaisipan kan saiyang mga aki. Marahayon siang tawo—maboot na marhay, andam na marhay na tumabang. Apat kaming nagin aki, alagad an pagkamoot ni Nanay nakaabot sa iba pang mga aki sa pagtaraed. Nagtatao sia nin panahon na makaibaiba kami. Naogma sia na estoryahan kami nin mga estorya sa Biblia asin umawit kaiba mi.
Inimbitaran man nia sa samong harong an laen-laen na naglilingkod nin bilog na panahon sa ministeryo. Sinda nagdagos sa samo nin saro o duwa sanang aldaw, na sa parate nagkokondukta nin mga pagtiripon asin nagtatao nin mga pahayag sa samong harong. Espesyalmenteng nagustohan mi an mga naggamit nin mga ilustrasyon asin nag-eestorya sa samo. Sarong beses kan 1919, mga sarong taon pagkatapos kan enot na guerra mundial, an nagsosongkong tugang na lalaki ipinanongod an saiyang mga komento espesyalmente sa samong mga aki. Ipinaliwanag nia an pagkonsagrar—an ngonyan mas tama na inaapod ta na pagdusay—asin tinabangan nia kami na masabotan kun paano kaiyan apektado an samong buhay. Pagtaodtaod kan bangging idto kan ako matorog na, ako namibi sa sakong langitnon na Ama asin sinabi ko sa saiya na gusto kong maglingkod pirme sa saiya.
Minsan siring, pakalihis kan 1922 medyo natahoban an desisyon na iyan nin iba pang intereses sa buhay. Nagpabarobalyo kami nin lugar asin nawaran nin pakipag-asosyar sa sarong kongregasyon kan banwaan ni Jehova. Mayo si Tatay huli sa saiyang trabaho sa perokaril. Iregular an samong pag-adal sa Biblia. Nagkua ako nin mga kurso sa eskuelahan sa katuyohan na magin commercial artist asin nagpaplano ako kaidto na mag-adal sa sarong bantog na unibersidad.
Pagpakarhay sa Sakong Konsentrasyon sa Buhay
Durante kan kabangaan kan mga taon nin 1930, an kinaban nagpoon na naman na pumasiring sa panglobong guerra. Nag-iistar kami kaidto sa Cleveland, Ohio, kan an saro sa Mga Saksi ni Jehova magsongko sa samo. Pinonan ming isipon nin mas seryoso an manongod sa samong nanodan kaidtong kami mga aki pa. An sakong matuang tugang na lalaki, si Russell, nangorognang seryoso an kaisipan, asin sia an enot na nagpabautismo. Ako medyo laen man an personalidad, alagad kan Pebrero 3, 1936, ako nagpabautismo man. Nagdadakula kaidto an sakong pakasabot sa kun ano an kalabot sa pagdusay ki Jehova, asin nakakanood na akong akoon an pagdirehir ni Jehova. Kan taon man sanang idto an duwa kong tugang na babae, si Kathryn asin Gertrude, nagpabautismo man. Kami gabos naglaog sa bilog na panahon na paglilingkod bilang payunir.
Minsan siring, dai boot sabihon kaiyan na nungka na kaming nag-isip manongod sa ibang bagay. Nagtirindog an sakong talinga kan estoryahan ako kan sakong kunyada manongod sa sarong magayonon na daraga na an ngaran Ann na “bibong-bibo” poon kan madangog nia an manongod sa katotoohan asin na maatender sa mga pagtiripon sa samong harong. Kan panahon na idto si Ann nagtatrabaho bilang sekretarya sa sarong opisina legal, asin mayo pang sarong taon sia nagpabautismo. Dai pa ako nin planong mag-agom, alagad risang-risa na si Ann siento porsientong para sa katotoohan. Boot niang lubos na makikabtang sa paglilingkod ki Jehova. Sia an tawo na nungkang nagsasabi, “Kaya ko daw na gibohon iyan?” Imbes, ihahapot nia, “Ano daw an pinakamarahay na paagi na magibo ko iyan?” Asin sia determinado na ipadagos iyan. Naatraer ako kan positibong punto de vista na iyan. Apuera kaiyan, sia magayonon kaidto, asin sagkod ngonyan iyo pa man giraray. Sia an naagom ko, asin dai nahaloy sia nagin kaibaiba ko sa paglilingkod bilang payunir.
Mahalagang Pagsasanay Bilang mga Payunir
Bilang mga payunir nanodan mi an sekreto sa kun paano maninigoan kun kami nagkukulang nin mga kinakaipuhan sagkod kun kami abunda. (Filipos 4:11-13) Sarong aldaw magbabanggi na, asin dai pa kami nagkakakan. Singko sentimos sana an kuarta mi. Nagduman kami sa sarong karnehan, asin naghapot ako, “Puede daw nindo kaming pabakalan nin sa singko sentimos na dakulang longganisa?” Hineling nia kami dangan puminedaso nin apat. Segurado ako na idto labi sa singko sentimos an kantidad, asin nakakakan kami.
Bakong pambihira kaidto an mapaatubang sa grabeng oposisyon mantang ginigibo mi an samong ministeryo. Sa sarong banwaan harani sa Syracusa, Nueva York, nasa tinampo kami na nagwawaras nin mga handbill asin may solog na mga kartel tanganing mag-apod nin atension para sa sarong espesyal na pagtiripon sa publiko. Duwang maskulado an kinaptan ako asin ginamitan nin puersa. An saro pulis, alagad dai sia nakauniporme, asin inignoro nia an sakong kahagadan na helingon an saiyang tsapa. Kaidto man uminabot si Grant Suiter na taga Bethel sa Brooklyn asin nagsabi na maduman kami sa presinto tanganing husayon an mga bagay. Dangan inapodan nia sa telepono an opisina kan Sosyedad sa Brooklyn, asin kami mag-agom ininstruksionan na lumuwas giraray kan aldaw man sanang idto na may mga kartel asin handbill tanganing magtao nin basehan para sa kaso na an resulta magseserbing arogan. Siring sa linalaoman, kami inarestar. Minsan siring, kan sabihon mi sa mga pulis na sinda idedemanda huli sa ilegal na pag-arestar, binutasan ninda kami.
Kan sunod na aldaw sarong grupo nin mariribok na tinedyer an linaog an lugar kan samong asamblea sa sutsut nin sarong padi, asin mayong maheling na mga pulis. An mga butangero pinukpok nin bat sa beisbol an salog na kahoy, itinuldang sa mga bleacher an nagkapirang nagdadangog, asin nagsarakat sa plataporma, na duman iinitaas ninda an sarong bandera kan Amerika asin nagkurahaw, “Saludohi nindo! Saludohi nindo!” Dangan pinonan nindang kantahon an “Beer Barrel Polka.” Biyo nindang napapondo an pagtiripon. Naeksperyensiahan mi mismo an boot sabihon ni Jesus kan sabihon nia: “Huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo.”—Juan 15:19.
An totoo, an pahayag-publiko rekording sa plaka nin sarong diskurso ni J. F. Rutherford, an presidente kaidto kan Watch Tower Society. Nagpirang aldaw kami ni Ann sa banwaan na idto asin nagsongko sa mga tawo tanganing alokon sinda kan oportunidad na madangog an pahayag sa saindang harong. May pirang nag-ako kan alok na iyan.
Pagboluntaryong Maglingkod sa Ibang Nasyon
Pag-abot nin panahon, nabuksan an bagong mga paagi nin paglilingkod. An tugang kong lalaki, si Russell, asin an saiyang agom, si Dorothy, inimbitaran bilang mag-agom na umatender sa enot na klase kan Paadalan nin Gilead, kan 1943, dangan isinugo bilang misyonero sa Cuba. An tugang kong babae na si Kathryn nasa ikaapat na klase. Sia idinestino man sa Cuba. Kan huri idinestino naman sia sa Republika Dominikana asin dangan sa Puerto Rico. Kumusta man kami ni Ann?
Kan mabaretaan mi an manongod sa Paadalan nin Gilead asin an bagay na an Sosyedad boot na magsugo nin mga misyonero sa ibang nasyon, an nagin saboot mi gusto ming ipresentar an samong sadiri para sa paglilingkod sa ibang nasyon. Sa primero, inisip mi na magsadiring magduman, puedeng sa Mejico. Alagad ta nagdesisyon kami na posibleng mas marahay na maghalat asin pabayaan na an Sosyedad an magdestino sa samo pakatapos ming makaatender sa Paadalan nin Gilead. Narealisar mi na ini an areglo na ginagamit ni Jehova.
Inimbitaran kami sa ikaapat na klase kan Paadalan nin Gilead. Alagad kan madali nang magpoon an klase, si N. H. Knorr, an presidente kaidto kan Watch Tower Society, mas nakaaram sa mga limitasyon ni Ann huli sa polio kan sia aki pa. Kinaolay nia ako manongod dian asin nagdesisyon sia na bakong madonong na isugo kami na maglingkod sa ibang nasyon.
Pakalihis nin mga duwang taon, kan ako nagtatrabaho bago an kombension, naheling giraray ako ni Tugang na Knorr asin naghapot sia kun baga interesado pa kami na umatender sa Gilead. Sinabi nia sa sako na dai kami idedestino sa ibang nasyon; may iba siang nasa isip. Kaya sa rehistrasyon kan ikasiyam na klase kan Pebrero 26, 1947, kaiba kami sa mga estudyante.
Nungka na malilingawan mi an mga aldaw na idto sa Gilead. An mga kurso nagsosopay sa espirituwal. Nagkaigwa kami nin mga katood na nagpadagos sagkod na kami nabubuhay. Alagad labi pa dian an naabot kan sakong pagkaimbuelto sa paadalan.
Sa Washington Asin Gilead
Medyo bago pa kaidto an Paadalan nin Gilead. Kulang pa an aram kan gobyerno kan Estados Unidos manongod sa mga katuyohan kan paadalan, kaya kadakol kan hapot. Boot kan Sosyedad na magkaigwa nin representante sa Washington, D.C. Duman kami isinugo pagpirang bulan pakagradwar mi sa Gilead. Matabang ako sa pagkua nin mga bisa para sa mga iniimbitaran na umatender sa Gilead hale sa ibang nasyon asin sa pagkua nin legal na mga papeles tanganing an mga naggradwar ikasugo sa ibang nasyon para sa pagmimisyonero. May mga opisyal na makatanosan na marhay asin matinabang. An iba kontrang marhay sa mga Saksi. An pira na makosog an politikal na mga punto de vista positibong nagsabi na kita may koneksion sa mga grupo na ibinibilang nindang bakong marahay.
An sarong lalaki na dinumanan ko an opisina marigon an pagtatsar sa sato huli ta dai kita nagsasaludo sa bandera o nakikiguerra. Pakatapos nin haloy-haloy niang pagyamyam manongod dian, sa katapustapusi ako nagsabi: “Gusto kong maaraman nindo, asin aram man talaga nindo, na an Mga Saksi ni Jehova dai nakikiguerra sa siisay man sa kinaban. Dai kami nakikikabtang sa mga aktibidad kan kinaban. Dai kami nakikikabtang sa saindang mga guerra, sa saindang politika. Kami biyong neutral. Dinaog mi na an mga problema na inaatubang nindo; kami may pagkasararo sa samong organisasyon. . . . Ngonyan, ano an gusto nindong gibohon mi? Ano gusto nindong bumalik kami sa saindong paagi asin lingawan mi an samuya?” Mayo na siang nasabi pakatapos kaiyan.
Duwang bilog na aldaw kada semana an itinatagama para sa pagduman sa mga opisina nin gobyerno. Apuera kaiyan, kami naglilingkod bilang espesyal payunir. Kaidto, nangahulogan ini nin paggamit nin 175 oras sa ministeryo sa langtad kada bulan (kan huri iyan ginibong 140 oras), kaya kami parateng nababanggihan na marhay sa paglilingkod. Ogmahon kami. Nagkondukta kami nin dakol na marahay na pag-adal sa bilog na mga pamilya, asin marahay an saindang pag-oswag. Kami ni Ann nagdesisyon na dai mag-aki, alagad kun sa espirituwal, nagkaigwa kami bako sanang nin mga aki kundi pati nin mga makoapo asin makoapo sa tuhod. Kanigoan na kagayagayahan sinda para sa samong puso!
Sa huring kabtang kan 1948, nakaresibi ako nin dugang pang asignasyon. Ipinaliwanag ni Tugang na Knorr na si Tugang na Schroeder, an rehistrador asin saro sa mga instruktor sa Paadalan nin Gilead, magigin sibot sa ibang mahalagang trabaho, kaya hinagad sa sako na magtokdo sa mga klase sa Gilead kun kinakaipuhan. Nahahandal na marhay, nagbalik ako sa Gilead, sa South Lansing, Nueva York, kaiba si Ann kan Disyembre 18. Sa primero, pirang semana sana kami sa Gilead, dangan minabalik kami sa Washington. Minsan siring, pag-abot nin panahon mas dakol na an panahon ko sa Gilead kisa Washington.
Durante kan panahon na ini, arog kan nasambitan ko kasubago, na naggradwar an ika-21 klase kan Gilead sa Yankee Stadium sa Nueva York. Kaya bilang saro sa mga instruktor, nagkapribilehio akong magkaigwa nin kabtang sa programang iyan sa gradwasyon.
Paglilingkod sa Pambilog na Kinaban na Opisina Prinsipal
Kan Pebrero 12, 1955, saro pang asignasyon nin paglilingkod an nagpoon para sa samo. Kami nagin miembro kan pamilyang Bethel sa pambilog na kinaban na opisina prinsipal kan naheheling na organisasyon ni Jehova. Alagad ano an kalabot dian? Sa pundamental, an pagigin andam na gibohon an ano man na iinasignar sa samo, pakikikabtang sa mga proyekto na nagkaipo nin pagkooperar sa iba. Siempre, nagibo mi na iyan kaidto, alagad ngonyan kami magigin kabtang nin sarong mas dakulang grupo—an pamilyang Bethel sa opisina prinsipal. Maogma niamong inako an bagong asignasyon na ini bilang ebidensia kan pagdirehir ni Jehova.
An dakulang kabtang kan sakong gibohon may labot sa mga bagay may koneksion sa media. Huli sa pagmawot nin nakabibiglang mga estorya asin huli sa pakakua nin impormasyon sa prehuwisyadong mga gikanan, an prensa may mga isinurat na mapagduhagi manongod sa Mga Saksi ni Jehova. Hiningoa mi na pakarhayon an situwasyon na iyan.
Boot na seguradohon ni Tugang na Knorr na kami gabos dakol an gigibohon, kaya igwa man nin iba pang mga asignasyon. Nagamit sa nagkapira kaini an sakong pagsasanay bilang commercial artist. Kalabot sa iba pa an istasyon nin radyo kan Sosyedad, an WBBR. May trabaho may koneksion sa mga pelikulang ginigibo kan Sosyedad. Siempre, an teokratikong kasaysayan kabtang kan kurso sa Gilead, alagad ngonyan laen-laen na proyekto an pinonan tanganing an dakol pa sa banwaan ni Jehova magin pamilyar sa mga detalye kan kasaysayan na iyan kan teokratikong organisasyon sa presenteng aldaw asin ikapaabot man ini sa publiko. Kalabot sa saro pang kabtang kan pagsasanay sa Gilead an pagpahayag sa publiko, asin kaipuhan na magibo an trabaho na ikatao man sa mga tugang sa kongregasyon an dakol pang pundamental na bagay dapit sa pagpahayag sa publiko. Kaya kadakol kan gigibohon.
Regular Na sa Gilead
Kan 1961, kan nagdadangadang na an pagsasanay sa nagbibiaheng mga paraataman asin mga tawohan sa mga sangang opisina, an Paadalan nin Gilead ibinalyo sa Brooklyn, an lugar kan pangenot na mga opisina kan Watch Tower Society. Balik giraray ako sa klase—ngonyan bako nang kasalihid na instruktor kundi bilang regular na miembro kan mga instruktor. Kanigoan na pribilehio! Ako marigon na kombensido na an Paadalan nin Gilead sarong regalo hale ki Jehova, sarong regalo na nagtaong pakinabang sa saiyang bilog na naheheling na organisasyon.
Sa Brooklyn an mga klase sa Gilead nagkaigwa nin mga oportunidad na mayo kaidto sa mga estudyante sa nakaaging mga klase. Mas dakol an bisitang espiker asin nakakaasosyar na gayo an Namamahalang Grupo saka nakakaibaibang marhay an pamilyang Bethel sa opisina prinsipal. An mga estudyante puede man na mag-ako nin pagsasanay sa mga prosedimiento sa opisina, sa mga pagpunsionar kan erokan na Bethel, asin sa laen-laen na kabtang kan trabaho sa pabrika.
Sa nag-aging mga taon laen-laen an kabilangan kan mga estudyante, asin iyo man an kabilangan kan mga instruktor. Nagkapirang beses man na nagliwat an lugar kan paadalan. Ngonyan iyan yaon sa magayon na mga kamugtakan sa palibot sa Patterson, Nueva York.
Pakipagtabangan sa mga Estudyante
Kanigoan na kagayagayahan an magtokdo sa mga klaseng ini! Uya an mga hoben na dai interesado sa pagtrabaho sa daan na palakaw. Binayaan ninda an saindang pamilya, an saindang mga katood, an saindang harong, asin an mga tawo na kalenguahe ninda. An klima, an kakanon—an gabos magigin laen. Dai ngani ninda aram kun anong nasyon an dudumanan ninda, alagad an saindang pasohan magin misyonero. Dai mo na kaipuhan na motibaron an siring na mga tawo.
Kun ako minalaog sa klase, katuyohan ko pirme na pamugtakon an boot kan mga estudyante. Mayo nin nakakanood na marhay kun sia dai mapamugtak asin nahahadit. Totoo, ako an instruktor, alagad aram ko kun paano an magin estudyante. Nagtukaw ako sa mga tukawan na iyan kaidto. Siempre, sinda mahigos na nag-aadal asin dakol an nanonodan ninda sa Gilead, alagad gusto ko man na magin maogma sinda.
Aram ko na pagduman ninda sa saindang destino, may mga bagay na kaipuhan ninda tanganing magin mapanggana. Kaipuhan ninda an makosog na pagtubod. Kaipuhan ninda an kapakumbabaan—dakol kaiyan. Kaipuhan nindang manodan na makibagay sa ibang tawo, akoon an mga situwasyon, sueltong magpatawad. Kaipuhan ninda na padagos na kultibaron an mga bunga kan espiritu. Kaipuhan man nindang kamotan an mga tawo asin kamotan an trabaho na pinagsugoan sa sainda. Iyan an mga bagay na pirme kong hiningoa na idoon sa mga estudyante mantang sinda nasa Gilead.
Dai ko talaga aram kun pira nang estudyante an natokdoan ko. Alagad aram ko an pagmate ko manongod sa sainda. Pakalihis nin limang bulan kaiba ninda sa laog kan klase, dai puedeng dai sinda mapamahal sa sako. Dangan kun minamasdan ko sinda na naglalakaw sa plataporma asin inaako an saindang diploma sa aldaw nin gradwasyon, aram ko na mapanggana nindang natapos an kurso asin dai mahahaloy sinda mahale. Garo man sana may minahale sa pamilya ko. Paanong dai mo mamomotan an mga tawo na andam na itao an saindang panahon asin kosog para sa iba asin gibohon an gigibohon kan mga hoben na ini?
Pakalihis nin dakol na taon, kun sinda minabalik tanganing sumongko, nadadangog ko sinda na nag-eestorya kan saindang mga kagayagayahan sa paglilingkod, asin aram ko na sinda yaon pa sa saindang mga asignasyon, na ginigibo an itinokdo sa sainda na gibohon. Ano an pagmate ko huli kaiyan? Sabi ko sa saindo, iyan marahayon na pagmate.
Pagtanaw sa Ngapit
Marumarom na an sakong mga mata ngonyan, asin naeeksperyensiahan ko an mga pagkadesganar na epekto kaini. Dai na ako nakakapagtokdo sa klase kan Gilead. Sa primero, masakit na pagliliwat iyan, alagad sa bilog na buhay ko nakanood akong akoon an mga situwasyon asin tioson iyan. Parate kong iniisip si apostol Pablo asin an saiyang “tonok sa laman.” Si Pablo tolong beses na namibi na logod maomayan sa kamatean na iyan, alagad an Kagurangnan nagsabi sa saiya: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.” (2 Corinto 12:7-10) Padagos na tinios iyan ni Pablo. Kun nakaya nia iyan, dapat hingoahon ko man. Minsan ngani dai na ako nagtotokdo sa klase, nagpapasalamat ako na naheheling ko pang minaagi kada aldaw an mga estudyante. Kun minsan nakakaolay ko sinda, asin ikinagagayagaya kan sakong puso an paghorophorop sa marahay na espiritu na saindang ipinaheheling.
Marahayon na horophoropon an natatagama sa ngapit. Itinotogdok na ngonyan an pundasyon. An Gilead nagkaigwa nin risang-risang kabtang dian. Pakalihis kan dakulang kahorasaan, kun buksan na an mga balumbon na sinambit sa Kapahayagan 20:12, magkakaigwa nin sangribong taon nin dugang pang maatom na edukasyon sa mga dalan ni Jehova. (Isaias 11:9) Alagad maski iyan bako pang an katapusan. Iyan talagang kapinonan sana. Sa bilog na panahon na daing sagkod, dakol pa an manonodan manongod ki Jehova asin dakol pa an gigibohon mantang naheheling niato na nahahayag an saiyang mga katuyohan. Ako lubos na kompiado na ootobon ni Jehova an gabos na marahayon na ipinanuga nia, asin boot ko na yaon ako duman tanganing makikabtang sa pag-ako kan mga pagdirehir ni Jehova sa sato sa panahon na iyan.
[Retrato sa pahina 26]
Gradwasyon sa Gilead sa Yankee Stadium sa Nueva York kan 1953
[Retrato sa pahina 26]
Si Gertrude, ako, si Kathryn, asin si Russell
[Retrato sa pahina 26]
Pagtrabaho kaiba ni N. H. Knorr (nasa porong wala) asin M. G. Henschel sa pag-organisar nin kombension
[Retrato sa pahina 26]
Sa istudyo sa pagbrodkast na WBBR
[Retrato sa pahina 29]
Sa laog kan klase sa Gilead
[Retrato sa pahina 31]
Kaiba si Ann, dai pang gayo nahahaloy