Paadalan nin Gilead—50 Anyos Na Asin Nag-aasenso Pa!

“KADAKOL kan lugar na an pagpatotoo manongod sa Kahadean dai pang gayo ikinatatao,” an sabi ni N. H. Knorr sa enot na klase nin Gilead kan Pebrero 1, 1943, an enot na aldaw kan paadalan. Idinugang nia: “Seguradong ginatos asin rinibo pa an maaabot kun mas dakol an trabahador sa langtad. Paagi sa dai na kutana maninigong kabootan kan Kagurangnan, magkakaigwa nin mas dakol pa.”

Asin nagkaigwa nanggad nin mas dakol pang trabahador​—minilyon pa! An mga parahayag kan Kahadean nagdakol poon sa 129,070 sa 54 kadagaan kan 1943 sagkod sa 4,472,787 sa 229 kadagaan kan 1992! An Paadalan nin Gilead nakakontribuwir nin dakula sa pagpatotoong ibinunga kan pagdakol na iyan. Pakalihis nin 50 anyos iyan padagos na nangengenot sa pagtotokdo sa mga trabahador na misyonero na maglingkod kun saen sinda kaipuhan sa langtad kan kinaban.

Kan Marso 7, 1993, 4,798 imbitadong bisita asin miembro kan pamilyang Bethel sa E.U. an nagtiripon sa Jersey City Assembly Hall, sa New Jersey, para sa graduwasyon kan ika-94 klase. Ining espesyal nanggad na okasyon nagtao man nin oportunidad na salingoyon an 50 anyos kan Paadalan nin Gilead. Boot daw nindong maaraman nin kadikit an programa?

Pakatapos kan pambukas na awit, si George D. Gangas kan Namamahalang Grupo nagdolot nin odok sa boot na pamibi. Dangan, pakatapos kan introduksion kan tsirman, si Carey W. Barber, an mga magraduwar​—asin an gabos na nag-atender—​maingat na naghinanyog sa sunod-sunod na haralipot na pahayag.

An enot na nagtaram si Robert W. Wallen, sa temang “Dai Ka Noarin Man Nagsosolosolo.” Sa makikatood na boses, sia nagsabi: ‘Sa maarabot na aldaw, may malataw na mga panahon sa saindong buhay na an pagmate nindo solo-solo na sana kamo, harayoon sa pamilya asin mga katood.’ Kun siring, paano niato masasabi na, “Dai ka noarin man nagsosolosolo?” Ipinaliwanag nia: ‘Huli ta bukas sa kada saro sa saindo an posibilidad nin tolos-tolos na pakikomunikar ki Jehova Dios.’ Sinadol nia an mga magraduwar na kamotan an pribilehiyo nin pamimibi asin gamiton iyan aroaldaw. Dangan, kapareho ni Jesus, masasabi ninda, “Dai ako nagsosolosolo.” (Juan 16:32) Nakapakokosog nanggad sa mga magraduwar an mga tataramon na iyan!

Sa pagpaliwanag kan temang “Marigon na Pangaptan an Saindong Paglaom” (na basado sa teksto kan aldaw kan Marso 7), Si Lyman A. Swingle kan Namamahalang Grupo sumunod na nagpahayag manongod sa pangangaipo nin duwang kuwalidad​—pakatagal asin paglaom. ‘An pag-olog-olog, pagkaanggot, pagkaongis, pagkabilanggo, pati kagadanan, mga dahelan kun taano ta kaipuhan kan mga Kristiano an pakatagal,’ an sabi nia. ‘Mayo nin limite sa kosog na orog kisa normal na makukua nin maimbod na mga Saksi ni Jehova sa mga panahon nin pangangaipo. Ini tunay na nakapakokosog sa boot, nangorogna para sa saindong mga magraduwar.’ Kumusta man an paglaom? ‘An paglaom dai puwedeng mawara,’ an paliwanag nia. ‘Kun paanong an takop sa payo nagpoprotehir sa payo kan nagsusulot, an paglaom man sa kaligtasan nagbabantay asin nagpoprotehir sa isip kan Kristiano, na nagpapangyari sa saiya na mapagdanay an integridad.’​—1 Tesalonica 5:8.

An sumunod na espiker, si Ralph E. Walls, puminili nin kawiliwiling tema, “Paano daw Kita Makadudulag Pasiring sa Katiwasayan nin Sarong ‘Mahiwas na Lugar’?” Ano ining “mahiwas na lugar”? (Salmo 18:19) “Ligtas na kamugtakan na nagtatao nin katoninongan sa isip asin katiwasayan sa puso,” an paliwanag kan espiker. Sa ano kita kaipuhan na iligtas? ‘Sa saimong sadiri​—sa saimong mga pagkukulang.’ Idinugang nia: ‘Siring man sa panluwas na mga kamugtakan na ginagatongan ni Satanas.’ (Salmo 118:5) Paano daw kita makadudulag pasiring sa katiwasayan nin sarong mahiwas na lugar? ‘Paagi sa paghanap sa mga kapagbootan ni Jehova sa gabos niatong ginigibo asin paagi sa pag-arang ki Jehova na may pagtubod dapit sa gabos niatong pinaghahaditan.’

“Ano an Natatagama sa Ngapit?” an temang pinili ni Don A. Adams. Asin ano man nanggad an natatagama sa ngapit para sa bagong mga misyonero? Panahon nin pag-adaptar, an paliwanag nia. “Dakol man na bendisyon an natatagama sa saindo.” Bilang halimbawa, inestorya nia an duwang bagong misyonero na kan makapuwesto na sa saindang destino nagsurat: “Isipon mo an pinakamaogma mong aldaw sa paglilingkod, asin arog kaiyan an kada aldaw. Perming kulang an dara ming literatura, asin daing ontok an paghagad nin mga tawo na adalan mi sinda.” Nagtao nin komento an espiker para sa pamilya asin mga katood kan mga magraduwar: ‘Dai kamo kaipuhan na mahadit manongod sa mga magraduwar na ini. Matatabangan nindo sinda paagi sa pagsurat sa sainda nin mga pagpakosog.’​—Talinhaga 25:25.

An sumunod na nagtaram iyo an mga instruktor sa paadalan. Pinili ni Jack D. Redford an temang “Dai Kamo Maglaom nin Ano Man sa Siisay Man.” An saro sa mga angat na aatubangon kan mga magraduwar iyo an pakikiiba sa mga tawo, an paliwanag nia. Ano daw an makatatabang? “Palihison an saindang mga sala. Dai maglaom nin sobra sa ibang tawo. Dai nindo perming laoman an bilog na sokol kan pinaghohona nindong dapat sanang itao saindo. Tawan nin lugar an pagkabakong sangkap nin ibang tawo, asin an kabootan na ini makatatabang saindo na magkaoyon. An abilidad nindo na makaoyon nin ibang tawo magigin sokol kan saindong pagkamaygurang.” (Talinhaga 17:9) Tunay na makatatabang sa mga magraduwar an madonong na sadol na ini na makaadaptar sa pagigin misyonero sa ibang nasyon!

“Igwa kami kan kayamanan na ini sa mga lalagan na laboy,” sabi kan 2 Corinto 4:7. Si Ulysses V. Glass, an rehistrador kan Paadalan nin Gilead, nagkomento sa tekstong ini mantang ipinaliliwanag nia an temang “Magsarig sa Saindong Probado Na, Maimbod na mga Tugang.” Ano an “mga lalagan na laboy”? “Ini siertong napapanongod sa sato bilang mga tawong bakong sangkap,” an sabi nia. Ano an “kayamanan”? “Iyan an satong Kristianong ministeryo,” an paliwanag nia. (2 Corinto 4:1) Asin ano an maninigong gibohon sa kayamanan na ini? “An kayamanan na ipinaniwala sa sato ni Jehova dai dapat na tagoon. Kaya, kamong namomotan na magigin mga misyonero, iwaras nindo an kayamanan na iyan saen man kamo magduman, asin tokdoan nindo an dakol pa kun paano iyan iwawaras.”

Nagin sentimental na okasyon idto kan si Albert D. Schroeder na an magtaram, ta sia an rehistrador kan Paadalan nin Gilead kan iyan pumoon. An tema nia “Kabangang Siglo nin Teokratikong Pagtotokdo.” “Aram ni Jehova kun paano matao nin epektibong pagtotokdo, asin ini ginibo nia,” sabi nia. Paano? Sinambit ni Tugang na Schroeder an pagtotokdong inako paagi sa duwang paadalan na inestablisar kaidtong 50 anyos na an nakaagi​—an Teokratikong Paadalan sa Pagmiministro asin an Paadalan nin Gilead. Idinoon nia na an nagin mahalagang instrumento sa pagtao nin tamang kaaraman iyo an New World Translation. Sinierto nia sa mga magraduwar: “Makaduduman kamo sa saindong mga destino sa ibang nasyon na may dakulang kompiansa na susustentohan kamo nin igo kan Sosyedad nin tamang kaaraman sa mga katuyohan ni Jehova.”

Si Milton G. Henschel, an presidente kan Watch Tower Bible and Tract Society of Pennsylvania, nagpahayag sa temang “Bako Sanang mga Ganador.” Kinua ni Tugang na Henschel an saiyang tema sa teksto kan taon 1943: “Bako sanang mga ganador paagi sa saiya na namoot sa sato.” (Roma 8:​37, King James Version) Idto angay na teksto kan taon, an paliwanag nia, huli ta sa tahaw kan Guerra Mundial II, an mga tugang niato sa dakol na nasyon nag-aagi sa grabeng paglamag. Binasa ni Tugang na Henschel an pirang kabtang kan luwas kan Watchtower na nagpaliwanag sa tekstong iyan kan taon dangan ipinaliwanag: “An artikulong ini sa Watchtower [Enero 15, 1943] pinag-adalan kan bulan nin Pebrero kan enot na klase nin Gilead, asin inandam sinda kaiyan para sa maabot.” An dakol sa mga naggraduwar sa nakaaging 50 taon pinatunayan nang sinda mga ganador, an paliwanag nia. Kumusta man an ika-94 klase? “Magdanay kamong dayupot ki Jehova, magdanay kamong dayupot sa saiyang pagkamoot, asin segurado an saindong kapangganahan.”

Pakatapos kan mga pahayag kan aga, ipinaabot kan tsirman an pirang pataratara hale sa laen-laen na nasyon. Dangan uminabot na an oras na pinakahahalathalat kan 24 kapag-agom​—an pagtao nin mga diploma. Tara, an mga estudyante sa Gilead ngonyan opisyal nang mga graduwado sa Gilead! Hale sinda sa 5 nasyon, pero an destino ninda dadarahon sinda sa 17 nasyon, kaiba an Hong Kong, Taiwan, Mozambique, asin mga parte nin Sirangan na Europa.

Pakalihis nin intermisyon, nagpoon na an programa sa hapon paagi sa pinahalipot na Pag-adal sa Torrengbantayan, na pinangenotan ni Robert L. Butler. Dangan ipinasale ninda an pira sa pambihira nindang eksperyensia mantang naghuhulit harani sa Wallkill, Nueva York. Ipinarisa kan programa an saro sa mga bagay na siertong nagdara sa sainda sa Gilead​—an hararom nindang pagkamoot sa ministeryo sa langtad.

Pakatapos kan programa kan mga estudyante, dakol sa mga presente an nag-iisip-isip kun baga may itatampok na espesyal an programa sa pagselebrar kan pag-50 anyos kan Paadalan nin Gilead. Dai sinda nabigo!​—Helingon an kaibang kahon, “Pagrepaso sa 50 Anyos kan Paadalan nin Gilead.”

Kaidtong singkuwenta anyos na an nakaagi, ipinaheling ni Tugang na Knorr na sia tawong may pagtubod asin pananaw sa ngapit. An marigon niang pagtubod na an Paadalan nin Gilead magigin mapanggana ipinahayag sa pambukas niang diskurso sa enot na klase, kan sia magsabi: “Nagtutubod kita na, totoo sa ngaran kaiyan, maluwas an sarong ‘tompok na patotoo’ hale digdi pasiring sa gabos na parte kan kinaban asin na an siring na patotoo magigin monumento sa ikamumuraway nin Dios na nungkang magagaba. Kamo bilang ordenadong mga ministro lubos na masarig sa Kaharohalangkawe, sa pakaaram na kamo saiyang gigiyahan asin totokdoan sa gabos na panahon nin pangangaipo, asin maaaraman man nindo na sia man an Dios nin bendisyon.”a

Pakalihis nin singkuwenta anyos, nag-aasenso pa an Paadalan nin Gilead! An mga graduwado sa ika-94 klase ngonyan may pribilehiyo na sundan an labing 6,500 na graduwadong naenot sa sainda. Logod lubos sindang manarig sa Kaharohalangkawe mantang ginigibo ninda an saindang kabtang sa pagtambak nin sarong “tompok na patotoo” na magigin monumento sa ikamumuraway ni Jehova Dios.

[Nota sa Ibaba]

[Kahon sa pahina 25]

Estadistika kan Klase

Total na bilang nin estudyante: 48

Bilang nin nasyon na representado: 5

Bilang nin nasyon na nadestinohan: 17

Promedyong edad: 32

Promedyong mga taon sa katotoohan: 15.3

Promedyong mga taon sa bilog na panahon na ministeryo: 9.6

[Kahon sa pahina 25, 26]

PAGREPASO SA 50 ANYOS KAN PAADALAN NIN GILEAD

Ano an mas marahay pang paagi na repasohon an historya kan Gilead kisa paagi sa mga eksperyensia kan mga nakaagi dian​—an enot na mga naggraduwar, an mga instruktor, asin an iba pa na nagtabang sa pag-organisar kaiyan? Naogmang marhay an mga presente sa pagdangog ninda sa kabtang na “Pagrepaso sa 50 Anyos kan Paadalan nin Gilead,” na pinangenotan ni Theodore Jaracz.

Ano an mga kamugtakan na nagbunga kan pagkaestablisar kan paadalan? Ipinaliwanag ni Tugang na Schroeder na sia asin an duwa pang instruktor tinawan sana nin apat na bulan sa pag-organisar kan paadalan. “Pero pag-abot nin Lunes, Pebrero 1, 1943, andam na kami para sa dedikasyon.”

Kumusta an enot na mga misyonerong isinugo? An paggirumdom ni Tugang na Henschel: “Ipinaimpake mi sa darakulang kahon na kahoy sa departamento kan Sosyedad sa pagpaktora an gabos na rogaring na gusto nindang darahon. Pag-abot kan mga kahon, iyan maingat nindang binubukasan asin ilinuluwas an saindang mga gamit. Pero ginagamit ninda an mga kahon sa paggibo nin muwebles.” Sa huri, sabi nia, an Sosyedad nag-areglo nin simpleng mga harong sa misyonero.

Sumunod sa programa, an ibang naggraduwar sa enot na mga klase kan Gilead na ngonyan mga miembro na kan pamilyang Bethel sa E.U. isinaysay an saindang mga nagigirumdoman, an saindang mga saboot, asin an saindang mga inagihan. An mga komento ninda tunay na nakapahiro sa puso kan gabos na yaon.

“Pagkaresibi ko kan imbitasyon na umatender sa enot na klase, naaraman ko na may kanser an sakong ina. Pero huling sia nagpayunir poon sa edad na 16, makosog nia akong sinadol na akoon an imbitasyon. Kaya mantang magkakatumang an nasa boot asin may pagsarig ki Jehova, nagbiyahe ako pasiring sa South Lansing. Biyo akong naogma asin naapresyar kong marhay an pagtotokdo sa Gilead. Tinapos kan sakong ina an saiyang daganon na buhay dai nahaloy pakagraduwar ko.”​—Charlotte Schroeder, naglingkod sa Mejico asin El Salvador.

“Mantang inaataman na ako ni Jehova sa kabtang kan daga na namumugtakan ko, inisip ko na saen man ako magduman daga pa man nia giraray iyan, asin aatamanon nia ako. Kaya naogma akong akoon an imbitasyon sa enot na klase.”​—Julia Wildman, naglingkod sa Mejico asin El Salvador.

“Idto maogmahon! Nakakaolay mi an tawo sa kada pinto. Kan enot na bulan, nakawaras ako nin 107 libro asin 19 an inadalan ko sa Biblia. Kan ikaduwang bulan 28 na an inaadalan ko sa Biblia. Siyempre, may nagkapirang bagay na kaipuhan ming pagtodan​—init, hanglas, mga insekto. Pero makangangalas idtong pribilehiyo na makaduman. Iyan bagay na permi kong papadangaton.”​—Mary Adams, ikaduwang klase, dapit sa destino nia sa Cuba.

“An panahon saro sa dakulang mga kaolangan na kinaipuhan na atubangon mi sa Alaska. Sa amihanan malipoton na marhay, na an temperatura minababa sagkod sa 60 grado an kababaan sa sero Fahrenheit asin mas malipot pa. “An mga baryo nin Indian asin saradit na puwerang lugar sa timog-sirangan nin Alaska naaabot magsalang paagi sa baroto o eroplano.”​—John Errichetti, ikatolong klase.

“Para sa sako an Gilead imbitasyon hale ki Jehova paagi sa saiyang daganon na organisasyon tanganing pakosogon kita sa espirituwal asin itokdo sato an makangangalas na dalan nin buhay.”​—Mildred Barr, ika-11 klase, naglingkod sa Irlandia.

Suminunod pa an kawiliwiling mga interbio​—ki Lucille Henschel (ika-14 klase, naglingkod sa Venezuela), Margareta Klein (ika-20 klase, naglingkod sa Bolivia), Lucille Coultrup (ika-24 klase, naglingkod sa Peru), Lorraine Wallen (ika-27 klase, naglingkod sa Brazil), William asin Sandra Malenfant (ika-34 klase, naglingkod sa Morocco), Gerrit Lösch (ika-41 klase, naglingkod sa Austria), asin si David Splane (ika-42 na klase, naglingkod sa Senegal).

Kumusta man an mga tugang na naglingkod bilang mga instruktor? Ininterbio man an nagkapira sa sainda​—si Russell Kurzen, Karl Adams, Harold Jackson, Fred Rusk, Harry Peloyan, Jack Redford, asin Ulysses Glass. Ginirumdom ninda an saindang pribilehiyo, na ipinahahayag kun paano sinda kaiyan naaapektaran sagkod sa aldaw na ini.

An makaoogmang patotoo sa pagkaepektibo kan mga misyonerong tinokdoan sa Gilead itinao ni Lloyd Barry, na naglingkod sa Hapon. Kan 1949, kan isugo duman an 15 misyonero, mayo pang 10 an parahayag sa bilog na Hapon. Pero pakalihis nin 44 taon, labi nang 175,000 an mga parabalangibog kan Kahadean sa nasyon na iyan! Dangan isinaysay ni Robert Wallen an pambihirang kapangganahan nin pirang misyonero sa pagtabang sa mga tawo pasiring sa katotoohan, pati an sarong misyonerang tugang na labi nang 45 taon sa Panama asin nakatabang sa 125 katawo sagkod sa pagdusay asin pagpabautismo.

Uminabot an kulminasyon kan bilog na programa kan an gabos na naggraduwar sa Gilead na presente pinasakat sa entablado. Idto tunay na nakapahihirong okasyon. An sunod-sunod na mga tugang na lalaki asin babae​—89 sa pamilyang Bethel apuwera sa bisitang mga graduwado—​naglakaw sa mga agihan pasakat sa entablado. Inibanan sinda kan mga tugang na naglingkod na mga instruktor sa nag-aging mga taon, dangan kan ika-94 klase​—mga 160 gabos!

“Nagin mapanggana daw an trabaho kan Paadalan nin Gilead sa pagtotokdo sa mga misyonero para sa ibang mga nasyon”? an hapot ni Tugang na Jaracz. “An ebidensia kan nakaaging 50 anyos makosogon na iyo!”