Maggayagaya ki Jehova Asin Magin Magayagaya

AN MAPANGGANANG pagtatapos nin ano man na kapakipakinabang na proyekto pirmeng sarong panahon nin paggayagaya. An gradwasyon na ginibo kan Marso 13, 1999, sa Sentro nin Edukasyon kan Watchtower sa Patterson, Nueva York, tunay nanggad na siring kaiyan na okasyon para sa 48 estudyante kan ika-106 na klase kan Paadalan sa Biblia kan Watchtower sa Gilead.

An pambukas na pahayag ni Theodore Jaracz, miembro kan Namamahalang Grupo, gradwado sa ikapitong klase kan Gilead, asin tsirman sa programa kan gradwasyon, itinampok an mga tataramon sa Salmo 32:11: “Maggayagaya ki Jehova asin magin magayagaya, kamong mga matanos.” Ipinaliliwanag kun taano ta angay na an gabos maggayagaya sa okasyon na ini, sia nagsabi: “Dahelan sa nagigibo ni Jehova paagi sa mga tanos an puso, kabale an satong mga estudyante sa Gilead, kaya kita naggagayagaya sa mga okasyon na arog kaini.” Minsan ngani an mga estudyante naggibo nin mga plano na magduman sa Paadalan nin Gilead asin nagmahigos na marhay tanganing makualipikar na maglingkod bilang misyonero, si Jehova an nagpangyari na an gabos na bagay matapos na mapanggana. (Talinhaga 21:5; 27:1) Iyan, idinoon ni Tugang na Jaracz, an dahelan kan ‘paggayagaya ki Jehova.’

Kabilang sa mga nasa auditoryum sa Patterson an mga kapamilya asin bisita kan mga estudyante na hale sa 12 nasyon tanganing helingon an magayagayang okasyon na ini. Mantang inaantisipar kan 5,198 nag-atender—kabale an mga miembro kan pamilyang Bethel sa Brooklyn, Patterson, asin Wallkill, na nakakonektar paagi sa audio asin video—an masunod na programa, risang-risa na nangingibabaw an espiritu nin kagayagayahan.

Sinadol na Papagdanayon an Espiritu nin Kagayagayahan

Mantang tinatapos ni Tugang na Jaracz an saiyang pambukas na pahayag, iinintrodusir nia an enot sa limang espiker, na nag-andam nin nakaparirigon sa boot na sadol hale sa Kasuratan bako sanang para sa mga naggradwar sa Gilead kundi para sa gabos na nag-atender.

Enot na nagtaram si William Malenfant, gradwado sa ika-34 klase kan Gilead, na ngonyan naglilingkod bilang katabang sa Komite sa Pagtotokdo kan Namamahalang Grupo. May koneksion sa saiyang tema na “‘An Gabos’ Bakong Daing Kamanungdanan!” basado sa Eclesiastes 1:2, ibinangon nia an hapot: “Talaga daw na boot sabihon ni Salomon na an gabos, sa absolutong sentido kan termino, daing kamanungdanan?” An simbag: “Dai. Idinodoon nia na an mga ginigibo nin tawo na dai iniintindi an kabotan nin Dios, mga okupasyon na suhay sa kabotan nin Dios—an gabos na bagay na iyan daing kamanungdanan.” Sa kabaliktaran, an pagsamba sa tunay na Dios, si Jehova, bakong daing kamanungdanan; ni an pag-adal kan Tataramon nin Dios, an Biblia, asin pagtokdo kaiyan sa iba. Dai linilingawan nin Dios an siring na mga paghihingoa kan saiyang mga lingkod. (Hebreo 6:10) Sa katunayan, dawa kun may mangyaring kalamidad sa mga nakanompong nin pabor ki Jehova, sinda “tunay na mapapatos sa supot nin buhay ki Jehova.” (1 Samuel 25:29) Abaa kanakaoogmang isipon! An paggirumdom sa mga puntong ini makatatabang sa gabos na nagsasamba ki Jehova na papagdanayon an espiritu nin kagayagayahan.

Si John Barr, miembro kan Namamahalang Grupo, pinarigon an boot kan naggradwar na klase paagi sa saiyang pahayag na “Makanompong nin Dakulang kaogmahan sa Saindong Asignasyon na Pagmimisyonero.” Ipinaheling nia na an paglilingkod bilang misyonero sarong bagay na kaidto pa pirme nang harani sa puso ni Jehova Dios. “Iyan sarong bagay na pundamental nang kabtang kan kapahayagan nin pagkamoot ni Jehova para sa kinaban. Isinugo nia an saiyang Aking bugtong sa dagang ini. Si Jesus an nakalalabi sa gabos na misyonero.” Mantang puedeng pensaron kan mga naggradwar an mga pagliliwat na kinaipuhan na gibohon ni Jesus tanganing magin mapanggana sa saiyang asignasyon digdi sa daga, an mga pakinabang sa paglilingkod ni Jesus bilang misyonero puedeng kamtan sagkod ngonyan kan gabos na nag-aaprobetsar kaiyan. Ini huli ta, siring kan sabi ni Tugang na Barr, ikinaogmang marhay ni Jesus an paggibo kan gibohon nin Dios, asin namotan man nia an mga aki nin katawohan. (Talinhaga 8:30, 31) Sinadol ni Tugang na Barr an mga naggradwar na magdanay sa saindang asignasyon, bako sanang huli sa pagtagal, kundi huli ta sinda naoogmang marhay sa paggibo kaiyan. “Manarig ki Jehova; dai nia pababayaan na kamo mamondo nin makuri,” an pakiolay nia sa klase.—Salmo 55:22.

“Paglakaw sa Ngaran ni Jehova Sagkod Lamang” an tema na pinili kan sunod na espiker, si Lloyd Barry, saro pang miembro kan Namamahalang Grupo. Huling naglingkod bilang misyonero sa laog nin labing 25 taon sa Hapon pakagradwar sa ika-11 klase kan Gilead, isinaysay ni Tugang na Barry an pirang eksperyensia nin naenot na mga misyonero asin an mga kadepisilan na kinaipuhan nindang atubangon. Ano an praktikal na hatol nia sa klase na naggradwar? “Orog sa gabos, papagdanayon an saindong espirituwalidad. Siring man, pag-adalan an lenguahe asin kultura. Papagdanayon an saindong kualidad na magpangisi. Asin magdanay sa gibohon; dai mapagal asin umontok.” Sinabi ni Tugang na Barry sa mga naggradwar na sa mga destino ninda sa ibang nasyon, makanonompong sinda nin dakol na tawo na naglalakaw sa ngaran nin manlaenlaen na dios, asin ipinagirumdom nia sa sainda an mga tataramon ni Miqueas: “An gabos na banwaan, kun para sa sainda, maglalakaw an balang saro sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios sagkod sa daing talaan na panahon, sagkod lamang pa ngani.” (Miqueas 4:5) An halimbawa kan mga dating misyonero siertong sarong mapuersang motibasyon para sa gabos na lingkod nin Dios na padagos na maglakaw sa ngaran ni Jehova asin maglingkod sa saiya nin fiel.

An sunod na may kabtang sa programa iyo an instruktor sa Gilead na si Lawrence Bowen. An tema kan saiyang pahayag nagbangon kan hapot na, “Magigin Ano Kamo?” Ipinaheling nia na an kapangganahan sa paglilingkod sa Dios nakadepende sa pagtubod asin pagtitiwala ki Jehova. An bilog na pagsarig ki Jehova nagresulta sa lubos na kapangganahan ni Hadeng Asa laban sa kaiwal na hukbo na may sarong milyon na tawohan. Pero ipinagirumdom sa saiya ni propeta Azarias an pangangaipo na padagos na magsarig sa Dios: “Si Jehova yaon sa saindo sagkod na kamo nasa saiya.” (2 Cronica 14:9-12; 15:1, 2) Mantang an ngaran nin Dios, na Jehova, nagtatao kan ideya na sia nagigin an ano man na kaipuhan tanganing maotob an saiyang katuyohan—baga man iyan nangangahulogan nin pagigin Paratao, Paraingat, o Parakastigo pa ngani—an mga misyonero na nananarig ki Jehova asin na an ginigibo kaoyon kan saiyang katuyohan magigin mapanggana sa saindang mga asignasyon. (Exodo 3:14) “Dai noarin man paglingawan,” an pagtatapos ni Tugang na Bowen, “na basta ginigibo nindo na saindong katuyohan an katuyohan ni Jehova, pangyayarihon nia na kamo magin an ano man na kaipuhan tanganing maotob an saindong asignasyon.”

An ultimong espiker sa kabtang na ini kan programa iyo si Wallace Liverance, dating misyonero asin iyo ngonyan an rehistrador kan paadalan. An saiyang diskurso, na may temang “Papagdanayon an Tataramon nin Dios na Buhay Asin May Epekto sa Saindo,” nag-apod nin atension sa dai nasusudyang mensahe, o panuga, nin Dios na pirmeng nag-aabante pasiring sa pagkaotob. (Hebreo 4:12) Nakaiimpluwensia iyan sa buhay kan mga tinotogotan iyan na umimpluwensia sa sainda. (1 Tesalonica 2:13) Paano mapagdadanay an tataramon na iyan na magin buhay asin may epekto sa satong buhay? Paagi sa mahigos na pag-adal sa Biblia. Ipinagirumdom ni Tugang na Liverance sa mga naggradwar an mga paagi nin pag-adal sa Biblia na nanodan sa Gilead na kabale an pagbasa asin pagpaliwanag kan kahulogan patin pag-aplikar kan Tataramon nin Dios. Kinotar nia an mga tataramon ni Albert Schroeder, miembro kan Namamahalang Grupo na naglingkod bilang tsirman kan komite na nag-establisar kan Paadalan nin Gilead kaidtong labing 50 taon na an nakaagi: “Paagi sa paggamit kan konteksto, nakukua nin saro an bilog, eksakto, espirituwal na puersa na itinatao nin Dios sa saiyang Tataramon.” An pamamaaging ini sa pag-adal kan Biblia pinapagdadanay an Tataramon nin Dios na buhay asin may epekto.

Magayagayang mga Eksperyensia Asin Interbio

Kasunod kan mga pahayag, an mga presente nakadangog nin nagkapirang magayagayang eksperyensia hale sa mga estudyante. Sa pangengenot ni Mark Noumair, dating misyonero asin sa presente instruktor sa Gilead, isinaysay asin ipinaheling nin sarong grupo nin mga estudyante kun paano sinda nagmaigot na magpatotoo sa laen-laen na situwasyon. An nagkapira nakapoon asin nakapagkondukta nin mga pag-adal sa Biblia sa mga tawo sa teritoryo paagi sa pagigin mapagmasid sa saindang mga kamugtakan asin pananaram patin paagi sa pagpaheling nin personal na interes. Sa siring an mga estudyante ‘pirmeng inaatenderan an sainda man sana asin an saindang pagtotokdo’ patin talagang interesado sa pagtabang sa iba na kamtan an kaligtasan.—1 Timoteo 4:16.

Dakol na praktikal na suhestion an itinao, asin an kagayagayahan sa pagmimisyonero ipinahayag man nin nagkapirang eksperyensiadong tugang na lalaki na nag-aako nin pagsasanay sa paadalan para sa mga miembro nin komite kan sanga na ginigibo sa Sentro nin Edukasyon kan Watchtower. An mga Tugang na si Samuel Herd asin Robert Johnson kan tawohan sa opisina prinsipal pinangenotan an magayagayang mga interbio sa mga representante hale sa mga sangang opisina kan Sosyedad sa Bolivia, Zimbabwe, Nicaragua, Republika nin Aprika Sentral, Republika Dominica, Papua New Guinea, asin Camerun.

Kasunod kan mga eksperyensia asin interbio, si Gerrit Lösch, gradwado sa ika-41 klase kan Gilead asin ngonyan miembro kan Namamahalang Grupo, nagtao kan pangultimong pahayag sa nakapupukaw nin isip na temang “Kamo daw Sarong ‘Kawiliwiling Tawo’?” Enot ipinagirumdom ni Tugang na Lösch sa mga naggradwar na si Jesus, an sangkap na Aki nin Dios, dai ibinilang kan mga tawo na kawiliwili, kundi “sia pinagduhagi asin isinikwal nin mga tawo.” (Isaias 53:3) Kaya bakong makangangalas na ngonyan sa dakol na parte kan kinaban, an mga misyonero ibinibilang na mga tawong hinahaboan, dai puede o dai inaako bilang indibiduwal. Sa ibong na kampi, durante kan halawig na mga taon nin paglilingkod ni Daniel sa Babilonya, paagi sa sarong anghel an Kaglalang tolong beses na inapod si Daniel na “kawiliwiling marhay.” (Daniel 9:23; 10:11, 19) Paano nagin siring si Daniel? Nungka niang ikinompromiso an mga prinsipyo sa Biblia kan nakikibagay sa kultura kan Babilonya; sia onesto sa gabos na paagi, na nungkang ginagamit an saiyang posisyon para sa personal na bentaha; asin sia sarong maigot na estudyante kan Tataramon nin Dios. (Daniel 1:8, 9; 6:4; 9:2) Sia regular man na namibi ki Jehova asin marikas sa pagtao sa Dios kan kamurawayan para sa saiyang mga nagibo. (Daniel 2:20) Paagi sa pagsunod sa halimbawa ni Daniel, an mga lingkod nin Dios puedeng magin kawiliwili, bako man na sa kinaban, kundi ki Jehova Dios.

Bilang pagtatapos kan nakapakokosog sa espirituwal na programa, binasa kan tsirman an saro sa mga telegrama asin mensahe hale sa bilog na kinaban. Dangan, inako kan kada saro kan 24 mag-agom an saindang diploma, asin ipinaisi an nasyon na dedestinohan sa sainda. Sa katapustapusi, binasa nin sarong representante kan klase an sarong surat na para sa Namamahalang Grupo asin sa pamilyang Bethel, na nagpapahayag kan apresasyon na namatean kan klase para sa pagsasanay asin preparasyon na inako ninda sa nag-aging limang bulan.

Kan matapos an programa, madadangog sa pahale nang kadaklan an “paggayagaya na may mga pagpasalamat.”—Nehemias 12:27.

[Kahon sa pahina 27]

Estadistika kan Klase

Bilang nin mga nasyon na irinepresentar: 10

Bilang nin mga nasyon na inasignaran: 19

Bilang nin mga estudyante: 48

Bilang nin mga mag-agom: 24

Promedyong edad: 33

Promedyong taon sa katotoohan: 16

Promedyong taon sa bilog na panahon na ministeryo: 13

[Retrato sa pahina 25]

Ika-106 na Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.