An Espiritu nin Pagigin Gikan sa Boot an Nagpapangyari sa mga Tawo na Magpa-Gilead
AN PAADALAN sa Biblia kan Watchtower sa Gilead nag-eeksister tanganing sanayon an nagdusay na mga lalaki asin babae para sa paglilingkod bilang misyonero sa ibang nasyon. Sairisay an nag-aadal sa Gilead? An mga may espiritu nin pagigin gikan sa boot. (Salmo 110:3) Tunay nanggad na risang-risa iyan kan Setyembre 8, 2001, kan maggradwar an ika-111 klase.
An nagkapirang estudyante kan klaseng iyan gikan sa boot nang binayaan an mga pamilya, katood, asin tinuboan na nasyon tanganing maglingkod kun saen mas dakula an pangangaipo. Sa paggibo kaiyan, binalo ninda an saindang sadiri kun baga puede sindang gumibo nin mga pagliliwat tanganing mag-istar sa medyo laen na kamugtakan. Halimbawa, inareglar ni Richer asin Nathalie an saindang mga bagay-bagay tanganing bumalyo sa Bolivia, si Todd asin Michelle sa Republika Dominica, asin si David asin Monique sa sarong nasyon sa Asia tanganing ilakop an maogmang bareta kan Kahadean nin Dios. An ibang mga estudyante nakapaglingkod na sa Nicaragua, Ecuador, asin Albania.
Si Christy naenkaminar na mag-adal nin lenguaheng Kastila sa haiskul, na nakatabang sa saiyang pagpreparar sa duwang taon nia sa Ecuador bago sia nag-agom. An iba pa nag-asosyar sa mga kongregasyon sa saindang sadiring nasyon na iba an lenguahe. Inaatubang an laen na angat, si Saul asin Priscilla nagpaheling nin espiritu nin pagigin gikan sa boot paagi sa paghihingoang mapakarhay an saindang Ingles bago sinda magduman sa paadalan.
An 20 semana nin pagsasanay sa pagmimisyonero marikas na uminagi. Uminabot na an aldaw nin gradwasyon, asin kairiba kan mga estudyante an mga katood asin pamilya, na naghihinanyog sa madonong na hatol asin pamamaaram na mga tataramon nin pagparigon sa boot.
An tsirman kan programa iyo si Theodore Jaracz, naggradwar sa ikapitong klase kan Paadalan nin Gilead, na naglilingkod ngonyan bilang miembro kan Namamahalang Grupo kan Mga Saksi ni Jehova. Itinampok kan saiyang pambukas na pahayag an katunayan na bilang sarong organisasyon, nungka kitang suminuhay sa obheto kan pagsasanay nin mga estudyante sa Gilead, iyo na ngani an paghuhulit kan maogmang bareta kan Kahadean sa bilog na ineerokan na daga. (Marcos 13:10) Inaandam kan Gilead an kualipikadong mga estudyante na ipadagos an paghuhulit na ini sa mas mahiwas na sokol kisa kan ginibo ninda kan nakaagi asin sa mga lugar sa kinaban na partikularmenteng nangangaipo nin sinanay na mga misyonero. Sinadol ni Tugang na Jaracz an mga estudyante na gamiton nin marahay an saindang pagsasanay sa Gilead mantang minaayon sinda ngonyan sa mga misyonero na naglilingkod sa presente sa 19 nasyon na nadestinohan kan mga naggradwar.
Napapanahon na Sadol Para sa mga Magradwar
Sunod-sunod na pahayag an suminunod. Si William Van De Wall, miembro kan Komite kan Sanga sa Estados Unidos, nagpahayag sa temang “Kaigotan sa Pagmimisyonero—Sarong Tanda nin Tunay na mga Kristiano.” Ipinokus nia an atension sa sugo na ‘gumibo nin mga disipulo,’ na nakarekord sa Mateo 28:19, 20, asin sinadol nia an mga estudyante: “Arogon nindo si Jesus, na ginibo an saiyang asignasyon sa pagmimisyonero na may kaigotan asin entusiasmo.” Tanganing matabangan an magigin mga misyonero na papagdanayon an saindang kaigotan sa pagmimisyonero, inenkaminar nia sinda: “Sunodon an sarong praktikal na iskedyul; papagdanayon an ugale nin marahay na personal na pag-adal, na nagdadanay na naaaraman an pinakabagong impormasyon manongod sa teokratikong mga bagay; asin magdanay na nakapokus sa mga dahelan kun taano ta yaon kamo sa saindong asignasyon.”
An nagsunod sa programa iyo si Guy Pierce, miembro kan Namamahalang Grupo. Ipinaliwanag nia an temang “Padagos na Kultibaron an ‘Saindong Kakayahan na Mangatanosan.’” (Roma 12:1) Nagtao sia nin praktikal na sadol sa naggradwar na klase, na pinaririgon an boot ninda na gamiton an saindang tao nin Dios na abilidad na mag-isip asin magrason. “Padagos na maghorophorop manongod sa sinasabi ni Jehova sa saindo paagi sa saiyang Tataramon. Poprotehiran kamo kaini,” an sabi nia. (Talinhaga 2:11) Sinadol man ni Tugang na Pierce an klase na dai magin dogmatiko sa saindang mga punto de vista tanganing dai kaini maolang an saindang “kakayahan na mangatanosan.” Tunay nanggad, an napapanahon na mga pagirumdom na ini mapatutunayan na nakatatabang kun an mga naggradwar maglingkod na bilang mga misyonero.
Sunod na iinintrodusir kan tsirman an saro sa mga instruktor sa Gilead, si Lawrence Bowen, na nagpahayag sa temang “Magdesisyon na Dai Makaaram nin Ano Man.” Ipinaliwanag nia na may koneksion sa saiyang pagmimisyonero sa Corinto, si apostol Pablo “nagdesisyon na dai makaaram nin ano man . . . kundi si Jesu-Cristo, asin na sia ipinako.” (1 Corinto 2:2) Aram ni Pablo na an nakalalabi sa gabos na puersa sa uniberso, an banal na espiritu, nagsusuportar sa mensahe na nababanaag sa bilog na Biblia: an pagbindikar kan soberaniya ni Jehova paagi sa ipinanugang Banhi. (Genesis 3:15) An 48 naggradwar na estudyante sinadol na magin arog ki Pablo asin Timoteo asin magin mapanggana bilang mga misyonero, na nagdadanay sa “arogan nin ikararahay na mga tataramon.”—2 Timoteo 1:13.
“Apresyaron an Saindong Pribilehio, Sarong Balaog na Hale sa Dios” iyo an tema kan pinakahuri sa serye nin pambukas na mga pahayag. Tinabangan ni Wallace Liverance, rehistrador sa Paadalan nin Gilead, an mga naggradwar na masabotan na an mga pribilehio nin paglilingkod kapahayagan nin dai na kutana maninigong kabootan nin Dios, bakong sarong bagay na may deretso sinda o inako ninda bilang bayad. Kinokotar an halimbawa ni apostol Pablo, si Tugang na Liverance nagsabi: “An pagpili ni Jehova ki Pablo na magin apostol nia sa mga nasyon dai dineterminaran nin mga gibo, kaya garo baga nakua ni Pablo an deretso na mapasaiya an asignasyon na iyan o na iyan maninigong mapasaiya. Dai iyan minadepende sa lawig nin paglilingkod o eksperyensia. Sa punto de vista nin tawo, garo baga si Bernabe an maninigong pilion. Iyan bakong basado sa personal na abilidad; minalataw na si Apolos mas matibay magtaram kisa ki Pablo. Iyan kapahayagan nin dai na kutana maninigong kabootan nin Dios.” (Efeso 3:7, 8) Inenkaminar ni Tugang na Liverance an mga naggradwar na gamiton an saindang balaog, o pribilehio nin paglilingkod, sa pagtabang sa iba na magin mga katood nin Dios asin mag-ako kan ‘regalo na itinatao nin Dios na buhay na daing katapusan paagi ki Cristo Jesus na satong Kagurangnan.’—Roma 6:23.
Kasunod kaini, pinamayohan ni Mark Noumair, saro pang instruktor sa Gilead, an maogmang pakikipag-olay sa dakol na estudyante sa temang “An Pag-andam Nagbubunga nin Marahay na mga Resulta.” (Talinhaga 21:5) Malinaw na ipinaheling kan mga eksperyensia na kun an parahulit mag-aandam na marhay sa ministeryo, nangorogna paagi sa pag-andam kan saiyang puso, magkakaigwa sia nin tunay na interes sa mga tawo. Dai sia noarin man mauubosan nin sasabihon. Imbes, sasabihon asin gigibohon nia an mga bagay na makatatabang sa sainda sa espirituwal. “Ini an liabe sa pagigin mapangganang misyonero,” an sabi ni Tugang na Noumair, na kinokotar an sadiring eksperyensia nia bilang misyonero sa Aprika.
Paglilingkod Bilang Misyonero—Sarong Nakakokontentong Karera
Ininterbio ni Ralph Walls asin Charles Woody an nagkapirang eksperyensiadong misyonero, na yaon man sa Sentro nin Edukasyon sa Patterson para sa espesyal na pagsasanay. Idinoon kan mga interbio na an pagkamoot sa mga tawo an nagtatao nin kagayagayahan sa paglilingkod bilang misyonero. Nakapakokosog liwat sa boot kan mga estudyante asin kan saindang mga kapamilya patin katood na yaon duman na maghinanyog sa eksperyensiadong mga misyonerong ini mantang ipinaliliwanag mismo ninda kun taano ta an paglilingkod bilang misyonero sarong nakakokontentong karera.
Itinao ni John E. Barr, naglilingkod sa Namamahalang Grupo, an pangenot na pahayag kan aldaw, na may titulong “Awit Kamo ki Jehova nin Bagong Awit.” (Isaias 42:10) Sinabi ni Tugang na Barr na an fraseng “bagong awit” minalataw sa Biblia nin siyam na beses. Ihinapot nia an hapot na, “Manongod sa ano an bagong awit na ini?” Dangan sia nagsimbag: “Ihinahayag kan konteksto na an bagong awit inaawit huli sa bagong mga pangyayari sa paggamit kan soberaniya ni Jehova.” Sinadol nia an mga estudyante na padagos na pagkasararoon an saindang mga tingog sa pag-awit nin mga pag-omaw sa mapangganang Kahadean nin Dios sa kamot kan Mesiyanikong Hade, si Cristo Jesus. Sinambit ni Tugang na Barr na an pagsasanay na naako ninda sa Gilead an nakatabang sa sainda na mas lubos na masabotan kisa kasuarin man an manlaenlaen na aspekto kan “bagong awit” na ini. “Idinoon kan paadalan an pangangaipo na ‘awiton’ nindo an mga pag-omaw ki Jehova kaoyon kan saindong mga tugang na lalaki asin babae saen man kamo dumuman; pirmeng kultibaron an pagkasararo kaiba an iba pa sa saindong mga destino.”
Pakatapos na itao sa mga estudyante an saindang mga diploma, binasa kan representante sa pagtaram kan klase an sarong surat nin sinserong pagpasalamat sa pagsasanay na inako ninda sa Gilead.
Puede daw nindong pahiwason an saindong paglilingkod sa Dios asin gibohon iyan na mas mabunga? Kun iyo, magmaigot kamo arog kan naggradwar na mga estudyanteng ini. Ini an nakatabang tanganing makualipikar sinda para sa langtad nin pagmimisyonero. Dakulang kagayagayahan an makukua kun an saro maogmang ipepresentar an saiyang sadiri nin gikan sa boot sa paglilingkod sa Dios.—Isaias 6:8.
[Kahon sa pahina 21]
ESTADISTIKA KAN KLASE
Bilang nin mga nasyon na irinepresentar: 10
Bilang nin mga nasyon na inasignaran: 19
Bilang nin mga estudyante: 48
Promedyong edad: 33.2
Promedyong taon sa katotoohan: 16.8
Promedyong taon sa bilog na panahon na ministeryo: 12:6
[Ritrato sa pahina 22]
An Ika-111 Naggradwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.