Mapangganang mga Estudyante na Nagin Mapangganang mga Misyonero
“DAI pa man giraray ako makapaniwala na nagkaigwa kami kan pribilehiong ini!” an kagsing ni Will, na nagtataram manongod sa pagsasanay na natapos pa sana nia asin kan saiyang agom, si Patsy, bilang mga estudyante kan ika-103 na klase kan Paadalan sa Biblia kan Watchtower sa Gilead. Nag-oyon si Zahid asin Jeni. “Kami nakamamate nin onra na magin presente digdi,” an sabi ninda. An gabos na estudyante nag-adal na marhay sa paadalan. Ngonyan sinda galagang ponan an saindang karera bilang mga misyonero. Alagad bago kaiyan, sa programa sa gradwasyon kan Setyembre 6, 1997, sinda nag-ako nin mamomoton na hatol na matabang sa sainda na magin mapanggana sa saindang destino sa pagmimisyonero.
An tsirman kan programa iyo si Theodore Jaracz, sarong miembro kan Namamahalang Grupo. Sinabi nia na—kaiba kan pamilyang Bethel asin mga representante kan 48 sa mga sangang opisina kan Watch Tower Society—yaon an mga katood asin paryente hale sa Canada, Europa, Puerto Rico, asin Estados Unidos tanganing siertohon an saindang suporta asin pagkamoot sa mga estudyante. Si Tugang na Jaracz nagkomento na an mga misyonero na isinugo kan mga iglesia nin Kakristianohan sa parate naparayo an atension sa pagmimisyonero asin nagpoon na pag-aaboton an akademikong mga pasohan o napalabot pa ngani sa politika. Sa kabaliktaran, an mga naggradwar sa Gilead ginigibo an itinokdo sa sainda na maninigong gibohon. Itinotokdo ninda an Biblia sa mga tawo.
Dangan si Robert Butler na hale sa opisina kan Sosyedad sa Brooklyn nagpahayag sa temang “Gibohon na Mapanggana an Saindong Dalan.” Ipinaliwanag nia na mantang an mga tawo sinosokol an kapangganahan basado sa pinansial o iba pang personal na ganansia, an talagang mahalaga iyo na kun paano sinosokol nin Dios an kapangganahan. An ministeryo ni Jesus mapanggana, bakong huli ta kadakol kan nakombertir nia, kundi huli ta sia fiel sa saiyang asignasyon. Pinamuraway ni Jesus si Jehova, asin sia nagdanay na daing ati kan kinaban. (Juan 16:33; 17:4) Ini mga bagay na puedeng gibohon kan gabos na Kristiano.
“Magin Oripon nin Gabos na Tawo,” an sadol ni Robert Pevy, na dating misyonero sa Oriente. Si apostol Pablo sarong mapangganang misyonero. Ano an saiyang sekreto? Ginibo niang oripon nin gabos an saiyang sadiri. (1 Corinto 9:19-23) Ipinaliwanag kan espiker: “An sarong naggradwar sa Gilead na arog kaiyan an aktitud dai mamansayon na paglangkaw sa puesto an paglilingkod bilang misyonero, sarong tangga pasiring sa mas importanteng mga posisyon sa organisasyon. An sarong misyonero maduman sa saiyang destino na saro sana an motibo—tanganing maglingkod, huli ta iyan an ginigibo nin sarong oripon.”
Sa pangenot ibinabasar an saiyang hatol sa 2 Corinto kapitulo 3 asin 4, si Gerrit Lösch kan Namamahalang Grupo mapuersang sinadol an mga estudyante na “Ipabanaag na Siring sa mga Salming an Kamurawayan ni Jehova.” Ipinagirumdom nia sa sainda na an kaaraman nin Dios garo liwanag na nagsisirang sa sarong Kristiano kun binubukasan nia an saiyang puso tanganing akoon iyan. Ipinababanaag niato an liwanag na iyan paagi sa paghuhulit kan maogmang bareta asin paagi sa pagpapadanay nin marahay na gawe-gawe. “Kun beses tibaad makamate kamo na kamo kulang,” an inadmitir nia. “Kun an siring na mga pagmate lumataw, manarig ki Jehova, ‘tanganing an kosog na lihis sa ordinaryo magin sa Dios.’” (2 Corinto 4:7) Inootro an mga tataramon ni Pablo na nasusurat sa 2 Corinto 4:1, si Tugang na Lösch nakiolay sa mga estudyante: “Dai isuko an saindong destino sa pagmimisyonero. Pirmeng pakintabon an saindong salming!”
Si Karl Adams, saro sa mga nagtotokdo sa Gilead, nagpahayag manongod sa interesanteng tema na “Yaon Saen si Jehova?” An hapot nanonongod, bakong sa lugar nin Dios sa uniberso, kundi sa pangangaipong konsideraron an punto de vista ni Jehova asin an mga nagpaparisa kan saiyang paggiya. “Kun nagkakatension,” an sabi nia, “dawa an sarong tawo na may halawig nang rekord nin paglilingkod ki Jehova puedeng malingawan iyan.” (Job 35:10) Kumusta man sa satong presenteng panahon? Kan 1942, an banwaan nin Dios nangaipo nin paggiya. Patapos na daw an paghuhulit, o dakol pa daw an dapat gibohon? Ano an kabotan ni Jehova para sa saiyang banwaan? Mantang sinda nag-aadal sa Tataramon nin Dios, nagin malinaw an simbag. “Bago natapos an taon,” an sabi ni Tugang na Adams, “nagibo na an mga plano para sa Paadalan sa Biblia kan Watchtower sa Gilead.” Binendisyonan nanggad ni Jehova an gibohon kan mga misyonero na isinugo kan paadalan na iyan.
Si Mark Noumair an ikaduwang instruktor na nagpahayag. Sa saiyang pahayag, na may titulong “Paano Nindo Gagamiton an Saindong Talento?,” pinarigon nia an boot kan mga estudyante na iaplikar an pagsasanay na inako ninda sa Gilead pag-abot tolos ninda sa saindang bagong mga destino. “Magpaheling nin interes sa iba,” an sabi nia. “Mangunlabot. Magin galagang manodan an mga kostumbre, an kasaysayan, an pangisi kan nasyon. Kun mas amay nindong manodan an lenguahe, mas madali man kamong makaaadaptar.”
An Maigot na mga Estudyante Nakanonompong nin Kagayagayahan sa Ministeryo
Dugang pa sa pagigin mahigos ninda sa saindang pag-adal mantang nasa Gilead, an mga estudyante iinasignar sa 11 lokal na kongregasyon. Sa mga katapusan kan semana, sinda maigot na nakikabtang sa paghuhulit. Si Wallace Liverance na saro sa mga maestro sa Gilead inagda an nagkapira sa sainda na ihiras sa mga nagdadangog an nagkapira sa saindang eksperyensia. Narisa an saindang kagayagayahan mantang isinasaysay ninda an saindang mga naeksperyensiahan kan nagpapatotoo sa mga galeriya, paradahan nin sasakyan, lugar nin negosyo, sa tinampo, asin sa harong-harong. An nagkapira sa sainda naggibo nin mga paagi tanganing maabot an mga tawo na iba an lenguahe na nag-eerok asin nagtatrabaho sa teritoryo kan saindang kongregasyon. Kisuerra sampulong pag-adal sa Biblia an naponan asin kinondukta kan mga miembro kan ika-103 na klase durante kan limang bulan na pagsasanay ninda.
An Haloy Nang mga Misyonero Ihiniras an Saindang mga Sekreto sa Pagigin Mapanggana
Pakatapos kan maogmang kabtang na ini kan programa, inagda ni Patrick Lafranca asin William Van de Wall an pitong miembro nin Komite kan Sanga na sumaryohon an mga leksion na nanodan ninda sa saindang karera bilang mga misyonero para sa kapakinabangan kan klase. Sinadol ninda an mga minagradwar na ibilang an saindang destino sa pagmimisyonero na hale ki Jehova asin na magin determinadong magdanay sa destino. Sinda nagtaram manongod sa positibong mga epekto kan mga misyonero na naggradwar sa Gilead sa gibohon sa ibang kadagaan.
Ano an nakatabang sa mga miembro kan Komite sa Sanga na ini na maglingkod sa laog nin dakol na dekada bilang maogma, produktibong mga misyonero? Sinda dayupot na naglingkod kaiba kan lokal na mga tugang asin nakanood sa sainda. Sinda galagang nag-adal kan lenguahe pag-abot tolos ninda sa saindang destino. Sinda nakanood na magin madaling makibagay asin magin tuod sa lokal na mga kostumbre. Si Charles Eisenhower, na naggradwar sa enot na klase kan Gilead asin misyonero sa laog nin 54 taon, ihiniras an limang “sekreto” na nanodan nin mapangganang mga misyonero: (1) Regular na mag-adal sa Biblia, (2) adalan an lenguahe, (3) magin aktibo sa ministeryo, (4) maghingoang makakontribwir sa katoninongan sa erokan nin mga misyonero, asin (5) regular na mamibi ki Jehova. An mga estudyante napahanga bako sanang sa praktikal na sadol na inako ninda kundi sa namamansayan na kagayagayahan sa paglilingkod ki Jehova kan eksperyensiadong mga misyonerong ini. Siring sa pagkasabi ni Armando asin Lupe, “sinda maogma kun nagtataram manongod sa saindang buhay.”
Pakatapos kan mga interbio, saro na sanang pahayag an natatada. Si Albert Schroeder, miembro kan Namamahalang Grupo, pinili an tema na “An Fiel na Paglilingkod Bilang mga Mayordomo kan Tataramon nin Dios Naghahayag nin Mahalagang Marhay na mga Mutya nin Katotoohan.” Mantang an Biblia iyo an mayor na aadalan na libro kan Paadalan nin Gilead, an mga estudyante interesado sa sasabihon nia. Sinabi ni Tugang na Schroeder na kan ponan an paggibo kan New World Translation of the Holy Scriptures 50 taon na an nakaagi, an linahidan na mga miembro kan Komite sa Pagtradusir kan Bibliang Bagong Kinaban dai naghingoang paoyonan an mga tawo kundi nanarig sa paggiya kan banal na espiritu. (Jeremias 17:5-8) Pero, kasuarin pa sana, rinekonoser kan nagkapirang autoridad an halangkaw na pamantayan na inestablisar kan New World Translation. Sa sarong surat sa Sosyedad, an sarong intelektuwal nagsurat: “Naiisihan ko kun de kalidad an sarong publikasyon kun makanompong ako kaiyan, asin ekselente an ginibo kan saindong ‘Komite sa Pagtradusir kan Bibliang Bagong Kinaban.’”
Pakatapos kan pahayag na ini, inako kan mga estudyante an saindang diploma, asin iinanunsiar an saindang mga destino sa mga nagdadangog. Emosyonal na panahon idto para sa mga miembro kan klase. Mantang binabasa kan sarong representante kan klase an sarong surat nin pag-apresyar, an dakol napapahibi asin napapaluha. An nagkapirang estudyante nag-andam para sa pagmimisyonero sa laog nin dakol na taon. Huling nakaaaram na an kurso sa Gilead gigibohon sa Ingles, an nagkapira nagbalyo sa mga kongregasyon na nagtataram nin Ingles tanganing paoswagon an saindang pakataram kan lenguahe. An iba nagbalyo sa mga lugar na may orog na pangangaipo para sa mga payunir, magsalang sa sadiri nindang nasyon o sa ibang nasyon. May iba pa na nag-andam paagi sa pagbasa nin mga eksperyensia, pagsiyasat, o paorootrong pagdalan kan videocassette kan Sosyedad na To the Ends of the Earth.
Si Will asin Patsy, na nasambitan sa enotan, nabigla kan personal na interes na ipinaheling sa mga estudyante. “An mga tawo na dai ngani kami midbid kinukugos kami asin rineretrato kami. An sarong miembro kan Namamahalang Grupo inabrasa kami asin nagsabi, ‘Ipinag-oorgolyo niamo kamo!’” Daing duwa-duwa, an mga estudyante kan ika-103 na klase namomotan na marhay. Sinda nasanay na marhay. An edukasyon na inako ninda sa Gilead matogot sa sainda na magin mapangganang mga misyonero an mapangganang mga estudyante.
[Kahon sa pahina 22]
Estadistika kan Klase
Bilang nin mga nasyon na irinepresentar: 9
Bilang nin mga nasyon na inasignaran: 18
Bilang nin mga estudyante: 48
Bilang nin mga mag-agom: 24
Promedyong edad: 33
Promedyong taon sa katotoohan: 16
Promedyong taon sa pambilog na panahon na ministeryo: 12
[Retrato sa pahina 23]
Ika-103 na Naggradwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Retrato sa pahina 24]
Saen daw kita maduman?