Magradwar na mga Estudyante sa Tataramon nin Dios
BILANG pag-arog sa mga Kristiano kan enot na siglo, an Mga Saksi ni Jehova midbid sa bilog na kinaban huli sa saindang paghuhulit sa harong-harong. An gibohon na ini idinoon sa pambukas na pahayag sa programa sa gradwasyon kan ika-102 na klase kan Paadalan sa Biblia kan Watchtower sa Gilead.
Kan Marso 1, 1997, si Albert Schroeder, miembro kan Namamahalang Grupo kan Mga Saksi ni Jehova, nag-apod nin atension sa sarong dai pa nahahaloy na artikulo sa Pranses na peryodiko na Le Point. Sinambit kaiyan an mga plano kan Katolika Romana na ponan an paghuhulit sa harong-harong sa Italia. “Tanganing [an mga misyonero kan Batikano] dai umabot na daing dara mantang sinda nakikikompetensia sa teritoryo nin Mga Saksi ni Jehova,” an sinabi kan artikulo, “an Batikano nagpaimprenta pa ngani nin sarong milyon na kopya kan Ebanghelyo ni San Marcos, mantang an saindang mga sugo napapaatubang sa mga eksperto [an mga Saksi] sa ‘pagpasakamot’ kan maogmang bareta sa harong-harong.”
An 48 gradwado kabilang sa mga nag-arog sa ekspertong mga paagi sa paghuhulit ni Jesus sa pagpalakop kan Tataramon nin Dios. Sinda naghale sa walong kadagaan pasiring sa Sentro nin Edukasyon kan Watchtower sa Patterson, Nueva York. Durante kan limang bulan nindang pag-eskuela, pinag-adalan ninda an bilog na Biblia. Kabale man sa saindang kurso an kasaysayan kan organisasyon nin Dios, praktikal na mga aspekto kan buhay misyonero, asin an mga bunga kan espiritu nin Dios. An gabos na ini huli sa sarong pasohan—tanganing andamon sinda para sa paglilingkod bilang misyonero sa ibang nasyon sa 17 kadagaan na susugoan sa sainda. Sa saindang gradwasyon, an 5,015 na internasyonal na grupo nin mga nagdadangog nakigayagaya sa okasyon. Anong pangultimong praktikal na hatol an inako kan mga estudyanteng idto sa Gilead?
Napapanahon na Pamparigon nin Boot Para sa Bagong mga Misyonero
Pakatapos kan pambukas na pahayag kan tsirman, si Ralph Walls, sarong katuwang kan Komite sa Tawohan kan Namamahalang Grupo, nagtao kan primerong halipot na pahayag na may praktikal na hatol para sa bagong mga misyonero. An saiyang tema “Girumdomon na Mamoot.” Idinoon nia na ihinula kan Biblia, sa 2 Timoteo kapitulo 3, na an kinaban magigin orog na daing pagkamoot. Itinao nia an napapanahon na pagirumdom na ini sa bagong mga misyonero, kaoyon sa paglaladawan sa pagkamoot na makukua sa 1 Corinto 13:1-7: “Tibaad malabawan pa nindo, bilang mga misyonero, an saindong kota sa oras. Tibaad kadakol kamo nin aram gikan sa pagsasanay sa saindo sa Gilead. O tibaad maigot kitang mag-obertaim sa satong asignasyon sa sanga. Alagad an gabos niatong paghihingoa asin pagsasakripisyo daing halaga kun malingawan niato na mamoot.”
An suminunod sa programa iyo si Carey Barber, kan Namamahalang Grupo, na ipinakipag-olay an tema na “Ginigiyahan Kita ni Jehova Pasiring sa Kapangganahan.” Poon sa sadit nindang kapinonan pakatapos kan Guerra Mundial I, ginigiyahan ni Jehova Dios an saiyang fiel na mga lingkod pasiring sa kapangganahan sa pagbalangibog kan maogmang bareta kan saiyang Kahadean, sa ibong nin paglamag. Kan 1931 an Mga Estudyante sa Biblia, siring sa apod sa sainda kaidto, inaprobaran an ngaran na Mga Saksi ni Jehova, sa kasosopgan kan mga klero kan Kakristianohan. “An ika-102 na klase nin sinanay sa Gilead na mga misyonero ngonyan igwa kan dakulang pribilehio na magkaigwa nin dakulang kabtang sa mamuraway na gibohon na pagtao nin oportunidad sa pinakadakol na mapupuede na manodan an sagradong ngaran na iyan,” an sabi ni Tugang na Barber. Sinda nakadagdag sa halabang listahan nin 7,131 misyonero na sinanay sa Paadalan nin Gilead asin nakatabang na ipaabot an paghuhulit kan Tataramon nin Dios poon sa 54 kadagaan kan 1943 sagkod sa 233 na kadagaan ngonyan.
An sunod na espiker, si Lloyd Barry, na miembro man kan Namamahalang Grupo, gradwado sa ika-11 klase kan Gilead asin naglingkod bilang misyonero sa Hapon sa laog nin labing 25 taon. Nagtao sia nin pamparigon nin boot sa saiyang tema na “‘Magdanay Ka sa mga Bagay na Ini.” “An kadaklan kan saindong kagayagayahan makukua sa pagtagal,” an sinabi nia sa mga estudyante. Anong mga balos an makakamtan sa pagtagal sa gibohon na pagmimisyonero o sa arin man na teokratikong asignasyon? “Orog sa gabos, an satong pakatagal nagpapagayagaya sa puso ni Jehova . . . Igwa nin dakulang satispaksion na makukua sa pakapagdanay sa integridad sa irarom nin pagbalo . . . Gibohon an saindong paglilingkod bilang misyonero na propesyon nindo sa buhay . . . An balos sa saindo magigin nakaoogmang ‘marahay na gibo.’” (Mateo 25:21; Talinhaga 27:11) Sa konklusyon kan saiyang presentasyon, bilog na pusong irinekomendar ni Tugang na Barry na an bagong mga misyonero ‘magdanay sa mga bagay na ini’ paagi sa pagigin determinado na magin buhay mismo ninda an pagmimisyonero.—1 Timoteo 4:16.
“Ano an Maheheling Nindo?” an hapot na pinalataw ni Karl Adams, na nagkaigwa nin kabtang sa pagtotokdo sa dakol na klase nin Gilead. Idinoon nia na an maheheling kan bagong mga misyonero sa saindang destino depende bako sanang sa saindang pisikal na pakaheling kundi siring man sa mga mata kan saindang puso. (Efeso 1:18) Iinilustrar ini kan naheling kan mga espiyang Israelita kan sinurbey ninda an Dagang Panuga. Parareho an naheling kan gabos na 12 espiya sa pisikal na punto de vista, alagad duwa sana an nakaheling sa Dagang Panuga sa punto de vista nin Dios. An mga misyonero puede man na mansayon an mga bagay sa laen-laen na paagi. Sa nagkapirang kadagaan na paglilingkodan ninda, tibaad makaheling sinda nin kadaihon, pagsakit, asin kadaihan nin paglaom. Alagad sinda dai maninigong magkaigwa nin negatibong reaksion asin bayaan an destino. Nag-estorya si Tugang na Adams manongod sa sarong misyonero hale sa sarong dai pa nahahaloy na klase na nagsabi: “An mga eksperyensiang ini nakaparealisar sa sako na kaipuhan kong magdanay digdi. An mga tawong ini nangangaipo nin paglaom para sa ngapit. Mawot kong maparahay an saindang buhay.” Nagkonklusyon si Tugang na Adams paagi sa pagparigon sa boot kan bagong mga misyonero na helingon an kadagaan na dinestinohan sa sainda bilang mga lugar na nadesisyonan ni Jehova na gibohon na kabtang kan Saiyang panglobong Paraiso asin mansayon an mga tawo duman bilang may esperansang mga miembro kan sosyedad sa bagong kinaban.
An ultimong pahayag sa kabtang na ini kan programa itinao ni Wallace Liverance, na naglingkod nin nagkapirang taon sa langtad nin pagmimisyonero bago nagin instruktor sa Gilead. “Humiro na May Pakarorop sa Makangangalas na mga Gibo nin Dios” an tema nia. Kalabot sa paghiro na may pakarorop an paghiro na may pag-iingat, paghusgar, asin sentido-komun. Iyan an dai nagibo ni Hadeng Saul kan Israel.—1 Samuel 13:9-13; 15:1-22.
An sarong paagi na makahiro na may pakarorop iyo an pag-ako sa mga angat nin pakikibagay sa bagong pamumuhay, kabale an pag-adal nin bagong lenguahe asin pagmidbid sa mga tawo. An mga eksperyensia nin mga misyonero sa pag-atubang sa mga angat asin pakapanggana sa mga olang puedeng makaparigon sa sainda sa espirituwal kun paanong si Josue asin si Caleb napakosog mantang nasasakop ninda an daga na itinao sa sainda nin Dios.
Mga Interbio
Kabale sa nagsunod na kabtang kan programa an serye nin mga interbio. Ininterbio ni Harold Jackson si Ulysses Glass, rehistrador asin haloyan nang instruktor kan Paadalan nin Gilead, na ngonyan 85 anyos na. An dakol na misyonero na yaon pa sa langtad narurumdoman pang marhay an dakol na taon niang fiel na pagtotokdo asin pagsasanay. An suminunod iyo si Mark Noumair, instruktor sa Gilead na naglingkod sa laog nin dakol na taon sa ibang nasyon sa Aprika bago nakaiba sa mga tawohan sa Paadalan nin Gilead. Ininterbio nia an mga estudyante manongod sa saindang ministeryo durante kan limang bulan nindang pag-eskuela. An saindang mga eksperyensia nagpaheling nin malinaw na igwa nin mga tawong interesado sa Tataramon nin Dios sa lokal na teritoryo.
Dangan si Robert Ciranko asin si Charles Molohan nakipag-olay sa eksperyensiadong mga lalaki na nag-aatender sa saro pang paadalan sa laog kan pasilidad, sarong paadalan para sa mga tawohan sa sanga. Kabale sa sadol ninda sa magradwar na klase an pangangaipo na magin mapakumbaba asin magkontribwir sa pagkasararo kan kongregasyon. Isinuherir ninda na an mga gradwado maninigong dai magkaigwa nin dati nang nasa isip na mga ideya kun ano an mangyayari sa gibohon na pagmimisyonero kundi, imbes, magin sanang andam na akoon an ano man na umabot sa sainda. An pag-aplikar kan sadol na ini daing duwa-duwa na matabang sa bagong mga misyonero na otobon an saindang asignasyon bilang mga paratokdo kan Tataramon nin Dios.
Sa katapustapusi, si Theodore Jaracz, na miembro kan Namamahalang Grupo, nagpahayag sa mga nagdadangog sa temang “Ano an Nakaiimpluwensia Kiisay?” Sia nagpaliwanag na kun kitang mga Kristiano nagpapaheling kan mga bunga kan espiritu, kita magigin marahay na impluwensia sa ibang tawo. “An mga misyonero na isinugo kan organisasyon ni Jehova nakagibo nin kaomaw-omaw na rekord nin pag-impluwensia sa mga tawo sa marahay, espirituwal na paagi,” an sabi nia. Dangan nasambitan nia an nagkapirang komento nin mga indibiduwal na natabangan na maglingkod sa Dios bilang resulta nin marahay na halimbawa kan mga misyonero. “Logod na padanayon nindo an reputasyon kan banwaan ni Jehova asin padagos na magtoktok sa mga pinto sa saindong destino sa ibang nasyon sa paghanap kan mga maninigo . . . Siring man, paagi sa saindong matanos, malinig na gawe-gawe, tumangon an espiritu kan kinaban na ini, asin magin marahay na impluwensia sa kaomawan asin onra ni Jehova,” an konklusyon nia.
Sa pagsumaryo kan programa, ipinaabot kan tsirman an mga pataratara hale sa harani asin harayo dangan itinao an mga diploma asin iinanunsiar an mga destino kan mga misyonero. Pakatapos kaiyan, binasa kan saro sa mga gradwado an sarong resolusyon kan klase na nagpapahayag nin mga pasasalamat sa pagtotokdong itinao. Malinaw nanggad, an programa nin gradwasyon kan ika-102 na klase pinagin mas determinado an gabos na nagdadangog na umabante sa pagbalangibog kan Tataramon nin Dios.
[Ritrato sa pahina 31]
Ika-102 na Magradwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.