An Gilead Nagsusugo nin mga Misyonero “sa Kaporoporohi kan Daga”
SA LAOG nin labi nang kabangang siglo ngonyan, an Paadalan sa Biblia kan Watchtower sa Gilead nagsusugo nin mga misyonero. Kan Setyembre 11, 1999, naggradwar an ika-107 klase nin Gilead. Iyan kompuesto nin 48 estudyante hale sa 11 nasyon, asin an mga ini idinestino na maglingkod sa 24 laen-laen na nasyon. Sinda maayon sa rinibo pang misyonero, na nagkaigwa nin dakulang kabtang sa pag-otob sa ultimong mga tataramon ni Jesus bago nagsakat sa langit. Ihinula nia na an saiyang mga disipulo “magigin mga saksi [nia] . . . sagkod sa kaporoporohi kan daga.”—Gibo 1:8.
An programa sa gradwasyon, na duman ginibo sa Sentro nin Edukasyon kan Watchtower sa Patterson, Nueva York, nagin marahayon na okasyon sa magayon na mga kamugtakan sa palibot. Ikinaogmang marhay kan mga estudyanteng naggradwar an pag-atender kan mga paryente, dayupot na mga katood, asin bisita. Kabilang an mga naghinanyog asin nag-obserbar paagi sa koneksion sa radyo asin telebisyon duman sa mga pasilidad sa Brooklyn asin Wallkill, an total na nag-atender 4,992.
Fiel na Maglingkod ki Jehova Asin sa Kataed
“Siisay an ki Jehova?” Iyan an tema kan introduksion ni Carey Barber, miembro kan Namamahalang Grupo asin tsirman kan programa sa gradwasyon. Ipinaliwanag nia na ini an isyu na napaatubang sa mga Israelita kan kaaldawan ni Moises. Ipinagirumdom sa naggradwar na mga estudyante asin sa mga nag-atender na an kadaklan na Israelita nagadan sa kaawagan huli ta dai sinda nagdanay na maimbod sa kampi ni Jehova. Pakatapos na magin biktima nin idolatriya, sinda “nagturukaw sa pagkakan asin pag-inom. Dangan sinda nagburuhat sa pag-oroogma.” (Exodo 32:1-29) Pinatanidan ni Jesus an mga Kristiano kan iyo man sanang peligro: “Atenderan an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo.”—Lucas 21:34-36.
An sunod na espiker, si Gene Smalley, kan Komite sa Pagsurat, hinapot an naggradwar na mga estudyante: “Kamo daw Magigin Paregorico?” Ipinaliwanag nia na an termino sa Griego na pa·re·go·riʹa ginamit sa Ingles bilang ngaran nin sarong nakabobolong na meskla na nakahahale nin pagkapurisaw. Minsan siring, ginamit ni apostol Pablo an makahulogan na terminong ini sa Griego sa Colosas 4:11 sa pagladawan sa saiyang mga kapwa trabahador. Sa New World Translation, an terminong ini trinadusir na “tabang na nakapakokosog.”
Sa praktikal na marhay na paagi an naggradwar na mga misyonero puedeng magin mga paregorico sa presenteng aldaw sa saindang mga destino paagi sa mapakumbabang pagtao nin tabang na nakapakokosog sa lokal na mga tugang na lalaki asin babae asin paagi sa pagpaheling nin espiritu nin kooperasyon asin pagkamoot sa kaibanan kan mga kapwa misyonero.
Si Daniel Sydlik, miembro kan Namamahalang Grupo, an sunod na nagpahayag dapit sa temang “An Bulawan na Reglamento sa Paggawe na Dapat Sundon.” Ipinaliwanag nia na an halangkaw na prinsipyo na sinabi ni Jesus sa Mateo 7:12, na “an gabos na boot nindong gibohon sa saindo nin mga tawo, gibohon man nindo sa sainda,” kalabot an paggibo nin positibong mga bagay para sa iba, bakong paglikay sana sa paggibo nin danyos.
Tanganing magibo ini nin mapanggana, tolong bagay an kaipuhan: mata na nakaheheling, pusong madinamayon, asin kamot na matinabang. Bilang sumaryo, sinabi nia: “Kun namamatean niato an kamawotan na tumabang, maninigo kitang tumabang tolos. Kaipuhan kitang maghingoa na gibohon para sa iba an gusto niatong gibohon ninda para sa sato.” Espesyalmenteng totoo ini sa mga misyonero na maduman sa ibang nasyon tanganing tabangan an mga tawo na isagibo an tunay na Kristianismo.
An mga Instruktor Nagtao nin Mamomoton na mga Pagirumdom
Pinarigon kan instruktor sa Gilead na si Karl Adams an boot kan naggradwar na mga misyonero na “Magpadagos sa Pagtalubo.” Sa anong mga bagay? Enot, sa kaaraman asin sa abilidad na gamiton iyan nin marahay. Sa Gilead, an mga estudyante nakanood kun paano magsiyasat tanganing aramon an kasaysayan sa likod asin kamugtakan kan mga pagkasaysay sa Biblia. Inenkaminar sinda na estudyaran kun paano maninigong makaapekto sa saindang buhay an lambang pagkasaysay. Sinadol sinda na padagos na gibohon ini.
“Ikaduwa, padagos na tumalubo sa pagkamoot. An pagkamoot sarong bagay na, kun inaataman, nagtatalubo. Kun pinababayaan, iyan puedeng magadan,” sabi ni Tugang na Adams. (Filipos 1:9) Ngonyan, bilang mga misyonero, kaipuhan sindang tumalubo sa pagkamoot sa irarom nin laen-laen na kamugtakan. Asin ikatolo: “Padagos na magtalubo sa dai na kutana maninigong kabootan asin kaaraman kan satong Kagurangnan asin Paraligtas na si Jesu-Cristo.” (2 Pedro 3:18) “Ini an makangangalas na kabootan na ipinaheling ni Jehova paagi sa saiyang Aki,” sabi kan espiker. “Mantang nagtatalubo an satong pag-apresyar sa dai na kutana maninigong kabootan na iyan, nadudugangan an satong kaogmahan sa paggibo kan kabotan nin Dios asin pag-otob kan iinasignar nia sa sato na gibohon.”
An saro pang instruktor sa Gilead, si Mark Noumair, nagpahayag dapit sa temang “Akoon Iyan na May Pagkamoot, Asin Makakaya Nindo Iyan.” Sia nagsadol: “Makanood kamong akoon na may pagkamoot an masakit na mga situwasyon sa buhay nin misyonero, asin makakaya nindo iyan. An dinidisiplina sana ni Jehova idtong mga namomotan nia. Dawa kun sa pagmate nindo an sarong hatol bakong tama an pagkataram, nakakapikar, o bakong makatanosan, an pagkamoot ki Jehova asin an relasyon nindo sa saiya makatatabang sa saindo na kayanon iyan.”
Sinabi ni Tugang na Noumair na an pagmimisyonero may kaibang dakol na trabaho. “Alagad an trabaho na mayo nin pagkamoot gigibohon kamong diskontento. Kun mayo nin pagkamoot, an saindong mga trabaho sa harong—arog baga nin pagluto, pamamakal, paghugas kan mga prutas, pagpakalakaga nin tubig—puedeng magin nakasusumong marhay. Dapat kamong umontok asin hapoton an saindong sadiri, ‘Taano ta ginigibo ko an mga ini?’ Bueno, kun sasabihon nindo sa saindong sadiri, ‘An sakong mga paghihingoa nakakokontribwir sa salud asin kaogmahan kan mga kapwa ko misyonero,’ kun siring dai iyan magigin masakit gibohon.” Bilang sumaryo, sia nagsadol: “Baga man iyan may labot sa pag-ako nin disiplina, pag-otob sa saindong mga kapanugaan sa pagmimisyonero, o pagresolber sa mga dai pagkasinabotan, an pag-ako kaiyan na may pagkamoot magpapangyari sa saindo na makatagal sa saindong asignasyon. ‘An pagkamoot nungka na nasusudya.’”—1 Corinto 13:8.
Pagkatapos pinangenotan kan instruktor sa Gilead na si Wallace Liverance an pagsaaksion nin nagkapirang nakaoogmang marhay na mga naeksperyensiahan kan mga estudyante mantang naghuhulit kaiba kan lokal na mga kongregasyon. Apuera sa pagharongharong, ginamit ninda an pagsasanay sa sainda sa pagmimisyonero sa paghanap sa mga tawo sa mga pondohan nin trak, labahan, istasyon nin tren, asin iba pang lugar.
An Eksperyensiadong mga Misyonero Nagtao nin mga Pagpasarig sa Boot
Kun an bagong mga misyonero maduman sa ibang nasyon, kaipuhan daw na maghadit? Kaya daw nindang atubangon an mga angat sa destino sa ibang nasyon? Ano an ginigibo kan mga sangang opisina tanganing tabangan an mga bagong abot na ini na magin mapanggana? Tanganing masimbag ini asin an iba pang hapot, si Steven Lett, kan Departamento nin Paglilingkod, asin si David Splane, kan Departamento nin Pagsurat, nag-interbio nin mga tugang na lalaki na kan panahon na idto nag-aatender sa paadalan kan sanga sa Sentro nin Edukasyon kan Watchtower. An mga tugang na ininterbio naglilingkod sa mga komite kan sanga sa España, Hong Kong, Liberia, Benin, Madagascar, Brazil, asin Hapon.
An eksperyensiadong mga lingkod na ini ni Jehova, na an kadaklan naglingkod bilang misyonero sa laog nin mga dekada, pinasarig an boot kan naggradwar na mga estudyante siring man kan saindang mga magurang asin paryente na nag-atender. Basado sa sainda mismong personal na eksperyensia asin kan mga kapwa misyonero, ipinaheling ninda na an mga problema asin kahaditan puedeng mapangganahan. An problema na inaatubang ninda tibaad dakula, “alagad puede iyan na maresolberan, asin an Sosyedad nagtatabang sa sato,” an komento ni Raimo Kuokkanen, sarong misyonero sa Madagascar. “Dai mi pinili an destino, inako mi iyan,” an sabi ni Östen Gustavsson, naglilingkod ngonyan sa Brazil. “Kaya nagdesisyon kami na gibohon an samong pinakamakakaya na magdanay dian.” Si James Linton, na naglilingkod sa Hapon, nagsabi na an nakatabang sa saiya iyo “an presensia nin mga tugang na naglilingkod na sa destino sa pagmimisyonero.” An pagmimisyonero sarong maogma asin nakakokontentong paagi nin paglilingkod ki Jehova asin pag-ataman sa saiyang mga karnero.
Paglikay sa Damat na Minagadan sa Espirituwalidad
Si Theodore Jaracz, miembro kan Namamahalang Grupo, na naggradwar man sa ikapitong klase nin Gilead kan 1946, an nagtao kan pantapos na pahayag, na may temang “An Angat sa Pagpapadanay na Buhay kan Espirituwalidad.” Rinerekonoser nguna an grabeng mga kabikoan na nangyayari sa laen-laen na parte kan kinaban, sinabi nia na an totoo, may mas maraot na mga kalamidad na nangyayari sa katawohan.
Sinasambit an Salmo 91, sinabi ni Tugang na Jaracz kun ano an “peste” asin “kalaglagan” na sa espirituwal na paagi minilyon an pinapaghelang asin ginagadan sa enterong palibot niato. Ginamit kan Diablo asin kan saiyang maraot na sistema an arog-pesteng propaganda, na basado sa intelektuwalismo asin materyalismo, sa pagpaluya asin paggadan sa espirituwal na paagi, alagad inaasegurar kita ni Jehova na an damat na ini dai makararani sa “siisay man na nag-eerok sa hilom na lugar kan Kaharohalangkawe.”—Salmo 91:1-7.
“An angat,” sabi ni Tugang na Jaracz, “iyo an pagdanay na makosog an pagtubod, pagdanay sa lugar nin seguridad. Dai kita puedeng magin arog kan mga paraolog-olog ‘na mayo nin espirituwalidad.’ Ini sarong problema sa ngonyan. Iyan problema na napapaatubang sa sato gabos sa laog kan organisasyon. Iyan puede man na mapaatubang sa saindo sa saindong destino sa pagmimisyonero.” (Judas 18, 19) Alagad sinabi sa naggradwar na mga misyonero na puede nindang mapagdanay nin mapanggana an espirituwalidad sa saindang mga destino. Halimbawa, sinadol sinda na estudyaran kun paano nagtatagal an satong mga tugang sa Rusya, sa Asia, asin sa mga nasyon sa Aprika—sa ibong nin mga pagprohibir, grabeng paglamag, pag-olog-olog, ateistikong propaganda, asin falsong mga sahot. Asin, sa dakol na kamugtakan, yaon pa an pisikal na mga problema, na resulta nin etnikong ralaban asin kakulangan nin mga kinakaipuhan.
Kun maluya an espirituwalidad, “kaipuhan na atubangon an causa kan problema dangan resolberan iyan, na ginagamit an hatol kan Tataramon nin Dios.” May itinaong mga halimbawa sa Biblia. Si Josue inenkaminar na basahon an saiyang kopya kan Ley sa maluya sanang tingog aroaldaw. (Josue 1:8) Kan manompongan an libro kan Ley kan kaaldawan ni Josias, binendisyonan ni Jehova an fiel na pag-aplikar kan mga instruksion kaiyan. (2 Hade 23:2, 3) Naaraman ni Timoteo an banal na mga kasuratan poon sa saiyang pagkaomboy. (2 Timoteo 3:14, 15) An mga taga Berea bako sanang marahay na mga parahinanyog; sinda ibinilang na ‘marahay an kamawotan’ huli ta siniyasat ninda an Kasuratan aroaldaw. (Gibo 17:10, 11) Asin si Jesu-Cristo an pangenot na halimbawa nin saro na nakaaram asin naggamit kan Tataramon nin Dios.—Mateo 4:1-11.
Bilang pagtatapos, mamomoton na sinadol ni Tugang na Jaracz an bagong mga misyonero: “Ngonyan andam na kamo na otobon an saindong asignasyon sa pagmimisyonero. Asin maduman kamo sa ibang nasyon, sa literal na gayong sentido, sa manlaenlaen na parte kan daga. Kun mapaatubang kita sa angat na magdanay na buhay sa espirituwal, kun siring dai niato totogotan an ano man na irayo an satong atension sa pag-otob kan napagdesisyonan niatong gibohon. Kamo maghuhulit na may kaigotan, momotibaron nindo an iba na arogon an saindong pagtubod, asin ipamimibi mi kaiba nindo na an saindong mga tinotokdoan, logod papangyarihon ni Jehova na mabuhay arog kan ginibo nia sa sato. Asin sa siring dakol pa an makakaebitar sa espirituwal na kalamidad na ngonyan nangyayari sa bilog na kinaban. Sinda maiba sa sato na padakol nang padakol an kabilangan sa paggibo kan kabotan ni Jehova. Asin logod bendisyonan kamo ni Jehova sa katuyohan na iyan.”
Pakatapos na basahon kan tsirman an mga pataratara hale sa laen-laen na nasyon sa bilog na kinaban, nagdatong an oras para sa pagtao sa naggradwar na mga estudyante kan saindang mga diploma. Dangan suminunod an pagbasa nin sarong mamomoton na surat nin apresasyon na ginibo kan mga estudyante. Kanigoan an saindang pagpasalamat ki Jehova asin sa saiyang organisasyon para sa espesyal na pagsasanay na inako ninda asin sa kanya-kanyang asignasyon sa sainda bilang mga misyonero na maduman “sa kaporoporohi kan daga”!—Gibo 1:8.
[Kahon sa pahina 29]
Estadistika kan Klase
Bilang nin mga nasyon na irinepresentar: 11
Bilang nin mga nasyon na inasignaran: 24
Bilang nin mga estudyante: 48
Bilang nin mga mag-agom: 24
Promedyong edad: 34
Promedyong taon sa katotoohan: 17
Promedyong taon sa bilog na panahon na ministeryo: 12
[Retrato sa pahina 26]
An Ika-107 Naggradwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.