Mga Graduwado sa Gilead​—“Tunay na mga Misyonero!”

“ANO an misyonero?” An hapot na iyan iinatubang nin sarong editoryal sa peryodiko kaidtong haros apat na dekada na an nakaagi. An kagsurat nangatanosan na an tunay na mga misyonero mga instrumento nin reporma sa sosyedad asin ekonomiya. Alagad, kan Domingo, Marso 5, 1995, sa Assembly Hall kan mga Saksi ni Jehova sa Jersey City, may pagdodoon na itinao an sarong laen na marhay na klase nin simbag. An okasyon? An graduwasyon kan ika-98 klase kan Paadalan sa Biblia kan Watchtower sa Gilead​—sarong paadalan na nagpapadara nin mga misyonero sa bilog na kinaban!

Pakatapos kan pambukas na awit asin pamibi, si Albert D. Schroeder kan Namamahalang Grupo maogmang inako an gabos na 6,430 nag-atender. Sa saiyang pambukas na mga komento, lininaw ni Tugang na Schroeder kun taano an mga graduwado sa Gilead ta napapalaen sa iba na inaapod an saindang sadiri na mga misyonero. Sinabi nia: “An Biblia an pangenot na librong pinag-aadalan sa Gilead.” An mga graduwado sa Gilead sinanay, bako na magtrabaho sa serbisyo sosyal, kundi na magin mga paratokdo kan Tataramon nin Dios. Kaya sinda sana an kuwalipikado na mag-asikaso sa espirituwal na mga pangangaipo kan mga tawo sa ibang nasyon.

An suminunod na mga espiker ipinaliwanag an nagkapirang iba pang kabtang na dian an mga graduwado sa Gilead nagtatao nin patotoo sa pagigin “tunay” na mga misyonero. Si Charles Molohan nagpahayag sa sainda sa temang “Padagos na Mamunga nin Marahay Bilang mga Misyonero.” Nagkokotar sa mga tataramon ni apostol Pablo sa Colosas 1:​9, 10, pinagirumdom ni Tugang na Molohan an mga naggraduwar na an saindang nakaaging limang bulan sa Gilead nakatabang sa sainda na umoswag “sa tamang kaaraman dapit sa Dios.” Ini matabang sa sainda na mamunga sa duwang paagi: pagpaheling kan mga bunga kan espiritu nin Dios asin paghiras sa iba kan mga katotoohan sa Biblia.

Si Daniel Sydlik kan Namamahalang Grupo suminunod na may nakapapepensar na temang “Dai Ikompromiso an Saindong Buhay.” Nasambitan nia an hapot ni Jesus: “Ano an itatao nin tawo bilang karibay kan saiyang kalag?” (Mateo 16:26) Nagkomento si Tugang na Sydlik: “An mga tawo iriniribay an saindang kalag sa mas pasil, mas magian na paagi nin pamumuhay.” Alagad, an mga igwa nin buhay na pagtubod dai puwedeng makikompromiso kun napapaatubang sa mga kasakitan asin pagbalo. An mga tataramon ni Jesus nagpaparisa na an saro dapat na magin andam na ‘tumao,’ an boot sabihon, magsakripisyo, tanganing kamtan an kalag, o buhay, nin saro. An bagong mga misyonero sinadol na itao ki Jehova an saindang bilog na kalag, an saindang pinakamakakaya, sa paglilingkod sa saiya!

Sunod, si William Van de Wall kan Komite kan Departamento sa Paglilingkod nagpahayag sa temang “Si Apostol Pablo​—Sarong Halimbawa na Angay na Arogon.” Si Tugang na Van de Wall nagpaliwanag: “Pinangenotan ni Pablo an gibohon na pagmimisyonero kaidtong enot na siglo.” Kaya angay nanggad, apat na kabtang an itinampok na dian si apostol Pablo nagtao nin marahay na halimbawa para sa mga misyonero ngonyan: (1) an tunay na pagmakolog asin pagkamoot ni Pablo sa mga tawo, (2) an saiyang pagigin epektibo sa ministeryo, (3) an saiyang may kababaan nin boot na pagsayumang ilangkaw an saiyang sadiri, (4) an saiyang dai nin pagdudang pagsarig ki Jehova.

“Togoti si Jehova na Siyasaton Kamo sa Saindong Bagong Asignasyon” an temang ipinaliwanag ni Lyman A. Swingle kan Namamahalang Grupo. Ginagamit an teksto kan aldaw, an Salmo 139:​16, inako ni Tugang na Swingle na, bilang bagong mga misyonero, makakaatubang sinda nin mga problema sa saindang mga asignasyon asin si Jehova an nakakaaram kan mga solusyon. “Dumolok sa saiya,” an sadol nia, “makipag-olay sa saiya kun igwa kamo nin problema. Mansayon kun ano an saiyang kabotan.”

Dangan si John E. Barr kan Namamahalang Grupo nagpahayag sa temang “An Saindong Pagtubod Nagtatalubong Gayo.” (2 Tesalonica 1:3) Sa Lucas 17:​1, satong mababasa na si Jesus nagsabi: “Dai malilikayan na magkaigwa nin mga masisingkogan.” An iba nasingkog huli sa mga personalidad nin mga kapwa misyonero. Alagad pinakosog ni Tugang na Barr an mga misyonero na magkaigwa kan pagtubod na kaipuhan tanganing magin mapagpatawad. Iyo nanggad, sa kontekstong ini na an mga disipulo ni Jesus nakimaherak: “Tawan mo kami nin orog na pagtubod.” (Lucas 17:​2-5) An pagtubod kan mga misyonero puwede man na mabalo nin manlaenlaen na organisasyonal na pagliliwat. “Igwa na daw kita kan pagtubod na akoon an mga ini,” an hapot ni Tugang na Barr, “o iyan daw magigin garo bukid na mga kaolangan?”

Suminunod an sadol kan duwang instruktor sa Gilead. Si Jack Redford sinadol an mga naggraduwar na magpadanay nin positibong kaisipan. Iinestorya nia an dapit sa sarong misyonera na binayaan an saiyang asignasyon bilang reaksion sa soba nin mga kapwa misyonero. Alagad an Kasuratan pinatatanidan kita tumang sa dai kinakaipuhan na pagkaanggot. (Eclesiastes 7:9) “Magkaigwa nin tamang kaisipan,” an sadol nia. “Magin mapagpatawad sa mga sala asin pagkabakong sangkap nin iba na nasa palibot nindo.”

Dangan si U. V. Glass, an rehistrador sa Gilead, naghapot: “Andam daw kamong pangganahan an ‘panahon asin pagkanorongod’”? (Eclesiastes 9:11) “An satong paagi nin pamumuhay perming nag-aagi nin mga pagliliwat,” an komento ni Tugang na Glass, “asin an iba puwedeng magin nanggad makolog na eksperyensia.” May nagkapirang misyonero na dai linalaoman na napaatubang sa pagluya nin salud, helang, asin mga problema sa pamilya, na napipiritan an iba na bayaan an saindang mga asignasyon. “Magin ano man an pagkanorongod,” an sabi ni Tugang na Glass, “aram niato na si Jehova nakakarisa kaiyan asin nagmamakolog. Kun ibubugtak niato an satong pagsarig sa saiya, aram niato na kita magigin mapanggana!”

An pahayag na may titulong “Itinagama Para sa Paglilingkod Bilang Misyonero” an ultimo sa serye nin mga pahayag kan aga. Si Theodore Jaracz kan Namamahalang Grupo sinimbag an hapot na pinalataw sa kapinonan, arin na baga, “Ano an misyonero?” Bilang simbag, ipinaliwanag nia an Gibo kapitulo 13 asin 14 manongod sa gibohon na pagmimisyonero ni Pablo asin Bernabe. Malinaw nanggad, an gibohon na iyan nakasentro, bakong sa pagresolber sa mga problema kan sosyedad, kundi sa ‘pagpahayag kan maogmang bareta.’ (Gibo 13:32) Si Tugang na Jaracz naghapot: “Dai daw kamo minaoyon na ipinaheling ni Pablo asin Bernabe kun maninigong magin arog sa ano an tunay na misyonero?” Dangan an beteranong misyonero na si Robert Tracy kan Mejico inapod na isaysay an nagkapira sa saiya mismong nakaoogma sa pusong mga eksperyensia bilang sarong ebanghelisador.

An programa sa aga uminabot sa pagtatapos kaiyan kan ipanao na ni Tugang na Schroeder an mga diploma sa 48 naggraduwar. Naogma an mga naghihinanyog na madangog an ngaran kan 21 nasyon na inasignaran kan mga misyonero: Barbados, Benin, Bolivia, Costa Rica, Cotê d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Republika nin Sentral Aprika, Senegal, Taiwan, asin Venezuela.

Pakapangodto, nagtiripon giraray an mga presente asin naogma sa buhay na pag-adal sa An Torrengbantayan, na pinangenotan ni Robert P. Johnson kan Departamento sa Paglilingkod. An mga miembro kan ika-98 klase an nagsimbag sa mga hapot. Sinundan ini nin maogmang serye nin mga interbio na pinangenotan kan mga tawohan sa Gilead. Napakosog na marhay an mga nagdadangog kan isaysay kan mga naggraduwar an saindang mga eksperyensia sa langtad asin ipahayag an saindang mga saboot manongod sa saindang mga asignasyon sa ibang nasyon.

Sa laog nin anom may kabangang taon, an Gilead yaon sa mga pasilidad kan Watchtower Society sa Wallkill, Nueva York. Alagad kan Abril 1995, an paadalan ibinalyo sa bagong Sentro nin Edukasyon kan Watchtower sa Patterson, Nueva York. Ano an namatean kan pamilyang Bethel sa Wallkill manongod sa pagliliwat na ini? Sa graduwasyon na ini may nagkapira hale sa Wallkill na ininterbio. An saindang nakatotodok sa boot na mga kapahayagan nagparisa na an mga estudyante sa Gilead nagwalat nin nagdadanay na impresyon sa sainda. Malinaw nanggad, an boluntad na mga lalaki asin babaeng ini tunay na mga misyonero​—mapakumbaba, mapagsakripisyo sa sadiri, odok na may pagmakolog sa pagtabang sa iba.

Sa pagtatapos kan graduwasyon, an gabos na nagdarangog may pagsarig na an Paadalan nin Gilead padagos na mapangganang gigibohon an ginigibo kaiyan sa laog na nin 50 taon​—magprodusir nin tunay na mga misyonero!

[Kahon sa pahina 18]

Estadistika kan Klase:

Bilang nin mga nasyon na irinepresentar: 8

Bilang nin mga nasyon na inasignaran: 21

Bilang nin mga estudyante: 48

Promedyong edad: 32.72

Promedyong taon sa katotoohan: 15.48

Promedyong taon sa pambilog na panahon na ministeryo: 10.91

[Retrato sa pahina 18]

Ika-98 Klase na Naggraduwar sa Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.