Nagsosopay na mga Balos Para sa Sagradong Paglilingkod

Isinaysay Ni Harry Bloor

Mga sanggatos na taon na an nakaagi, an sakong apoon sarong sirradong miembro kan Iglesia Metodista. Saro man siang respetadong predikador na lego, na dakol an idinodonar sa pagsuportar sa dakol na kapilya sa Stoke-on-Trent, an banwaan sa Inglaterra na gibohan nin mga dalipay na lalagan. Dangan nag-agi sia nin pagtios. Tanganing tabangan si Lolo, inareglar kan sakong ama na sia magmanehar nin sadit na turotindahan. An tindahan may lisensia sa pagtinda nin serbesa, asin kan maaraman ini kan mga Metodista, tolos-tolos nindang inekskomulgar si Lolo.

AN SAKONG ama naanggot na marhay asin nagsumpa na nungka na siang makikilabot giraray sa relihion​—asin inotob nia an saiyang sinabi. Sia dating pulis, alagad sa huri sia nagin kagsadiri nin sarong taberna. Kaya ako nagdakula sa tahaw kan mga parong asin aso kan lugar na idto. Dai nagkaigwa nin kabtang an relihion sa buhay ko, alagad nakanood ako na magin matibay sa kadaklan na kawat na arog kan dama. Minsan siring, huli sa amay na impluwensia ni Lolo, napagdanay ko an awad-awad na paggalang sa Biblia, maski kakadikit kan aram ko manongod dian.

Nanodan Ko an Katotoohan sa Biblia

Kan 1923, kan ako 24 anyos, ako nagbalyo pasirangan sa Nottingham asin pinonan ko na mag-ilusyon ki Mary, na nag-iistar sa baryo nin Whetstone na mga 40 kilometros an rayo, sa timog-solnopan nin Leicester. An saiyang ama, si Arthur Rest, dating organista sa sarong lokal na kapilya, alagad ngonyan saro na siang maigot na Estudyante sa Biblia, na apod sa Mga Saksi ni Jehova kaidto. Si Arthur perming ipinakikipag-olay sa sako an manongod sa bago niang manompongan na pagtubod​—na daing gayo nagin mapanggana sa sako. Minsan siring, an sakong interes napukaw kan ipinag-iba nia ako sa lokal na kapilya nin Baptista kan Domingong hapon, Hulyo 13, 1924, tanganing magdangog nin pahayag nin sarong miembro kan parlamento na sarong prominenteng Baptista. An saiyang tema, “An mga Katokdoan ni Pastor Russell Inimbestigaran sa Liwanag kan Kasuratan,” nakapukaw kan sakong interes. Yaon pa sako an mga nota na isinurat ko kaidto.

An mga Baptista nagsayuma sa kahagadan kan Mga Estudyante sa Biblia na simbagon an pag-atake sa saindang mga tinutubod. Ako napikar na marhay kaini asin nagin desidido sa paghanap nin ibang lugar na magibo an pagtiripon na iyan. An kaharaning kamalig nagin an pinakamarahay na lugar. Sinighidan niamo idto, hinale an mga lapat, iginilid an mga makina sa pagginik, asin kami andam na. Nagtipon kami nin 70 tukawan, asin nag-imprenta kami nin mga imbitasyon.

Kan si Frank Freer mag-abot hale sa Leicester sa pagtao kan pahayag, gabos na tukawan okupado na, asin 70 pa an nagtitindog! An malinaw na pangangatanosan ni Frank na hale sa Kasuratan nakaakit sa sako, siring man sa dakol pang presente. Poon kaidto, an sadit na kongregasyon kan Mga Estudyante sa Biblia sa Blaby na harani sa Leicester marikas na nagdakula. Idto man an panahon nin dakulang pagbabago sa sakong buhay​—patin ki Mary. Kan 1925 kaming duwa nagdusay ki Jehova, nagpabautismo, asin nagpakasal.

Espirituwal na mga Bendisyon

Kan suminunod na taon, ninombrahan akong direktor sa paglilingkod para sa kongregasyon nin Blaby. Gusto niamo mag-agom na arogon an ginigibo kan mga colporteur asin magin pambilog na panahon na mga paraebanghelyo, alagad dai naghaloy narisa na dai itotogot kan salud ni Mary na makaya nia an siring kasibot na iskedyul. Minsan maluya an saiyang salud sagkod sa saiyang kagadanan kan 1987, sia nagin marahay na kaibaiba asin ekselenteng ministro na eksperto sa impormal na pagpatotoo asin pagpoon nin mga pag-adal sa Biblia. Kada banggi magsala na nag-aatender kami nin pagtiripon o naghihiras nin mga katotoohan sa Biblia sa samong pagtaraed.

Saro akong inhenyero asin nagtatrabaho sa sarong kompanya na gibohan nin mga makina sa tableriya. Kaiba sa sakong trabaho an pagparabiahe sa Britania, saka sa Pransia, asin si Mary parateng nag-iiba sa sako. An mga pagbiaheng ini nagtatao samo nin oportunidad na makapaghulit nin mahiwas.

Pundasyon Para sa Paghiwas

Kan 1925 nagpatogdok kami nin sarong magayon na edipisyo para sa samong mga pagtiripon sa Blaby, asin hale dian nag-organisar kami nin epektibong sistema nin paghuhulit. Kada Domingong aga, minaarkila kami nin auto na nagdadara samo sa suruwaysuway na baryo asin saradit na banwaan. Mantang pasiring duman an mga parahayag iwinawalat na tanganing maghulit, dangan hinahapit sinda sa pagbuelta kan auto. Sa maarasahas na mga bulan nin tig-init, nagkakaigwa kami nin pag-adal sa Biblia sa hapon nang marhay nin Domingo, na ginagamit an bagong luwas kan An Torrengbantayan. Pagkatapos, pag-alas otso, kami nagtataragboan sa sadan kan Leicester para sa pampublikong pahayag sa luwas. Sarong banggi 200 katawo an nagdangog. An aktibidad na ini nagserbing pundasyon para sa dakol na kongregasyon ngonyan sa laog asin palibot kan Leicester.

Kan 1926 an sarong importanteng marhay na kombension ginibo nin sabay sa Alexandra Palace asin Royal Albert Hall sa Londres. Sa okasyon na iyan, si Joseph F. Rutherford, an presidente kaidto kan Watch Tower Society, ilinuwas an librong Deliverance. An resolusyon na “Sarong Deklarasyon sa mga Namamahala kan Kinaban” asin an mapuersang pampublikong pahayag ni Tugang na Rutherford na “Taano an Pankinaban na mga Kapangyarihan ta Namemeligrong Mapukan​—An Remedyo” inimprenta nin kompleto sa sarong pangenot na peryodiko kan suminunod na aldaw pagkapahayagan kaiyan. Labi sa 10,000 an nakadangog kan lekturang pampubliko, asin pagkatapos 50,000,000 na kopya kan resolusyon an ikinadistribwir sa bilog na kinaban. An kombension na iyan nakaparikas sa gibohon na paghuhulit sa Britania.

Dakulang Kombension kan Panahon nin Guerra

An ikaduwang guerra mundial nagputok kan Setyembre 1939, asin kan 1941 an guerra nasa kasagsagan na. An mga eroplanong pambomba kan Alemania minasakyada aldaw asin banggi, asin hinahale an ilaw sa bilog na nasyon. An pagkakan kulang, asin kun ano an yaon estriktong rinarasyon. An mga lunadan limitadong marhay, minsan an tren. Sa ibong kan garo baga dai mapanggaganahan na mga olang na ini, ginibo niamo an limang aldaw na nasyonal na kombension kan Setyembre 3-7, 1941.

An De Montfort Hall sa Leicester an napili na lugar para sa kombension huli ta an Leicester nasa tahaw kan Inglaterra. Mantang ako nasa negosyo nin tablon, nakatabang ako sa paggibo nin mga karatula sa pagpaisi. Inareglar ko man an lokal na transportasyon para sa mga kombensionista. Paagi sa amay na pagbakal nin tiket asin pagbayad nin sobra sa regular na bayad, nahimo niamo na padagos na magdalagan an trambia sa Leicester dawa Domingo.

Huli ngani ta may mga restriksion sa pagbiahe, an samong paglaom tibaad mga 3,000 na Saksi an makaabot. Imahinaron an kaogmahan kan an sobra sa 10,000 na delegado nagsabi na sinda maatender! Alagad saen daw sinda madagos? An mga siudadano kan Leicester nagin maboot sa pag-imbitar sa dakol na dumagos sa saindang harong. Dugang pa, mga sangribo an nag-istar sa mga tolda na tinindog sa mahiwas na lugar mga 3 kilometros an rayo sa lugar kan kombension. An Kampong Gedeon, na apod niamo dian, napag-orolay-olayan na marhay sa komunidad.

Darakulang puting tolda an inarkila tanganing gamiton para sa mga departamento sa kombension asin matawan nin lugar an darakulang kadaklan na dai na magkaigo sa laog. Kan madeterminaran na sa liwanag kan bulan, an mga tolda puedeng magin target kan mga eroplanong pambomba nin mga Nazi, dali-dali na naggibo nin paagi tanganing dai iyan marisa. An guerra, asin espesyalmente an dai pakikikabtang dian kan mga Saksi, nagin kapurisawan kan publiko. Ginatos na Saksi kan panahon na idto an nasa karsel huli sa saindang basado sa Bibliang paninindogan manongod sa neutralidad.​—Isaias 2:4; Juan 17:16.

An Sunday Pictorial, kan Setyembre 7, 1941, nagbareta: “Nakasosorpresang bagay na makanompong nin 10,000 katawo, an kadaklan hoben, na ginagamit an sarong semana sa pag-orolay manongod sa relihion na dai nasasambitan an guerra, apuera bilang insidental sanang isyu.

“Ako naghapot kun baga an mga Saksi igwa nin mga miembro sa Alemania. Iyo, an sabi sako, asin haros gabos sa sainda, mga 6,000, an yaon sa kampo de konsentrasyon.”

An reporter nagdagdag pa: “Ah, iyo, an mga Nazi man nanggad an enemigo, alagad an mga Saksi kakadikit kan ginigibo manongod sa sainda, apuera sa pagpabakal nin mga pulyeto asin pagdangog nin mga diskurso.”

Sa pankagabsan an mga komento sa peryodiko manongod sa samo negatibo, asin an mga paratumang nagin madahas pa ngani sa mga pagprobar na dai man nagin mapanggana na ribokon an samong kombension. Pero, inadmitir kan Daily Mail nin Londres, na medyo napipiritan sana: “An pagkaorganisar areglado, bakong agresibo, asin episiente.”

Kami pinagsahotan na responsable sa pagkulangkulang nin panindang sigarilyo. Alagad an The Daily Mail nagpaliwanag: “Ni an Leicester o an Nagkokontrol sa Tabako dai puedeng magreklamo na an mga Saksi iyo an nakauubos kan sigarilyo sa Leicester. Sinda dai nagsisigarilyo.” Siring man, an reklamo na an lokal na mga nag-iistar duman naaagawan nin kakanon kan mga Saksi nawara kan ipinaliwanag na dara ninda an kadaklan kan saindang rasyon na pagkakan. Sa katunayan, sa katapusan kan kombension, 150 1.8 kilong tinapay an idinonar sa Impirmarya Real kan Leicester​—awad-awad na kontribusyon kan mga panahon na idto na nagkukulangkulang an pagkakan.

An kombension nagtao nin dakulang pagpaoswag sa espirituwal para sa mga 11,000 na Saksi sa Britania. Sinda naogmang marhay huling mga 12,000 an nag-atender! An mga delegado magayagayang ginibo an daing kaagid na paghuhulit sa tinampo sa Leicester, asin binisita ninda an hararayong baryo na dara an mga pag-aatubang paagi sa ponograpo.

An prinsipal na mga pahayag sa kombension mga irinekord kan nakaaging bulan na mga pahayag na itinao sa limang aldaw na kombension kan Mga Saksi ni Jehova sa St. Louis, Missouri, E.U.A. An irinekord na pahayag ni Tugang na Rutherford na “Mga Aki kan Hade” sarong tampok na kabtang kan kombension. Huli ta bakong posible na importaron an mga kopya kan librong Children na ilinuwas sa St. Louis, sarong espesyal na malugyat an tutob na edisyon an inimprenta kan huri sa Britania. Sarong kopya kaiyan an ipinadara sa gabos na aki na nag-atender sa kombension.

An Napapalaen na Taonan na Miting sa Leicester

Pakalihis kan guerra an pag-oswag kan mga parabalangibog kan Kahadean sa Britania talagang makangangalas! Kan enot na mga taon kan dekada 1980, an kabilangan nin mga kongregasyon sa Leicester nagin sampulo. Dangan ipinaisi samo na napagkaoroyonan kan Namamahalang Grupo kan Mga Saksi ni Jehova na gibohon sa Leicester an taonan na miting kan Watch Tower Bible and Tract Society sa 1983. Bilang paraataman sa siudad kan Leicester, dai naghaloy nagin kalabot ako sa mga pag-andam, kaiba na an pag-arkila giraray kan De Montfort Hall.

Treseng miembro kan Namamahalang Grupo na hale sa opisina prinsipal kan Sosyedad sa Brooklyn an nag-abot para sa okasyon. An total na 3,671 delegado​—na ngonyan hale na sa palibot kan kinaban, asin kadaklan mga gurangan na​—nakapano sa auditoryum. Dagdag pa na 1,500 an nakadangog kan programa sa kaharaning Assembly Hall.

Si Albert D. Schroeder, na paraataman kaidto sa sangang opisina kan Watch Tower Society sa Londres kan panahon kan samong kombension sa Leicester kaidtong may guerra, iyo an nangenot sa taonan na miting na ini. Sa paggirumdom kan kombension kan 1941, si Tugang na Schroeder naghapot: “Pira sa saindo na yaon ngonyan an presente kaidto?” Labing kabanga kan mga nagdadangog an nag-itaas nin kamot. “Waw! Abaang pagkasararo giraray nindo gabos na fiel asin maimbod!” an saiyang kagsing. Tunay na idto dai malilingawan na eksperyensia.

Sa edad na 98, ako naglilingkod pa man giraray bilang sekretaryo sa samong kongregasyon asin padagos na nagtatao nin mga pampublikong payahag, minsan ngani ginigibo ko na iyan ngonyan na nakatukaw. Pagkagadan ni Mary kan 1987, nagpakasal kami ni Bettina, sarong balo na dakol nang taon ming midbid ni Mary. Nagpapasalamat ako huli sa marahayon na pag-ataman sa sako, kapwa sa pisikal asin espirituwal. Sa ibong kan mga limitasyon na dara kan maluyang salud ni Mary asin ngonyan kan sako mismong kagurangan, nasompongan ko na an pagigin sibot sa sagradong paglilingkod pirmeng nagtatao nin nagsosopay na balos.​—1 Corinto 15:58.

[Retrato sa pahina 26]

Andam na makikabtang sa ministeryo kan mga taon nin 1920

[Retrato sa pahina 26]

Mga eksena kaidtong kombension sa Leicester