Bareta kan mga Parabalangibog kan Kahadean
An Pakatagal Nagbubunga nin Bendisyon nin Dios sa Malawi
SI Jose sarong fiel na lingkod ni Jehova. (Hebreo 11:22) Sia saro man na tawo na pambihira an pakatagal. Dawa ngani sia pinasaloiban kan saiya mismong mga tugang, duwang beses na ipinabakal sa pagkaoripon, asin sa huri ikinarsel huli sa falsong mga sahot, si Jose dai pinanluyahan nin boot. Imbes, mapasensia niang tinagalan an mga taon nin kasakitan, na mapakumbabang naghahalat sa bendisyon ni Jehova.—Genesis 37:23-28, 36; 39:11-20.
Kaagid kaiyan ngonyan, an Mga Saksi ni Jehova sa Malawi mapasensiang naghalat sa bendisyon nin Dios. Sa laog nin 26 na taon, an Kristianong mga Saksi na ini nagtagal nin mga pagprohibir kan gobyerno, grabeng pagtumang, asin dakol na karatan. Alagad an saindang pakatagal nagkaigwa nin marahay na bunga!
Kan magkaigwa nin paglamag sa Malawi sa paghinanapos kan 1967, igwa nin mga 18,000 na parahayag kan Kahadean. Imahinara an kagayagayahan kan mga Saksi kan maaraman ninda na an taon nin paglilingkod kan 1997 nagpoon na may bagong pinakahalangkaw na kabilangan na 38,393 na parahayag—labing doble kisa kan magpoon an pagprohibir! Dugang pa, an kabilangan nin mga nag-atender sa 13 “Mga Mensahero nin Diosnon na Katoninongan” na Pandistritong mga Kombension sa Malawi luminabi sa 117,000. Totoong binendisyonan ni Jehova an saindang pagtubod asin pakatagal.
Sarong halimbawa kan bendisyon na ini an eksperyensia nin sarong hoben na lalaki na an ngaran Machaka. Kan akoon ni Machaka an alok na mag-adal kan Biblia kaiba kan mga Saksi ni Jehova, an saiyang mga magurang naanggot na marhay. Sinda nagsabi: “Kun gusto mong magin Saksi, dapat na humale ka digdi sa harong.” Minsan siring, an humang ini dai nakadesganar sa saiya sa pagpadagos kan saiyang pag-adal. Bilang resulta, kinua kan mga magurang ni Machaka an gabos niang gubing. Ibinakal sia nin mas dakol kan mga tugang. Kan naaraman ini kan mga magurang ni Machaka, sinabihan ninda sia: “Kun susuportaran ka kan mga Saksi, dapat na lumayas ka asin duman ka na sa sainda mag-istar.” Pakalihis na konsideraron nin maingat an mga bagay, si Machaka huminale sa harong, asin sarong pamilyang Saksi sa lokal na kongregasyon an nagpadagos sa saiya.
An mga magurang ni Machaka nauyam na marhay kaya nagdesisyon sindang humale sa lugar na idto tangani na biyong lumikay sa mga Saksi. Siempre, si Machaka napurisaw huli kaini, alagad naranga siang marhay kan ipakipag-olay sa saiya kan mga tugang an Salmo 27:10, na nagsasabi: “Kun bayaan ako kan sakong ama asin kan sakong ina, si Jehova mismo an maampon sa sako.”
Pag-abot nin panahon, luminomoy an boot kan mga magurang ni Machaka, asin nagdesisyon siang bumalik sa saindang harong. Minalataw na an determinasyon kan saindang aki na maglingkod ki Jehova nagwalat nin mapuersang epekto sa sainda huli ta gusto man ninda na mag-adal kan Biblia kaiba kan mga Saksi ni Jehova! Inatenderan man ninda an gabos na tolong aldaw na “Mga Mensahero nin Diosnon na Katoninongan” na Pandistritong Kombension, na pakatapos kaiyan napahiro sinda na magsabing: “Tunay nanggad na ini an organisasyon nin Dios.”
Iyo, an pagtumang tibaad nakababalo sa pasensia, alagad an maimbod na mga mensahero nin Dios dai minaontok. Sinda mapusong nagpapadagos, sa pakaaram na “an kahorasaan nagbubunga nin pakatagal; dangan, an pakatagal, nin pagkainooyonan.” (Roma 5:3, 4) An Mga Saksi ni Jehova sa Malawi tama sanang makapapatunay na an pakatagal nagbubunga nin bendisyon nin Dios.