An mga Iglesia Nagbubuyboy

“Ipinabibista kan Papa an Iglesia.” “Inkisisyon Asin Anti-Semitismo​—Iinaandam kan Iglesia an Saiyang Mea Culpa.”a “Mea Culpa Huli sa Holocaust.” “An mga Metodista Naghahagad nin Dispensasyon sa mga Indian kan Solnopan na Estados Unidos.”

NAKABASA na daw kamo nin mga titulo na arog kaini? Garo baga orog na nagigin parate, an mga iglesia inaako an basol asin naghahagad nin dispensasyon sa saindang mga ginibo kan nakaaging mga siglo. An media daing ontok na itinatampok an bagong mga mea culpa kan papa.

Kun an Papa Maghagad nin Tawad

Sa pag-oltanan nin 1980 asin 1996, ‘inako [ni Juan Paulo II] an mga sala kan Iglesia sa kasaysayan o naghagad nin tawad’ kisuerra 94 beses, an sabi kan komentarista sa Batikano na si Luigi Accattoli sa saiyang librong Quando il papa chiede perdono (Kun an Papa Maghagad nin Tawad). Oyon ki Accattoli, “sa Iglesia Katolika, an papa sana an tamang gumibo nin mea culpa.” Asin ginibo nia ini, na nagtataram manongod sa pinakakontrobersial na mga pahina kan kasaysayan nin Katoliko​—an mga Krusada, mga guerra, pagsuportar sa mga diktadura, pagkabaranga sa mga iglesia, anti-Semitismo, mga Inkisisyon, Mafia, asin rasismo. Sa sarong memorandum na ipinadara kan 1994 sa mga kardinal (na ibinibilang kan nagkapira na iyo an pinakamahalagang dokumento kan pontipikado), si Juan Paulo II nagproponer nin “pankagabsan asin milenyal na pagbuyboy nin mga kasalan.”

An nagkapirang prelado nagsunod sa halimbawa kan papa. Kan Disyembre 1994 an peryodiko sa Italia na Il Giornale nagbareta: “Dakol na Amerikanong obispo an nagpaheling sa telebisyon asin naghagad nin tawad sa publiko.” Huli sa ano? Huli sa pagpasadit kan problema nin mga padi na nakikidorog sa aki, na ikinaperwisyo nin dakol na hoben na biktima. Kan Enero 1995 an peryodikong La Repubblica nagbareta manongod sa “sarong kapahayagan na dai pang kaagid sa kasaysayan nin modernong Katolisismo”​—tinawan nin atension an problema dapit sa pagsilensio ni Papa Pio XII may koneksion sa Holocaust. Kan Enero 1995 an iyo man sanang peryodiko nagbareta na an obispado sa Alemania naghagad nin tawad huli sa “dakol na sala” kan mga Katoliko Romano na nagsuportar sa mga krimen kan mga Nazi. An manlaenlaen na iglesiang Protestante pinagkritika man an saindang sadiri.

Taano?

Ineenkaminar kita kan Biblia na maghagad nin tawad kun kita may sala, asin dakol an inoomaw an mga iglesia kun kinikritika ninda an saindang sadiri. (Santiago 5:16) Alagad taano ta ginigibo ini kan mga iglesia? Paano iyan maninigong makaapektar sa satong pagmansay sa sainda?

[Nota sa ibaba]