Mga Oripon nin mga Tawo o mga Lingkod nin Dios?

“AN MGA SAKSI NI JEHOVA minsan paano dapat hangaan.” Siring an pagkasabi kan libro sa Alemania na Seher, Grübler, Enthusiasten (Mga Bisyonaryo, Parahorophorop, Apisyonado). Minsan ngani medyo mapagkritika sa mga Saksi, iyan nag-admitir: “Sa pankagabsan, sinda namumuhay na daing kanawayan, nasa tahaw na grado sa sosyedad. Sinda mahigos patin sadiosan sa saindang trabaho, matoninong na mga siudadano asin onesto sa pagbayad nin buwis. Sinda minalikay sa labi-labing paghanap nin kayamanan. . . . Kaomaw-omaw an saindang disiplina sa mga kombension. An saindang mapagsakripisyong espiritu kapareho kan arin man na ibang relihiosong grupo; kun manongod sa ministeryo sinda nakalalabi sa gabos na iba pa. Alagad an ikinalalabi ninda sa gabos na ibang Kristianong iglesia asin grupo sa satong aldaw iyo an dai nanggad nababaring determinasyon kan kadaklan sa sainda sa pagbalangibog kan saindang mga doktrina sa irarom nin gabos na kamugtakan asin sa atubangan nin gabos na peligro.”a

Sa ibong kan siring na positibong paghusgar, may mga opinyon na naghihingoang ipamidbid an Mga Saksi ni Jehova sa laen na marhay na anggulo. Sa kadaklan na nasyon sa bilog na kinaban, dakol nang dekada na hayag na ginigibo kan mga Saksi an saindang relihiosong mga paglilingkod na daing olang. Minilyon na an nakakabisto sa sainda, iginagalang sinda, asin nag-ooyon na sinda igwa nin diretso na gibohon an saindang relihion. Taano, kun siring, ta igwa pa nin pagduda manongod sa kun siisay an Mga Saksi ni Jehova?

Tibaad an sarong rason sa pagduda iyo na sa dai pa sana nahahaloy dakol na ibang relihiosong grupo an naimbuelto sa pagmaltrato sa aki, lagduan na paghugot, asin mga pagsalakay nin mga terorista. Siempre, an arog kaining mga pagrayo sa tamang dalan yaon minsan saen, bako sanang sa tahaw kaidtong mga relihioso. Minsan siring, kun manongod sa relihion, an dakol nagin mapagduda, an nagkapira antipatiko pa ngani.

Mga Peligro nin Pagsunod sa mga Tawo

An “sekta” tinatawan nin kahulogan bilang “sarong grupo na nagsusunod sa sarong napapalaen na doktrina o sa sarong lider.” Siring man, an kabilang sa sarong “kulto” igwa nin “dakulang debosyon sa sarong persona, ideya, o bagay.” Sa katunayan, an mga miembro kan arin man na relihiosong grupo na makosog na nagsusunod sa tawong mga lider patin sa mga ideya ninda namemeligrong magin mga oripon nin mga tawo. An makosog na relasyon na pirmeng nagsasarig sa lider puedeng sumagkod sa nakararaot na emosyonal patin espirituwal na pagdepende. An peligro nadudugangan kun an saro poon pa sa pagkaaki pinadadakula sa sarong sektaryanong kamugtakan.

An mga nag-iisip nin siring manongod sa sarong relihion nangangaipo nin mapananarigan na impormasyon. An nagkapira tibaad sinabihan na an Mga Saksi ni Jehova kabilang sa relihiosong organisasyon na inooripon an mga miembro kaiyan, ginagamit an autoritaryong pagkontrol sa sainda, sobra an restriksion sa saindang katalingkasan, asin ginigibo sindang mga disidente sa sosyedad sa pankagabsan.

Aram kan Mga Saksi ni Jehova na bakong makatanosan an mga iniisip na ini. Kun siring, inaagda ninda kamo na kamo mismo an magsiyasat. Pakatapos nin maingat na paghorophorop, gumibo kamo kan sadiri nindong konklusyon. An mga Saksi daw mga lingkod nin Dios, siring sa saindang sinasabi, o an totoo mga oripon nin mga tawo? Ano an gikanan kan saindang kosog? An duwang artikulo sa pahina 12-23 matao nin nakakokontentong mga simbag sa siring na mga hapot.

[Nota sa ibaba]