Nagigirumdoman daw Nindo?

Nanompongan daw nindo na may praktikal na halaga sa saindo an dai pa sana nahahaloy na mga luwas kan An Torrengbantayan? Kun siring taano ta dai baloon an saindong memorya paagi sa minasunod na mga hapot?

◻ Ano an pagkakalaen kan “aldaw kan Kagurangnan” asin kan “aldaw ni Jehova”? (Kapahayagan 1:​10; Joel 2:11)

Kabale sa “aldaw kan Kagurangnan” an kaotoban kan 16 na bisyon na ilinadawan sa Kapahayagan kapitulo 1 sagkod 22 asin an pundamental na mga pangyayari na ihinula ni Jesus bilang simbag sa hapot kan saiyang mga disipulo manongod sa tanda kan saiyang presensia. Bilang kulminasyon kan aldaw kan Kagurangnan, biglang maabot an makangingirhat na aldaw ni Jehova kun hokoman na nia an marigsok na kinaban ni Satanas. (Mateo 24:​3-​14; Lucas 21:11)​—12/15, pahina 11.

◻ Ano an nagkapirang marahayon na kabtang kan Biblia ni Makarios?

An ngaran na Jehova minalataw nin labi sa 3,500 na beses sa Biblia ni Makarios. An sarong nag-espesyalisar sa Rusong babasahon na panrelihion nagsabi: “[An] traduksion nagsususog sa tekstong Hebreo, asin an lenguahe kan traduksion dalisay asin maninigo sa materyal.”​—12/15, pahina 25, 27.

◻ Ano an “katotoohan” na sinabi ni Jesus na bubutasan kita? (Juan 8:32)

Sa pagsabing “katotoohan,” an boot sabihon ni Jesus iyo an impormasyon na ipinasabong nin Dios​—nangorogna an impormasyon mapadapit sa kabotan nin Dios—​na prineserbar sa Biblia.​—1/1, pahina 3.

◻ Sairisay an Jehu asin Jonadab sa presenteng aldaw?

Si Jehu naglaladawan ki Jesu-Cristo, na irinerepresentar sa daga kan “Israel nin Dios,” an linahidan na mga Kristiano. (Galacia 6:​16; Kapahayagan 12:17) Kun paanong si Jonadab nagluwas tanganing sabaton si Jehu, an “dakulang kadaklan” hale sa mga nasyon nagluwas tanganing suportaran an daganon na mga representante ni Jesus. (Kapahayagan 7:​9, 10; 2 Hade 10:15)​—1/1, pahina 13.

◻ Ano an boot sabihon kan ‘paglakaw sa kaibanan nin Dios’? (Genesis 5:​24; 6:9)

Ini nangangahulogan na an mga naggigibo kaiyan, siring baga ki Enoc asin Noe, guminawe sa paagi na nagtaong ebidensia nin makosog na pagtubod sa Dios. Ginibo ninda an ipinagboot sa sainda ni Jehova asin giniyahan an saindang buhay kaoyon sa kun ano an aram ninda manongod sa saiya sa saiyang tratamiento sa katawohan.​—1/15, pahina 13, 14.

◻ Taano an saro ta maninigong magplano nin patienot enkaso sia magadan?

Sa sarong sentido, an paggibo nin siring na mga areglo regalo nin saro sa pamilya nia. Nagpapaheling iyan nin pagkamoot. Iyan nagpapatunay sa pagmawot na ‘magsustento sa mga kairiba nia sa harong’ maski mayo na sia. (1 Timoteo 5:8)​—1/15, pahina 22.

◻ Ano an nagibo kan “daan na tipan”? (2 Corinto 3:14)

Iyan nagtao nin mga patanaw sa ngapit kan bagong tipan asin, paagi sa paorootrong mga pag-atang kaiyan, ipinaheling kaiyan an grabeng pangangaipo na balukaton an tawo sa kasalan asin kagadanan. Iyan “paratokdo na minagiya pasiring ki Cristo.” (Galacia 3:24)​—2/1, pahina 14.

◻ Sa anong mga paagi na an bagong tipan daing katapusan? (Hebreo 13:20)

Primero, bakong arog kan tipan nin Ley, iyan dai noarin man sasalidahan. Ikaduwa, an mga resulta kan pagpunsionar kaiyan permanente. Asin ikatolo, an daganon na mga sakop kan Kahadean nin Dios padagos na makikinabang sa areglo kan bagong tipan sagkod sa Milenyo.​—2/1, pahina 22.

◻ Anong mga pakinabang an minagikan sa pagigin mapagpasalamat?

An init na naeeksperyensiahan nin saro huli sa pagigin mapagpasalamat gikan sa puso nagkokontribwir sa saiyang kaogmahan asin katoninongan. (Ikomparar an Talinhaga 15:​13, 15.) Bilang positibong kualidad, an pagpasalamat nagpoprotehir sa saro tumang sa negatibong mga saboot na siring kan kaanggotan, pag-imon, asin paghinanakit.​—2/15, pahina 4.

◻ Sa anong mga tipan dinara an mga pinaniaki sa espiritu?

Sa bagong tipan, na ginibo ni Jehova sa mga miembro kan espirituwal na Israel, asin an tipan para sa Kahadean, na ginibo ni Jesus sa saiyang linahidan na mga parasunod. (Lucas 22:​20, 28-​30)​—2/15, pahina 16.

◻ Ano an tolong dakulang kapiestahan na dian pinagbotan an mga Israelita na umatender?

An Kapiestahan kan Tinapay na Mayo nin Lebadura, pakatapos tolos kan Paskua nin Nisan 14; an Kapiestahan nin mga Semana, sa ika-50 aldaw poon Nisan 16; asin an Kapiestahan nin Pagsaray, o Kapiestahan nin mga Payag-Payag, sa ikapitong bulan. (Deuteronomio 16:​1-​15)​—3/1, pahina 8, 9.

◻ Taano ta sarong pribilehio an pag-atender sa Kristianong mga pagtiripon?

Si Jesus nagsabi: “Kun saen an duwa o tolo na nagkakatiripon sa ngaran ko, yaon ako sa tanga ninda.” (Mateo 18:​20; 28:20) Siring man, sarong mahalagang paagi kan espirituwal na pagpakakan an mga pagtiripon kan kongregasyon asin mas dakulang mga pagtiripon. (Mateo 24:45)​—3/1, pahina 14.

◻ Ano an ginikanan kan ngaran na Nimrod?

An nagkapirang intelektuwal nagkakapareho an opinyon na an ngaran na Nimrod bakong an ngaran na itinao kan sia mamundag. Imbes, iniisip ninda na iyan an ngaran na itinao sa huri tanganing tumama sa saiyang rebelyosong ugale pakalihis na iyan mahayag.​—3/15, pahina 25.

◻ Gurano kaimportante an pamilya sa sosyedad nin tawo?

An pamilya sarong pangangaipo nin tawo. Ipinaheheling kan kasaysayan na mantang an areglo nin pamilya luway-luway na nararaot, an puersa kan mga komunidad asin nasyon nagluluya. Kaya an pamilya igwa nin direktang epekto sa karigonan kan sosyedad asin sa ikararahay kan mga aki asin kan mga kapag-arakian sa ngapit.​—4/1, pahina 6.

◻ Ano an tolong prueba na an Biblia Tataramon nin Dios?

(1) Iyan eksakto sa siensia; (2) iyan igwa nin dai apektado nin panahon na mga prinsipyo na praktikal para sa modernong pamumuhay; (3) iyan igwa nin espesipikong mga hula na naotob, siring sa pinatutunayan nin mga katotoohan sa kasaysayan.​—4/1, pahina 15, 16.