Paghokom na Ginibo sa Hababang Kaplanodohan kan Desisyon
“An mga nasyon . . . magturukad sa hababang kaplanodohan ni Josafat; huli ta duman ako matukaw tanganing hokoman an gabos na nasyon.”—JOEL 3:12.
1. Taano ta may naheheling si Joel na mga kadaklan na nagkatiripon sa “hababang kaplanodohan kan desisyon”?
“IGWA nin mga kadaklan, mga kadaklan sa hababang kaplanodohan kan desisyon”! An nakapupukaw sa boot na mga tataramon na iyan satong mababasa sa Joel 3:14. Taano ta nagkatiripon an mga kadaklan na ini? Minasimbag si Joel: “An aldaw ni Jehova harani na.” Iyan an dakulang aldaw nin pagbindikar ki Jehova—an aldaw para sa paghokom sa kaburunyogan na nagsikwal sa naestablisar nang Kahadean nin Dios na pinamamahalaan ni Cristo Jesus. Sa katapustapusi, bubutasan na kan “apat na anghel” sa Kapahayagan kapitulo 7 an “apat na doros kan daga,” na magbubunga kan “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.”—Kapahayagan 7:1; Mateo 24:21.
2. (a) Taano an lugar na gigibohan kan paghokom ni Jehova ta angay na apodon na “hababang kaplanodohan ni Josafat”? (b) Ano an nagin tamang reaksion ni Josafat kan sinasalakay?
2 Sa Joel 3:12, an lugar na gigibohan kan paghokom na ini inaapod na “hababang kaplanodohan ni Josafat.” Angay nanggad, durante nin maunos na panahon sa kasaysayan nin Juda, si Jehova naggibo nin paghokom duman para sa marahay na si Hadeng Josafat, na an ngaran nangangahulogan “Si Jehova Hokom.” An pag-estudyar sa nangyari kan panahon na idto matabang sa sato na mas masabotan an mangyayari sa satong panahon. An rekord manonompongan sa 2 Cronica kapitulo 20. Sa bersikulo 1 kan kapitulong iyan, mababasa ta na “an mga aki ni Moab asin ni Amon patin kaiba ninda an nagkapira sa mga Amonim nagduruman sa pakilaban tumang ki Josafat.” Ano an nagin reaksion ni Josafat? Ginibo nia an pirmeng ginigibo nin fiel na mga lingkod ni Jehova sa panahon nin krisis. Nagdolok sia ki Jehova sa paghagad nin giya, na odok sa boot na namimibi: “O samuyang Dios, dai ka daw maghohokom sa sainda? Huli ta kami mayo nin kosog sa atubangan kan dakulang kadaklan na ini na minadatong tumang sa samo; asin kami mismo dai nakaaaram kun ano an dapat niamong gibohon, alagad an samong mga mata nasa saimo.”—2 Cronica 20:12.
Sinimbag ni Jehova an Sarong Pamibi
3. Anong mga instruksion an itinao ni Jehova sa Juda kan inaatubang ninda an pagsalakay kan kataraed na nasyon?
3 Mantang “an gabos na gikan ki Juda nagtitirindog sa atubangan ni Jehova, minsan an saindang saradit na aki, an saindang agom na babae asin an saindang mga aking lalaki,” itinao ni Jehova an saiyang simbag. (2 Cronica 20:13) Kun paanong ginagamit nia an saiyang “fiel asin madonong na oripon” ngonyan, an dakulang Paradangog nin pamibi tinawan man nin kakayahan an Levitang propeta na si Jahaziel na itao an Saiyang simbag sa nagkakatiripon. (Mateo 24:45) Satong mababasa: “Uya an sabi ni Jehova sa saindo, ‘Dai kamo matakot o masindakan huli sa dakulang kadaklan na ini; huli ta bakong saindo an laban, kundi sa Dios. . . . Dai kamo kaipuhan na makipaglaban sa panahon na ini. Tindog kamo sa saindong puesto, dai kamo maghiro asin helingon an pagliligtas ni Jehova sa saindo. . . . Dai kamo matakot o masindakan. Nuodma lumuwas kamo tumang sa sainda, asin ta si Jehova maiba sa saindo.’”—2 Cronica 20:15-17.
4. Sa anong paagi hinagad ni Jehova na an saiyang banwaan magin aktibo, bakong daing hiro-hiro, kan inaatubang ninda an angat kan kaiwal?
4 An hinagad ni Jehova ki Hadeng Josafat asin sa saiyang banwaan bako sanang magtukawtukaw, na naghahalat nin milagrosong pagliligtas. Kaipuhan sindang gumibo nin inisyatiba sa pag-atubang sa angat kan kaiwal. An hade asin ‘an gabos na gikan ki Juda, minsan an saindang saradit na aki, an saindang agom na babae asin an saindang mga aking lalaki,’ nagpahayag nin makosog na pagtubod kan sinda makinuyog na nagmata nin amay pagkaaga asin nagmartsa tanganing hampangon an nananalakay na kadaklan. Sa dalan, an hade padagos na nagtao nin teokratikong instruksion asin pamparigon sa boot, na sinasadol sinda: “Pagtubod kamo ki Jehova na saindong Dios tangani na kamo mabuhay nin halawig. Pagtubod kamo sa saiyang mga propeta asin sa siring magin kamong mapanggana.” (2 Cronica 20:20) Pagtubod ki Jehova! Pagtubod sa saiyang mga propeta! Iyan an nagdedeterminar kan kapangganahan. Ngonyan man, mantang kita nagpapadagos na aktibo sa paglilingkod ki Jehova, nungka logod kitang magduda na pangyayarihon niang magin mapanggana an satong pagtubod!
5. Paanong aktibo an Mga Saksi ni Jehova ngonyan mantang inoomaw ninda si Jehova?
5 Arog kan mga taga-Judea kan kaaldawan ni Josafat, kita dapat na ‘mag-omaw ki Jehova, huli ta sagkod sa panahon na daing sagkod an saiyang mamomoton na kabootan.’ Paano ta itinatao an pag-omaw na ini? Paagi sa maigot na paghuhulit niato kan Kahadean! Kun paanong an mga taga-Judeang idto ‘pinonan an magayagayang kurahaw asin pag-omaw,’ iniibanan ta man nin gibo an satong pagtubod. (2 Cronica 20:21, 22) Iyo, magpaheling kita nin kaparehong primera klaseng pagtubod mantang si Jehova nag-aandam na humiro tumang sa saiyang mga kaiwal! Minsan ngani an dalan garo baga halawig, magdesidir kita na makatagal, aktibo sa pagtubod, siring sa ginigibo kan saiyang mapangganang banwaan sa maribok na mga lugar sa daga ngonyan. Sa nagkapirang lugar na grabe an paglamag, kadahasan, makuring kakulangan nin kakanon, asin masakit na mga kamugtakan sa ekonomiya, an fiel na mga lingkod nin Dios nakaeeksperyensia nin pambihirang mga resulta, sono sa report kan 1998 Yearbook of Jehovah’s Witnesses.
Iliniligtas ni Jehova an Saiyang Banwaan
6. Paano nakatatabang an makosog na pagtubod na papagdanayon kitang maimbod ngonyan?
6 An maraot na mga nasyon sa palibot kan Juda naghingoang sakopon an banwaan nin Dios, alagad may arogan na pagtubod na an isinimbag kan mga lingkod ni Jehova pag-awit nin mga pag-omaw sa saiya. Puede tang ipahayag an kaparehong pagtubod ngonyan. Paagi sa pagpano sa satong buhay nin mga gibo nin pag-omaw ki Jehova, pinakokosog ta an satong espirituwal na pangalasag, na dai tinotogotan na makalagbas an tusong mga pakana ni Satanas. (Efeso 6:11) Oolangon kan makosog na pagtubod an sugot na malingling sa hababaon na klaseng pag-aling-aling, materyalismo, asin pagkaindiperente na iyo an midbidan kan naghihingagdan na kinaban sa palibot niato. An daing kadaogan na pagtubod na ini papagdadanayon kitang naglilingkod nin maimbod kaiba kan “fiel asin madonong na oripon” mantang kita padagos na pinakakakan sa espirituwal “sa igong panahon.”—Mateo 24:45.
7. Ano an reaksion kan Mga Saksi ni Jehova sa laen-laen na pagsalakay tumang sa sainda?
7 An satong pagtubod na basado sa Biblia pakokosogon kita na manindogan nin marigon tumang sa kampanya nin pagkaongis na pinoprobokar kan mga nagpapaheling kan espiritu kan “maraot na oripon” sa Mateo 24:48-51. Inootob an hulang ini sa pambihirang paagi, an mga apostata aktibong nagsasabwag nin mga kaputikan asin propaganda sa dakol na kadagaan ngonyan, na nakikipagkasapakat pa ngani sa mga may katongdan nin autoridad sa tahaw nin mga nasyon. Kun saen angay, an Mga Saksi ni Jehova minahiro, siring kan ilinadawan sa Filipos 1:7, na ‘idinedepensa saka legal na pinatutunayan an maogmang bareta.’ Halimbawa, kan Setyembre 26, 1996, sa sarong kaso hale sa Grecia, an siyam na huwes kan Korte Para sa mga Diretso nin Tawo sa Europa, sa Strasbourg, nagkakasararong pinatunayan liwat na “an Mga Saksi ni Jehova nakakasono sa kahulogan nin ‘midbid na relihion,’” na may diretsong magkaigwa nin katalingkasan sa pag-iisip, konsensia, asin paniniwala, asin diretsong ipahayag an saindang pagtubod. Kun dapit sa mga apostata, an paghokom nin Dios nagsasabi: “Nangyari sa sainda an kasabihan kan totoong talinhaga: ‘An ayam minabalik sa sadiring suka, asin an orig na nalinigan sa paglabog sa lamaw.’”—2 Pedro 2:22.
8. Kan kaaldawan ni Josafat, paano hinokoman ni Jehova an mga kaiwal kan Saiyang banwaan?
8 Kaidtong kaaldawan ni Josafat, hinokoman ni Jehova an mga gustong kolgan an Saiyang banwaan. Satong mababasa: “Si Jehova nagbugtak nin mga lalaking man-aabat tumang sa mga aki ni Amon, Moab asin kan mabukid na rehion nin Seir na minalaog sa Juda, asin tinira ninda an lambang saro. Asin an mga aki ni Amon asin Moab tuminindog tumang sa mga tagamabukid na rehion nin Seir tangani na laglagon sinda asin pohoon sinda; asin kan matapos na ninda an mga taga-Seir, tinabangan ninda an lambang saro na laglagon an sadiring kaiba.” (2 Cronica 20:22, 23) An lugar na iyan nginaranan kan mga taga-Judea na Hababang Kaplanodohan nin Beraca, na an Beraca nangangahulogan “Bendisyon.” Sa mga panahon man sa presente, an paghokom ni Jehova sa saiyang mga kaiwal magbubunga nin dakulang mga bendisyon para sa saiyang sadiring banwaan.
9, 10. Sairisay an nagpaheling na maninigo sinda sa bakong paborableng paghokom ni Jehova?
9 Tibaad ihapot niato, Sairisay sa presenteng mga panahon an maako nin bakong paborableng paghokom hale ki Jehova? Tanganing makua an simbag sa hapot na iyan, kaipuhan tang balikan an hula ni Joel. An Joel 3:3 nagtataram dapit sa mga kaiwal kan saiyang banwaan na ‘nagtatao kan aking lalaki para sa sarong patotot, asin an aking babae ipinabakal ninda para sa arak.’ Iyo, an pagheling ninda sa mga lingkod nin Dios hababaon kisa sa sainda, na an halaga kan saindang mga aki kapareho sana kan bayad sa patotot o kan kantidad nin sarong pitsel nin arak. Maninimbag sinda dian.
10 Maninigo man na hokoman an mga naggigibo nin espirituwal na pagpapatotot. (Kapahayagan 17:3-6) Asin nangorognang kulpable an mga nagtutulod sa politikal na mga kapangyarihan na lamagon an Mga Saksi ni Jehova asin olangon an saindang aktibidad, siring sa ginigibo kan pirang parasutsut na mga namomoon sa relihion sa Sirangan na Europa sa nakaagi pa sanang mga panahon. Ipinahahayag ni Jehova an saiyang determinasyon na humiro tumang sa siring na mga paragibo nin karatan.—Joel 3:4-8.
“Santipikara an Ralaban!”
11. Paano inaangat ni Jehova an saiyang mga kaiwal sa ralaban?
11 Sunod, inaapodan ni Jehova an saiyang banwaan na ibalangibog an sarong angat sa mga nasyon: “Santipikara an ralaban! Pukawa an makokosog! Paraniha sinda! Pasakata sinda, an gabos na lalaking parapakilaban!” (Joel 3:9) Pagdeklarar ini nin daing kaagid na ralaban—matanos na ralaban. An maimbod na mga Saksi ni Jehova nananarig sa espirituwal na mga armas mantang inaatubang ninda an putik na mga propaganda, na kinokontra nin katotoohan an kaputikan. (2 Corinto 10:4; Efeso 6:17) Sa dai na mahahaloy, sasantipikaron nin Dios an “ralaban kan dakulang aldaw nin Dios na Makakamhan sa gabos.” (Kapahayagan 16:14) Hahaleon kaiyan sa daga an gabos na nagtutumang sa soberaniya nin Dios. An saiyang banwaan digdi sa daga dai pisikal na makikikabtang dian. Sa literal asin piguratibong paagi, ‘dinaragopdop ninda an mga espada na magin tarom nin arado asin an mga budyak na magin mga sanggot.’ (Isaias 2:4) Bakong arog kaini, inaangat ni Jehova an nagkokontrang mga nasyon na gibohon an kabaliktaran: “Giboha nindong espada an saindong mga tarom nin arado asin garod an saindong mga sanggot.” (Joel 3:10) Inaagda nia sinda na gamiton sa ralaban an gabos nindang makinang panguerra asin modernong mga armamento. Alagad dai sinda manggagana, huli ta ki Jehova an ralaban asin kapangganahan!
12, 13. (a) Maski ngani tapos na an Malipot na Guerra, paano ipinaheling kan dakol na nasyon na sagkod ngonyan sinda andam na makiguerra? (b) Sa ano bakong andam an mga nasyon?
12 Kaidtong enot na mga taon nin 1990, an mga nasyon nagdeklarar na tapos na an Malipot na Guerra. Sa bagay na iyan, nakamtan daw an pangenot na pasohan kan Naciones Unidas na katoninongan asin katiwasayan? Dai nanggad! Ano an sinasabi sa sato kan mga pangyayari sa Burundi, Demokratikong Republika nin Congo, Iraq, Liberia, Rwanda, Somalia, asin dating Yugoslavia? Sa pagkasabi kan Jeremias 6:14, sinda nagsasabi: “‘Igwa nin katoninongan! Igwa nin katoninongan!’ mantang mayo man nin katoninongan.”
13 Minsan ngani puminondo na an biglang ralaban sa nagkapirang lugar, an mga miembrong nasyon kan NU sagkod ngonyan nagdidinaraogan sa paggibo nin komplikadong mga armas na panguerra. An nagkapira padagos na nagmamantener nin reserbang suplay nin mga armas nuklear. An iba naggigibo nin mga armas na kemikal o bakteryolohiko para sa lagdoan na paglaglag. Mantang an mga nasyon na iyan nagtitiripon sa simbolikong lugar na inaapod Armagedon, inaangat nia sinda: “Kun manongod sa maluya, sabihon nia: ‘Ako makosog na tawo.’ Tawan an saindong tabang asin madia, kamo gabos na nasyon sa palibot, asin pagtiripon kamo.” Dangan nakitumoy si Joel paagi sa saiyang sadiring pakiolay: “Sa lugar na iyan, O Jehova, daraha an saimong makokosog.”—Joel 3:10, 11.
Pinoprotehiran ni Jehova an mga Sadiri Nia
14. Sairisay an makokosog ni Jehova?
14 Sairisay an makokosog ni Jehova? Mga 280 beses sa Biblia, an tunay na Dios inaapod na “Jehova nin mga hukbo.” (2 Hade 3:14) An mga hukbong ini iyo an mga anghel sa langit na pirmeng andam na gibohon an ipagboot sa sainda ni Jehova. Kan hingoahon kan mga Sirio na dakopon si Eliseo, sa katapustapusi binuklat ni Jehova an mga mata kan surugoon ni Eliseo tanganing maheling nia kun taano sinda ta dai magigin mapanggana: “Uya! an mabukid na rehion pano-pano nin mga kabayo asin karuwaheng panlaban na kalayo sa palibot ni Eliseo.” (2 Hade 6:17) Sinabi ni Jesus na puede kutana siang humagad sa saiyang Ama nin “labi sa kagduwang hukbo nin mga anghel.” (Mateo 26:53) Ilinaladawan an pangangabayo ni Jesus tanganing maghokom sa Armagedon, an Kapahayagan nagsasabi: “An mga hukbo na yaon sa langit nagsusurunod sa saiya na nangangabayo sa maputing mga kabayo, asin sinda nagugubingan nin maputi, malinig, pinong lino. Asin sa saiyang ngoso nagluluwas an sarong matarom na halabang espada, tanganing ipanlugad nia sa mga nasyon, asin sia magpapastor sa sainda paagi sa sogkod na batbat. Binabatayan man nia an pugaan nin ubas kan kaanggotan kan kabangisan nin Dios na Makakamhan sa gabos.” (Kapahayagan 19:14, 15) An simbolikong pugaan nin ubas na iyan ilinaladawan sa malinaw na marhay na mga termino bilang an “dakulang pugaan nin ubas kan kaanggotan nin Dios.”—Kapahayagan 14:17-20.
15. Paano ilinaladawan ni Joel an pakikilaban ni Jehova tumang sa mga nasyon?
15 Paano, kun siring, sinisimbag ni Jehova an pakiolay ni Joel na darahon an sadiring makokosog nin Dios? Iyan paagi sa klaro an pagkaladawan na mga tataramon na ini: “Magmarata an mga nasyon asin magturukad sa hababang kaplanodohan ni Josafat; huli ta duman ako matukaw tanganing hokoman an gabos na nasyon sa palibot. Tigpasan an kagot, ta hinog na an anihon. Madia kamo, hilig kamo, ta an pugaan nin ubas pano na. Naglilipwas an mga tangke kan pugaan; huli ta dakol an saindang karatan. Igwa nin mga kadaklan, mga kadaklan sa hababang kaplanodohan kan desisyon, ta an aldaw ni Jehova harani na sa hababang kaplanodohan kan desisyon. An aldaw asin bulan madiklom nanggad, asin an mismong mga bitoon sa katotoohan hahaleon an saindang liwanag. Asin hale sa Sion si Jehova mag-uungal, asin hale sa Jerusalem ipadadangog nia an saiyang tingog. Asin magkukunogkunog an langit asin daga.”—Joel 3:12-16.
16. Sairisay an magigin kabale sa mga hohokoman ni Jehova?
16 Kun paanong segurado an kahulogan kan ngaran na Josafat na “si Jehova Hokom,” segurado man na an Dios, si Jehova, lubos na ibibindikar an saiyang soberaniya kun sia maghokom na. Ilinaladawan kan hula an mga maako nin bakong paborableng paghokom bilang “mga kadaklan, mga kadaklan sa hababang kaplanodohan kan desisyon.” An siisay man na natatada pang paradepensa nin falsong relihion makakabilang sa mga kadaklan na iyan. Kabale man idtong mga ilinaladawan sa ikaduwang Salmo—an mga nasyon, mga banwaan, mga hade kan daga, asin haralangkaw na opisyal—na mas pinili an marigsok na palakaw kan kinaban na ini kisa sa ‘paglilingkod ki Jehova na may takot.’ An mga ini habong “humadok sa aki.” (Salmo 2:1, 2, 11, 12) Dai ninda rinerekonoser si Jesus bilang asosyadong Hade ni Jehova. Dugang pa, magigin kabale sa mga kadaklan na tinandaan para sa kalaglagan an gabos na tawo na hohokoman kan mamuraway na Hadeng iyan bilang “mga kanding.” (Mateo 25:33, 41) Pagdatong kan itinalaan na panahon ni Jehova na mag-ungal hale sa langitnon na Jerusalem, an saiyang nombradong Hade nin mga hade mangangabayo tanganing gibohon an paghokom na iyan. Siertong magkukunogkunog an langit asin daga! Minsan siring, sinisierto sa sato: “Si Jehova magigin pailihan kan saiyang banwaan, asin kuta para sa mga aki ni Israel.”—Joel 3:16.
17, 18. Sairisay an ipinamimidbid bilang mga matatadang buhay sa dakulang kahorasaan, asin anong mga kamugtakan an kakamtan ninda?
17 Ipinamimidbid kan Kapahayagan 7:9-17 an mga matatadang buhay sa dakulang kahorasaan bilang “sarong dakulang kadaklan” na kompuesto kan mga naggigibo nin pagtubod sa nakatutubos na puersa kan dugo ni Jesus. An mga ini poprotehiran sa aldaw ni Jehova, mantang an nagtitiripon na mga kadaklan sa hula ni Joel hohokoman sa bakong paborableng paagi. Sinasabi ni Joel sa mga matatadang buhay: “Kamo makamimidbid na ako si Jehova na saindong Dios, na nag-eerok sa Sion na sakuyang banal na bukid,” an langitnon na istada ni Jehova.—Joel 3:17a.
18 Dangan ipinaaaram sa sato kan hula na an sakop kan langitnon na Kahadean nin Dios “kaipuhan na magin banal na lugar; asin kun mapadapit sa mga tagaibang banwaan, sinda dai na maagi sa saiya.” (Joel 3:17b) Sa langit asin sa daganon na rona kan langitnon na Kahadean na iyan, dai magkakaigwa nin mga tagaibang banwaan, huli ta an gabos magkakasararo sa dalisay na pagsamba.
19. Paano ilinaladawan ni Joel an paraisong kaogmahan kan banwaan nin Dios ngonyan?
19 Maski ngonyan, nangingibabaw an abundang katoninongan sa tahaw kan banwaan ni Jehova digdi sa daga. May pagkasararo na ibinabalangibog ninda an saiyang mga paghokom sa labing 230 kadagaan asin sa labing 300 na laen-laen na lenguahe. An saindang prosperidad magayonon na ihinula ni Joel: “Mangyayari sa aldaw na iyan na an kabukidan manonoro sa mahamis na arak, asin an mismong mga bolod bobolosan nin gatas, asin an mismong mga sapa nin Juda gabos bobolosan nin tubig.” (Joel 3:18) Iyo, padagos na uulaan ni Jehova an saiyang mga paraomaw digdi sa daga nin nagsosopay na magayagayang mga bendisyon asin prosperidad patin nagkokosog na bolos nin mahal na marhay na katotoohan. An soberaniya ni Jehova lubos nang nabindikar sa hababang kaplanodohan kan desisyon, asin magsosopay an kagayagayahan mantang sia daing sagkod na nag-eerok sa kaibahan kan saiyang binalukat na banwaan.—Kapahayagan 21:3, 4.
Nagigirumdoman daw Nindo?
◻ Paano ilinigtas ni Jehova an saiyang banwaan kaidtong kaaldawan ni Josafat?
◻ Siisay an hinohokoman ni Jehova na maninigo sa kalaglagan sa “hababang kaplanodohan kan desisyon”?
◻ Sairisay an makokosog nin Dios asin ano an magigin kabtang ninda sa pangultimong ralaban?
◻ Anong mga kaogmahan an nakakamtan kan fiel na mga parasamba?
[Retrato sa pahina 21]
Sinabihan an Juda: ‘Dai kamo matakot huli ta bakong saindo an laban kundi sa Dios’
[Retrato sa pahina 23]
Inaangat ni Jehova an saiyang mga kaiwal na ‘gibohon na espada an saindang mga tarom nin arado’
[Retrato sa pahina 24]
Ipinamimidbid kan Biblia an sarong dakulang kadaklan nin mga matatadang buhay sa dakulang kahorasaan