‘Padagos Kamong Maglakaw na Kasaro ni Cristo’
“Kun siring, mantang inako nindo si Cristo Jesus na Kagurangnan, padagos kamong maglakaw na kasaro nia.”—COLOSAS 2:6.
1, 2. (a) Paano ilinaladawan kan Biblia an buhay nin fiel na paglilingkod ni Enoc ki Jehova? (b) Paano kita tinatabangan ni Jehova na maglakaw sa kaibanan nia, siring sa ipinaririsa kan Colosas 2:6, 7?
NAPAGMASDAN na daw nindo an sarong sadit na aking lalaki na naglalakaw sa kaibanan kan saiyang ama? Inaarog kan aki an kada hiro kan saiyang ama, na nababanaag sa saiyang lalauogon an paghanga; inaalalayan sia kan ama, na an saiya mismong lalauogon naoogma na may pagkamoot asin pag-oyon. Angay nanggad, an deskripsion nanggad na iyan an ginagamit ni Jehova sa pagladawan kan buhay nin fiel na paglilingkod sa saiya. Halimbawa, an Tataramon nin Dios nagsasabi na an fiel na tawong si Enoc “nagpadagos na maglakaw sa kaibanan kan [tunay] na Dios.”—Genesis 5:24; 6:9.
2 Kun paanong tinatabangan nin sarong makonsiderasyon na ama an saiyang sadit na aki sa paglakaw sa kaibanan nia, tinawan kita ni Jehova kan pinakamarahay na posibleng tabang. Sinugo nia an saiyang Aking bugtong digdi sa daga. Sa lambang lakad kan saiyang bilog na buhay digdi sa daga, ipinabanaag ni Jesu-Cristo sa sangkap na paagi an saiyang langitnon na Ama. (Juan 14:9, 10; Hebreo 1:3) Kaya tanganing makalakaw sa kaibanan nin Dios, kaipuhan kitang maglakaw sa kaibanan ni Jesus. Si apostol Pablo nagsurat: “Kun siring, mantang inako nindo si Cristo Jesus na Kagurangnan, padagos kamong maglakaw na kasaro nia, na nakagamot asin itinitindog dian sa saiya patin pinaririgon sa pagtubod, siring sa pagkatokdo sa saindo, na nagsosopay sa pagtubod na may pagpasalamat.”—Colosas 2:6, 7.
3. Sono sa Colosas 2:6, 7, taano ta masasabi niato na labi pa kisa sa pagpabautismo sana an kalabot sa paglakaw na kasaro ni Cristo?
3 Huli ta boot nindang maglakaw na kasaro ni Cristo, na naghihingoang sunodon an saiyang sangkap na mga lakad, an sadiosan an pusong mga estudyante sa Biblia nagpapabautismo. (Lucas 3:21; Hebreo 10:7-9) Sa bilog na kinaban, kan 1997 sana, labing 375,000 an naggibo kan mahalagang marhay na lakdang na ini—na may promedyo na labing 1,000 kada aldaw. Nakapupukaw sa boot an aumentong ini! Minsan siring, an mga tataramon ni Pablo na nasusurat sa Colosas 2:6, 7 nagpapaheling na labi pa kisa sa pagpabautismo sana an kalabot sa paglakaw na kasaro ni Cristo. An berbo sa Griego na trinadusir na ‘padagos na maglakaw’ naglaladawan nin sarong aksion na dapat na daing ontok, nagpapadagos. Dugang pa, sinabi pa ni Pablo na an paglakaw sa kaibanan ni Cristo kalabot an apat na bagay: pagigin nakagamot ki Cristo, pagigin itinindog dian sa saiya, pagigin marigon sa pagtubod, asin pagsopay sa pagpasalamat. Estudyaran ta an kada frase asin helingon kun paano kita tinatabangan kaiyan na magpadagos na naglalakaw na kasaro ni Cristo.
Kamo daw ‘Nakagamot ki Cristo’?
4. Ano an boot sabihon kan pagigin ‘nakagamot ki Cristo’?
4 Enot, isinurat ni Pablo, kita kaipuhan na magin ‘nakagamot ki Cristo.’ (Ikomparar an Mateo 13:20, 21.) Paano mahihimo nin saro na magin siang nakagamot ki Cristo? Bueno, an mga gamot nin tinanom natatago, alagad mahalagang marhay iyan para sa tinanom—iyan an nagtatao dian nin karigonan asin sustansia. Sa kaagid na paagi, an halimbawa asin katokdoan ni Cristo sa primero dai naheheling an epekto sa sato, na nakatatadom sa satong isip asin puso. Dian iyan nagtatao nin sustansia asin nagpapakosog sa sato. Kun tinotogotan ta iyan na maggiya sa satong kaisipan, sa satong mga hiro-hiro, asin sa satong mga desisyon, kita napahihiro na idusay an satong buhay ki Jehova.—1 Pedro 2:21.
5. Paano kita ‘magkakaigwa nin pagmawot’ sa espirituwal na kakanon?
5 Namotan ni Jesus an kaaraman gikan sa Dios. Iinagid pa ngani nia iyan sa pagkakan. (Mateo 4:4) Tara, sa saiyang Sermon sa Bukid, nagtao sia nin 21 kotasyon hale sa walong laen-laen na libro kan Hebreong Kasuratan. Tanganing maarog an saiyang halimbawa, dapat niatong gibohon an siring sa isinadol ni apostol Pedro—“magkaigwa kamo nin pagmawot” sa espirituwal na kakanon “bilang mga omboy na bagong mamundag.” (1 Pedro 2:2) Kun an omboy na bagong mamundag magmawot nin kakanon, malinaw niang ipinaheheling an saiyang makosog na pagmawot. Kun sa ngonyan bakong siring kaiyan an satong namamatean manongod sa espirituwal na kakanon, ineenkaminar kita kan mga tataramon ni Pedro na “magkaigwa” kan pagmawot na iyan. Paano? Puedeng makatabang an prinsipyo na yaon sa Salmo 34:8: “Namitan nindo asin helingon nindo na si Jehova marahay.” Kun regular tang ‘ninanamitan’ an Tataramon ni Jehova, an Biblia, na tibaad binabasa an sarong kabtang kaiyan kada aldaw, maheheling niato na iyan masustansia asin marahay sa espirituwal. Pag-abot nin panahon, matalubo an satong pagmawot kaiyan.
6. Taano ta mahalaga na maghorophorop sa satong binabasa?
6 Minsan siring, mahalaga na tunawon na marhay an kakanon oras na kakanon niato iyan. Kaya kaipuhan kitang maghorophorop sa satong binabasa. (Salmo 77:11, 12) Halimbawa, mantang binabasa ta an librong The Greatest Man Who Ever Lived, an kada kapitulo orog na magigin kapakipakinabang kun kita mapondo asin hapoton an satong sadiri: ‘Anong kabtang kan personalidad ni Cristo an naheheling ko sa pagkasaysay na ini, asin paano ko iyan maaarog sa sako mismong buhay?’ An paghorophorop sa siring na paagi magpapangyari sa sato na ikaaplikar an satong nanonodan. Dangan, kun napapaatubang sa sarong desisyon, puede tang ihapot sa satong sadiri kun ano an puedeng ginibo ni Jesus. Kun madesisyon kita sa siring na paagi, nagtatao kita nin ebidensia nin pagigin tunay na nakagamot ki Cristo.
7. Ano an maninigo na magin pagmansay niato sa matagas na espirituwal na kakanon?
7 Sinasadol man kita ni Pablo na magkakan nin “matagas na kakanon,” an mas hararom na mga katotoohan kan Tataramon nin Dios. (Hebreo 5:14) Puedeng magin enot na pasohan niato sa bagay na ini an pagbasa kan enterong Biblia. Dangan igwa nin mas espesipikong mga topiko na mapag-aadalan, arog baga kan pantubos na atang ni Cristo, an manlaenlaen na tipan na ginibo ni Jehova sa saiyang banwaan, o an nagkapira sa makahulang mga mensahe sa Biblia. Kadakol kan materyal na makatatabang sa sato na akoon asin tunawon an siring na matagas na espirituwal na kakanon. Ano an pasohan sa pagkua kan siring na kaaraman? Iyan, bakong tanganing tawan kita nin dahelan na maghambog, kundi pakosogon an satong pagkamoot ki Jehova asin magin orog na dayupot sa saiya. (1 Corinto 8:1; Santiago 4:8) Kun galaga tang kinukua an kaaraman na ini, iinaaplikar iyan sa satong sadiri, asin ginagamit iyan sa pagtabang sa iba, kita tunay na mag-aarog ki Cristo. Tatabangan kita kaini na magin tamang nakagamot sa saiya.
Kamo daw ‘Itinitindog Dian ki Cristo’?
8. Ano an boot sabihon kan pagigin ‘itinindog dian ki Cristo’?
8 Para sa sunod na aspekto nin paglakaw na kasaro ni Cristo, si Pablo marikas na minabalyo hale sa sarong buhay na paglaladawan pasiring sa saro pa—hale sa tinanom pasiring sa edipisyo. Kun iniisip ta an sarong itinitindog na edipisyo, an naiisip ta bako sanang an pundasyon kundi siring man an palangkaw nang palangkaw na edipisyo mismo na heling-heling, na pinagpapagalan na marhay. Sa kaagid na paagi, kaipuhan niato na magmaigot na marhay tanganing pataluboon an mga kualidad asin ugale na arog-Cristo. Naririsa an siring na pagmamaigot, siring kan isinurat ni Pablo ki Timoteo: ‘Pahayagan an saimong pag-oswag sa gabos.’ (1 Timoteo 4:15; Mateo 5:16) Ano an nagkapirang Kristianong gibohon na nagpapatalubo sa sato?
9. (a) Tanganing maarog si Cristo sa satong ministeryo, ano an nagkapirang praktikal na pasohan na puede tang gibohon? (b) Paano ta naaaraman na gusto ni Jehova na kita maogma sa satong ministeryo?
9 Inasignaran kita ni Jesus na ihulit asin itokdo an maogmang bareta. (Mateo 24:14; 28:19, 20) Itinao nia an sangkap na halimbawa, na nagpapatotoo nin mapuso asin epektibo. Siempre, nungka niatong magigibo an ginibo nia. Minsan siring, itinao ni apostol Pedro an pasohan na ini para sa sato: “Santipikaron nindo an Cristo bilang Kagurangnan sa saindong puso, na pirmeng andam na sumimbag sa lambang naghahagad sa saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) Kun sa pagmate nindo bako kamong “pirmeng andam na sumimbag,” dai kamo madesesperar. Gumibo nin rasonableng mga pasohan na makatatabang sa saindo na luway-luway na makarani sa pamantayan na iyan. An patienot na pag-andam puedeng makatabang sa saindo na bagohon an saindong presentasyon o iiba an saro o duwang teksto. Puede kamong gumibo nin pasohan na magpasakamot nin mas dakol na literatura sa Biblia, gumibo nin mas dakol na pagdalaw liwat, o makapoon nin sarong pag-adal sa Biblia. An pagdodoon maninigong bako nanggad sa kadakolan—arog baga nin bilang nin oras, ikinapasakamot, o pag-adal—kundi sa kualidad. An paggibo nin rasonableng mga pasohan asin pagmamaigot na aboton iyan makatatabang sa sato na maogma sa pagtao kan satong panahon asin kosog sa ministeryo. Iyan an gusto ni Jehova—na kita maglingkod sa saiya na “may paggayagaya.”—Salmo 100:2; ikomparar an 2 Corinto 9:7.
10. Ano an nagkapirang iba pang Kristianong gibohon na kaipuhan niatong gibohon, asin paano an mga ini nakatatabang sa sato?
10 May mga ginigibo man kita sa kongregasyon na nagpapatalubo sa sato dian ki Cristo. An pinakamahalaga iyo an pagpaheling nin pagkamoot sa lambang saro, ta ini an nagpapamidbid na tanda nin tunay na mga Kristiano. (Juan 13:34, 35) Kan kita nag-aadal pa, an dakol sa sato naparani an boot sa nagtotokdo sa sato, na natural sanang mangyari. Minsan siring, puede daw na sunodon ta ngonyan an hatol ni Pablo na “humiwas” paagi sa pakipagmidbidan sa iba pa sa kongregasyon? (2 Corinto 6:13) Kaipuhan man kan kamagurangan an satong pagkamoot asin apresasyon. Paagi sa pagkooperar sa sainda, na hinahagad asin inaako an saindang Makakasuratan na hatol, orog na mapapagian ta an saindang magabat na trabaho. (Hebreo 13:17) Kadungan kaiyan, ini makakokontribwir sa satong pagigin itinindog dian ki Cristo.
11. Ano an maninigo na magin realistikong pagmansay niato sa bautismo?
11 An bautismo sarong nakaoogmang marhay na okasyon! Minsan siring, dai ta maninigong laoman na an gabos na panahon sa buhay pakatapos kaiyan magigin nakaoogma man. Kalabot sa dakulang kabtang kan satong pagigin itinindog dian ki Cristo an ‘paglakaw na husay sa iyo man sanang pinagkatodan na ini.’ (Filipos 3:16) Iyan dai nangangahulogan nin nakapopongot, nakalalangkag na pamumuhay. An kahulogan sana kaiyan pag-abante nin diretso—sa ibang pagtaram, pagpatalubo nin marahay na mga ugale sa espirituwal asin pag-otob kaiyan sa pag-agi nin mga aldaw asin taon. Girumdomon, “an makatagal sagkod sa katapusan iyo an maliligtas.”—Mateo 24:13.
Kamo daw “Pinaririgon sa Pagtubod”?
12. Ano an boot sabihon kan pagigin ‘marigon sa pagtubod’?
12 Sa saiyang ikatolong frase na naglaladawan kan satong paglakaw na kasaro ni Cristo, sinasadol kita ni Pablo na magin ‘marigon sa pagtubod.’ An sarong bersion nagsasabing, “segurado mapadapit sa pagtubod,” huli ta an termino sa Griego na ginamit ni Pablo puedeng mangahulogan nin “seguradohon, garantiyahan, asin gibohon na dai maliliwat sa legal na paagi.” Mantang nagtatalubo an satong kaaraman, tinatawan kita nin dugang pang mga dahelan na maheling na an satong pagtubod ki Jehova Dios marigon an pundasyon asin, sa katunayan, legal na napasisikad. An resulta nadudugangan an satong karigonan. Orog na nagigin depisil para sa kinaban ni Satanas na impluwensiahan kita. Ipinagigirumdom kaini sa sato an konseho ni Pablo na ‘magpadagos sa pagkamaygurang.’ (Hebreo 6:1) An pagkamaygurang asin karigonan konektadong marhay sa kada saro.
13, 14. (a) An mga Kristiano kan enot na siglo sa Colosas napaatubang sa anong mga peligro sa saindang karigonan? (b) Ano an tibaad ikinahadit ni apostol Pablo?
13 An mga Kristiano kan enot na siglo sa Colosas napaatubang sa mga peligro sa karigonan ninda. Si Pablo nagpatanid: “Mag-ingat kamo: tibaad may saro na bumihag sa saindo paagi sa pilosopiya asin basang na daya sono sa tradisyon nin mga tawo, sono sa enot na mga katokdoan kan kinaban asin bakong sono ki Cristo.” (Colosas 2:8) Habo ni Pablo na an mga taga-Colosas, na nagin sakop kan ‘kahadean kan Aki nin pagkamoot’ nin Dios, mabihag, maparayo sa saindang binendisyonan na kamugtakan sa espirituwal. (Colosas 1:13) Madaya paagi sa ano? Nanabihan ni Pablo an “pilosopiya,” na iyo sanang paglataw kan terminong ini sa Biblia. Sia daw nagtataram dapit sa mga pilosopong Griego, arog ki Plato asin Socrates? Minsan ngani an mga ini nagtao nin peligro sa tunay na mga Kristiano, kan mga panahon na idto, mahiwas an paggamit kan terminong “pilosopiya.” Iyan sa parate nanonongod sa dakol na grupo nin mga tawo na sarong doktrina an sinusunod—pati sa mga relihioso. Halimbawa, an mga Judio kan enot na siglo na arog ki Josefo asin Filo inapod na pilosopiya an saindang sadiring relihion—na tibaad tanganing gibohon iyan na mas nakaaakit.
14 An nagkapirang pilosopiya na tibaad ikinahadit ni Pablo may labot sa relihion. Kan huri sa iyo man sanang kapitulo kan saiyang surat sa mga taga-Colosas, kinaolay nia an mga nagtotokdo na, “Dai magkapot, ni magnamit, ni magdotdot,” na paagi kaiyan nananabihan an mga kabtang kan Ley ni Moises na tinapos kan kagadanan ni Cristo. (Roma 10:4) Apuera sa mga pilosopiyang pagano, may mga impluwensia na an epekto nagsapeligro sa espirituwalidad kan kongregasyon. (Colosas 2:20-22) Si Pablo nagpatanid tumang sa pilosopiya na kabtang kan “enot na mga katokdoan kan kinaban.” An siring na falsong katokdoan hale sa tawo.
15. Paano niato malilikayan na maimpluwensiahan kan bakong Makakasuratan na kaisipan na parateng napapaatubang sa sato?
15 An pagpalakop nin sa tawong mga ideya asin kaisipan na bakong marigon na basado sa Tataramon nin Dios puedeng magsapeligro sa Kristianong karigonan. Kita ngonyan dapat na magmaan sa siring na mga peligro. Si apostol Juan nagsadol: “Mga namomotan, dai kamo tumubod sa gabos na ipinasabong na tataramon, kundi baloon an ipinasabong na mga tataramon kun baga iyan gikan sa Dios.” (1 Juan 4:1) Kaya kun an sarong kaeskuela magprobar na kombensiron kamo na an pamumuhay sono sa mga pamantayan kan Biblia lihis na sa uso, o kun an sarong kataed may tendensiang impluwensiahan kamo na arogon an materyalistikong aktitud, o kun an sarong katrabaho tusong impluwensiahan kamo na lapason an saindong konsensia na sinanay sa Biblia, o dawa kun an sarong kapagtubod magpahayag nin mapagkritika, negatibong mga komento manongod sa iba sa kongregasyon basado sa saiyang sadiring opinyon, dai nindo basta pag-akoon an sinasabi ninda. Haleon an dai kaoyon kan Tataramon nin Dios. Mantang ginigibo niato iyan, papagdadanayon ta an satong karigonan mantang kita naglalakaw na kasaro ni Cristo.
“Nagsosopay sa Pagtubod na May Pagpasalamat”
16. Ano an ikaapat na aspekto kan paglakaw na kasaro ni Cristo, asin ano an tibaad ihapot niato?
16 An ikaapat na aspekto nin paglakaw na kasaro ni Cristo na nasasambitan ni Pablo iyo na kita magin “nagsosopay sa pagtubod na may pagpasalamat.” (Colosas 2:7) An terminong “nagsosopay” nagpapagirumdom nin sarong salog na nagsosopay sa mga pangpang kaiyan. Ini nagsusuherir na kita bilang mga Kristiano, an satong pagpasalamat dapat na magin dagos-dagos o nakaugalean na. Marahay na ihapot kan kada saro sa sato, ‘Nagpapasalamat daw ako?’
17. (a) Taano ta masasabi na kita gabos dakol na dapat pasalamatan, dawa sa masakit na mga panahon? (b) Ano an nagkapirang regalo hale ki Jehova na nangorognang pinasasalamatan nindo?
17 Tunay nanggad, kita gabos igwa nin bastanteng dahelan na magsopay sa pagpasalamat ki Jehova aroaldaw. Dawa sa pinakamasakit na mga panahon, puedeng igwa nin simpleng mga bagay na nakapagiginhawa. Sarong katood na nagpapaheling nin pakikidamay. Sarong namomotan na nagtatao nin komentong nakaparirigon giraray sa kompiansa. Igong torog na nakapaoomay. Masiram na kakanon na nakahahale nin gutom. Awit nin gamgam, ngisi nin sarong aki, maaliwalas na asul na langit, nakarerepreskong huyop-huyop—an gabos na ini asin dakol pa puedeng maeksperyensiahan niato sa sarong aldaw. Pasil sanang marhay na ipasipara an siring na mga regalo. Dai daw iyan gabos maninigo sa pagsabi nin salamat? Iyan gabos hale ki Jehova, an Gikanan nin “lambang marahay na balaog asin lambang sangkap na regalo.” (Santiago 1:17) Asin tinawan nia kita nin mga regalo na garo nagpapasadit sa mga ini—halimbawa, an buhay mismo. (Salmo 36:9) Dugang pa, tinawan nia kita nin oportunidad na mabuhay sagkod lamang. Tanganing ikatao an regalong ini, ginibo ni Jehova an kadarudakulaing sakripisyo paagi sa pagsugo kan saiyang Aking bugtong, “an nangongorog niang kinaoogmahan.”—Talinhaga 8:30; Juan 3:16.
18. Paano ta ikapaheheling na kita nagpapasalamat ki Jehova?
18 Kanigoan katotoo, kun siring, kan mga tataramon kan salmista: “Marahay na magpasalamat ki Jehova.” (Salmo 92:1) Kaagid kaiyan, ipinagirumdom ni Pablo sa mga Kristiano sa Tesalonica: “Magpasalamat kamo para sa gabos na bagay.” (1 Tesalonica 5:18; Efeso 5:20; Colosas 3:15) An kada saro sa sato puedeng magdesisyon na magin orog na mapagpasalamat. An satong mga pamibi dai kaipuhan na magin entero na sanang kahagadan sa Dios mapadapit sa satong mga pangangaipo. Tama man iyan. Alagad imahinara na igwa kamong katood na kinakaolay sana kamo kun may kaipuhan sia sa saindo! Kaya taano ta dai mamibi ki Jehova tangani sanang pasalamatan asin omawon sia? Sierto nanggad na maoogma sia sa siring na mga pamibi kun sia minadungaw sa ingratong kinaban na ini! An sarong sekondaryong pakinabang iyo na an siring na mga pamibi puedeng makatabang sa sato na magkonsentrar sa positibong mga aspekto sa buhay, na ipinagigirumdom sa sato kun gurano nanggad kadakol kan bendisyon sa sato.
19. Paano isinusuherir kan pananaram ni Pablo sa Colosas 2:6, 7 na kita gabos puedeng magpadagos na umoswag sa paglakaw sa kaibanan ni Cristo?
19 Bako daw na pambihira nanggad kadonong na giya an manonompongan sa sarong halipot na kotasyon kan Tataramon nin Dios? An hatol ni Pablo na padagos na maglakaw sa kaibanan ni Cristo sarong bagay na maninigong booton na isapuso kan kada saro sa sato. Kun siring magin desidido kita na magin ‘nakagamot ki Cristo,’ ‘itinindog dian sa saiya,’ ‘marigon sa pagtubod,’ asin ‘nagsosopay sa pagpasalamat.’ An hatol na iyan partikularmenteng mahalagang marhay para sa mga bagong mabautismohan. Alagad aplikado iyan sa sato gabos. Isip-isipa kun paano pairarom nang pairarom na minatubo an mayor na mga gamot asin kun paano an sarong itinitindog na edipisyo palangkaw nang palangkaw. Kaya an satong paglakaw sa kaibanan ni Cristo nungkang natatapos. Kadakol pa an kaipuhan na paoswagon. Tatabangan kita asin bebendisyonan kita ni Jehova, huli ta gusto nia na kita padagos na maglakaw na daing katapusan sa kaibanan nia asin sa kaibanan kan saiyang namomotan na Aki.
Ano an Isisimbag Nindo?
◻ Ano an kalabot sa paglakaw na kasaro ni Cristo?
◻ Ano an boot sabihon kan pagigin ‘nakagamot ki Cristo’?
◻ Paano kita puedeng magin ‘itinindog dian ki Cristo’?
◻ Taano ta mahalagang marhay na magin ‘marigon sa pagtubod’?
◻ Ano an mga dahelan niato na kita ‘magsopay sa pagpasalamat’?
[Retrato sa pahina 10]
An mga gamot nin kahoy tibaad dai naheheling, alagad iyan an nagtatao nin kakanon dian asin marigon na nagsusuportar kaiyan