An Daga Taano Iyan ta Uya Digdi?

Igwa nin sarong hapot na kaipuhan nindong estudyaran: An sato daw na magayon na planeta ginibo nin sarong intelihenteng Kaglalang na igwa nin katuyohan para sa daga asin para sa mga tawo na yaon dian? An pagresolber sa isyung iyan sa paagi na kamo maninigoan makatatabang sa saindo na masabotan kun ano an nakatagama sa ngapit para sa satong planeta.

AN DAKOL na sientista na biyong siniyasat an uniberso asin an satong daga nakaheling nin mga ebidensia na nagtotokdo sa pag-eksister nin sarong Kaglalang, na an Dios nasa likod kaiyan. Estudyare an mga komento nin saro sana sa sainda:

Si Propesor Paul Davies nagsurat sa The Mind of God: “An pag-eksister nin areglado, koordinadong uniberso na igwa nin marigon, organisado, komplikadong mga estruktura nangangaipo nin mga ley asin kamugtakan na espesyal na marhay.”

Pakatapos na trataron an nagkapirang “pagkanorongod” na nariparo kan mga astropisiko asin iba pa, idinugang ni Propesor Davies: “Kun eestudyaran an gabos na ini, iyan nagtatao nin nakagugulat na ebidensia na an buhay na aram niato depende nin sensitibong marhay sa pinakanaturalesa kan mga ley sa pisika, asin sa nagkapirang garo nagkanorongod sanang aksidente sa aktuwal na mga numero na napili kan naturalesa para sa manlaenlaen na kantidad kan materya nin mga partikula, kosog nin puersa, asin iba pa. . . . Igo nang sabihon na, kun puede kitang magsagin Dios, asin pumili nin mga numero para sa mga sokol na ini sa sadiri niatong kapritso paagi sa pagbirikbirik sa sarong grupo nin mga birikan, manonompongan niato na an haros gabos na timpla kan mga birikan mapangyari sa uniberso na dai na puedeng erokan. Sa nagkapirang kaso garo baga an manlaenlaen na birikan kaipuhan na timplahon nin tamang-tama sana nanggad tanganing an uniberso mapasa kamugtakan na matalubo an buhay. . . . An katunayan na dawa an sadit na mga pagbago sa kamugtakan nin mga bagay puedeng magpangyari sa uniberso na dai na maheling tunay nanggad na sarong katotoohan na may hararom na kahulogan.”

An kahulogan kaiyan para sa dakol iyo na an satong daga, kaiba an iba pang kabtang kan uniberso, ginibo nin sarong Kaglalang na may katuyohan. Kun iyan totoo, kaipuhan niatong aramon kun taano ta primero ginibo nia an daga. Kaipuhan man niatong siertohon, kun mahihimo niato, kun ano an saiyang katuyohan para sa daga. Sa bagay na ini may minalataw na pambihira kabakong normal. Sa ibong kan lakop na popularidad nin ateismo, igwa nin nakabibiglang bilang nin tawo na naniniwala pa man giraray sa sarong intelihenteng Kaglalang. An kadaklan na iglesia nin Kakristianohan sagin nagtataram manongod sa makakamhan sa gabos na Dios asin Kaglalang kan satong uniberso. Pero, bihira sa arin man sa mga relihion na ini an nagtataram na may kompiansa asin kombiksion manongod sa ngapit kan daga sa katuyohan nin Dios.

Ano an Sinasabi kan Biblia?

Makatanosan na maglaom sa sarong gikanan nin impormasyon na inaako nin dakol bilang hale sa Kaglalang. An gikanan na iyan iyo an Biblia. An saro sa pinakasimple asin pinakamalinaw na mga kapahayagan na yaon dian mapadapit sa ngapit kan satong daga manonompongan sa Eclesiastes 1:4. Mababasa niato: “An sarong kapag-arakian minalihis, asin an saro pang kapag-arakian minadatong: alagad an daga nagdadanay sagkod lamang.” (King James Version) An Biblia malinaw sa pagpaliwanag kun taano ta linalang ni Jehova Dios an daga. Ipinaheheling man kaiyan na ilinaag nia iyan sa tamang-tama na posisyon sa uniberso asin may koneksion sa satong saldang tanganing susteniran an buhay dian. An Makakamhan sa gabos na Dios pinasabngan an suanoy na propetang si Isaias na magsurat: “Ini an isinabi ni Jehova, an Kaglalang kan kalangitan, Sia na totoong Dios, an Naghaman kan daga asin an Naggibo kaiyan, Sia an Saro na masarig na nagbugtak kaiyan, na dai iyan linalang na dai nin kapakanan, na naghaman kaiyan tanganing pag-istaran: ‘Ako si Jehova, asin mayo na nin iba.’”​—Isaias 45:18.

Alagad kumusta an pagpaoswag nin tawo sa mga paagi na laglagon an gabos na buhay digdi sa daga? Sa saiyang daing kaparehong kadonongan, ipinahayag nin Dios na sia mainterbenir bago malaglag kan katawohan an gabos na buhay sa satong planeta. Mangnoha an nakapakokosog liwat sa boot na panugang ini sa ultimong libro sa Biblia, an Kapahayagan: “An mga nasyon nagkaaranggot, asin an saimong sadiring kaanggotan nagdatong, asin an itinalaan na panahon sa paghokom sa mga gadan, asin sa pagtao kan saindang balos sa saimong mga oripon na mga propeta asin sa mga banal patin sa mga natatakot sa saimong ngaran, an saradit asin darakula, asin sa paglaglag sa mga naglalaglag kan daga.”​—Kapahayagan 11:18.

Ihinahayag sa sato ni Jehova kun ano an saiyang orihinal na katuyohan sa paglalang kan daga, an mutyang ini sa espasyo, siring sa pagkaladawan kaiyan nin sarong astronaut na naglilibot sa daga. Katuyohan nin Dios na iyan magin panglobong paraiso, na maginhawang ineerokan nin mga tawo​—mga lalaki asin babae—​na gabos namumuhay na matoninong asin nagkakaoroyon. Iinareglo nia na luway-luway na maerokan an planeta paagi sa pagtogot sa enot na magkapadis na tawo na magkaaki. Para sa kaogmahan asin kagayagayahan kan enot na mag-agom na tawo, ginibo ni Jehova na magin sarong paraiso an kamugtakan kan sarong sadit na lugar sa daga. Mantang an pangangaki kan mga pamilya nin tawo mapadagos sa pag-agi nin mga taon asin siglo, an tatamnan sa Eden luway-luway na malakop sagkod na maotob an Genesis 1:28: “Sinabihan sinda nin Dios: ‘Pangagbunga asin pangagdakol kamo asin panoa nindo an daga asin sakopa nindo iyan.’”

Mantang naheheling niato ngonyan an mamondong kamugtakan kan daga asin kan mga nag-eerok dian, iyan daw nangangahulogan na an orihinal na katuyohan nin Dios para sa daga naprakaso? O binago nia daw an saiyang katuyohan asin nagdesisyon na huli sa pagigin sumbikalan kan katawohan, pababayaan nia an planeta na biyo nang malaglag asin mapoon na naman sia, sabi ngani? Dai, makasisierto kita na ni saro sa mga situwasyon na ini an totoo. Sinasabi sa sato kan Biblia na ano man an katuyohan ni Jehova mangyayari sa katapustapusi, na ano man na desisyon an gibohon nia dai maoolang nin siisay man na indibiduwal o dawa nin sarong dai linalaoman na pangyayari. Sinisierto nia sa sato: “Magigin siring man an sakong tataramon na magluwas sa sakong ngoso. Dai iyan mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”​—Isaias 55:11.

An Katuyohan nin Dios Napondo, Dai Nabago

Huli sa pagsuhay ni Adan asin Eva saka pagpahale sa sainda sa tatamnan sa Eden, malinaw na an katuyohan nin Dios para sa sarong paraisong daga mangyayari na mayo sinda. Minsan siring, ipinarisa tolos ni Jehova na an nagkapira sa saindang mga aki gigibohon an saiyang orihinal na pagboot. Totoo, ini mangangaipo nin panahon, dakol na siglo pa ngani, alagad mayong nagpaparisa kun gurano kalawig na panahon an kinaipuhan kutana sa paggibo kan orihinal na pagboot dawa kun si Adan asin Eva kapwa nagpadagos na nabuhay na sangkap. An katotoohan iyo na sa katapusan kan Milenyal na Paghade ni Cristo Jesus​—labi-labi sanang sangribong taon poon ngonyan—​an Paraisong mga kamugtakan sa Eden malakop sa bilog na daga asin an planetang Daga eerokan nin matoninong asin maogmang mga gikan kan enot na magkapadis na tawo. Tunay nanggad, an abilidad ni Jehova bilang dai nasasalang Paramukna mabibindikar sagkod lamang!

Dangan maootob an nakaoogmang mga hula na ipinasabong nin Dios kaidto pang panahon. An mga teksto na siring kan Isaias 11:​6-9 maootob sa mamuraway na paagi: “An lobo mag-eerok sa kadikit na panahon na kasaro kan kordero, asin an leopardo maghihigdang kadorog kan ogbon na kanding, asin an bakang ogbon asin an leon saka an hayop na basog nag-iiriba; asin sarong aking sadang an mangengenot sa sainda. Asin an baka saka an oso magsasabsab; an saindang mga ogbon maghihirigdang dororog. Asin minsan an leon magkakakan nin dagami kapareho kan torong baka. Asin an aking pasusohon magkakawat sa lungib kan kobra; asin sa ibabaw kan lungib nin kamandagan na halas ibubugtak nin bagong butason sa pagsuso an saiyang kamot. Dai sinda magibo nin maraot o manraraot sa bilog na sakuyang banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”

An maluyang salud asin mga helang na ikagagadan malihis na, siring kan kagadanan mismo. May mas malinaw pa daw kisa sa simpleng mga tataramon na ini na manonompongan sa ultimong libro kan Biblia? “An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:​3, 4.

Iyo, puede kitang magkaigwa nin kapusoan​—an satong magayon na planetang Daga magdadanay. Magin pribilehio logod nindo na matadang buhay sa katapusan kan maraot na palakaw na ini nin mga bagay, kaiba kan gabos na gibohon kaiyan na nakararaot sa daga. An malinig na bagong kinaban na gibo nin Dios harani na. Asin an dakol na namomotan magigimata hale sa kagadanan paagi sa milagro kan pagkabuhay liwat. (Juan 5:​28, 29) Totoo, an satong daga magdadanay, asin puede kitang magdanay kaiba kaiyan asin masiraman dian.