Sa Katapustapusi—Hustisya Para sa Gabos

“Kami magmamaigot na maghinanyog sa bagong mga paagi . . . sa pinagkasalaan na mga tingog, hadit na mga tingog, mga tingog na desesperadong dangogon. . . . An kaipuhan pang gibohon tawan nin buhay an nasa ley: na igarantiya sa katapustapusi na mantang an gabos namundag na magkakapantay sa dignidad sa atubangan nin Dios, an gabos mamundag na magkakapantay sa dignidad sa atubangan nin tawo.”​—Presidente Richard Milhous Nixon kan E.U., diskurso sa inagurasyon, Enero 20, 1969.

KUN minatukaw an mga hade, presidente, asin primer ministro, sinda mahilig na magtaram manongod sa hustisya. Si Richard Nixon, an dating presidente kan Estados Unidos, dai napapalaen. Alagad an saiyang matibay na mga tataramon nawawaran nin halaga kun hehelingon sa daing kinakampihan na liwanag nin kasaysayan. Minsan sia nanumpa na ‘tawan nin buhay an ley,’ sa huri si Nixon napatunayan na nagkasala nin paglapas sa ley asin napiritan na talikdan an saiyang katongdan. Pakalihis nin tolong dekada, an ‘pinagkasalaan, hadit, asin desesperadong mga tingog’ padagos na maribok na nag-iinsistir na dangogon.

An pagdangog sa siring na mga tingog asin pagtao nin atension sa saindang mga hinanakit bakong pasil na trabaho, siring sa nadiskobre nin dai mabilang na namomoon na marahay an intension. An ‘hustisya para sa gabos’ napatunayan na sarong pasohan na masakit makamtan. Minsan siring, kaidtong dakol nang siglo an nakaagi, may ipinanuga na angay na mag-ako kan satong atension​—sarong daing kaagid na panuga may labot sa hustisya.

Paagi sa propeta niang si Isaias, sinierto nin Dios sa Saiyang banwaan na isusugo nia sa sainda an sarong “lingkod” na sia mismo an mapili. “Ibinugtak ko an sakong espiritu sa saiya,” sabi sa sainda ni Jehova. “Magtatao sia nin hustisya sa mga nasyon.” (Isaias 42:​1-3) Mayo nin namamahalang tawo na mangangahas na tumao nin siring kahiwas an sakop na deklarasyon, saro na mangangahulogan nin nagdadanay na hustisya sa lambang nasyon. Mapagtitiwalaan daw an panugang ini? Maootob pa daw an siring kaekstraordinaryong bagay?

Sarong Panuga na Mapagtitiwalaan Niato

An panuga arog sana kamasasarigan kan nanuga kaiyan. Sa kasong ini, daing iba kundi an Dios na Makakamhan sa gabos an nagsasabi na eestablisaron kan saiyang “lingkod” an hustisya sa bilog na kinaban. Bakong arog nin mga politiko, si Jehova dai nanunuga nin basta-basta. ‘Dai mangyayaring sia magputik,’ an sinisierto sa sato kan Biblia. (Hebreo 6:18) “An dineterminaran kong gibohon gigibohon,” an may pagdodoon na sinabi nin Dios.​—Isaias 14:​24, Today’s English Version.

An kompiansa niato sa panugang iyan dinudugangan man nin puersa kan rekord kan piniling “lingkod” nin Dios, si Jesu-Cristo. An maestablisar nin hustisya dapat na mamoot sa hustisya asin mamuhay nin may katanosan. Iwinalat ni Jesus an daing kanawayan na rekord bilang tawo na ‘namoot sa katanosan asin naongis sa karatan.’ (Hebreo 1:9) An saiyang itinaram, an saiyang paagi nin pamumuhay, asin pati an paagi kan saiyang pagkagadan, gabos nagpatunay na sia totoong sarong makatanosan na tawo. Kan magadan si Jesus, an sarong opisyal kan hukbo nin Roma, na minalataw na nakaheling sa pagbista ki Jesus asin sa paggadan sa saiya, napahirong magsabi: “An tawong ini talagang matanos.”​—Lucas 23:47.

Apuera sa pamumuhay nia mismo nin matanos, kinontra ni Jesus an inhustisya na lakop na marhay kan saiyang kaaldawan. Ginibo nia ini, bakong paagi sa subersion o rebolusyon, kundi paagi sa pagtotokdo nin tunay na hustisya sa gabos na gustong maghinanyog. An saiyang Sermon sa Bukid ekspertong esplikasyon kun paano maninigong gibohon an tunay na hustisya asin katanosan.​—Mateo, kapitulo 5-7.

Ginibo ni Jesus an saiyang ihinulit. Dai nia dinuhagi an kaherakherak na mga daoton, an mga “bawal duotan” sa sosyedad na Judio. Imbes, kinaolay nia sinda, dinuotan sinda, asin pinaomayan pa ngani sinda. (Marcos 1:​40-​42) An gabos niang nanompongan, kaiba an mga dukha asin inaapi, importante sa saiya. (Mateo 9:​36) “Madia kamo sa sako, kamo gabos na nagpapagal asin nagagabatan, asin pagiginhawahon ko kamo,” sabi nia sa sainda.​—Mateo 11:28.

Orog sa gabos, dai itinogot ni Jesus na raoton sia o papaiton an boot nia kan inhustisya na nasa palibot nia. Nungka na sia nagbalos nin maraot sa maraot. (1 Pedro 2:​22, 23) Dawa kan nasa makuring kolog, sia namibi sa saiyang langitnon na Ama para sa mismong mga soldados na nagpako sa saiya. “Ama, patawada sinda,” an pakimaherak nia, “huli ta dai ninda naaaraman an saindang ginigibo.” (Lucas 23:34) Tunay nanggad, ‘liniwanag ni Jesus sa mga nasyon kun ano an hustisya.’ (Mateo 12:18) Ano pang orog na prueba an nasa sato sa kamawotan nin Dios na establisaron an sarong makatanosan na kinaban kisa sa buhay na halimbawa kan sadiri niang Aki?

Kayang Haleon an Inhustisya

An buhay na prueba na kayang haleon an inhustisya yaon man sa kinaban ngonyan. Bilang indibiduwal, saka bilang organisasyon, an Mga Saksi ni Jehova nagmamaigot na daogon an prehuwisyo, pagpaorog, rasismo, asin kadahasan. Estudyare an minasunod na halimbawa.

Naniwala si Pedroa na an subersibong aksion iyo an solamenteng paagi na matawan nin hustisya an Rehion nin Vasco, an rehion kan España na iniistaran nia. Sa katuyohan na ini sia nagin miembro nin sarong teroristang organisasyon na nagtao sa saiya nin paramilitar na pagpatood sa Pransia. Pagkatapos tolos kan pagpatood sa saiya, pinagbotan sia na organisaron an sarong grupong terorista asin paputokon an sarong kuartel kan pulisiya. Inaandam na kan mga kagrupo nia an mga dinamita kan arestaron sia kan mga pulis. Nag-18 bulan sia sa karsel, alagad dawa napepreso ipinagpadagos nia an saiyang politikal na aktibidad, na nakikakabtang sa mga pagpakagutom asin ginurot an saiyang mga pupulsohan sarong beses.

An paghona ni Pedro sia nakikipaglaban para sa hustisya. Dangan namidbid nia si Jehova asin an saiyang mga katuyohan. Kan nasa karsel si Pedro, an agom nia nagpoon na mag-adal kan Biblia kaiba kan Mga Saksi ni Jehova, asin pakaluwas nia, inimbitaran sia kaini na umatender sa saro sa saindang mga pagtiripon. Nagustohan niang marhay an okasyon kaya naghagad sia nin pag-adal sa Biblia, pag-adal na nagmotibar sa saiya na gibohon an dakulang mga pagbago sa saiyang punto de vista asin sa saiyang pamumuhay. Sa katapustapusi, kan 1989, si Pedro asin an saiyang agom pareho nabautismohan.

“Nagpapasalamat ako ki Jehova na nungka akong aktuwal na nakagadan durante kan mga taon ko bilang terorista,” sabi ni Pedro. “Ngonyan ginagamit ko an espada kan espiritu nin Dios, an Biblia, sa pagtao sa mga tawo nin mensahe nin tunay na katoninongan asin hustisya​—an maogmang bareta kan Kahadean nin Dios.” Dai pa sana nahahaloy si Pedro, na ngonyan naglilingkod bilang magurang kan Mga Saksi ni Jehova, nagsongko sa mismong kuartel na intension nia kaidtong laglagon. Ngonyan nagduman sia sa katuyohan na maghulit nin mensahe nin katoninongan sa mga pamilyang nag-iistar duman.

Ginigibo kan Mga Saksi ni Jehova an mga pagbagong ini huli ta hinihidaw ninda an sarong matanos na kinaban. (2 Pedro 3:​13) Minsan ngani sinda lubos na nagtitiwala sa panuga nin Dios na ini papangyarihon, aram ninda na obligasyon man ninda na mamuhay kaoyon sa hustisya. Liniliwanag sa sato kan Biblia na hinahagadan kita nin Dios na gibohon an satong kabtang.

Pagsabwag nin mga Banhi nin Katanosan

Totoo, kun napapaatubang sa inhustisya, tibaad gusto na niatong kumurahaw: “Haen an Dios nin hustisya?” Iyan an ikinagsing kan mga Judio kaidtong kaaldawan ni Malaquias. (Malaquias 2:17) Sineryoso daw nin Dios an saindang reklamo? Al kontraryo, “pinagal” sia kaiyan ta, kabilang sa iba pang bagay, sinda mismo nagpapasaloib sa saindang agom na guminurang na, na idinidiborsio sinda sa pinakasadit na mga sarahotan. Ipinahayag ni Jehova an pagmakolog nia sa ‘agom na babae kan saindang pagkabarobata, na saindang pinasaloiban, minsan ngani an mga ini an saindang kapadis asin an agom na babae kan saindang tipan.’​—Malaquias 2:14.

Kita daw lehitimong makapagrereklamo manongod sa inhustisya kun kita mismo minagawe nin bakong makatanosan? Sa ibong na lado, kun pagmamaigotan niatong arogon si Jesus paagi sa pagpoho sa prehuwisyo asin rasismo sa satong puso, paagi sa pagigin mayong ipinaoorog asin mamomoton sa gabos, asin paagi sa dai pagbalos nin maraot sa maraot, ipinaheheling niato na kita totoong namomoot sa hustisya.

Tanganing mag-ani kita nin hustisya, sinasadol kita kan Biblia na ‘magsabwag nin banhi sa katanosan.’ (Oseas 10:12) Gurano man iyan kasadit, importante an lambang personal na kapangganahan sa inhustisya. Arog kan isinurat ni Martin Luther King, Jr. sa saiyang Letter From Birmingham Jail, “an inhustisya saen man peligro sa hustisya sa gabos na lugar.” An mga ‘naghahanap nin katanosan’ iyo an mga tawong pinipili nin Dios na magmana kan saiyang matanos na bagong kinaban na madali nang dumatong.​—Sofonias 2:3.

Dai niato ikatotogdok an satong paglaom sa hustisya sa nagliligaligang pundasyon nin mga panuga nin tawo, pero makapagtitiwala kita sa tataramon kan satong mamomoton na Kaglalang. Iyan an dahelan na sinabihan ni Jesus an saiyang mga parasunod na padagos na ipamibi na dumatong na logod an Kahadean nin Dios. (Mateo 6:​9, 10) Si Jesus, an nombradong Hade sa Kahadean na iyan, ‘ililigtas an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas.’​—Salmo 72:​12, 13.

Malinaw nanggad, bakong permanente an inhustisya. Sagkod lamang na dadaogon an inhustisya kan pamamahala ni Cristo sa bilog na daga, siring sa sinisierto sa sato nin Dios paagi sa saiyang propetang si Jeremias: “Madatong an panahon na ootobon ko an sakong ipinanuga . . . Sa panahon na iyan pipilion ko bilang hade an matanos na gikan ni David. Gigibohon kan hadeng iyan an tama asin makatanosan sa bilog na daga.”​—Jeremias 33:​14, 15, TEV.

[Nota sa Ibaba]