Puedeng Ikabalik an Kompiansa!
MINSAN ngani an presenteng krisis sa kompiansa sarong tanda kan “huring mga aldaw,” an kadaihan nin kompiansa nagin risa man kaidtong rinibong taon na an nakaagi. (2 Timoteo 3:1) Iyan naglataw sa sarong daing gayo linalaoman na lugar—sa sarong paraiso. An Biblia nagsasabi dapit sa lokasyon: “[An] Dios nagtanom nin hardin sa Eden, sa sirangan, asin duman nia ibinugtak an tawo na saiyang hinaman. Sa siring pinatubo ni Jehova Dios hale sa daga an lambang kahoy na magayon na paghelingon asin masiram na kakanon asin siring man an kahoy nin buhay sa tahaw kan hardin asin an kahoy kan pakaaram nin marahay asin maraot.”—Genesis 2:8, 9.
An minasunod na mga bersikulo nagtatao nin liwanag sa kun ano an koneksion kaini sa krisis sa kompiansa sa presenteng aldaw. Satong mababasa: “Si Jehova Dios nagbugtak man kan pagboot na ini sa tawo: ‘Hale sa gabos na kahoy sa tatamnan puede kang magkakan sagkod na ika mabasog. Alagad kun dapit sa kahoy kan pakamidbid sa marahay asin maraot dai ka magkakan dian, huli ta sa aldaw na kumakan ka dian ika siertong magagadan.’” (Genesis 2:16, 17) Igwa daw nin ano man na rason si Adan na pagdudahan an sinabi ni Jehova?
Padagos niatong mababasa: “Ngonyan an halas iyo an pinakatuso sa gabos na layas na hayop kan kapatagan na ginibo ni Jehova Dios. Kaya iyan nagpoon na magsabi sa babae: ‘Ano totoo na an Dios nagsabi na dai kamo magkakan sa gabos na kahoy kan tatamnan?’ Sa puntong ini an babae nagsabi sa halas: ‘Makakakakan kami sa bunga kan mga kahoy sa tatamnan. Alagad kun dapit sa pagkakan sa bunga kan kahoy na yaon sa tahaw kan tatamnan, suminabi an Dios, “Dai kamo magkakan kaiyan, dai, dai kamo dumotdot kaiyan tanganing dai kamo magadan.”’ Sa puntong ini an halas nagsabi sa babae: ‘Dai nanggad kamo magagadan. Huli ta naaaraman nin Dios na sa mismong aldaw na kamo kumakan kaiyan mabubuklat an saindong mga mata asin kamo magigin arog nin Dios, na nakamimidbid kan marahay asin maraot.’ Kaya naheling kan babae na an bunga kan kahoy marahayrahay na kakanon asin na iyan kawiliwili sa mga mata, iyo, an kahoy nakaaarang paghelingon. Kaya nagpoon siang kumua kan bunga kaiyan asin kumakan kaiyan. Dangan tinawan man nia an saiyang agom na lalaki kan sia nasa kaibanan nia asin nagpoon man siang kumakan kaiyan.”—Genesis 3:1-6.
Sa pag-ignoro kan malinaw na patanid nin Dios, si Adan asin Eva nagpaheling nin kadaihan nin kompiansa ki Jehova. Kapareho sinda kan kaiwal nin Dios na si Satanas, na nakipag-olay ki Eva paagi sa literal na halas. Si Satanas mayo nin kompiansa sa paagi nin pamamahala ni Jehova. Huli kaini asin sa mapalangkaw patin ambisyosong puso, nagrebelde sia tumang sa Dios asin linagalag an mga tawo na gibohon man iyan. Inimpluwensiahan nia sinda na isipon na an Dios dai dapat pagtiwalaan.
An Resulta? Naraot na mga Relasyon
Tibaad naobserbaran nindo na an mga indibiduwal na dai nagtitiwala sa iba nadedepisilan na makapagpadanay nin mga katood. Si Publilius Syrus, sarong parasurat sa Latin kaidtong enot na siglo B.C.E., nagsurat: “An kompiansa an solamenteng bogkos nin pagkakatood.” Paagi sa saindang akto nin rebelyon, ipinaheling ni Adan asin Eva na sinda dai nagtiwala sa Dios. Huli kaini, mayo nanggad nin rason an Dios na magtiwala sa sainda. Bilang resulta kan pagkaraot nin pagtitiwala, o kompiansa, nawara kan enot na mga tawo an pakipagkatood sa Dios. Mayo nin nagpapaheling na si Jehova nakipag-olay giraray sa sainda pakakondenara nia sa sainda huli sa pagrebelde ninda.
An relasyon ni Adan asin Eva naapektaran man. Pinatanidan ni Jehova si Eva: “Sa sakit ika mangangaki, asin an saimong pagmawot magigin para sa saimong agom na lalaki, asin sia madominar sa saimo.” (Genesis 3:16) An The Jerusalem Bible nagsasabi: “Sia magpapakangkagurangnan sa saimo.” Imbes na gumibo nin mamomoton na pagkapayo sa saiyang agom na babae, na iyo an boot nin Dios, si Adan ngonyan nagin saiyang kagurangnan, na nagpapakangkagurangnan sa saiya.
Pagkatapos na sinda magkasala, prinobaran ni Adan na basolon an saiyang agom. Sa saiyang opinyon huli idto sa nagibo nia kaya sinda pinalayas sa sarong sangkap na tatamnan pasiring sa dai pa haman na daga, na seguradong mapaooripon sa bakong sangkap na mga kamugtakan bago bumalik sa kabokabo. (Genesis 3:17-19) Maiimahinar nanggad niato na ini pinaggikanan nin dai pagkakaoyon kan duwa. Tibaad sobra an nagin reaksion ni Adan, na nagsasabing dai na sia noarin man mahinanyog ki Eva. Posibleng inisip nia na may katanosan sia sa pagsabi sa saiya nin garo baga, ‘Magpoon ngonyan, ako na an masusunod!’ Sa ibong na lado, tibaad sa pagheling ni Eva nasudya si Adan sa saiyang papel bilang payo nin pamilya, na nagin dahelan na sia mawaran nin kompiansa sa saiya. Ano man an nangyari, paagi sa pagpahayag nin kadaihan nin kompiansa sa Dios, nawara kan mga tawo an saindang pakipagkatood sa saiya asin naraot an saindang relasyon sa lambang saro.
Siisay an Puedeng Pagtiwalaan Niato?
Bakong gabos maninigo sa satong kompiansa, siring sa ipinaheheling kan halimbawa ni Adan asin Eva. Paano niato maaaraman kun siisay an maninigo asin dai maninigo sa satong kompiansa?
An Salmo 146:3 nagsasadol sa sato: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan.” Asin sa Jeremias 17:5-7, mababasa niato: “Isumpa an pusog na lalaking nananarig sa daganon na tawo asin ginigibo an laman na mani saiyang takyag, asin na an saiyang puso minarayo ki Jehova mismo.” Sa ibong na lado, “maogma an pusog na lalaki na nananarig ki Jehova, asin na an nagin kompiansa iyo si Jehova.”
Totoo, an pagkompiar sa mga tawo bakong pirmeng sala. Idinodoon sana kan mga tekstong iyan na an kompiansa sa Dios nungkang napapasala, alagad an pagkompiar sa bakong sangkap na mga tawo kun beses puedeng ikapahamak. Halimbawa, an mga tawo na nagtitiwala sa mga tawo na magigibo an solamenteng an Dios sana an makagigibo—an magtao nin kaligtasan asin magpangyari nin lubos na katoninongan na may katiwasayan—madedesganar.—Salmo 46:9; 1 Tesalonica 5:3.
An totoo, an mga tawo asin institusyon nin tawo angay sanang pagkompiaran sagkod na sinda minahiro kaoyon sa mga katuyohan nin Dios asin nagpapaheling nin diosnon na mga prinsipyo. Sa siring, tanganing mamotibar niato an iba na magkompiar sa sato, kita dapat na magtaram kan totoo, magin onesto asin masasarigan. (Talinhaga 12:19; Efeso 4:25; Hebreo 13:18) Paagi sana sa paggawe niato kaoyon sa mga prinsipyo sa Biblia na an pagtitiwala sa sato nin iba magkakaigwa nin katanosan asin magigin gikanan nin pagpakinosogan asin pagparinigonan nin boot.
Pagbalik kan Kompiansa
An Mga Saksi ni Jehova igwa nin masarig na basehan sa pagkompiar sa Dios asin pag-enkaminar sa iba na gibohon man iyan. Si Jehova fiel asin maimbod, saro na pirmeng masasarigan na gigibohon an saiyang sinabi, huli ta “dai mangyayaring magputik an Dios.” An pagkompiar sa Dios nin pagkamoot nungkang maresulta sa pagkadesganar.—Hebreo 6:18; Salmo 94:14; Isaias 46:9-11; 1 Juan 4:8.
An mga tawong nagkakasararo sa pagkompiar ki Jehova asin namumuhay sono sa saiyang mga prinsipyo makosog na namomotibar na magpaheling nin kompiansa sa lambang saro. Sa sarong kinaban na may krisis sa kompiansa, kanigoan kagayagaya na makanompong nin mga tawo na mapagtitiwalaan! Imahinara an magigin kalaenan kan kinaban kun kita lubos na makakokompiar sa sinasabi o ginigibo nin iba! Sa maabot na kinaban na ipinanuga nin Dios ini an mangyayari. Dai na noarin man liwat magkakaigwa nin ano man na krisis sa kompiansa!
Gusto daw nindong mabuhay sa panahon na iyan? Kun iyo, inaagda kamo kan Mga Saksi ni Jehova na pakosogon an saindong kompiansa sa Dios asin sa saiyang mga panuga paagi sa pag-adal nin orog pa manongod sa saiyang mga kahagadan para sa buhay. An pag-adal sa Biblia nagtatao nin prueba na an Dios nag-eeksister, na sia interesado sa ikararahay kan katawohan, asin na sa dai mahahaloy sia mahiro tanganing ikorehir an mga problema sa kinaban paagi sa saiyang Kahadean. Minilyon an nakanood na magkompiar sa Dios asin sa saiyang Tataramon, an Biblia. Maogmang ipaheheling sa saindo kan Mga Saksi ni Jehova an serbisyo publikong kurso nin pag-adal sa Biblia na iinaalok ninda na daing bayad. O sumurat kamo sa mga kagpublikar kan magasin na ini para sa dugang na impormasyon.
[Blurb sa pahina 5]
An kadaihan nin kompiansa sa Dios nagbubunga nin pagkaraot nin mga relasyon nin tawo
[Blurb sa pahina 6]
An mga tawo angay sanang pagkompiaran sagkod na sinda minahiro kaoyon sa diosnon na mga prinsipyo