Paghalat na may “Galagang Pag-Antisipar”
“An galagang pag-antisipar kan mga linalang naghahalat sa paghahayag kan mga aki nin Dios.”—ROMA 8:19.
1. Ano an pagkakaagid kan situwasyon kan mga Kristiano ngonyan asin kan sa mga Kristiano kan enot na siglo?
AN SITUWASYON kan tunay na mga Kristiano ngonyan kapareho kan sa mga Kristiano kan enot na siglo. An sarong hula nakatabang sa mga lingkod ni Jehova kan mga aldaw na idto na maaraman kun noarin nakatalaan na lumataw an Mesiyas. (Daniel 9:24-26) An iyo man sanang hula isinabi bago pa an pagkalaglag nin Jerusalem alagad mayo nin mga elemento na nagpapangyari sa mga Kristiano na patienot na maaraman kun noarin lalaglagon an siudad na iyan. (Daniel 9:26b, 27) Kaagid kaiyan, marahay sana ta an sarong hula nagpangyari sa sinserong mga estudyante sa Biblia kan ika-19 siglo na mag-antisipar. Paagi sa pagkonektar kan “pitong panahon” sa Daniel 4:25 sa “mga panahon kan mga Hentil,” inantisipar ninda na si Cristo maako kan kapangyarihan sa Kahadean kan 1914. (Lucas 21:24, King James Version; Ezequiel 21:25-27) Minsan ngani dakol an hula sa librong Daniel, mayo sa mga ini an nagpapangyari sa mga estudyante sa Biblia na yaon ngonyan na kalkulohon nin eksakto kun noarin lalaglagon an enterong palakaw nin mga bagay ni Satanas. (Daniel 2:31-44; 8:23-25; 11:36, 44, 45) Minsan siring, ini madali nang mangyari, huli ta kita nabubuhay sa “panahon kan katapusan.”—Daniel 12:4.a
Pagigin Mapagbantay Durante kan Presensia ni Cristo
2, 3. (a) Ano an mayor na prueba na kita nabubuhay durante kan presensia ni Cristo na may kapangyarihan bilang hade? (b) Ano an nagpapaheling na an mga Kristiano dapat na magdanay na mapagbantay durante kan presensia ni Jesu-Cristo?
2 Totoo, pinapag-antisipar nin sarong hula an mga Kristiano kaidtong bago si Cristo tawan nin kapangyarihan sa Kahadean kan 1914. Alagad an “tanda” na itinao ni Cristo kan saiyang presensia asin kan pagtatapos kan palakaw nin mga bagay nagtampok nin mga pangyayari. Asin an kadaklan digdi maheheling pagkapoon kan saiyang presensia. An mga pangyayaring iyan—guerra, kakulangan nin kakanon, linog, peste, nag-orog na katampalasanan, paglamag sa mga Kristiano, asin pambilog na kinaban na paghuhulit kan maogmang bareta kan Kahadean—nagseserbing mayor na prueba na kita ngonyan nabubuhay na durante kan presensia ni Cristo na may kapangyarihan bilang hade.—Mateo 24:3-14; Lucas 21:10, 11.
3 Pero, an bilog na dalagan kan panhuring hatol ni Jesus sa saiyang mga disipulo: “Magdanay kamong mapagmasid, magpuka kamo, . . . magdanay kamong mapagbantay.” (Marcos 13:33, 37; Lucas 21:36) An maingat na pagbasa kan konteksto kan mga sadol na ini na magin mapagbantay nagpapaheling na sa pangenot si Cristo dai nagtataram manongod sa maingat na pagbantay para sa tanda kan kapinonan kan saiyang presensia. Imbes, pinagbobotan nia an saiyang tunay na mga disipulo na magdanay na mapagbantay durante kan saiyang presensia. Para sa ano na an tunay na mga Kristiano dapat na magdanay na nagbabantay?
4. Magseserbing ano an tanda na itinao ni Jesus?
4 Itinao ni Jesus an saiyang dakulang hula bilang simbag sa hapot na: “Noarin mangyayari an mga bagay na ini [an mga pangyayari na masagkod sa pagkalaglag kan Judiong palakaw nin mga bagay], asin ano an magigin tanda kan saimong presensia asin kan pagtatapos kan palakaw nin mga bagay?” (Mateo 24:3) An ihinulang tanda magseserbing parapamidbid bako sanang sa presensia ni Cristo kundi pati sa mga pangyayari na masagkod sa katapusan kan presenteng maraot na palakaw nin mga bagay.
5. Paano ipinaheling ni Jesus na mantang presente sa espirituwal, sia “madatong” pa?
5 Ipinaheling ni Jesus na durante kan saiyang “presensia” (Griego, pa·rou·siʹa) sia madatong na may kapangyarihan asin kamurawayan. May labot sa “pagdatong” na iyan (na ipinaririsa kan mga porma kan termino sa Griego na erʹkho·mai), sia nagsabi: “Dangan an tanda kan Aki nin tawo malataw sa langit, dangan an gabos na tribo kan daga hahampakon an saindang sadiri sa pananangis, asin maheheling ninda an Aki nin tawo na minadatong sa mga panganoron nin langit na may kapangyarihan asin dakulang kamurawayan. . . . Ngonyan manodan nindo an puntong ini sa higuerra bilang sarong ilustrasyon: Oras na an bagong sanga kaiyan magsoli asin magdahon, aram nindo na an tig-init harani na. Siring man kamo, kun maheling na nindo an gabos na bagay na ini, aramon nindo na sia [si Cristo] harani na sa mga tata. . . . Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan. . . . Kamo . . . magin andam, huli ta sa oras na dai nindo pinaghohona, an Aki nin tawo madatong.”—Mateo 24:30, 32, 33, 42, 44.
Taano ta Madatong si Jesu-Cristo?
6. Paano mangyayari an pagkalaglag kan “Dakulang Babilonya”?
6 Minsan presente bilang Hade poon kan 1914, dapat na husgaran pa ni Jesu-Cristo an mga palakaw asin indibiduwal bago gibohon an paghokom sa mga nakua niang maraot. (Ikomparar an 2 Corinto 5:10.) Dai na mahahaloy ilalaog ni Jehova sa isip nin politikal na mga namamahala na laglagon an “Dakulang Babilonya,” an pambilog na kinaban na imperyo nin falsong relihion. (Kapahayagan 17:4, 5, 16, 17) Espesipikong sinabi ni apostol Pablo na lalaglagon ni Jesu-Cristo “an tawo nin katampalasanan”—an apostatang klero nin Kakristianohan, na prominenteng kabtang kan “Dakulang Babilonya.” Si Pablo nagsurat: “An tampalasan mahahayag, na gagadanon kan Kagurangnan na Jesus paagi sa espiritu kan saiyang ngoso asin tutunawon paagi sa paghayag kan saiyang presensia.”—2 Tesalonica 2:3, 8.
7. Pagdatong kan Aki nin tawo sa saiyang kamurawayan, anong paghokom an gigibohon nia?
7 Sa harani nang ngapit, hohokoman ni Cristo an mga tawo kan mga nasyon basado sa iginawe ninda sa saiyang mga tugang na uya pa digdi sa daga. Mababasa niato: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamuraway na trono. Asin an gabos na nasyon titiponon sa atubangan nia, asin pagbubulagbulagon nia an mga tawo, kun paanong ibinubulag nin pastor an mga karnero sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala. . . . An hade masabi sa [mga karnero], ‘Totoong sinasabi ko sa saindo, Huli ta ginibo nindo iyan sa saro sa pinakasadangoton kaining sakong mga tugang, ginibo nindo iyan sa sako.’ . . . Asin an mga [kanding] maduman sa pagkaparang daing katapusan, alagad an mga matanos sa buhay na daing katapusan.”—Mateo 25:31-46.
8. Paano ilinaladawan ni Pablo an pagdatong ni Cristo sa paghokom sa mga maraot?
8 Arog kan ipinaheheling sa parabola manongod sa mga karnero asin kanding, gigibohon ni Jesus an pangultimong paghokom sa gabos na maraot. Sinierto ni Pablo sa nagdudusang mga kapagtubod an “pakaginhawa kaiba mi sa pagkahayag kan Kagurangnan na Jesus hale sa langit kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan hudisyal na padusa na daing katapusan na pagkalaglag hale sa atubangan kan Kagurangnan asin sa kamurawayan kan saiyang kakosogan, sa panahon na sia dumatong tanganing pamurawayon may labot sa saiyang mga banal.” (2 Tesalonica 1:7-10) Mantang nasa enotan niato an gabos na nakaoogmang mangyayaring ini, dai daw kita maninigo na gumibo nin pagtubod asin galagang magdanay na mapagbantay sa pagdatong ni Cristo?
Galagang Naghahalat sa Pagkahayag ni Cristo
9, 10. Taano an mga linahidan na uya pa digdi sa daga ta galagang naghahalat kan pagkahayag ni Jesu-Cristo?
9 An “pagkahayag kan Kagurangnan na Jesus hale sa langit” bako sanang sa paglaglag sa mga maraot kundi sa pagbalos man sa mga matanos. An mga natatada sa linahidan na mga tugang ni Cristo na uya pa digdi sa daga tibaad magdusa pa bago an pagkahayag ni Cristo, alagad sinda naggagayagaya sa saindang mamuraway na langitnon na paglaom. Sa linahidan na mga Kristiano, si apostol Pedro nagsurat: “Padagos kamong maggayagaya mantang kamo mga kadamay sa mga pagdusa kan Cristo, tanganing kamo makapaggayagaya asin magin man labi-labi an kagayagayahan sa panahon kan pagkahayag kan saiyang kamurawayan.”—1 Pedro 4:13.
10 An mga linahidan determinado na magdanay na fiel sagkod na si Cristo ‘tiponon sinda sa saiya’ tangani na “an nabalong kualidad” kan saindang pagtubod “magin dahelan nin pag-omaw asin kamurawayan patin onra sa pagkahayag ni Jesu-Cristo.” (2 Tesalonica 2:1; 1 Pedro 1:7) May labot sa fiel na mga Kristianong iyan na linahidan nin espiritu, masasabi: “An patotoo manongod sa Cristo pinarigon dian sa saindo, tangani na dai kamo magkulang sa ano man na balaog, mantang kamo galagang naghahalat kan pagkahayag kan satong Kagurangnan na si Jesu-Cristo.”—1 Corinto 1:6, 7.
11. Mantang hinahalat an pagkahayag ni Jesu-Cristo, ano an ginigibo nin linahidan na mga Kristiano?
11 An linahidan na natatada may saboot na kapareho kan ki Pablo, na nagsurat: “Ibinibilang ko na an mga pagdusa sa presenteng kapanahonan daing ano man na halaga kun ikokomparar sa kamurawayan na ihahayag sa sato.” (Roma 8:18) An saindang pagtubod dai kaipuhan na sulayan nin mga pagkalkulo nin panahon. Sinda nagmamasibot sa paglilingkod ki Jehova, na nagtatao nin marahayon na halimbawa sa saindang kairiba, an “ibang karnero.” (Juan 10:16) An mga linahidan na ini nakaaaram na harani na an katapusan kan maraot na palakaw na ini, asin hinihimate ninda an sadol ni Pedro: “Pasariga an saindong isip para sa gibohon, lubos na papagdanayon an toltol na pag-iisip; ibugtak an saindong paglaom sa dai na kutana maninigong kabootan na dadarahon sa saindo sa pagkahayag ni Jesu-Cristo.”—1 Pedro 1:13.
“An Galagang Pag-antisipar kan mga Linalang”
12, 13. Paano an mga linalang na tawo “ipinasakop sa kasayangan,” asin ano an hinihidaw kan ibang karnero?
12 An ibang karnero daw igwa man nin pakahahalathalaton na may galagang pag-antisipar? Sierto nanggad na igwa. Pakapagtaram manongod sa mamuraway na paglaom kan mga inampon ni Jehova bilang saiyang linahidan nin espiritu na “mga aki” asin “kapwa mga paramana ni Cristo” sa langitnon na Kahadean, si Pablo nagsabi: “An galagang pag-antisipar kan mga linalang naghahalat sa paghahayag kan mga aki nin Dios. Huli ta an mga linalang ipinasakop sa kasayangan, bakong sa sadiring boot kaiyan kundi paagi sa saiya na nagpasakop kaiyan, basado sa paglaom na an mga linalang man mismo patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.”—Roma 8:14-21; 2 Timoteo 2:10-12.
13 Paagi sa kasalan ni Adan, an gabos niang gikan “ipinasakop sa kasayangan,” na namundag na oripon nin kasalan asin kagadanan. Dai ninda nahimong patalingkason an saindang sadiri sa kaoripnan na iyan. (Salmo 49:7; Roma 5:12, 21) Ay, kanigoan an paghidaw kan ibang karnero na ‘mapatalingkas sa pagkaoripon sa kalapaan’! Alagad bago iyan mangyari, may nagkapirang bagay na dapat na mangyari segun sa mga panahon asin kapanahonan ni Jehova.
14. Ano an kalabot sa “paghahayag kan mga aki nin Dios,” asin paano ini magbubunga kan ‘pakatalingkas sa pagkaoripon sa kalapaan’ kan katawohan?
14 An natatada sa linahidan na “mga aki nin Dios” dapat na ‘mahayag’ nguna. Ano an kalabot digdi? Sa itinalaan na panahon nin Dios, magigin risang-risa para sa ibang karnero na an mga linahidan sa katapustapusi ‘natatakan’ asin pinamuraway na tanganing maghade kaiba ni Cristo. (Kapahayagan 7:2-4) An binuhay liwat na “mga aki nin Dios” ‘mahahayag’ man sa panahon na sinda makidamay ki Cristo sa paglaglag sa maraot na palakaw nin mga bagay ni Satanas. (Kapahayagan 2:26, 27; 19:14, 15) Dangan, durante kan Sangribong Taon na Paghade ni Cristo, sinda ‘mahahayag’ pa bilang saserdoteng mga pinakapaagihan sa pagtao kan mga pakinabang sa atang na pantubos ni Jesus sa “mga linalang” na tawo. Ini magbubunga kan ‘pakatalingkas sa pagkaoripon sa kalapaan’ kan katawohan asin sa kahurihurihi paglaog sa “mamuraway na katalingkasan kan mga aki nin Dios.” (Roma 8:21; Kapahayagan 20:5; 22:1, 2) Mantang igwa kan marahayon na mga tinatanaw na iyan, makangangalas daw na an ibang karnero “naghahalat sa paghahayag kan mga aki nin Dios” na may “galagang pag-antisipar”?—Roma 8:19.
An Pagpapasensia ni Jehova Nangangahulogan nin Kaligtasan
15. Ano an dai niato noarin man maninigong paglingawan mapadapit sa pag-iskedyul ni Jehova sa mga pangyayari?
15 Si Jehova an Dakulang Paratalaan nin Panahon. An saiyang pag-iskedyul sa mga pangyayari magigin sangkap. An mga bagay tibaad garo baga dai pirmeng nangyayari sa paagi na inaantisipar mismo niato. Minsan siring, kita puedeng magkaigwa nin absolutong pagtubod na maootob an gabos na panuga nin Dios. (Josue 23:14) Tibaad itinotogot nia na magpadagos an mga bagay nin mas halawig kisa sa inantisipar nin dakol. Alagad hingoahon niatong saboton an saiyang mga dalan asin hangaan an saiyang kadonongan. Si Pablo nagsurat: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan! Huli ta ‘siisay an nakaaram kan kaisipan ni Jehova, o siisay an nagin saiyang parahatol?’”—Roma 11:33, 34.
16. Siisay an nasa kamugtakan na makinabang sa pagpapasensia ni Jehova?
16 Si Pedro nagsurat: “Mga namomotan, mantang naghahalat kamo kan mga bagay na ini [an pagkalaglag kan dating “kalangitan” saka “daga” asin an pagsalida dian kan ipinanuga nin Dios na “bagong kalangitan” saka “bagong daga”], giboha an bilog nindong makakaya na sa katapustapusi makua niang daing digta asin dai nin kanawayan patin nasa katoninongan. Apuera kaini, ibilang nindo an pagpapasensia kan satong Kagurangnan na kaligtasan.” Huli sa pagpapasensia ni Jehova, minilyon pa an natatawan kan oportunidad na maligtas sa “aldaw ni Jehova,” na madatong nin bigla “siring sa parahabon.” (2 Pedro 3:9-15) An saiyang pagpapasensia minatogot man sa lambang saro sa sato na ‘maghingoa na makamtan an satong kaligtasan na may takot asin pagtakig.’ (Filipos 2:12) Sinabi ni Jesus na dapat niatong ‘atenderan an satong sadiri’ asin “magpuka” kita kun boot niatong oyonan asin magin mapanggana sa “pagtindog sa atubangan kan Aki nin tawo” sa panahon na sia dumatong sa paghokom.—Lucas 21:34-36; Mateo 25:31-33.
Padagos na Maghalat na May Pakatagal
17. Anong mga tataramon ni apostol Pablo an maninigong isapuso niato?
17 Sinadol ni Pablo an saiyang espirituwal na mga tugang na tumorohok, “bakong sa mga bagay na naheheling, kundi sa mga bagay na dai naheheling.” (2 Corinto 4:16-18) Boot nia na mayo nin makapalibog sa saindang pagmansay sa langitnon na balos na ibinugtak sa atubangan ninda. Baga man kita linahidan na mga Kristiano o kabilang kita sa ibang karnero, girumdomon niato an makangangalas na paglaom na ibinugtak sa atubangan niato asin dai kita umontok. ‘Padagos kitang maghalat na may pakatagal,’ na pinatutunayan na “bako kita an klase na minasibog sa kalaglagan, kundi an klase na may pagtubod sa ikapagdadanay na buhay kan kalag.”—Roma 8:25; Hebreo 10:39.
18. Taano ta may kompiansa na ikapababaya niato an mga panahon asin kapanahonan sa kamot ni Jehova?
18 May kompiansa na ikapababaya niato an mga panahon asin kapanahonan sa kamot ni Jehova. An kaotoban kan saiyang mga panuga ‘dai mahuhuri’ segun sa saiyang iskedyul. (Habacuc 2:3) Mientras tanto, an sadol ni Pablo ki Timoteo nagkakaigwa nin dagdag na kahulogan para sa sato. Sia nagsabi: “Ako solemneng nagboboot sa saimo sa atubangan nin Dios asin ni Cristo Jesus, na iyo an nakatalagang maghokom sa mga buhay asin sa mga gadan, asin huli sa paghayag sa saiya asin sa saiyang kahadean, ihulit mo an tataramon, gibohon iyan na may pagkasibot sa marahay na panahon, sa masakit na panahon . . . Giboha an gibohon nin sarong paraebanghelyo, lubos na otobon an saimong ministeryo.”—2 Timoteo 4:1-5.
19. Ano an panahon pa ngonyan na gibohon kan banwaan ni Jehova, asin taano?
19 Mga buhay an nakataya—niato asin kan sa mga kataed niato. Si Pablo nagsurat: “Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.” (1 Timoteo 4:16) Halipoton na an panahon para sa maraot na palakaw na ini nin mga bagay. Mantang hinahalat niato na may galagang pag-antisipar an nakaoogmang mga pangyayari na nasa enotan niato, pirme niatong isaisip na panahon asin kapanahonan pa ngonyan ni Jehova na an saiyang banwaan maghulit kan maogmang bareta kan Kahadean. An gibohon na iyan dapat na taposon sa paaging kontento sia. “Dangan,” arog kan sabi ni Jesus, “madatong an katapusan.”—Mateo 24:14.
[Nota sa Ibaba]
a Helingon an kapitulo 10 asin 11 kan librong Kaaraman na Minagiya Pasiring sa Buhay na Daing Katapusan, na ipinublikar kan Watchtower Bible and Tract Society of New York, Inc.
Bilang Repaso
◻ Mapadapit sa mga pagkalkulo nin panahon, paano an satong situwasyon kaagid kan sa mga Kristiano kan enot na siglo?
◻ Taano an mga Kristiano ta dapat na ‘magdanay na mapagbantay,’ dawa durante kan presensia ni Cristo?
◻ Taano an mga linalang na tawo ta may galagang pag-antisipar kan “paghahayag kan mga aki nin Dios”?
◻ Taano ta may kompiansa na ikapababaya niato an mga panahon asin kapanahonan sa kamot ni Jehova?
[Retrato sa pahina 17]
An mga Kristiano dapat na magpuka sa pag-antisipar kan pagdatong ni Cristo
[Retrato sa pahina 18]
An linahidan na natatada nagmamasibot sa paglilingkod ki Jehova, na dai ibinabasar an saindang pagtubod sa mga pagkalkulo nin panahon