Padagos na Mag-andam!

“Padagos na mag-andam, huli ta sa oras na dai nindo pinaghohona madatong an Aki nin tawo.”—LUCAS 12:40.

1. Ano an isinabi ni Cristo manongod sa pangangaipo na magpuka?

SINADOL ni Jesu-Cristo an saiyang mga parasunod na magin mapagpuka. Halimbawa, sia nagsabi: “Kaya magpuka kamo; sinabihan ko na kamo kan gabos na bagay. . . . Dangan maheheling nindo an Aki nin tawo na nagdadatong sa mga panganoron na may dakulang kapangyarihan asin kamurawayan. . . . Mapadapit sa aldaw na iyan o oras mayo nin siisay man na nakakaisi, ni an mga anghel sa langit ni an Aki, kundi an Ama sana. Magbantay kamo, magpuka kamo, huli ta dai nindo aram kun noarin an itinalaan na panahon. Iyan siring sa sarong tawo na mapaduman sa ibang daga na binayaan an saiyang harong asin itinao an autoridad sa saiyang mga oripon, sa lambang saro an saiyang gibo, asin pinagbotan an parabantay sa tata na magpuka. Kaya magpuka kamo, huli ta dai nindo aram kun noarin madatong an kagurangnan kan harong, kun baga sa hapon o sa matangang banggi o sa pagturaok nin manok o sa amay na aga; tanganing kun umabot sia nin panale, dai nia kamo maabotan na natotorog. Alagad an isinasabi ko sa saindo isinasabi ko sa gabos, Magpuka kamo.”—Marcos 13:23-37.

2. Taano an arogan na pamibi ta nagpaparisa nin pagpuka, alagad paano pinaluya kan mga iglesya nin Kakristianohan an paghalat sa Kahadean?

² An naeenot na mga artikulo nagtao nin dakol na ebidensia gikan sa neutral na mga reperensia na an mga iglesya nin Kakristianohan dai ‘nagpuka.’ Sono sa The Catholic Encyclopedia, saindang pinaluya an paghalat sa Kahadean paagi sa pagsabi na “an kahadean nin Dios nangangahulogan . . . kan paghade nin Dios sa satong puso,” sa siring hinahale an gabos na kahulogan kan arogan na pamibi, o Pamibi kan Kagurangnan. Pero an The New Encyclopædia Britannica nagsasabi: “An mga inaarang sa Pamibi kan Kagurangnan nagpaparisa kan nakahahadit na gayong kamugtakan na an ngaran asin kabotan nin Dios lalanghadan, na an saiyang Kahadean dai pa nagdatong.” Iyo, an arogan na pamibi nagpaparisa nin pagpuka. Sa espisipiko, ano an mga bagay na dapat na halaton nin mga Kristiano?

“Puka”—Para sa Ano?

3. Taano ta dai puwedeng lingawan nin mga Kristiano an panahon?

³ An maingat na pagsiyasat sa mga hula kan Biblia manongod sa “Huring mga Bagay” nagpapaheling kan eksaktong mga bagay na dapat na halaton nin mga Kristiano sa ‘pagpuka.’ Enot, dai ninda maninigong lingawan an panahon, huli ta si Jesu-Cristo may isinabing “itinalaan na panahon” na an nakakaaram sana iyo an saiyang Ama. (Marcos 13:32, 33) Dugang pa, sinabihan ni Jesus an saiyang mga disipulo na an Jerusalem “babatayan kan mga nasyon, sagkod na maotob an itinalaan na mga panahon kan mga nasyon [mga Hentil].” (Lucas 21:24) Malinaw na itinao ni Jesus an impormasyon na ini sa saiyang mga parasunod tanganing matabangan sinda na mamidbid an panahon kan katapusan, huli ta iyan kaiba sa saiyang simbag sa hapot na: “Paratokdo, noarin ngani mangyayari an mga bagay na ini, asin ano an tanda kun mangyayari na an mga bagay na ini?”—Lucas 21:7.

4. Anong “tanda” an hahalaton nin mga Kristiano?

⁴ Apuwera sa pagtao ninda nin atension sa panahon, an mga Kristiano kaipuhan na maghalat sa hinagad na “tanda,” na sinasabi man sa Mateo 24:3 asin Marcos 13:4. An tandang ini na igwa nin dakol na kabtang—kaiba na an internasyonal na mga guerra, gutom, linog, peste asin paglamag sa tunay na mga Kristiano—magigin konektado sa kaotoban nin mga hula dapit sa panahon tanganing ipamidbid an “kapag-arakian” na “dai makakalihis” sagkod na talagang aktuwal na mangyari an gabos na bagay na itinalaan na mangyari sa panahon kan katapusan.—Lucas 21:10-12, 32.

5. Paano si Cristo magigin kaiba kan saiyang tunay na mga parasunod sa gabos na siglo, alagad iyo sana daw ini an boot niang sabihon kan itao nia an tanda sa saiyang “presensia”?

⁵ Anong mahahalagang pangyayari na konektado sa “pagtatapos kan palakaw nin mga bagay” an ipaiisi kan tandang ini? An mga disipulo ni Jesus naghapot sa saiya: “Ano an magigin tanda kan saimong presensia [Griego, pa·rou·siʹa]?” (Mateo 24:3) Ano an magigin kahulogan kan “presensia” ni Cristo? Labi pa sa saiyang pagigin nasa kaibanan sa espiritu kan saiyang tunay na mga parasunod kun sinda nagtitiripon o inootob an isinugo sa sainda na gumibo nin mga disipulo. Tatabangan nia an saiyang mga parasunod sa paaging ini sa gabos na siglo. (Mateo 18:20; 28:18-20) Dawa an mga teologo nin Kakristianohan nag-aadmitir na an terminong “presensia” nagkaigwa nin espesyal na kahulogan. An The New International Dictionary of New Testament Theology nagsasabi: “An ideya kan parousia ngonyan konektado sa paghalat kan iglesya sa paglataw ni Cristo sa katapusan kan panahon.” Poon sa kapinonan sagkod sa katapusan, an Kristianong Griegong Kasuratan nagsasadol sa mga Kristiano na maghalat sa presensia ni Cristo.—Mateo 24:3, 27, 37, 39; Santiago 5:7, 8; 2 Pedro 3:3, 4; 1 Juan 2:28; Kapahayagan 1:7; 22:7.

6. (a) Ano an magigin kahulogan kan presensia ni Cristo para sa maraot na palakaw na ini nin mga bagay? (b) Paano an presensia ni Cristo makakaapektar sa linahidan na mga Kristiano na nagadan na maimbod asin sa mga buhay pa sa daga?

⁶ An presensia ni Cristo daing ibang magigin kahulogan kundi an “pagtatapos kan palakaw nin mga bagay.” (Mateo 24:3; Marcos 13:4) Iyan mangangahulogan na an presenteng maraot na palakaw nin mga bagay naglaog na sa “panahon nin katapusan” kaiyan, o “huring mga aldaw.” (Daniel 12:4, 9; 2 Timoteo 3:1-5) Iyan mangangahulogan na inako na ni Cristo sa saiyang Ama an pagboot na kaptan an kapangyarihan sa Kahadean na magsasakop sa daga ‘sa tahaw kan saiyang mga kaiwal.’ (Salmo 110:2; 2:6-9; Kapahayagan 11:15-18) Bago hokoman an kinaban sa kabilogan, sisiyasaton ni Cristo an saiyang sadiring kongregasyon asin bubuhayon liwat an linahidan na mga Kristiano na nagadan na maimbod. (1 Corinto 15:21, 23; 1 Tesalonica 2:19; 3:13; 4:13-17; 2 Tesalonica 2:1) An linahidan na mga Kristiano na buhay pa sa daga asin maimbod na naglilingkod bilang “oripon” ni Cristo paagi sa pagdadanay na puka sa espirituwal asin pagtatao nin espirituwal na “kakanon sa igong panahon” nonombrahan ni Cristo na mamahala sa “gabos niang sadiri,” o intereses kan Kahadean sa daga. (Mateo 24:45-47; Lucas 12:42-44) An “maimbod asin madonong na oripon” na ini kaipuhan na gumibo kan asin mangenot sa sarong gibohon sa bilog na kinaban na paghuhulit kan “maogmang baretang ini kan kahadean,” “dangan madatong an katapusan.”—Mateo 24:14.

7. Dawa sa panahon kan presensia ni Cristo, ano pang ibang tanda an hahalaton nin mga Kristiano, asin taano ta padagos nindang ipamimibi na “dumatong” na logod an Kahadean nin Dios?

⁷ An tunay na mga Kristiano dapat na “magpuka” para sa gabos na bagay na ini na magpapatunay na sinda nabubuhay sa panahon kan presensia ni Cristo asin kan “pagtatapos kan palakaw nin mga bagay.” Alagad minsan sa laog kan “panahon nin katapusan,” sinda kaipuhan na magpuka para sa “tanda kan Aki nin tawo,” sa saiyang “pagdatong” tanganing hokoman an maraot na palakaw nin mga bagay ni Satanas. (Mateo 24:30, 44; Marcos 13:26, 35; Lucas 12:40; 21:27; 2 Tesalonica 1:7-10) Kaya, minsan ngani sia magigin ‘presente’ asin an saiyang Kahadean naestablisar na, sia asin an saiyang Kahadean kaipuhan pa man giraray na “dumatong” saka ‘ronoton asin tapuson’ an mga nasyon asin kahadean kan kinaban ni Satanas. (Daniel 2:44) Ini an dahelan kun taano ta, pagkatawan kan mga kabtang kan “tanda” kan saiyang presensia, idinugang ni Cristo: “Kun maheling na nindong nangyayari an mga bagay na ini, aramon nindo na an kahadean nin Dios harani na.” (Lucas 21:31) Iyo, minsan sa panahon kan presensia ni Cristo, an mga Kristiano mamimibi pa man giraray na dumatong na logod an Kahadean nin Dios, asin kaipuhan pa man giraray na sinda “magbantay” asin “magpuka” para sa itinalaan na panahon kan “katapusan” asin kan saindang “kaligtasan.”—Marcos 13:7, 29, 32-37; Lucas 21:9, 28.

Siisay an Napatunayan na ‘Nagpupuka’?

8. Saro-saroon an mga bagay na maninigong halaton nin mga Kristiano.

⁸ Nasabotan pa sana niato na an mga Kristiano kaipuhan na mabuhay na naghahalat sa katapusan kan “itinalaan na panahon kan mga nasyon.” Kaipuhan na sinda maghalat sa ‘tanda kan presensia ni Cristo asin kan pagtatapos kan palakaw nin mga bagay.’ Kaipuhan na laoman ninda an pagbuhay liwat sa linahidan na mga Kristiano na nagadan na maimbod asin an malinaw na pagkamidbid sa grupong “maimbod asin madonong na oripon” na nonombrahan na mamahala sa mga intereses sa daga kan Kahadean ni Cristo. Ultimo, an “oripon” na ini magpapadagos na magtao nin espirituwal na kakanon, mantang nangengenot sa paghuhulit kan “maogmang baretang ini kan kahadean . . . sa bilog na ineerokan na daga” bago “an katapusan.” “An tanda kan Aki nin tawo” malataw paagi sa saiyang “pagdatong” tanganing laglagon an maraot na palakaw nin mga bagay ni Satanas.

9. Siisay an napatunayan na naghahalat sa katapusan kan “itinalaan na panahon kan mga nasyon,” asin paano an Zion’s Watch Tower nakatabang sa mga Kristiano na magdanay na mata sa espirituwal?

⁹ Siisay an ‘nagpuka’ para sa gabos na bagay na ini? Kaidto pang 1876, si Charles T. Russell na taga-Pittsburgh, Pennsylvania, atentibo nang naghahalat sa katapusan kan “itinalaan na mga panahon kan mga nasyon,” o “mga panahon kan mga Hentil.” (King James Version) Kan taon na idto sia nagpublikar nin sarong artikulo na may titulong: “Mga Panahon nin mga Hentil: Noarin Iyan Matatapos?” Dian sinabi nia na “an pitong panahon matatapos sa A.D. 1914.” Poon kan 1880, an impormasyon na iyan ipinublikar sa Zion’s Watch Tower. An luwas na Marso 1880 nagsabi: “‘An mga Panahon nin mga Hentil’ sagkod sa 1914, asin an langitnon na kahadean sa panahon sanang iyan lubos na magsasakop.” Totoo, an mga estudyante sa Biblia na nagsurat kan mga artikulong iyan kan panahon na idto mayo pa kan eksaktong pakasabot sa Biblia asin kasaysayan dapit sa aktuwal na magigin kahulogan kan katapusan kan “itinalaan na mga panahon kan mga nasyon” na idto, arog kan pakasabot niato sa mga bagay na ini ngonyan.a Alagad an mahalaga iyo na sinda ‘nagpuka’ asin nakatabang na an mga kapwa ninda Kristiano makapagdanay na mata sa espirituwal.

10. Paano liniwanag an tunay na kahulogan kan “presensia” ni Cristo?

¹⁰ An grupong ini nin mga estudyante sa Biblia na kaasosyar ni Charles Russell asin kan magasin na Zion’s Watch Tower nakatabang man sa mga sinserong Kristiano na makasabot na an “presensia” ni Cristo maninigong saboton na dai naheheling, asin na dai sia mabuwelta sa daga tanganing maghade bilang hade sa laman. Padagos nindang inapod an atension kan “mga domestiko” kan Kagurangnan sa mga pangyayari sa kinaban may koneksion sa “tanda” kan presensia ni Cristo asin kan “panahon nin katapusan.”

11. (a) Ano an dai lubos na nasabotan kan panahon na idto kun dapit sa daganon na mga kahadean asin kun dapit sa ‘pag-agaw’ sa linahidan na mga Kristiano? (b) Ano an mas marahay na pakasabot niato ngonyan sa Daniel 2:44 asin 1 Tesalonica 4:15-17?

¹¹ Totoo, pinaghona kaidto na an pagkapatindog kan Kahadean sa kalangitan mangangahulogan kan pagkalaglag tolos kan daganon na mga kahadean asin na an linahidan na mga Kristiano “aagawon” tanganing makaiba nin nagadan nang mga linahidan na Kristiano na bubuhayon liwat sa panahon kan presensia ni Cristo. (2 Tesalonica 2:1) Alagad siisay an makakabasol sa sainda sa dai lubos na pakasabot kan panahon na idto na an dakulang gibong pagtitipon kaipuhan na mangyari sa pag-oltanan kan kapinonan asin katapusan kan kaotoban kan Daniel 2:44, o na an mangyayaring ‘pag-agaw’ na sinasabi sa 1 Tesalonica 4:15-17 nangangahulogan nin pagkabuhay liwat tolos kan mga linahidan na magagadan pagkatapos na magpoon an enot na pagkabuhay liwat?—1 Corinto 15:36, 42-44; Roma 6:3.

12. (a) Ano an linaoman ni Cristo na maabotan niang ginigibo kan saiyang maimbod na “oripon” kun sia dumatong tanganing siyasaton an saiyang harong, asin siisay an nanompongan niang naggigibo nin siring? (b) Ano an ipinagpapadagos na gibohon kan grupong maimbod na “oripon” poon kaidto?

¹² Nasasabotan niato an mga bagay na ini ngonyan, salamat sa nag-oorog na liwanag na itinao sa Tataramon nin Dios paagi sa grupong “maimbod asin madonong na oripon.” (Talinhaga 4:18) Mapadapit sa “oripon” na iyan, si Jesus nagsabi: “Siisay man nanggad an maimbod asin madonong na oripon na pinaniwalaan kan saiyang kagurangnan kan saiyang mga domestiko, tanganing magtao sainda kan saindang kakanon sa igong panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring. Sa katotoohan sinasabi ko sa saindo, Paniniwalaan nia sia kan gabos niang sadiri.” (Mateo 24:45-47) Kan siyasaton kan natutukaw na sa tronong Kagurangnan na Jesus an saiyang harong kan 1919, naabotan nia an grupo nin mga Kristiano na kaasosyar kan magasin na Watchtower na maimbod na naghihingoa na “magpuka” sa tabang kan espirituwal na “kakanon sa igong panahon.” Sagkod sa aldaw na ini, an grupong “oripon” na iyan maimbod na nagpadagos na magtao nin espirituwal na kakanon tanganing an “mga domestiko” kan Kagurangnan asin an saindang kairiba makahimong “magbantay, magpuka.”—Marcos 13:33.

Pagigin Alisto o Mahugak?

13. Ano an maninigong ihapot sa saindang sadiri kan mga nagtatatsar sa mga Saksi ni Jehova?

¹³ Madali para sa establisadong mga iglesya nin Kakristianohan asin iba pa na tatsaran an mga Saksi ni Jehova huli ta an saindang mga publikasyon may beses na nagsabi na may mga bagay na puwedeng mangyari sa sarong petsa. Alagad bako daw na an siring na gawe kaoyon sa sadol ni Cristo na “magpuka”? (Marcos 13:37) Sa ibong na kampi, an mga iglesya daw nin Kakristianohan nakadagka sa Kristianong pagpuka paagi sa pagtotokdo na an Kahadean iyo an “paghade nin Dios sa satong puso”? Bako daw na imbes sinda nakadagka sa espirituwal na kahugakan paagi sa paghona na an paghalat sa “katapusan” “daing kahulogan” o “daing datang estorya”? An mga apostata daw na nagsasabi na “an huring mga aldaw” nagpoon kan Pentecostes asin sakop an bilog na Kristianong Panahon nakapagtokdo nin Kristianong pagkaalisto? Bako daw na, imbes, sinda nakapagpatungka sa espirituwal?

14. Ano an mga halimbawa kan mga maimbod na lingkod ni Jehova kan nakaagi na labi-labi an pagmawot na maheling na naotob an mga katuyohan nin Dios?

¹⁴ Totoo, an nagkapirang paglaom na garo baga suportado kan kronolohiya sa Biblia dai naotob sa linalaoman na panahon. Alagad bako daw na mas marahay na masala huli sa labi-labing paghalat na maheling na maotob an mga katuyohan nin Dios ki sa magin torog sa espirituwal kun dapit sa kaotoban kan hula sa Biblia? Bako daw na si Moises napasala nin 40 taon sa pagkarkulo sa paghihingoa na humiro nin mayo pa sa panahon tanganing haleon an kasakitan nin Israel? (Genesis 15:13; Gibo 7:6, 17, 23, 25, 30, 34) Bako daw na an mga apostol ni Cristo labi-labi an pagmawot na maheling na mapatindog an Kahadean, dai na baga sabihon an biyo nindang dai pakasabot sa tunay na kahulogan kan Kahadean? (Gibo 1:6; ikomparar an Lucas 19:11; 24:21.) Bako daw na an linahidan na mga Kristiano sa Tesalonica nalalangkag nang maheling an “presensia kan satong Kagurangnan na Jesu-Cristo” asin “an aldaw ni Jehova”?—2 Tesalonica 2:1, 2.

15. Anong mga halimbawa an nagpapaheling na bakong sala sa Kasuratan na gamiton an kronolohiya sa paghihingoang maaraman kun noarin maootob an mga katuyohan nin Dios, asin ano an ikinurahaw nin dakol na maimbod na lingkod ni Jehova, kan nakaagi asin sa presente?

¹⁵ Mayo man nin sala sa paggamit sa kronolohiya sa mga paghihingoa na maaraman an “itinalaan na panahon” para sa kaotoban kan mga katuyohan nin Dios. (Habacuc 2:3) Si Daniel nagkarkulo kun noarin matatapos an pagigin gaba nin Jerusalem. (Daniel 9:1, 2) An maimbod na Judiong natatada kan enot na siglo naghalat sa pagdatong kan Mesiyas huli ta kinarkulo ninda an katapusan nin sarong panahon, basado sa hula. (Daniel 9:25; Lucas 3:15) An mga Kristiano kan paghinanapos kan ika-19 siglo asin pagpopoon kan ika-20 siglo nakahimong maghalat sa pagsakop kan Kahadean nin Dios bago an 1914 huli ta kinarkulo ninda kun noarin matatapos an “itinalaan na panahon kan mga nasyon.” (Lucas 21:24; Daniel 4:16, 17) Kun siring masasabotan kun taano ta may mga ginibong paghihingoa na gamiton an iba pang mga tanda sa panahon na nasa Biblia tanganing aramon kun noarin posibleng maotob an mga paglaom na haloy nang hinahalat. An maimbod na mga lingkod ni Jehova kan nakaagi nagkururahaw: “Sagkod noarin, O Jehova?”—Isaias 6:11; Salmo 74:10; 94:3.

Kun Taano ta Dapat na “Mag-andam”?

16. (a) An Marcos 13:32 maninigo daw na saboton na nangangahulogan na kita dapat na dai magpaheling nin interes sa kun noarin madatong an katapusan? (b) Anong “tanda” an naheheling na, alagad ano pang ibang “tanda” an hinahalat niato?

¹⁶ Mantang malinaw na sinabi ni Jesus na mayo nin tawo na makakaaram kan “aldaw” o “oras” na an Ama magboboot sa saiyang Aki na ‘dumatong’ tumang sa maraot na palakaw nin mga bagay ni Satanas, tibaad may maghapot: ‘Taano ta napakahalaga na maghalat sa katapusan?’ Ini mahalaga huli ta haros kadungan kaiyan idinugang ni Jesus: “Magbantay kamo, magpuka kamo.” (Marcos 13:32-35) An “tanda” kan parousia ni Jesus naheling na poon kan 1914. Kita ngonyan naghahalat sa “tanda kan Aki nin tawo,” kun sia ‘dumatong’ na bilang Parakastigo ni Jehova.

17, 18. (a) Taano ta pinagbotan ni Jesus an mga Kristiano kan enot na siglo na dumulag sa Jerusalem oras na maheling ninda an tanda kan nagdadangadang na kalaglagan kaiyan? (b) Taano ta magigin peligroso na manarahotan manongod sa pagigin apretado kan satong mga panahon?

¹⁷ Kan si Jesus magtao sa mga Kristianong taga-Judea kan enot na siglo nin sarong tanda na paagi kaiyan maaaraman ninda na nagdatong na an panahon na dumulag sa Jerusalem, sia nag-insister sa pangangaipo na humiro tolos-tolos. (Lucas 21:20-23) Taano ta mag-aapreta, mantang haros apat na taon pa an uminagi poon kan paglataw kan tanda kan 66 C.E. asin an aktuwal na pagkalaglag nin Jerusalem kan 70 C.E.? Huli ta aram ni Jesus na kun sinda mag-aatraso, padagos nindang ididigson an saindang pagdulag asin sa huri maaabotan kan mga hukbong Romano.

¹⁸ Siring man ngonyan, magigin peligrosong gayo para sa mga Kristiano na manarahotan dapit sa pagkaapretado kan satong panahon asin magkaigwa nin kaisipan na garo “namamasyar sana” na nagpaparisa nin pagduda dapit sa kaharanihan kan katapusan.

19. Anong patanid an itinao ni Pedro asin Jesus?

¹⁹ An parousia, o presensia, ni Cristo labi nang 70 taon ngonyan, asin an saiyang “pagdatong” para sa “aldaw ni Jehova” nin pagkastigo sa kinaban ni Satanas marikas na nagdadangadang. Si apostol Pedro nagsabi na an aldaw na ini “madatong siring sa parahabon,” asin idinugang nia na kita maninigong ‘maghalat asin maggirumdom sa presensia kan aldaw ni Jehova.’ (2 Pedro 3:10-12) Pinatanidan man kita ni Jesus: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod. . . . Magpuka kamo.”—Lucas 21:34-36.

20. Ano an maninigo niatong ipagpasalamat, asin paano kita iingatan kan tamang Kristianong paghalat?

²⁰ An mga Saksi ni Jehova maninigo nanggad na maogma asin magpasalamat na sinda pinapagdanay na puka sa espirituwal kan maimbod asin mapagbantay na grupong “oripon”! An tamang Kristianong paghalat nag-iingat sa sato sa peligrosong “huring mga aldaw” na ini asin mapahiro sa sato na makikabtang nin maigot sa paghuhulit kan “maogmang baretang ini kan kahadean.” Paagi kaiyan tatabangan niato an iba na magpuka asin makaligtas pasiring sa bagong palakaw nin mga bagay na duman “an katanosan an magdadanay.”—2 Timoteo 3:1-5; Mateo 24:14; 2 Pedro 3:13.

[Nota sa Ibaba]

Nagigirumdoman daw Nindo?

◻ Taano ta dai maninigong lingawan nin mga Kristiano an panahon sa kronolohiya nin Biblia?

◻ Ano an nagin espesyal na kahulogan kan terminong “presensia”?

◻ Taano ta maninigo pa man giraray na ipamibi na dumatong na logod an Kahadean nin Dios?

◻ Paano nindo sisimbagon an mga nagtatatsar sa mga Saksi ni Jehova dapit sa kronolohiya?

◻ Taano ta peligroso an manarahotan manongod sa pagigin apretado kan satong mga panahon?

[Kahon sa pahina 14]

Mga Bagay na Maninigong Halaton nin mga Kristiano

An katapusan kan “itinalaan na mga panahon kan mga nasyon.”—Lucas 21:24.

“An tanda” kan presensia ni Cristo “asin kan pagtatapos kan palakaw nin mga bagay.”—Mateo 24:3–25:46.

An malinaw na midbidan kan grupong “maimbod asin madonong na oripon.”—Mateo 24:45-47.

An “tanda kan Aki nin tawo,” kun sia ‘dumatong’ na tanganing gibohon an mga paghokom ni Jehova.—Mateo 24:30.

[Ritrato sa pahina 13]

Si C. T. Russell asin an saiyang kairiba nagpuka