Ano Na an Nangyari sa Kristianong Pagpuka?

“AN ISINASABI ko sa saindo isinasabi ko sa gabos, Magpuka.” An mga tataramon na iyan ni Jesu-Cristo padagos na nadadangog nin sinserong mga Kristiano sa nag-aging mga siglo. Alagad pirang miembro kan Katolika Romana, Eastern Orthodox o pangenot na mga Iglesya Protestante an nakakadangog pa sa nakakapahirong patanid na iyan?—Marcos 13:37, King James Version.

Taano an mga Kristiano ta kaipuhan na magpuka? Isinabi pa sana ni Jesus: “Magpuka kamo ta dai nindo aram kun noarin madatong an kagurangnan kan harong, . . . tanganing kun umabot sia nin panale, dai nia kamo maabotan na natotorog.” (Marcos 13:35, 36) Kaya an mga disipulo ni Jesus kaipuhan na magpuka para sa pagdatong kan saindang Kagurangnan, an boot sabihon, pagdatong ni Cristo.

Ano an katuyohan kan pagdatong ni Jesus? An pagboot nia na magpuka itinao bilang kabtang kan saiyang simbag sa direkta sa puntong hapot na ini sa saiya kan saiyang mga disipulo: “Ano an magigin tanda kan saimong presensia asin kan pagtatapos kan palakaw nin mga bagay [“katapusan kan kinaban,” KJ]?” (Mateo 24:3) Sono sa kaagid na tala, pakapagtao nin sarong tanda na kadakol kan kabtang, si Cristo nagsabi: “Dangan maheheling nindo an Aki nin tawo na nagdadangadang sa sarong panganoron na igwa nin kapangyarihan asin dakulang kamurawayan. Alagad kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan naghaharani na. . . . Kun maheling na nindong nangyayari an mga bagay na ini, aramon nindo na an kahadean nin Dios harani na.”—Lucas 21:27-31.

Marahay na mga Dahelan sa Pagpuka

Kaya, si Jesu-Cristo nagtao sa saiyang mga disipulo nin marahay na mga dahelan sa pagdadanay na mata sa espirituwal tanganing halaton an kaotoban kan “tanda.” Ini mangangahulogan na an saindang Kagurangnan ‘presente’ na dai naheheling, ta dai kakaipuhanon an tanda kun an saiyang presensia magigin pisikal, naheheling. Alagad an saiyang espirituwal na presensia mangangahulogan man na an maraot na “kinaban,” o “palakaw nin mga bagay,” nasa “pagtatapos” na kaiyan, o panahon kan katapusan. Asin para sa mga Kristiano, iyan mangangahulogan na an saindang ‘kaligtasan harani na.’ Iyo, iyan mangangahulogan na “an kahadean nin Dios harani na.”

Bako daw na ini an pinakaubod kan Kristianong paglaom? Bako daw na iyan an mismong bagay na itinokdo sa gabos na Kristiano na ipamibi, arin na baga: “Ama niamo na nasa langit, an saimo logod na ngaran pakangbanalon, dumatong logod an kahadean mo, gibohon an boot mo, sa daga nin siring sa langit”? (Mateo 6:9, 10, The Jerusalem Bible) Tanganing magin lohiko, bako daw na an mga Katoliko na inoorootro an saindang Padrenuestro o an mga miembro nin ibang iglesya na nangangadiye kan Pamibi kan Kagurangnan maninigong magpuka tanganing helingon na maotob an saindang mga pamibi? O posible daw na an mga katokdoan kan saindang iglesya nakahale na sa kahulogan kan pamibing iyan, kaya haros mayo na sinda nin hahalaton?

Kun Taano ta Dai Na Nagpupuka an Dakol

An mga Kristiano kaipuhan na magpuka para sa tanda kan presensia ni Cristo (Griego, pa·rousiʹa, na isinalin na “pagdatong” sa dakol na bersion kan Biblia). Taano? Huli ta ini mangangahulogan na an Kahadean nin Dios, an sainda mismong kaligtasan asin an katapusan kan “kinaban,” o presenteng maraot na “palakaw nin mga bagay,” harani na. An laen-laen na mga iglesya nin Kakristianohan maninigo kutanang tinabangan an mga miembro ninda na magdanay na puka sa espirituwal tanganing dai sinda manompongan na natotorog kun dumatong an Kagurangnan. Inotob daw kan mga iglesya an misyon nindang ini?

An sarong librong reperensia para sa mga iskolar nagsasabi: “Mantang nag-aagi an panahon na dai pa nangyayari an parousia iyan ruminayo nang ruminayo sa ngapit kun para sa iglesya, asin sa katapustapusi haros biyo nang tinalikdan bilang sarong punto nin pagtubod.”—The New International Dictionary of New Testament Theology.

Ini, sa katotoohan, iyo an nangyari. Tinalikdan na kan mga iglesya nin Kakristianohan an Kristianong pagpuka na ipinagboot ni Jesus sa saiyang mga disipulo na noarin man dai pagpabayaan. Dai na sinda naghahalat sa presensia ni Cristo asin sa pagdatong kan Kahadean nin Dios. May mga itinatao sindang sarahotan kun taano ta dai na ninda hinahalat an “pagtatapos kan palakaw nin mga bagay,” o “katapusan kan kinaban.”

An may sarong tomo na ensiklopedyang Pranses na QUID 1984 nagtatao nin presenteng pakahulogan sa relihiyosong paniniwala manongod sa katapusan kan kinaban. Sa irarom kan “Mga Karakteristiko kan Relihiyon na Katoliko,” iyan nagsasabi: “Minalataw na sa presente an pakahulogan kan Iglesya sa katapusan kan Kinaban iyo an indibiduwal na pagbalo na kaipuhan na atubangon nin lambang saro kun sia magadan.” Sa pagpaorog pa sa problema, an The New Encyclopædia Britannica nagsasabi: “An mas establisadong mga iglesyang Kristiano ipinuwera an eschatology [an katokdoan sa “Huring mga Bagay”] bilang daing kahulogan o bilang daing datang estorya.”

Kaya, ano an makangangalas pero dai madudulagan na simbag sa hapot na “Ano na an nangyari sa Kristianong pagpuka?” Iyan ginadan kan “mas establisadong mga iglesyang Kristiano,” an boot sabihon, an Katolika Romana, Eastern Orthodox asin pangenot na mga iglesyang Protestante. Minsan siring, an minasunod na mga artikulo magpapaheling na an tunay na mga lingkod nin Dios perming naghahalat sa presensia ni Cristo, asin na igwa nin sarong banwaan ngonyan na pinatunayan an saindang Kristianong pagpupuka sa nag-aging mga taon asin nakadiskobre giraray sa sarong makangangalas na paglaom na puwede man na mapasaindo. Tabi ipagpadagos an saindong pagbasa, dangan hagadon sa saro sa mga Saksi ni Jehova na tabangan kamong “magpuka” para sa kaotoban kan paglaom na iyan sa Biblia.