Kun Taano an mga Saksi ni Jehova ta Nagpupuka

“Magpuka kamo, huli ta dai nindo aram kun sa anong aldaw madatong an saindong Kagurangnan.”​—MATEO 24:42.

1. Kiisay minaaplikar an sadol na “magpuka”?

SA LAMBANG lingkod nin Dios​—baga man hoben o may edad na, baga man bago pa sanang magdusay o may halawig nang rekord nin paglilingkod—​an sadol kan Biblia minaaplikar: “Magpuka kamo”! (Mateo 24:42) Taano ta mahalaga ini?

2, 3. (a) Anong tanda an malinaw na ilinadawan ni Jesus, asin ano an ipinaheling kan kaotoban kan hula? (b) Anong kamugtakan na sinambit sa Mateo 24:42 an minabalo sa pagigin tunay kan satong pagtubod, asin paano?

² Sa paghinanapos kan saiyang ministeryo digdi sa daga, ihinula ni Jesus an tanda kan saiyang dai naheheling na presensia na may kapangyarihan sa Kahadean. (Mateo, kapitulo 24 asin 25) Malinaw niang ilinadawan an panahon na iyan kan saiyang makahadeng presensia​—asin an mga pangyayari bilang kaotoban kan hula nagpapaheling na sia pinatukaw na sa trono bilang Hade sa kalangitan kan 1914. Itinokdo man nia an sarong kamugtakan na sa panahon na iyan mabalo sa pagigin tunay kan satong pagtubod. Manongod sa panahon na sia mahiro bilang Parakastigo sa paglaglag kan presenteng maraot na palakaw durante kan dakulang kahorasaan na si Jesus nagsabi: “Mapadapit sa aldaw asin oras na iyan mayo nin siisay man na nakakaaram, ni an mga anghel kan kalangitan ni an Aki, kundi an Ama sana.” Iyan an nasa isip kaya sia nagsabi: “Kaya magpuka kamo, huli ta dai nindo aram kun sa anong aldaw madatong an saindong Kagurangnan.”​—Mateo 24:​36, 42.

³ An dai niato pakaaram kun noarin an aldaw asin an oras na mapoon an dakulang kahorasaan naghahagad na kun kita naghihingako na mga Kristiano, maninigo kitang mamuhay bilang tunay na mga Kristiano kada aldaw. An paagi daw kan paggamit nindo sa saindong buhay magbubunga kan pag-oyon kan Kagurangnan pagdatong kan dakulang kahorasaan? O kun an kagadanan an maenot, gigirumdomon ka daw nia bilang saro na maimbod na naglingkod ki Jehova sagkod sa katapusan kan saimong presenteng buhay?​—Mateo 24:13; Kapahayagan 2:10.

An Enot na mga Disipulo Nagmaigot na Magin Puka

4. Ano an satong manonodan sa halimbawa nin espirituwal na pagkapuka ni Jesus?

⁴ Si Jesu-Cristo mismo nagtao kan pinakamarahay na halimbawa nin espirituwal na pagkapuka. Sia parate asin odok na namimibi sa saiyang Ama. (Lucas 6:12; 22:​42-44) Kan napapaatubang sa mga pagbalo, nagsarig siang marhay sa paggiya na yaon sa Kasuratan. (Mateo 4:​3-10; 26:52-54) Dai nia tinogotan an saiyang sadiri na malingling sa gibohon na iinasignar saiya ni Jehova. (Lucas 4:​40-44; Juan 6:15) Magigin siring man daw kaiyan kapuka idtong mga ibinilang an saindang sadiri na mga parasunod ni Jesus?

5. (a) Taano an mga apostol ni Jesus ta nagkaproblema sa pagpapadanay nin espirituwal na pagkatimbang? (b) Anong tabang an itinao ni Jesus sa saiyang mga apostol pagkabuhay nia liwat?

⁵ May beses, pati an mga apostol ni Jesus nanluya. Bilang resulta nin sobrang pagkagalaga asin salang mga ideya, kinaipuhan nindang akoon an mga pagkasudya. (Lucas 19:11; Gibo 1:6) Bago ninda nanodan na lubos na manarig ki Jehova, an biglang mga pagbalo nakataranta sainda. Kaya, kan si Jesus inaresto, an saiyang mga apostol nagdurulag. Sa huri kan bangging idto, si Pedro, dahelan sa takot, paorootrong nagpainda pati kan pakamidbid nia ki Cristo. Dai pa ikinasasapuso kan mga apostol an hatol ni Jesus na: “Magpuka kamo asin padagos na mamibi.” (Mateo 26:​41, 55, 56, 69-75) Pagkabuhay nia liwat ginamit ni Jesus an Kasuratan tanganing pakosogon an saindang pagtubod. (Lucas 24:​44-48) Asin kan garo baga an iba sainda may posibilidad na gibohon na segunda sana an ministeryo na ipinaniwala sa sainda, pinakosog ni Jesus an saindang motibasyon na magkonsentrar sa mas importanteng gibohon.​—Juan 21:​15-17.

6. Tumang sa anong duwang siod patienot nang pinatanidan ni Jesus an saiyang mga disipulo?

⁶ Enot kaiyan, pinatanidan ni Jesus an saiyang mga disipulo na dai sinda dapat magin kabtang kan kinaban. (Juan 15:19) Hinatolan man nia sinda na dai magpakangkagurangnan sa lambang saro kundi na iribang maglingkod bilang magturugang. (Mateo 20:​25-27; 23:​8-12) Sinunod daw ninda an saiyang hatol? Inenot daw ninda an gibohon na saiyang itinao sainda?

7, 8. (a) Paano ipinaheheling kan rekord na ginibo kan mga Kristiano kan enot na siglo na saindang isinapuso an sadol ni Jesus? (b) Taano ta mahalaga kaidto an padagos na pagkapuka sa espirituwal?

⁷ Sagkod na an mga apostol buhay pa, iningatan ninda an kongregasyon. An kasaysayan nagpapatunay na an enot na mga Kristiano bakong kalabot sa politikal na mga aktibidad kan Imperyo nin Roma asin na mayo sindang ipinaorog na grupong klero. Sa ibong na kampi, sinda maigot na mga parabalangibog kan Kahadean nin Dios. Sa katapusan kan enot na siglo, nakapagpatotoo sinda sa bilog na Imperyo nin Roma, na naggigibo nin mga disipulo sa Asia, Europa, asin Aprika del Norte.​—Colosas 1:23.

⁸ Minsan siring, an mga nagibong iyan sa paghuhulit dai boot sabihon na mayo nang ano pa man na pangangaipong magpuka sa espirituwal. An ihinulang pagdatong ni Jesus haloy pa. Asin paglaog kan kongregasyon sa ikaduwang siglo C.E., naglataw an mga situwasyon na nagsapeligro sa espirituwalidad kan mga Kristiano. Taano?

An mga Uminontok na Magin Puka

9, 10. (a) Pagkagadan kan mga apostol, anong mga pangyayari an nagpaheling na an dakol na naghihingakong Kristiano dai nagpupuka? (b) Anong mga teksto na sinitar sa parapong ini an nakatabang kutana sa naghihingakong mga Kristiano na magdanay na makosog sa espirituwal?

⁹ An ibang naglaog sa kongregasyon nagpoon na ipahayag an saindang mga paniniwala sa lenguahe kan pilosopiyang Griego, tangani na an saindang ihinuhulit gibohon na madaling akoon kan mga tawo sa kinaban. Luway-luway, an paganong mga doktrina, arog baga kan Trinidad asin kan kanaturalan na inmortalidad kan kalag, nagin kabtang nin naatian na porma nin Kristianismo. Nagresulta ini sa pagbaya sa paglaom sa milenyo. Taano? Idtong mga nag-ako kan paniniwala sa inmortalidad kan kalag nagkonklusyon na an mga bendisyon sa paghade ni Cristo makakamtan gabos sa rona nin mga espiritu nin sarong kalag na magdadanay na buhay pagkagadan kan hawak na tawo. Kaya mayo na sindang naheling na pangangaipong maghalat sa presensia ni Cristo na may kapangyarihan sa Kahadean.​—Ikomparar an Galacia 5:​7-9; Colosas 2:8; 1 Tesalonica 5:21.

¹⁰ An situwasyon na ini pinagrabe nin iba pang pangyayari. An ibang naghihingako na Kristianong mga paraataman nagpoon na gamiton an saindang mga kongregasyon bilang paagi na magkamit nin kabantogan sa sadiri. Tuso nindang tinawan an saindang sadiring mga opinyon asin katokdoan nin halaga na kapantay sa Kasuratan o mas halangkaw pa ngani kaiyan. Kun may oportunidad, an apostatang iglesyang ini boluntad pa nganing nagserbi sa intereses kan politikal na estado.​—Gibo 20:30; 2 Pedro 2:1, 3.

Mga Bunga nin Orog Pang Pagkapuka

11, 12. Taano an Reporma nin Protestante ta dai nagtanda nin pagbalik sa tunay na pagsamba?

¹¹ Pakatapos nin mga siglo nin pan-aabuso kan Iglesya Katolika Romana, may mga Repormista na nagtaram na kan ika-16 na siglo. Alagad ini dai nagtanda nin pagbalik sa tunay na pagsamba. Taano ta dai?

¹² Minsan ngani manlaenlaen na grupong Protestante an tuminalingkas sa kapangyarihan nin Roma, dara ninda an dakol na pundamental na katokdoan asin gibo kan apostasiya​—an ideyang klero-lego, siring man an paniniwala sa Trinidad, inmortalidad kan kalag, asin daing sagkod na pagpasakit pagkagadan. Asin, arog kan Iglesya Katolika Romana, nagpadagos sindang kabtang kan kinaban, na dayupot na kaalyado kan politikal na mga elemento. Kaya ginusto nindang isikwal an ano man na mga paglaom dapit sa pagdatong ni Cristo bilang Hade.

13. (a) Ano an nagpapaheling na may mga tawong tunay na pinahalagahan an Tataramon nin Dios? (b) Durante kan ika-19 siglo, sa anong pangyayari nagkaigwa nin espesyal na interes an ibang naghihingakong Kristiano? (c) Taano ta dakol an nakaeksperyensia nin pagkasudya?

¹³ Alagad, ihinula ni Jesus na pagkagadan kan mga apostol, an tunay na mga magmamana kan Kahadean (na iinagid nia sa trigo) magpapadagos na tumalubo kadungan kan falsong mga Kristiano (o, mga doot) sagkod sa panahon kan pag-ani. (Mateo 13:​29, 30) Dai niato ngonyan puwedeng ilista na may ano man na kasegurohan an gabos na ibinilang na trigo kan Kagurangnan. Alagad maninigong mangnohon na durante kan ika-14, ika-15, asin ika-16 na siglo, may mga tawo na isinapeligro an saindang buhay asin katalingkasan tanganing matradusir an Biblia sa lenguahe kan ordinaryong tawo. An iba bako sanang inako an Biblia bilang Tataramon nin Dios kundi sinayumahan man an Trinidad bilang bakong Makakasuratan. An iba isinikwal an paniniwala sa inmortalidad kan kalag asin pagpasakit sa kalayo sa impierno bilang biyong bakong kaoyon kan Tataramon nin Dios. Siring man, durante kan ika-19 siglo, bilang resulta kan orog pang pag-adal sa Biblia, may mga grupo sa Estados Unidos, Alemania, Inglaterra, asin Rusya na nagpoon na ipahayag an kombiksion na nagdadangadang na an panahon para sa pagbalik ni Cristo. Pero an kadaklan sa saindang mga linaoman nasudya. Taano? Sa dakulang kabtang, huli ta nagsarig sindang marhay sa mga tawo asin bakong gayo sa Kasuratan.

Kun Paano an mga Ini Nagin Puka

14. Iladawan an paagi nin pag-adal sa Biblia na ginamit ni C. T. Russell asin kan saiyang kairiba.

¹⁴ Dangan, kan 1870, si Charles Taze Russell asin an iba niang kairiba nagporma nin grupo para sa pag-adal nin Biblia sa Allegheny, Pennsylvania. Bako sinda an enot na nakatalastas sa dakol na katotoohan sa Biblia na saindang inako, pero kun nag-aadal, ginigibo nindang ugale na siyasaton nin maingat an gabos na teksto dapit sa sarong hapot.a An saindang katuyohan, bakong humanap nin patotoong mga teksto para sa dati nang tinutubod na ideya, kundi tanganing makasierto na naggigibo sinda nin mga konklusyon na kaoyon sa gabos na sinasabi kan Biblia dapit sa bagay.

15. (a) Ano an narealisar kan iba apuwera ki Tugang na Russell? (b) Ano an nagtanda sa mga Estudyante sa Biblia bilang laen sa mga ini?

¹⁵ An nagkapirang iba pa bago sainda nakarealisar nang si Cristo mabalik na dai naheheling bilang sarong espiritu. Nasabotan kan iba na an katuyohan kan pagbalik ni Cristo, bakong tanganing soloon an daga asin paraon an gabos na buhay nin tawo, kundi, imbes, tanganing bendisyonan an gabos na pamilya sa daga. May nagkapira ngani na nakarealisar na an taon 1914 magtatanda kan katapusan kan mga Panahon nin mga Hentil. Alagad para sa mga Estudyante sa Biblia na kairiba ni Tugang na Russell, ini labi pa sa mga punto sana para sa pag-orolay sa teolohiya. Plinano ninda an saindang buhay sono sa mga katotoohan na ini asin tinawan iyan nin internasyonal na publisidad sa hiwas na dai pang kaagid sa panahon na idto.

16. Kan taon 1914, taano si Tugang na Russell ta nagsurat na: “Kita nasa panahon nin pagbalo”?

¹⁶ Alagad, kinaipuhan pa nindang magpuka. Taano? Bilang halimbawa, minsan ngani aram ninda na an 1914 tinandaan kan hula sa Biblia, dai ninda siertong aram kun ano an talagang mangyayari sa taon na iyan. Nag-atubang ini sainda nin pagbalo. Sa The Watch Tower kan Nobyembre 1, 1914, si Tugang na Russell nagsurat: “Girumdomon ta na kita nasa panahon nin pagbalo. . . . Kun igwa nin ano man na dahelan na magiya sa saro na bayaan an Kagurangnan asin an Saiyang Katotoohan asin na umontok sa pagsakripisyo para sa Katuyohan kan Kagurangnan, kun siring bako sanang an pagkamoot sa Dios na nasa puso an nakapukaw nin interes sa Kagurangnan, kundi may laen pa; tibaad paglaom na an panahon halipot na; an konsagrasyon para sana sa sarong depinidong panahon.”

17. Paano si A. H. Macmillan, asin an iba pang arog saiya, nagpadanay nin espirituwal na pagkatimbang?

¹⁷ An iba binayaan kaidto an paglilingkod ki Jehova. Pero si A. H. Macmillan saro na dai buminaya. Pakalihis nin dakol na taon, prangka niang inako: “Kun minsan an samong mga linalaoman sa sarong petsa labi pa sa ginagarantiyahan kan Kasuratan.” Ano an nakatabang saiya na mapagdanay an espirituwal na pagkatimbang? Saiyang narealisar, siring kan sabi nia, na “kun an mga linalaoman na idto dai naotob, iyan dai nakaliwat sa mga katuyohan nin Dios.” Idinugang nia: “Nanodan ko na maninigo niatong akoon an satong mga sala asin padagos na siyasaton an Tataramon nin Dios para sa orog pang kaliwanagan.”b May kapakumbabaan, tinogotan kan enot na mga Estudyante sa Biblia na idto na husayon kan Tataramon nin Dios an saindang pagmansay.​—2 Timoteo 3:​16, 17.

18. Paano an pagigin puka kan mga Kristiano nagbunga nin progresibong mga pakinabang manongod sa pagigin bakong kabtang kan kinaban?

¹⁸ Durante kan suminunod na mga taon, an saindang pangangaipong magpuka dai nag-ina. Siyempre, aram ninda na an mga Kristiano dapat na bakong kabtang kan kinaban. (Juan 17:14; Santiago 4:4) Kaoyon kaiyan, dai sinda uminiba sa Kakristianohan sa pagsuportar sa Liga de Naciones bilang politikal na kapahayagan kan Kahadean nin Dios. Pero pag-abot sana nin 1939 na malinaw nindang nasabotan an isyu dapit sa Kristianong neutralidad.​—Helingon an The Watchtower, Nobyembre 1, 1939.

19. Anong mga pakinabang sa pangangataman sa kongregasyon an ibinunga huli ta an organisasyon nagpuka?

¹⁹ Nungka sindang nagkaigwa nin grupong klero, minsan ngani an ibang elehidong magurang naghona na an paghuhulit sa laog kan kongregasyon iyo sana an maninigong laoman sainda. Alagad, huli sa odok na pagmawot na makaoyon sa Kasuratan, rinepaso kan organisasyon an katongdan kan mga magurang sa liwanag kan Kasuratan, na paorootrong ginigibo iyan paagi sa mga pahina kan The Watchtower. Ginibo an mga pagliliwat sa organisasyon kaoyon sa sinasabi kan Kasuratan.

20-22. Paano progresibong inandam an bilog na organisasyon sa pag-otob kan ihinulang gibohon na panglobong pagbalangibog kan Kahadean?

²⁰ An bilog na organisasyon progresibong inandam sa lubos na pag-otob kan gibohon na isinabi kan Tataramon nin Dios para sa satong kaaldawan. (Isaias 61:​1, 2) Sagkod saen dapat na ikabalangibog an maogmang bareta sa satong kaaldawan? Si Jesus nagsabi: “Sa gabos na nasyon an maogmang bareta kaipuhan na ikahulit nguna.” (Marcos 13:10) Sa punto-de-vista nin tawo, an gibohon na iyan parateng garo baga imposible.

²¹ Alagad, may pagsarig ki Cristo bilang Payo kan kongregasyon, an grupong maimbod asin madonong na oripon nag-abante. (Mateo 24:45) May kaimbodan asin karigonan na itinokdo ninda sa banwaan ni Jehova an gibohon na dapat otobon. Poon 1919, orog pang idinoon an ministeryo sa langtad. Para sa dakol, bakong pasil na magharongharong asin makipag-olay sa mga estranyo. (Gibo 20:20) Pero an mga artikulong pinag-adalan na arog baga kan “Blessed Are the Fearless” (kan 1919) asin “Be of Good Courage” (kan 1921) nakatabang sa iba na makapoon sa gibohon, na may pagsarig ki Jehova.

²² An pakiolay, kan 1922, na “ipaisi, ipaisi, ipaisi, an Hade asin an saiyang kahadean” nagtao nin kinakaipuhan na pagpakosog na tawan an gibohon na ini nin maninigong kahalagahan. Magpoon kan 1927, hinarale an mga magurang na dai inako an Makakasuratan na paninimbagan na iyan. Kan panahon na idto, an nagbibiyaheng mga representante kan Sosyedad, an mga pilgrim, inasignaran na magin mga direktor sa paglilingkod sa rehiyon, na nagtatao nin personal na pagtotokdo sa mga parahayag dapit sa paglilingkod sa langtad. Bakong gabos nakapagpayunir, pero sa mga Sabado asin Domingo dakol an ginagamit an bilog na mga aldaw sa paglilingkod, na nagpopoon sa amay na aga, minapondo nin kadikit sa pagkakan nin sanwits, dangan nagpapadagos sa paglilingkod sagkod na magbabanggi na. Idto mahalagang mga panahon nin teokratikong pag-oswag, asin nakikinabang kitang marhay paagi sa pagrepaso kan paagi na giniyahan ni Jehova an saiyang banwaan. Padagos niang ginigibo iyan. Paagi sa saiyang pagbendisyon, an gibong paghuhulit kan maogmang bareta dapit sa natindog nang Kahadean makakaabot sa mapangganang katapusan.

Kamo daw Nagpupuka?

23. Manongod sa pagkamoot asin pagigin siblag sa kinaban kan mga Kristiano, paano niato ikapaheheling bilang indibiduwal na kita nagpupuka?

²³ Nagsusunod sa paggiya ni Jehova, an saiyang organisasyon padagos na pinapag-iingat kita sa mga gibo asin kaisipan na magpapamidbid sato bilang kabtang kan kinaban, na sa siring namemeligrong mapara kaiba kaiyan. (1 Juan 2:17) Siring man, kita bilang mga indibiduwal kaipuhan na magin puka paagi sa pagsunod sa paggiya ni Jehova. Si Jehova tinatawan man kita nin pagtotokdo manongod sa pamumuhay asin paggibo na sararo. Natabangan kita kan saiyang organisasyon na tumalubo sa pag-apresyar sa tunay na kahulogan kan Kristianong pagkamoot. (1 Pedro 4:​7, 8) An satong pagpupuka naghahagad na kita odok na maghingoang iaplikar an hatol na ini, sa ibong kan pagkabakong sangkap nin tawo.

24, 25. Sa anong mahalagang mga bagay maninigo kitang magpuka, na may anong malalaoman?

²⁴ Permi nanggad, an maimbod asin madonong na oripon pinagigirumdom kita: “Manarig ka ki Jehova sa bilog mong puso asin dai ka manarig sa saimong sadiring pakasabot.” (Talinhaga 3:5) “Mamibi nin daing ontok.” (1 Tesalonica 5:17) Sinadol kitang makanood na ibasar an satong mga desisyon sa Tataramon nin Dios, na togotan an tataramon na ini na magin ‘ilawan sa satong bitis asin liwanag sa satong dalan.’ (Salmo 119:105) Mamomoton nanggad, pinakosog kitang enoton sa satong buhay an paghuhulit kan maogmang bareta kan Kahadean nin Dios, an gibohon na ihinula ni Jesus para sa satong kaaldawan.​—Mateo 24:14.

²⁵ Iyo, an maimbod asin madonong na oripon tunay na puka. Bilang mga indibiduwal kaipuhan man kitang magpuka. Bilang resulta kan paggibo kaiyan, kita logod manompongan na kabilang duman sa mga matindog na may pag-oyon sa atubangan kan Aki nin tawo kun sia dumatong na sa paggibo nin paghokom.​—Mateo 24:30; Lucas 21:​34-36.

[Mga Nota sa Ibaba]

Bilang Pagrepaso

◻ Siring kan ipinaheling sa Mateo 24:​42, taano ta kaipuhan kitang danay na magpuka?

◻ Paano si Jesus asin an saiyang mga parasunod kan enot na siglo nagpadanay nin espirituwal na pagkapuka?

◻ Magpoon kan 1870, ano an mga nangyari huli ta nagpuka an mga lingkod ni Jehova?

◻ Ano an matao nin ebidensia na nagpupuka kita bilang mga indibiduwal?

[Mga ritrato sa pahina 23]

Si Jesus nagdanay na sibot sa gibohon na iinasignar kan saiyang Ama. Sia odok man na namibi

[Ritrato sa pahina 24]

Si Charles Taze Russell sa saiyang huring mga taon

[Ritrato sa pahina 25]

An labi sa 4,700,000 na parabalangibog kan Kahadean aktibo sa bilog na daga