Si “Jehova, Dios na Maheherakon Asin Maugayon”
“Jehova, Jehova, Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.”—EXODO 34:6.
1. (a) Anong karangahan an itinatao kan Biblia para sa mga naheling an mga namomotan na napaparayo sa dalisay na pagsamba? (b) Ano an pagmansay ni Jehova sa mga napapasala?
“SINABI kan aki kong babae na habo na niang magin kabtang kan Kristianong kongregasyon,” sabi nin sarong Kristianong ama. “Sa laog nin dakol na aldaw, semana, bulan pa ngani pagkatapos, nakamate ako nin dai nahahaleng kolog sa sakong hawak. Idto mas grabe sa pagkagadan.” Tunay nanggad na makologon sa boot na maheling an sarong namomotan na napaparayo sa dalan nin dalisay na pagsamba. Nag-agi na daw kamo sa siring na eksperyensia? Kun iyo, mararanga kamong maaraman na si Jehova may pakikidamay sa saindo. (Exodo 3:7; Isaias 63:9) Alagad ano an pagmansay nia sa mga napapasalang iyan? Ipinaheheling kan Biblia na may pagkaherak na inaagda sinda ni Jehova na makabalik sa saiyang pabor. Nakimaherak sia sa rebeldeng mga Judio kan kaaldawan ni Malaquias: “Pagbalik kamo sa sako, asin ako mabalik sa saindo.”—Malaquias 3:7.
2. Paano ipinaheheling kan Biblia na an pagkaherak kanaturalan na kabtang kan personalidad ni Jehova?
2 An pagkaherak nin Dios itinampok para ki Moises sa Bukid nin Sinai. Duman, ihinayag ni Jehova an saiyang sadiri bilang “Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.” (Exodo 34:6) Idinodoon kan deklarasyon na ini na an pagkaherak kanaturalan na kabtang kan personalidad ni Jehova. “Boot nia na an gabos makapagsolsol,” an isinurat kan Kristianong apostol na si Pedro. (2 Pedro 3:9) Siempre, an pagkaherak nin Dios may limite. “Dai nanggad sia magpapalibre sa padusa,” an sabi ki Moises. (Exodo 34:7; 2 Pedro 2:9) Minsan siring, “an Dios pagkamoot,” asin an pagkaherak dakulang aspekto kan kualidad na iyan. (1 Juan 4:8; Santiago 3:17) Si Jehova dai “papagdadanayon an saiyang kaanggotan sagkod lamang,” asin sia “may dakulang kaogmahan sa mamomoton na kabootan.”—Miqueas 7:18, 19.
3. Paano an punto de vista ni Jesus sa pagkaherak kabaliktaran kan sa mga eskriba asin Fariseo?
3 Si Jesus sangkap na ladawan kan saiyang langitnon na Ama. (Juan 5:19) An saiyang maheherakon na pagtratar sa mga paragibo nin sala bakong pagkonsinte sa saindang mga kasalan kundi kapahayagan kan iyo man sanang mapagpadangat na mga saboot na ipinaheling nia sa mga maluya an salud sa pisikal. (Ikomparar an Marcos 1:40, 41.) Iyo, iiniba ni Jesus an pagkaherak sa “mas magabat na mga bagay” sa Ley nin Dios. (Mateo 23:23) Sa kabaliktaran, estudyare an mga eskriba asin Fariseo, na an legalistikong ideya manongod sa hustisya sa parate biyo nang hinahale an pagkaherak. Kan maheling ninda si Jesus na nakikikatood sa mga parakasala, sinda nagreklamo: “An tawong ini nag-iistimar sa mga parakasala asin nagkakakan sa kaibanan ninda.” (Lucas 15:1, 2) Sinimbag ni Jesus an mga nagsasahot sa saiya paagi sa tolong ilustrasyon, na an kada saro nagdodoon kan pagkaherak nin Dios.
4. Anong duwang ilustrasyon an isinaysay ni Jesus, asin ano an punto kan lambang saro?
4 Enot, isinaysay ni Jesus an manongod sa sarong tawo na binayaan an 99 karnero tanganing hanapon an saro na nawara. An punto nia? “Magkakaigwa nin orog na kagayagayahan sa langit huli sa sarong parakasala na nagsosolsol kisa sa siyam na polo may siyam na matanos na dai nangangaipong magsolsol.” Sumunod, isinaysay ni Jesus an manongod sa sarong babae na hinanap an nawarang sarong pirak na dracma asin naggayagaya kan iyan makua. An aplikasyon nia? “Nagkakaigwa nin kagayagayahan an mga anghel nin Dios huli sa sarong parakasala na nagsosolsol.” Isinaysay ni Jesus an ikatolo niang ilustrasyon sa pormang parabola.a Iyan ibinilang nin dakol na an pinakamarahay na halipot na estorya na isinaysay kasuarin man. An pag-estudyar sa parabolang ini makatatabang sa sato na apresyaron asin arogon an pagkaherak nin Dios.—Lucas 15:3-10.
An Sarong Aking Rebelde Naghale sa Harong
5, 6. Paano an ngohod na aki sa ikatolong ilustrasyon ni Jesus nagpaheling nin labi-labi karaot na kadaihan nin pag-apresyar?
5 “An sarong tawo may duwang aking lalaki. Asin an ngohod sa sainda nagsabi sa saiyang ama, ‘Ama, tawan sa sako an kabtang kan rogaring na kahirasan ko.’ Kun siring binanga nia sa sainda an saiyang kabuhayan. Paghaloyhaloy, pakalihis nin nagkapira sanang aldaw, tinipon kan ngohod na aki an gabos asin nagbiahe pasiring sa harayong daga, asin duman sinayang an saiyang rogaring paagi sa marigsok na pamumuhay.”—Lucas 15:11-13.b
6 An ngohod na aki digdi nagpaheling nin labi-labi karaot na kadaihan nin pag-apresyar. Enot, hinagad nia an pamana sa saiya, dangan sinayang nia iyan “paagi sa marigsok na pamumuhay.” An fraseng “marigsok na pamumuhay” trinadusir hale sa termino sa Griego na nangangahulogan na “pamumuhay na ngana-ngana sa bisyo.” Sinasabi nin sarong intelektuwal na an termino “nagpapahayag kan biyong pagpadara sa horot.” May tamang dahelan, an hoben na lalaki sa parabola ni Jesus parateng inaapod na gastador, sarong termino na naglaladawan sa saro na ragap sa pagigin marakwa asin marawraw.
7. Sairisay ngonyan an kapareho kan gastador, asin taano ta dakol na siring na indibiduwal an naghahanap nin independensia sa “harayong daga”?
7 May mga tawo daw ngonyan na kapareho kan gastador? Igwa. Makamomondo, an medyo sadang na kabilangan binayaan an ligtas na “harong” kan satong langitnon na Ama, si Jehova. (1 Timoteo 3:15) An nagkapira sa sainda naghohona na an mga kamugtakan sa laog kan kasararo sa harong nin Dios sobra kadakol kan bawal, na an mapagbantay na mata ni Jehova kaolangan imbes na proteksion. (Ikomparar an Salmo 32:8.) Pensara an sarong Kristiana na pinadakula segun sa mga prinsipyo sa Biblia alagad sa huri napalabot sa pag-inom asin pagdodroga. Sa paggirumdom sa mamondong panahon na iyan sa saiyang buhay, sia nagsasabi: “Gusto kong patunayan kaidto na kaya kong magkaigwa nin mas marahay na buhay. Gusto kong gibohon an gusto ko, asin habo kong may magsabi sako nin laen dian.” Arog kan gastador, naghanap nin independensia an hoben na babaeng ini. Makaturotriste, huli sa saiyang mga gibo na bakong sono sa Kasuratan kinaipuhan na sia pahaleon sa Kristianong kongregasyon.—1 Corinto 5:11-13.
8. (a) Anong tabang an ikaoopresir sa mga nagmamawot na mamuhay na sarongat sa mga pamantayan nin Dios? (b) Taano an saro ta maninigo na gumibo nin nagpapagin timbang na pagpensar sa saiyang pinipili kun dapit sa pagsamba?
8 Talagang makologon sa boot kun an sarong kapagtubod nagpapaheling nin kamawotan na mamuhay na sarongat sa mga pamantayan nin Dios. (Filipos 3:18) Kun ini nangyayari, an kamagurangan asin iba pang may espirituwal na kualipikasyon nagmamaigot na pakarhayon giraray an napapasala. (Galacia 6:1) Minsan siring, mayo nin pinipirit na akoon an sakal nin Kristianong pagkadisipulo. (Mateo 11:28-30; 16:24) Kun sinda nasa edad na, dawa mga hoben dapat na gumibo nin personal na pagpili kun dapit sa pagsamba. Sa katapustapusi, an lambang saro sa sato libre ahente moral na maninimbag sa Dios para sa saiyang sadiri. (Roma 14:12) Siempre, satuya man na ‘aanihon an satong itinanom’—leksion na dai nahaloy nanodan kan gastador sa parabola ni Jesus.—Galacia 6:7, 8.
Pagkadesesperar sa Harayong Daga
9, 10. (a) Anong pagkaliwat nin kamugtakan an naeksperyensiahan kan gastador, asin ano an nagin reaksion nia dian? (b) Iilustrar kun paano an nagkapira ngonyan na nag-aabandonar sa tunay na pagsamba nakaeeksperyensia nin mamondong kamugtakan na kaagid kan sa gastador.
9 “Kan magasto na nia an gabos, nangyari an grabeng gutom sa bilog na dagang idto, asin nagpoon siang mangaipo. Nagduman pa ngani sia asin nakiiba sa saro sa mga siudadano kan dagang idto, asin sia isinobol nia sa saiyang kaomahan tanganing mag-ataman nin mga orig. Asin minawot niang mabasog kan mga algarroba na kinakakan kan mga orig, asin mayo nin siisay man na gustong tumao sa saiya nin ano man.”—Lucas 15:14-16.
10 Minsan sia dukhang-dukha, dai pa inisip kan gastador na magpuli. Imbes, may nakamidbid siang siudadano na nagtao sa saiya nin trabaho na pag-ataman nin mga orig. Mantang sinabi kan Ley ni Moises na an orig maating hayop, an siring na empleyo posibleng dai maako nin sarong Judio. (Levitico 11:7, 8) Alagad kun naribok man an konsensia kan gastador, kinaipuhan na pogolan nia iyan. Total, dai nia malalaoman an among nia, na sarong lokal na siudadano, na magin interesado sa saboot nin sarong pobreng tagaibang daga. An mamondong kamugtakan kan gastador kaagid kan inaagihan nin dakol ngonyan na nag-aabandonar sa diretsong dalan nin dalisay na pagsamba. Sa parate, an mga siring napapalabot sa mga aktibidad na dati ibibilang nindang makasosopog. Halimbawa, sa edad na 17, an sarong hoben na lalaki nagrebelde tumang sa Kristianong pagpadakula sa saiya. “Pinara nin inmoralidad asin pagdodroga an dakol na taon na pagtotokdo basado sa Biblia,” an inadmitir nia. Dai nahaloy, nanompongan kan hoben na lalaking ini na sia nasa karsel huli sa armadong paghabon asin tinutuyong paggadan. Minsan ngani sa huri sia naomayan sa espirituwal, abaa kamakamomondo kan ibinayad nia para sa “dai nagdadanay na pag-ogma sa kasalan”!—Ikomparar an Hebreo 11:24-26.
11. Paano nadagdagan pa an masakit na kamugtakan kan gastador, asin paano nadiskobre kan nagkapira ngonyan na “basang na daya” an mga pan-akit kan kinaban?
11 An masakit na kamugtakan kan gastador dinagdagan pa kan bagay na “mayo nin siisay man na gustong tumao sa saiya nin ano man.” Haen na an bago niang mga katood? Ngonyan na sia mayo na ni sarong sentabo, sia garo na “ikinaoongis” ninda. (Talinhaga 14:20) Kaagid kaiyan, nadidiskobre kan dakol ngonyan na napaparayo sa pagtubod na an mga pan-akit asin punto de vista kan kinaban na ini “basang na daya” sana. (Colosas 2:8) “Nag-agi ako nin grabeng kolog asin kamondoan huli ta mayo an paggiya ni Jehova,” sabi nin sarong hoben na babae na sa kadikit na panahon binayaan an organisasyon nin Dios. “Hiningoa kong makibagay sa kinaban, alagad huli ta bako talaga akong kapareho nin iba, isinikwal ninda ako. An pagmate ko garo ako aking nawara na nagkakaipo nin ama na magiya sa sako. Kaidto ko narealisar na kaipuhan ko si Jehova. Nungka ko pang gusto na mamuhay giraray nin independiente sa saiya.” Iyan man an narealisar kan gastador sa ilustrasyon ni Jesus.
An Gastador Nakapag-isip-isip
12, 13. Anong mga bagay an nakatabang sa nagkapira ngonyan na makapag-isip-isip? (Helingon an kahon.)
12 “Kan sia makapag-isip-isip, sia nagsabi, ‘Pirang tangdanan kan sakong ama an abunda sa tinapay, mantang ako nagagadan digdi sa gutom! Ako matindog asin maduman sa sakong ama patin ako masabi sa saiya: “Ama, nagkasala ako tumang sa langit asin tumang sa saimo. Bako na akong maninigo na apodon pang aki mo. Giboha akong saro sa saimong mga tangdanan.”’ Kaya sia nagtindog asin nagduman sa saiyang ama.”—Lucas 15:17-20.
13 An gastador ‘nakapag-isip-isip.’ Sa laog nin kadikit na panahon, sia nagpasiramsiram, na garo baga nabubuhay sa kinaban nin pangatorogan. Alagad ngonyan narisa na niang marhay an saiyang tunay na kamugtakan sa espirituwal. Iyo, dawa sia naparayo, may paglaom pa para sa hoben na lalaking ini. May marahay pang manonompongan sa saiya. (Talinhaga 24:16; ikomparar an 2 Cronica 19:2, 3.) Paano man an mga naghahale sa aripompon nin Dios ngonyan? Rasonable daw na isipon na sinda gabos mayo na nin paglaom, na sa lambang kaso an saindang pagrebelde nagpapatunay na sinda nagkasala tumang sa banal na espiritu nin Dios? (Mateo 12:31, 32) Dai man pirme. An nagkapira sa sainda tinotormento kan saindang sumbikalan na iginagawe, asin pag-abot nin panahon an dakol sa mga ini nakakapag-isip-isip. “Nungka, dawa sarong aldaw, na nalingawan ko si Jehova,” sabi nin sarong tugang na babae, sa pag-isip-isip kan panahon na sia mayo sa organisasyon nin Dios. “Pirme akong namimibi kaidto na maski paano, sa maabot na panahon, aakoon nia ako pabalik sa katotoohan.”—Salmo 119:176.
14. Ano an nagin desisyon kan gastador, asin paano sia nagpaheling nin kapakumbabaan sa paggibo nin siring?
14 Alagad ano an magigibo kan mga naparayo manongod sa saindang situwasyon? Sa parabola ni Jesus an gastador nagdesisyon na magpuli asin hagadon an kapatawadan kan saiyang ama. “Giboha akong saro sa saimong mga tangdanan,” an napagdesisyonan na sabihon kan gastador. An surugoon na tangdanan trabahador na aldawan na puedeng sisantehon sa saro sanang aldaw na abiso. Mas hababa pa ini kisa sa oripon na, sa sarong parte, garo miembro kan pamilya. Kaya mayo sa isip kan gastador na hagadon na sia ibalik sa dati niang posisyon bilang aki. Andam nanggad siang akoon an pinakahababang posisyon tanganing patunayan an saiyang nakabalik na kaimbodan sa saiyang ama sa aroaldaw. Minsan siring, may sorpresang naghahalat sa gastador.
Nakaoogmang Pag-ako
15-17. (a) Ano an reaksion kan ama kan maheling an saiyang aki? (b) Ano an kahulogan kan halabang gubing, singsing, asin sandalyas na itinao kan ama para sa saiyang aki? (c) Ano an ipinaheheling kan pag-areglo kan ama na magkaigwa nin punsion?
15 “Mantang sia harayo pa, an saiyang ama naheling sia asin napahiro nin pagkaherak, asin sia duminalagan asin kinugos an saiyang liog patin mapagpadangat na hinadokan sia. Dangan an aki nagsabi sa saiya, ‘Ama, nagkasala ako tumang sa langit asin tumang sa saimo. Bako na akong maninigo na apodon pang aki mo. Giboha akong saro sa saimong mga tangdanan.’ Alagad an ama nagsabi sa saiyang mga oripon, ‘Dali! kua kamo nin halabang gubing, an pinakamarahay, asin isulot nindo iyan sa saiya, asin bugtake nindo nin singsing an saiyang kamot asin nin sandalyas an saiyang mga bitis. Asin daraha nindo digdi an pinatabang torilyo, bunoa nindo iyan asin magkarakan kita patin mag-ogma, huli ta an aki kong ini gadan na asin nabuhay liwat; sia nawara asin nakua.’ Asin sinda nagpoon na mag-orogma.”—Lucas 15:20-24.
16 An siisay man na mamomoton na magurang hihidawon an espirituwal na pagkaomay nin sarong aki. Huli kaini, maiimahinar niato an ama kan gastador na pinagmamasdan aroaldaw an dalan sa atubangan kan saiyang harong, na naglalaom na marhay na bumalik an saiyang aki. Ngonyan naheling nia an saiyang aki na padangadang! Daing duda na liwat na an itsura kan solterito. Pero, namidbid sia kan ama “mantang sia harayo pa.” An naheling nia bakong an pakit na gubing asin an nanluluyang marhay an boot na aktitud; an naheling nia an saiyang aki, asin sia duminalagan sa pagsabat sa saiya!
17 Kan aboton kan ama an saiyang aki, kinugos nia an liog kan saiyang aki asin mapagpadangat na hinadokan sia. Dangan pinagbotan nia an saiyang mga oripon na tawan an saiyang aki nin halabang gubing, singsing, asin sandalyas. An halabang gubing na ini bako sanang simpleng gubing, kundi “an pinakamarahay”—tibaad pano nin burdang toga na arog kan itinatao sa sarong onradong bisita. Mantang an singsing asin sandalyas sa parate dai naheheling sa mga oripon, liniliwanag kan ama na an saiyang aki inaako giraray bilang tunay na miembro kan pamilya. Alagad orog pa dian an ginibo kan ama. Ipinagboot niang magkaigwa nin punsion sa pagselebrar kan pagbalik kan saiyang aki. Malinaw nanggad, bakong napipiritan sana an pagpatawad kan tawong ini sa saiyang aki o iyan huli sana ta naoobligar sia kan pagbalik kan saiyang aki; gusto niang magpatawad. Iyan nagpagayagaya sa saiya.
18, 19. (a) Ano an itinotokdo sa saindo manongod ki Jehova kan parabola kan aking gastador? (b) Arog kan ipinaheheling sa saiyang tratamiento sa Juda asin Jerusalem, paano si Jehova ‘danay na nag-aantisipar’ kan pagbalik nin sarong parakasala?
18 Sagkod digdi, ano an itinotokdo sa sato kan parabola kan aking gastador manongod sa Dios na pribilehio niatong sambahon? Enot, na si Jehova “maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.” (Exodo 34:6) Sa katunayan, an pagkaherak lataw na kualidad nin Dios. Iyan an saiyang normal na reaksion sa mga nangangaipo. Dangan, itinotokdo sa sato kan parabola ni Jesus na si Jehova “andam na magpatawad.” (Salmo 86:5) Garo baga nagbabantay sia na maobserbaran an ano man na pagbago sa puso nin makasalan na mga tawo na matao sa saiya nin basehan na magpaheling nin pagkaherak.—2 Cronica 12:12; 16:9.
19 Halimbawa, isip-isipa an tratamiento nin Dios sa Israel. An propetang si Isaias pinasabngan ni Jehova na iladawan an Juda asin Jerusalem na ‘may helang poon sa payo sagkod sa bitis.’ Pero, sinabi man nia: “Si Jehova magdadanay na nag-aantisipar na pahelingan kamo nin pabor, asin kun siring sia matindog sa pagpaheling sa saindo nin pagkaherak.” (Isaias 1:5, 6; 30:18; 55:7; Ezequiel 33:11) Arog kan ama sa parabola ni Jesus, si Jehova garo baga ‘nagbabantay sa dalan.’ Inaantisipar niang marhay an pagbalik kan siisay man na naghale sa saiyang harong. Bako daw na ini an lalaoman niato sa sarong mamomoton na ama?—Salmo 103:13.
20, 21. (a) Sa anong paagi na an dakol ngonyan naeenganyar kan pagkaherak nin Dios? (b) Ano an tatrataron sa kasunod na artikulo?
20 Kada taon, an pagkaherak ni Jehova nakaeenganyar sa dakol na makapag-isip-isip asin bumalik sa tunay na pagsamba. Abaang kagayagayahan an itinatao kaini sa saindang mga namomotan! Halimbawa an Kristianong ama na nasambitan sa kapinonan. Marahay sana ta an saiyang aking babae naomayan sa espirituwal asin ngonyan naglilingkod bilang bilog na panahon na ministro. “Naoogma ako sa sokol na posible sa daan na palakaw na ini nin mga bagay,” sabi nia. “An sakong mga luha nin kamondoan nagin mga luha nin kagayagayahan.” Daing duwa-duwa, si Jehova naggagayagaya man!—Talinhaga 27:11.
21 Alagad bako sana iyan an parabola kan gastador. Ipinagpadagos ni Jesus an saiyang estorya tanganing ikapaheling nia an kalaenan kan pagkaherak ni Jehova sa dai mababago, mapaghusgar na paninindogan na lakop sa mga eskriba asin Fariseo. Kun paano nia iyan ginibo—asin kun ano an kahulogan kaini para sa sato—tatrataron sa kasunod na artikulo.
[Mga Nota sa Ibaba]
a An mga parabola asin iba pang ilustrasyon na isinaysay sa Biblia dai man talaga aktuwal na nangyari. Apuera kaini, mantang an katuyohan kan mga estoryang ini magtokdo nin moral na leksion, dai kaipuhan na humanap nin simbolikong kahulogan sa lambang detalye.
b An makahulang kahulogan kan parabolang ini ipinaliliwanag sa luwas kan Watchtower na Pebrero 15, 1989, pahina 16, 17.
Bilang Pagrepaso
◻ Paano an aktitud ni Jesus manongod sa pagkaherak kabaliktaran kan sa mga Fariseo?
◻ Sairisay ngonyan an kapareho kan gastador, asin paano?
◻ Anong mga pangyayari an nakapagpaisip-isip sa gastador?
◻ Paano nagpaheling nin pagkaherak an ama sa saiyang nagsosolsol na aki?