Ginibo Ninda an Kabotan ni Jehova

Si Jesus Nagtao nin Panahon na Makaibaiba an mga Aki

AN TOLO may kabangang taon na ministeryo ni Jesus madali nang matapos. Dai mahahaloy sia malaog sa Jerusalem asin maagi nin makologon na kagadanan. Aram niang marhay kun ano an mangyayari, huli ta sinabihan nia an saiyang mga disipulo: “An Aki nin tawo itatao sa mga kamot nin mga tawo, asin gagadanon sia ninda.”​—Marcos 9:31.

Daing duwa-duwa, mamawoton ni Jesus na gamiton sa pinakamarahay an kada aldaw, kada oras, kada segundong natatada. An saiyang mga disipulo nangangaipo pa nin atension. Naheling ni Jesus na sinda nangangaipo pa nin mapuersang konseho mapadapit sa pangangaipo nin kapakumbabaan asin sa dai nawawarang peligro na masingkog. (Marcos 9:​35-​37, 42-​48) Kaipuhan man sindang tokdoan manongod sa pag-agom, diborsio, asin pagigin daing agom. (Mateo 19:​3-​12) Huli ta nakaaaram na madali na siang magadan, daing duwa-duwa na si Jesus nagtaram sa saiyang mga disipulo nin diretso sa punto asin may pagkaapurado. Mahalagang marhay an panahon​—bagay na nagpagin mas pambihira pa ngani sa sunod na ginibo ni Jesus.

Maogmang Inako ni Jesus an mga Aki

An pagkasaysay sa Biblia nagsasabi: “An mga tawo nagpoon na darahon sa saiya an saradit na aki tanganing duotan nia sinda.” Kan maheling ini kan mga disipulo, ensegida sindang nagboses kan saindang dai pag-oyon. Tibaad nangatanosan sinda na si Jesus importanteng marhay o sibot na marhay tanganing magkainteres pa sa mga aki. Kun siring, imahinara an pagkabigla kan mga disipulo kan maanggot sa sainda si Jesus! “Pabayae nindo na dumolok sa sako an saradit na aki,” sinabihan nia sinda. “Dai nindo sinda pagpogolan, huli ta an kahadean nin Dios para sa mga siring.” Dangan idinugang ni Jesus: “Totoong sinasabi ko sa saindo, An siisay man na dai mag-ako sa kahadean nin Dios na arog sa sarong sadit na aki dai nanggad makalalaog dian.”​—Marcos 10:​13-​15.

Si Jesus nakaheling nin kahangahangang mga kualidad sa mga aki. Sinda sa parate mainusisa asin mapagtiwala. Tutubodon ninda an mga tataramon kan saindang mga magurang asin sosorogon pa ngani iyan sa atubangan kan ibang mga aki. An saindang mapaghimate, madaling tokdoan na ugale angay na arogon kan gabos na nagmamawot na makalaog sa Kahadean nin Dios. Arog kan sabi ni Jesus, “an kahadean nin Dios para sa mga siring.”​—Ikomparar an Mateo 18:​1-5.

Alagad dai sana ginagamit ni Jesus an mga aking ini tanganing magtao nin ilustrasyon. Ipinaheheling nin malinaw kan pagkasaysay na si Jesus tunay na gustohon na marhay na makiiba sa sainda. Ibinabareta ni Marcos na “kinugos [ni Jesus] an mga aki asin pinonan na bendisyonan sinda, na idinodoon an saiyang kamot sa sainda.” (Marcos 10:16) An pagkasaysay sana ni Marcos an igwa kan nakakapaogmang detalye na “kinugos [ni Jesus] an mga aki.”a Sa siring linabihan ni Jesus an inaantisipar kan mga nasa edad na, na nagdara kan mga aking ini ki Jesus tanganing “duotan” nia sana sinda.

Ano an kahulogan kan ‘pagdoon ni Jesus kan saiyang mga kamot’ sa mga aki? Dai ini nagsusuherir nin sarong relihiosong seremonya, arog kan pagbautismo. Mantang sa nagkapirang okasyon, an pagdoon nin mga kamot nangahulogan nin pagnombra, sa ibang okasyon iyan nangahulogan sana nin pagbendisyon. (Genesis 48:14; Gibo 6:6) Kaya si Jesus puedeng nagtatao sana nin bendisyon sa mga aki.

Ano man an kamugtakan, si Marcos naggagamit nin mas mapuersang termino para sa “bendisyon” (ka·teu·lo·geʹo), na nagpaparisa nin mas madoon na puersa. Ini nagsusuherir na odok, mapagpadangat, asin may init na binendisyonan ni Jesus an mga aki. Malinaw nanggad, dai nia minansay an mga aki na sarong pagabat na nakauubos nin oras.

Leksion Para sa Sato

An paagi nin pagtratar ni Jesus sa mga aki sagkod sa nasa edad na bakong nananakot ni nakakapamenus. “Seguradong madali siang maghuyom asin magayagayang nagngingisi,” sabi nin sarong reperensia. Bakong makangangalas na an mga tawo na laen-laen an edad nagin pamugtak an boot sa kaibahan nia. Pinepensar an halimbawa ni Jesus, puedeng hapoton niato an satong sadiri, ‘Ako daw madaling dolokon sa pagheling nin iba?’ ‘Ako daw garo sibot-sibot tanganing disturbohon pa kan mga aktibidad asin kapurisawan nin iba?’ An pagkultibar nin sinserong interes sa mga tawo pahihiroon kita na itao an satong panahon asin kosog para sa iba, arog kan ginibo ni Jesus. Mamamatean kan iba an satong tunay na interes asin mapaparani sinda sa sato.​—Talinhaga 11:25.

Siring kan ipinaheheling kan pagkasaysay ni Marcos, ikinaogma ni Jesus an pakikiiba sa mga aki. Minalataw na sia nagtao nin panahon na obserbaran sinda mantang nagkakawat, huli ta nasambitan nia an saindang mga kawat sa saro kan saiyang mga ilustrasyon. (Mateo 11:​16-19) Tibaad an nagkapira sa mga aki na binendisyonan ni Jesus akion pa tangani na mamidbid kun siisay sia asin kun ano an saiyang itinotokdo. Alagad dai kaini pinangyari na mamatean nia na sinasayang nia an saiyang panahon. Nagtao sia nin panahon na makaibaiba an mga aki huli ta namomotan nia sinda. Posibleng marhay, an dakol sa mga aki na nasumpongan ni Jesus durante kan saiyang ministeryo sa huri napahiro na maghimate sa saiyang pagkamoot paagi sa pagigin saiyang mga disipulo.

Kun si Jesus nagtao nin panahon na makaibaiba an mga aki durante kan kritikal na huring mga semana kan saiyang buhay, daing duwa-duwa na kita makakukua man nin panahon para sa sainda sa satong sibot na iskedyul. Kita maninigo na magin mapagmangno partikularmente sa mga may espesyal na mga pangangaipo, siring baga kan mga aking lalaki asin babae na daing ama. An totoo, an gabos na aki nag-ooswag kun sinda tinatawan nin atension, asin kamawotan ni Jehova na itao niato sa sainda an gabos na pagkamoot asin tabang na kaya niato.​—Salmo 10:14.

[Nota sa Ibaba]