Bareta kan mga Parabalangibog kan Kahadean

Nanodan nin Sarong Dating Kaiwal an Katotoohan

KADAKOL nang ibinareta mapadapit sa guerra sibil sa Liberia. Manampulong ribo an nawaran kan saindang buhay, asin dakol pa an nagdurulag. Sa ibong kan kasakitan na ini, an sadiosan an pusong mga tawo padagos na nag-aako kan katotoohan, siring sa ipinaheheling kan minasunod na eksperyensia.

Poon kan 10 anyos pa sana, si James inedukar kan Iglesia Luterano. Kan magin editor sa peryodiko kan iglesia, ginamit nia an saiyang posisyon tanganing sumurat kontra sa Mga Saksi ni Jehova. Ini sa ibong kan katunayan na dai pa nia noarin man nakaolay an saro sa sainda.

Pag-abot nin panahon, binayaan ni James an peryodiko kan iglesia asin nagin asensadong kagsadiri nin sarong motel. Sarong aldaw mantang sia nagtutukaw sa resepsion kan saiyang motel, duwang posturadang tugang na babae an nagdolok sa saiya. Kan maheling an saindang malinig asin aregladong gubing, pinadagos nia sinda. Alagad kan ipaliwanag ninda an katuyohan kan saindang pagsongko, sia nagsabi, “Sibot-sibot ako tanganing makipag-olay.” An mga Saksi inalok sia nin suskripsion sa mga magasin na An Torrengbantayan asin Awake!, asin nag-ako sia tangani sanang humale na sinda. Sa laog nin 12 bulan nag-aabot sa saiyang harong an mga magasin, alagad ibinugtak nia iyan sa plastik na bag na dai ngani hinahale an mga patos.

Nasa kainitan kaidto an sarong guerra sibil, kaya nag-impake si James asin ibinugtak sa bag an kuarta asin mahalagang mga bagay tanganing dumulag sa enot na senyal nin pagsakyada. Sarong aga may nagputok na granada sa likod kan saiyang harong, asin huli sa pagkataranta kinua nia an saiyang bag asin nagdulag tanganing iligtas an saiyang buhay. Kaibanan nin rinibong nagdudurulag na sibilyan, sia kaipuhan na umagi sa dakol na lugar nin inspeksion. Duman, an inosenteng mga sibilyan parateng hinahabonan asin ginagadan sa dai masabing dahelan.

Sa enot na lugar nin inspeksion, may pirang ihinapot ki James dangan pinabuksan an saiyang bag. Kan buksan nia, hineling nia an saiyang bag asin dai makapaniwala sa saiyang naheling. Nakubhanan sia kan maheling nia na an bag na nadara nia bakong an bag na nalalagan kan saiyang mahalagang mga bagay. Sa saiyang pagkataranta, an nabitbit nia iyo an bag na nalalagan kan gabos na dai pa nabubuksan na mga magasin na Torrengbantayan asin Awake! Minsan siring, kan maheling kan soldados an mga magasin asin mabasa an saiyang ngaran sa etiketa, sia nagsabi: “Ay, saro ka sa Mga Saksi ni Jehova. Dai mi kamo hinahanap, aram mi na dai kamo nagpuputik.” Pakatapos na kumua nin pirang magasin sa bag, pinaagi na kan soldados si James.

Iyo man iyan an nangyari sa siyam na laen-laen na lugar nin inspeksion, ta ipinamugtak kan gabos na komandante na si James saro sa Mga Saksi ni Jehova asin pinapaagi sia na dai inaano. Nagpapasalamat ngonyan si James na dai nia nadara an saiyang mahalagang mga bagay huli ta segun sa saiyang naheling, haros segurado na kutana siang nagadan huli sa saiyang mga rogaring.

Kan sa katapustapusi makaabot sia sa ultimo asin pinakakinatatakotan na lugar nin inspeksion, natakot sia nin makuri kan maheling an dakol na bangkay sa palibot. Sa pagkasindak, inarang nia an ngaran ni Jehova. Namibi sia na kun tatabangan sia nin Dios na makaligtas sa lugar na ini nin pangagadan, paglilingkodan nia sia sa bilog niang buhay.

Ipinaheling ni James an saiyang bag sa mga soldados, asin sa giraray sinda nagsabi: “Dai mi hinahanap an mga tawong ini.” Kinakaolay sia, idinagdag ninda: “An saro sa mga tugang mo nag-iistar sa ibaba kan bolod na ini. Paduman ka asin umiba ka sa saiya.” Sa panahon na ini an opinyon ni James dapit sa mga Saksi biyo nang naliwat. Tolos-tolos na dinumanan nia an tugang, asin ginibo an mga areglo para sa pag-adal sa Biblia sa librong Puwede Kamong Mabuhay Sagkod Lamang sa Paraiso Digdi sa Daga.a

Pakalihis nin pirang aldaw, napiritan siang dumulag sa lugar na iyan huli sa sarong pagsakyada. Sa panahon na ini, si James nagdulag pasiring sa kadlagan na an saiya sanang librong Mabuhay Sagkod Lamang an kapot! Durante kan 11 bulan na pagkasuhay sa mga Saksi, limang beses na pinag-adalan nia an saiyang libro. Kan sa katapustapusi makabuelta na sia sa siudad, ipinadagos nia an saiyang pakipag-adal sa Biblia sa mga Saksi asin marikas na nag-oswag. Pakalihis nin halipot na panahon, nabautismohan sia asin sia ngonyan fiel na naglilingkod kaiba an saiyang mga tugang sa espirituwal.

[Nota sa Ibaba]