Igwa daw Kamo nin Anghel de la Guardia?
NANINIWALA daw kamo na igwa kamo nin anghel de la guardia? Dakol na tawo an naghohona na sinda igwa. Huli sa bagay na iyan, an sarong babaeng taga solnopan na Canada sinasabing igwa nin espesyal na balaog may labot sa mga anghel. Kun itatao nindo sa saiya an saindong kompletong ngaran kaiba an $200, hinihingako nia na magigibo niang makakomunikar nindo an saindong anghel de la guardia. Enot, naghohorophorop sia paagi sa pagkonsentrar sa laad nin sarong kandila. Sunod, nagkakaigwa sia nin bisyon na dian tinatawan sia kan anghel nindo nin mensahe na ipapaabot sa saindo. Bilang bonus, an babae nagtatao nin drowing kan itsura kan saindong anghel.
Para sa nagkapira, ini garo baga kaagid nin sarong estorya manongod ki Hadeng Luis IX nin Pransia. Nagbakal daa sia nin mamahalon na marhay na mga balukag na sinasabing naragrag hale sa pakpak ni Arkanghel Miguel. Minsan ngani kinukustion an estoryang iyan, dakol an tolos-tolos na aakoon an mga paghihingako kan babaeng taga Canada.
Pagkainteres sa mga Anghel
Sa nakaagi pa sanang mga taon nagkaigwa nin pambihirang pagkainteres sa mga anghel. Sa telebisyon asin sine, mga libro, magasin, asin pulyeto, sinasabi sa sato an manongod sa mga anghel na nagraranga sa mga grabe an helang, nagraranga sa mga nagadanan, nagtatao nin kadonongan, asin inaagaw an mga tawo sa kagadanan. Sa Estados Unidos, mga 20 milyones an nagdadalan sa sarong semanal na serye sa telebisyon na nagpapaheling kan pag-interbenir nin mga anghel sa buhay nin mga tawo. An sarong tindahan nin mga libro may listahan nin labing 400 na libro na nakasentro sa mga anghel.
An sarong bagong libro nagsasaysay nin mga eksperyensia manongod sa kun paano ilinigtas nin mga anghel de la guardia an buhay nin mga soldados sa ralaban. May mga istiker sa bamper nin auto na nagsasabi na an mga tsuper pinoprotehiran nin mga anghel de la guardia. May mga organisasyon, komperensia, asin seminar na nagsusuportar sa pag-adal dapit sa mga anghel asin sinasabing nagtatabang sa mga tawo na makikomunikar sa sainda.
Si Eileen Freeman iyo an kagsurat kan tolong libro manongod sa mga anghel asin kagpublikar nin sarong babasahon na solamenteng idinusay para sa sainda. Iiniinsistir nia: “Naniniwala ako na sa lambang anghel sa langit igwa nin sarong katimbang na anghel de la guardia digdi sa Daga, sarong persona na an mga obligasyon bako sanang an pag-omaw sa Dios sa langit kundi an aktuwal na pag-ataman sa mga tawo asin iba pang porma nin buhay digdi sa Daga. May sarong anghel de la guardia na iinasignar sa kada saro sa sato kan kita ipinangingidam asin nagbabantay sa satong pagdakula sa matris, sa satong pagkamundag, sa bilog niatong buhay sa kinaban na ini, sagkod na giyahan kita kan anghel hale sa laog kan kinaban na ini pasiring sa kamurawayan sa langit.” Ilinaladawan nanggad kaini an lakop na opinyon dapit sa mga anghel de la guardia.
Sa nagtatao nin tension asin masakit na mga panahon na ini, nakararangang maniwala na igwa kita nin sadiring anghel de la guardia, na an obligasyon protehiran kita. Ano an sinasabi kan Tataramon nin Dios, an Biblia, manongod digdi? Maninigo daw niatong hingoahon na makaolay an mga anghel? May pagmakolog daw sinda sa satong moral na mga pamantayan asin relihiosong mga paniniwala? Anong tabang an puede niatong laoman sa sainda? An mga hapot na ini sisimbagon sa minasunod na artikulo.