Paglakaw sa Kaibanan nin Dios—Na Tinatanaw an Panahon na Daing Sagkod
“Kita maglalakaw sa ngaran ni Jehova na satong Dios sagkod sa daing talaan na panahon, sagkod lamang pa ngani.”—MIQUEAS 4:5.
1. Taano ta maaapod si Jehova na “Hade sa panahon na daing sagkod”?
SI Jehova Dios dai nagkaigwa nin kapinonan. Tamang-tama na sia inaapod na “an Suanoy kan mga Aldaw,” ta an saiyang pag-eksister daing katapusan kaidtong nakaagi. (Daniel 7:9, 13) Si Jehova magkakaigwa man nin daing sagkod na ngapit. Sia an solamenteng “Hade sa panahon na daing sagkod.” (Kapahayagan 10:6; 15:3) Asin sa saiyang pagheling, an sangribong taon “garo sana an kasuodma na nag-agi na, asin garo sana pagbantay sa banggi.”—Salmo 90:4.
2. (a) Ano an katuyohan nin Dios para sa makinuyog na mga tawo? (b) Sa ano niato maninigong isentro an satong mga paglaom asin plano?
2 Mantang daing sagkod an Paratao nin buhay, puede niang iopresir sa enot na mag-agom na tawo, si Adan asin Eva, an esperansang buhay na daing katapusan sa Paraiso. Minsan siring, huli sa pakisuway, ipinatunod ni Adan an diretso sa buhay na daing katapusan, na ipinamana sa saiyang mga gikan an kasalan asin kagadanan. (Roma 5:12) Pero, an pagrebelde ni Adan dai nakaolang sa orihinal na katuyohan nin Dios. Kabotan ni Jehova na an makinuyog na mga tawo mabuhay sagkod lamang, asin daing salto na gigibohon nia an saiyang katuyohan. (Isaias 55:11) Tamang-tama, kun siring, na isentro niato an satong mga paglaom asin plano sa paglilingkod ki Jehova na tinatanaw an panahon na daing sagkod. Minsan ngani gusto niatong papagdanayon na harani sa isip an “aldaw ni Jehova,” mahalagang marhay na girumdomon na an pasohan niato maglakaw sa kaibanan nin Dios sagkod lamang.—2 Pedro 3:12.
Si Jehova Minagibo nin Aksion sa Saiyang Itinalaan na Panahon
3. Paano niato naaaraman na si Jehova may “itinalaan na panahon” sa pag-otob kan saiyang mga katuyohan?
3 Bilang mga naglalakaw sa kaibanan nin Dios, kita interesadong marhay sa paggibo kan saiyang kabotan. Aram niato na si Jehova an Dakulang Paratalaan nin Panahon, asin kita may kompiansa na nungka siang minasalto sa pag-otob kan saiyang mga katuyohan sa saiyang itinalaan na panahon. Halimbawa, “kan dumatong na an kalubosan kan panahon, isinugo nin Dios an saiyang Aki.” (Galacia 4:4) Sinabi ki apostol Juan na may “itinalaan na panahon” para sa pagkaotob kan makahulang mga bagay na naheling nia paagi sa mga tanda. (Kapahayagan 1:1-3) Yaon an “itinalaan na panahon sa paghokom sa mga gadan.” (Kapahayagan 11:18) Labi nang 1,900 na taon an nakaagi, si apostol Pablo pinasabngan na sabihon na an Dios “nagtalaan nin aldaw na katuyohan niang hokoman an ineerokan na daga sa katanosan.”—Gibo 17:31.
4. Paano niato naaaraman na mawot ni Jehova na taposon an maraot na palakaw na ini nin mga bagay?
4 Tataposon ni Jehova an maraot na palakaw na ini nin mga bagay, ta an saiyang ngaran pinag-oolog-olog sa kinaban ngonyan. An mga maraot namumurak. (Salmo 92:7) Paagi sa saindang mga tataramon asin gibo, iniinsulto ninda an Dios, asin ikinokolog kan boot nia na maheling an saiyang mga lingkod na minumuda asin pinaglalamag. (Zacarias 2:8) Bakong makangangalas na dineterminaran ni Jehova na an enterong organisasyon ni Satanas tataposon sa dai na mahahaloy! Dineterminaran nin Dios nin eksakto kun noarin ini mangyayari, asin linilinaw kan kaotoban kan mga hula sa Biblia na kita ngonyan nabubuhay sa “panahon kan katapusan.” (Daniel 12:4) Dai na mahahaloy sia magibo nin aksion para sa pagbendisyon sa gabos na namomoot sa saiya.
5. Ano an punto de vista ni Lot asin ni Habacuc sa mga kamugtakan na nasa palibot ninda?
5 An mga lingkod ni Jehova kan nakaagi hinidaw na maheling an katapusan nin karatan. An matanos na si Lot “napupurisaw na gayo sa pagpangana kan mga makisuway sa ley sa malaswang gawe.” (2 Pedro 2:7) Ikinamomondo an mga kamugtakan sa palibot nia, si propeta Habacuc nakimaherak: “Sagkod noarin, O Jehova, na ako dapat na magkurahaw para sa tabang, asin dai ka nagdadangog? Sagkod noarin ako mag-aarang sa saimo nin tabang sa kadahasan, asin dai ka nagliligtas? Taano ta pinapaheling mo ako sa nakadadanyar, asin nagpaparaheling ka sa kariribokan? Asin taano ta igwa nin panamsam asin kadahasan sa atubangan ko, asin taano ta nangyayari an iriwal, patin taano ta may mapait na paglalaban?”—Habacuc 1:2, 3.
6. Ano an isinabi ni Jehova bilang simbag sa pamibi ni Habacuc, asin ano an manonodan niato digdi?
6 Sa sarong kabtang, si Habacuc sinimbag ni Jehova sa mga tataramon na ini: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Dawa pa iyan maatraso, padagos iyan na halaton; huli ta iyan daing salto na maootob. Dai iyan mahuhuri.” (Habacuc 2:3) Sa siring, ipinaaram nin Dios na sia magibo nin aksion sa “itinalaan na panahon.” Minsan ngani tibaad garo baga may pagkaatraso, ootobon ni Jehova an saiyang katuyohan—daing salto!—2 Pedro 3:9.
Paglilingkod na Daing Kapagalan an Kaigotan
7. Minsan ngani dai aram ni Jesus nin eksakto kun noarin maabot an aldaw ni Jehova, paano nia ginibo an saiyang mga aktibidad?
7 An pakaaram daw kan eksaktong iskedyul ni Jehova sa mga mangyayari kaipuhan nguna tangani na kita maigot na makalakaw sa kaibanan nin Dios? Bako. Estudyare an nagkapirang halimbawa. Si Jesus interesadong marhay sa panahon na an kabotan nin Dios gigibohon digdi sa daga nin siring sa langit. Sa katunayan, tinokdoan ni Cristo an saiyang mga parasunod na mamibi: “Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10) Minsan ngani aram ni Jesus na sisimbagon an kahagadan na ini, dai nia aram an eksaktong iskedyul kan mga bagay. Sa saiyang dakulang hula mapadapit sa katapusan kan palakaw na ini nin mga bagay, sia nagsabi: “May labot sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana.” (Mateo 24:36) Mantang si Jesu-Cristo mahalagang marhay sa pagkaotob kan mga katuyohan nin Dios, sia direktang kalabot sa paggadan sa mga kaiwal kan saiyang langitnon na Ama. Minsan siring, kan si Jesus yaon digdi sa daga, dawa sia dai nakaaaram kun noarin magibo nin aksion an Dios. Huli daw kaiyan sia bako nang gayong maigot sa paglilingkod ki Jehova? Dai nanggad! Kan maheling si Jesus na maigot na linilinigan an templo, “nagirumdoman kan saiyang mga disipulo na nasusurat: ‘Hahalonon ako kan kaigotan para sa saimong harong.’” (Juan 2:17; Salmo 69:9) Si Jesus padagos na nagmasibot nin lubos sa gibohon na pinagsugoan sa saiya, asin ginibo nia iyan na daing kapagalan an kaigotan. Sia naglingkod man sa Dios na tinatanaw an panahon na daing sagkod.
8, 9. Kan maghapot an mga disipulo manongod sa pagbabalik kan Kahadean, ano an sinabi sa sainda, asin ano an nagin reaksion ninda?
8 Totoo man ini sa mga disipulo ni Cristo. Kinaolay sinda ni Jesus bago sia sumakat sa langit. An pagkasaysay nagsasabi: “Ngonyan, kan magkatiripon na sinda, sinda nagharapot sa saiya: ‘Kagurangnan, ano ibabalik mo ngonyan an kahadean sa Israel?’” Arog kan saindang Kagurangnan, hinihimuyawot nindang dumatong na an Kahadean. Pero, si Jesus nagsimbag: “Mayo sa saindo an pakaaram kan mga panahon o kapanahonan na ibinugtak kan Ama sa saiyang sadiring kapangyarihan; alagad kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.”—Gibo 1:6-8.
9 Mayo nin nagpaparisa na an mga disipulo pinanluyahan nin boot huli sa simbag na ini. Imbes, sinda maigot na nagmasibot sa paghuhulit. Sa laog sana nin mga semana, napano na ninda an Jerusalem kan saindang pagtotokdo. (Gibo 5:28) Asin sa laog sana nin 30 taon, napahiwas na ninda an saindang paghuhulit sagkod sa punto na nasabi ni Pablo na an maogmang bareta ikinahulit na “sa gabos na linalang sa sirong nin langit.” (Colosas 1:23) Minsan ngani an Kahadean dai ‘ibinalik sa Israel’ arog kan salang linaoman kan mga disipulo asin iyan dai inestablisar sa langit durante kan saindang pagkabuhay, sinda padagos na maigot na naglingkod ki Jehova na tinatanaw an panahon na daing sagkod.
Pagsiyasat sa Satong mga Motibo
10. An dai pakaaram kun noarin lalaglagon nin Dios an palakaw ni Satanas nagtotogot sa sato na patunayan an ano?
10 An mga lingkod ni Jehova sa presenteng aldaw hinihidaw man na maheling an katapusan kan maraot na palakaw na ini nin mga bagay. Minsan siring, an pangenot na interes niato bakong an satong pagkaligtas pasiring sa ipinanuga nin Dios na bagong kinaban. Gusto niatong maheling na masantipikar an ngaran ni Jehova asin mabindikar an saiyang soberaniya. Huli kaini, makapaggagayagaya kita na dai sinabi sa sato nin Dios an ‘aldaw o oras’ na itinalaan para sa paglaglag sa palakaw ni Satanas. Itinotogot kaini na kita makatao nin ebidensia na determinado kita na maglakaw nin daing sagkod sa kaibanan nin Dios huli ta sia namomotan niato asin bakong huli ta kita may panmadalian, maimot na mga pasohan.
11, 12. Sa anong paagi kinustion an integridad ni Job, asin ano an koneksion sa sato kan pagkustion na iyan?
11 An pagpadanay kan satong integridad sa Dios nakatatabang man na patunayan na sala an Diablo kan sia magsahot na an tanos na si Job—asin sa siring an mga tawo na kapareho nia—naglilingkod sa Dios huli sa sadiring interes. Pakatapos na iladawan ni Jehova an saiyang lingkod na si Job bilang tawong daing kanawayan, tanos, matatakton sa Dios, may karatan na nagsahot si Satanas: “Natatakot daw si Job sa Dios na mayo nin kabayadan? Bako daw na ika mismo nagbugtak nin proteksion sa palibot nia asin sa palibot kan saiyang harong asin sa palibot kan gabos niang sadiri? Binendisyonan mo an gibo kan saiyang mga kamot, asin an saiya mismong kahayopan nakalakop sa daga. Alagad ngonyan tabi unata an saimong kamot asin dotdota an gabos niang sadiri asin helinga kun baga dai ka nia sumpaon sa saimo mismong lalauogon.” (Job 1:8-11) Paagi sa pagpapadanay kan saiyang integridad sa irarom nin pagbalo, pinatunayan ni Job na falso an maraot an intension na paghihingakong ini.
12 Paagi sa arog man kaiyan na pagdadanay sa dalan nin integridad, puede niatong pahimutikan an ano man na sahot ni Satanas na kita naglilingkod sana sa Dios huli ta aram niato na madali na an balos. An dai pakaaram sa eksaktong panahon na gigibohon an pamamalos nin Dios sa mga maraot nagtatao sa sato kan oportunidad na patunayan na talagang namomotan niato si Jehova asin boot niatong maglakaw sa saiyang mga dalan sagkod lamang. Ipinaheheling kaiyan na kita maimbod sa Dios asin nagtitiwala sa saiyang paagi nin pag-asikaso sa mga bagay. Apuera dian, an dai pakaaram kan aldaw asin oras nakatatabang na kita magdanay na mapagmato asin puka sa espirituwal huli ta aram niato na an katapusan puedeng umabot ano man na oras, na arog nin parahabon sa banggi. (Mateo 24:42-44) Paagi sa paglakaw sa kaibanan ni Jehova aroaldaw, pinagagayagaya niato an saiyang puso asin nagtatao kita nin simbag sa Diablo, na nagduduhagi sa saiya.—Talinhaga 27:11.
Magplano Para sa Panahon na Daing Sagkod!
13. Ano an ipinaririsa kan Biblia manongod sa pagplano para sa ngapit?
13 An mga naglalakaw sa kaibanan nin Dios nakaaaram na madonong an paggibo nin rasonableng mga plano para sa ngapit. Aram an mga problema asin limitasyon na bunga nin pagkagurang, an dakol hinihingoa na gamiton nin marahay an saindang pagkahoben asin kosog tangani na magkaigwa nin seguridad sa pinansial an saindang buhay sa huri. Kun siring, kumusta man an satong mas mahalaga nanggad na espirituwal na ngapit? An Talinhaga 21:5 nagsasabi: “An mga plano kan mahigos seguradong nagbubunga nin bentaha, tara an gabos na naghuhumari seguradong mapasiring sa pagkatikapo.” An patienot na pagplano na tinatanaw an panahon na daing sagkod totoong may bentaha. Mantang dai niato aram kun noarin eksaktong maabot an katapusan kan palakaw na ini, kaipuhan na isipon niato an satong mga pangangaipo sa ngapit. Alagad magin kitang timbang asin enoton niato sa buhay an intereses nin Dios. An mga tawong mayo nin pagtubod tibaad mag-isip na halipot an pananaw kan pagsentro kan intereses nin saro sa paggibo kan kabotan nin Dios. Alagad iyo daw?
14, 15. (a) Anong ilustrasyon an isinaysay ni Jesus may labot sa mga plano para sa ngapit? (b) Taano ta halipot an pananaw kan tawong mayaman sa ilustrasyon ni Jesus?
14 Si Jesus nagsaysay nin sarong ilustrasyon na nagtatao nin kaliwanagan sa bagay na ini. Sia nagsabi: “An daga nin sarong tawong mayaman marahay an produkto. Bilang resulta nagpoon siang mangatanosan sa saiya man sana, na sinasabi, ‘Ano daw an gigibohon ko, ngonyan na mayo na ako nin matitiponan kan sakong mga inani?’ Kaya sia nagsabi, ‘Ini an gigibohon ko: Gagabaon ko an sakong mga tambobong asin magtotogdok ako nin orog pa kadarakula, asin dian titiponon ko an gabos kong tipasi asin an gabos kong marahay na bagay; asin masabi ako sa sakong kalag: “Kalag, dakol ka nang marahay na bagay na naririmpos para sa dakol na taon; magpaginhawa ka na sana, magkakan ka, uminom ka, magpasiramsiram ka.”’ Alagad an Dios nagsabi sa saiya, ‘Ika na lolong, ngonyan na banggi hinahagad ninda sa saimo an saimong kalag. Kun siring, siisay an magkakamit kan mga bagay na saimong tinipon?’ Siring an nangyayari sa tawo na nagtitipon nin kayamanan para sa saiya man sana alagad bakong mayaman sa Dios.”—Lucas 12:16-21.
15 An punto daw ni Jesus an tawong mayaman dai kutana nagtrabaho sa paghihingoa na magkaigwa nin materyal na seguridad sa ngapit? Bako, ta an Kasuratan nag-eenkaminar nin mahigos na pagtrabaho. (2 Tesalonica 3:10) An sala kan tawong mayaman iyo na dai nia ginibo an kaipuhan tanganing magin “mayaman sa Dios.” Dawa kun nasiraman sia sa saiyang materyal na kayamanan sa laog nin dakol na taon, pag-abot nin panahon sia magagadan. Halipot an saiyang pananaw, na dai iniisip an panahon na daing sagkod.
16. Taano ta kompiado kitang makapananarig ki Jehova para sa tiwasay na ngapit?
16 An paglakaw sa kaibanan ni Jehova na tinatanaw an panahon na daing sagkod praktikal sagkod harayo an pananaw. Iyan an pinakamarahay na paagi nin pagplano para sa ngapit. Minsan ngani madonong na gumibo nin praktikal na mga plano may labot sa pag-eskuela, empleyo, asin mga paninimbagan sa pamilya, maninigo na pirme niatong girumdomon na nungka na inaabandonar ni Jehova an saiyang maimbod na mga lingkod. Si Hadeng David nag-awit: “Ako dati hoben na lalaki, naggurang man ako, alagad ta dai ako nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.” (Salmo 37:25) Si Jesus nagtao man nin garantiya na an Dios matao nin probisyon para sa gabos na hinahanap nguna an Kahadean asin naglalakaw sa matanos na mga dalan ni Jehova.—Mateo 6:33.
17. Paano niato naaaraman na harani na an katapusan?
17 Minsan ngani kita naglilingkod sa Dios na tinatanaw an panahon na daing sagkod, pinapagdadanay pa man giraray niato na harani sa isip an aldaw ni Jehova. An kaotoban kan hula sa Biblia buhay na buhay na nagpapatotoo sa kaharanihan kan aldaw na iyan. An siglong ini midbid sa mga guerra, peste, linog, asin kakulangan nin kakanon, kaiba an paglamag sa tunay na mga Kristiano saka an lakop sa globong paghuhulit kan maogmang bareta kan Kahadean nin Dios. Ini gabos bagay na nagpapamidbid kan panahon kan katapusan kaining maraot na palakaw nin mga bagay. (Mateo 24:7-14; Lucas 21:11) An kinaban pano kan “mga mamomoton sa sainda man sana, mga mamomoton sa kuarta, mga nagpapasikat sa sadiri, mga maabhaw, mga paralanghad, mga masumbikal sa mga magurang, mga daing utang na boot, mga bakong maimbod, mga dai nin natural na kapadangatan, mga dai maoyonan, mga parapakaraot, mga mayong pagpopogol sa sadiri, mga maringis, mga mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan imbes na mga mamomoton sa Dios.” (2 Timoteo 3:1-5) Sa delikadong huring mga aldaw na ini, an buhay depisil para sa sato bilang mga lingkod ni Jehova. Kanigoan an paghimuyamot niato kan aldaw na hahaleon kan Kahadean ni Jehova an gabos na karatan! Mientras tanto, magin kitang determinado na maglakaw sa kaibanan nin Dios na tinatanaw an panahon na daing sagkod.
Paglilingkod na Tinatanaw an Buhay na Daing Katapusan
18, 19. Ano an nagpapaheling na an mga fiel kan suanoy naglingkod sa Dios na tinatanaw an panahon na daing sagkod?
18 Mantang kita naglalakaw sa kaibanan ni Jehova, isaisip niato an pagtubod ni Abel, Enoc, Noe, Abraham, asin Sara. Pakasambita sa sainda, si Pablo nagsurat: “Sa pagtubod ini gabos nagkagaradan, minsan ngani dai ninda nakamtan an kaotoban kan mga panuga, alagad an mga iyan natanaw ninda sa harayo asin galagang inako an mga iyan patin ipinahayag sa publiko na sinda mga nakihihimanwa asin nakiiistar nin temporaryo sa daga.” (Hebreo 11:13) An mga fiel na idto “nagmamawot nin orog karahay na lugar, an boot sabihon, sarong langitnon.” (Hebreo 11:16) Sa pagtubod, sinda nag-antisipar nin orog karahay na lugar na sakop kan pamamahala kan Mesiyanikong Kahadean nin Dios. Masisierto niato na babalosan sinda nin Dios nin buhay na daing sagkod sa orog karahay na lugar na iyan—an daganon na Paraiso na sakop kan pamamahala kan Kahadean.—Hebreo 11:39, 40.
19 Ipinahayag ni propeta Miqueas an determinasyon kan banwaan ni Jehova na sambahon an Dios nin daing sagkod. Sia nagsurat: “An gabos na banwaan, kun para sa sainda, maglalakaw an balang saro sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios sagkod sa daing talaan na panahon, sagkod lamang pa ngani.” (Miqueas 4:5) Sagkod na sia magadan, si Miqueas maimbod na naglingkod ki Jehova. Kun buhayon na liwat sa bagong kinaban, daing duwa-duwa na an propetang iyan magpapadagos na maglakaw sa kaibanan nin Dios sa bilog na panahon na daing sagkod. Abaa karahay na halimbawa para sa sato na nabubuhay nin nasa poro na kan panahon kan katapusan!
20. Ano an maninigo na desididong gibohon niato?
20 Inaapresyar ni Jehova an pagkamoot na ipinaheheling niato para sa saiyang ngaran. (Hebreo 6:10) Aram nia na depisil para sa sato na papagdanayon an integridad sa saiya sa kinaban na ini na dominado kan Diablo. Minsan siring, mantang “an kinaban maagi sana,” “an naggigibo kan kabotan nin Dios magdadanay sagkod lamang.” (1 Juan 2:17; 5:19) Kun siring, sa tabang ni Jehova, magin kitang desidido na tagalan an mga kasakitan na inaatubang niato aroaldaw. An satuya logod na kaisipan asin pamumuhay nakasentro sa marahayon na mga bendisyon na ipinanuga kan satong mamomoton na langitnon na Ama. An mga ini puedeng mapasatuya kun kita padagos na maglalakaw sa kaibanan nin Dios na tinatanaw an panahon na daing sagkod.—Judas 20, 21.
Ano an Isisimbag Nindo?
◻ Ano an katuyohan nin Dios para sa makinuyog na mga tawo?
◻ Taano ta dai pa minagibo nin aksion si Jehova tanganing taposon an maraot na kinaban?
◻ Taano ta dai maninigo na magpaluya sa satong kaigotan an dai pakaaram nin eksakto kun noarin magibo nin aksion an Dios?
◻ Ano an nagkapirang pakinabang sa paglakaw sa kaibanan nin Dios na tinatanaw an panahon na daing sagkod?
[Retrato sa pahina 17]
Hinahagad kan paglakaw sa kaibanan nin Dios na kita maigot na maglingkod sa saiya siring kan ginibo kan enot na mga disipulo ni Cristo