An Dios Bakong Maluway Mapadapit sa Saiyang Panuga

“SAGKOD noarin, O Jehova, na ako dapat na magkurahaw para sa tabang, asin dai ka nagdadangog?” Iyan an mga tataramon kan propetang Hebreo na si Habacuc, na nabuhay kaidtong ikapitong siglo B.C.E. Alagad pamilyar nanggad pagdangogon iyan, bako daw? Natural sa tawo na magmawot na kamtan tolos-tolos o sa pinakamadaling panahon, an mga bagay na hinihidaw tang marhay. Asin nangorognang totoo ini sa satong panahon nin tolos-tolos na pagpanigo.—Habacuc 1:2.

Kan enot na siglo, may nagkapira na minalataw na nag-isip na kutana inotob na tolos nin Dios an saiyang mga panuga. Nalangkag sindang marhay kaya inisip pa ngani ninda na an Dios maluway o huri na. Dahel kaini, kinaipuhan na ipagirumdom sa sainda ni apostol Pedro na an punto de vista nin Dios dapit sa panahon laen na marhay kisa kan sa sato. Si Pedro nagsurat: “Dai logod nindo malingawan an sarong katotoohan na ini, mga namomotan, na an sarong aldaw ki Jehova garo sangribong taon asin an sangribong taon garo sarong aldaw.”—2 Pedro 3:8.

Sono sa paaging ini nin pagbilang nin panahon, an tawo na 80 anyos nabuhay sana nin mga duwang oras, asin an bilog na kasaysayan nin katawohan mga anom na aldaw sana an ilinawig. Kun siring kaini an magigin pagmansay niato, nagigin mas madali para sa sato na saboton an paagi nin pagtratar sa sato nin Dios.

Minsan siring, an Dios bakong daing labot sa panahon. Sa kabaliktaran, sia mapagrisang marhay sa panahon. (Gibo 1:7) Kun siring, si Pedro padagos na nagsasabi: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.” (2 Pedro 3:9) Bakong arog nin mga tawo, an Dios dai nakakamateng kaipuhan na maghidali na garo baga nauubosan na sia nin panahon. Bilang an “Hade sa panahon na daing sagkod,” sia igwa nin makangangalas na pankagabsan na pananaw asin puede niang aramon kun noarin sa sulog nin panahon an saiyang mga paghiro magigin para sa pinakaikararahay kan gabos na kalabot.—1 Timoteo 1:17.

Pakatapos na ipaliwanag an dahelan kan garo baga kaluwayan nin Dios, sinabi ni Pedro an patanid na ini: “An aldaw ni Jehova madatong siring sa parahabon.” Na an boot sabihon, an aldaw nin pakipagkuenta madatong sa panahon na dai nanggad iyan linalaoman nin mga tawo. Dangan, sa minasunod na mga bersikulo, sinambit ni Pedro an makangangalas na paglaom para sa mga nagpapaheling nin “banal na mga gawe asin gibo nin diosnon na debosyon,” arin na baga, na sinda magdanay na buhay pasiring sa ipinanuga nin Dios na “bagong kalangitan asin sarong bagong daga.”—2 Pedro 3:10-13.

Ini maninigo na magpangyari sa sato na lalo pang apresyaron na dai pa nag-abot an paghokom nin Dios. An saiyang pagpapasensia nagpagin posible sa sato na maaraman an saiyang katuyohan asin bagohon an satong buhay tanganing akoon an saiyang ipinanugang mga bendisyon. Dai daw niato maninigong ibilang “an pagpapasensia kan satong Kagurangnan na kaligtasan,” na irinarason ni Pedro? (2 Pedro 3:15) Minsan siring, may saro pang dahelan an pagpapasensia nin Dios.

Sarong Sokol nin Kaliwagan na Dapat Mapano

Sa pag-estudyar sa nakaaging mga pagtratar nin Dios sa katawohan, naririsa ta na parate siang nagpopogol sa saiyang paghokom sagkod na mayo na nanggad na malalaoman na pagrahay. Halimbawa, may koneksion sa paghokom nin Dios sa mga Cananeo, an saindang mga kasalan haloy pa sinabi na nia ki Abraham. Alagad bako pa kaidto an itinalaan na panahon na gibohon nia an saiyang paghokom. Taano ta bako? An Biblia nagsasabi: “Huli ta an kaliwagan kan mga Amorreo [an mga Cananeo] dai pa natatapos,” o siring sa pagkasabi kan bersion na Knox: “An karatan kan mga Amorreo dai pa nakaabot sa termino kaiyan.”—Genesis 15:16.a

Minsan siring, pakalihis nin mga 400 na taon, nag-abot an paghokom nin Dios, asin an daga sinakop kan mga gikan ni Abraham, an mga Israelita. Pira sana sa mga Cananeo, arog ki Rahab asin mga Gabaonita, an nakaligtas huli sa saindang ugale asin mga gawe, alagad sa pankagabsan, nakaabot sinda sa labi-labing sokol nin karigsokan, siring kan ihinahayag kan mga nakotkot nin arkeolohiya sa presenteng panahon. Sinda naggibo nin pagsamba sa simbolo kan ikinabuhay nin lalaki, pagpapatotot sa templo, asin pag-atang nin aki. An Halley’s Bible Handbook nagsasabi: “An mga arkeologo na nagkotkot sa mga kagabaan kan mga siudad kan mga Cananeo nagngangalas ta dai sinda linaglag nin mas amay nin Dios.” Sa katapusan, ‘lubos na an sokol nin kasalan’ kan mga Cananeo; an saindang karatan “nakaabot [na] sa termino kaiyan.” Daing siisay man na tamang makasasahot na an Dios bakong makatanosan kan togotan niang linigon an daga mantang ilinigtas nia an mga nagpaheling nin tamang ugale.

Maheheling ta an kaparehong kamugtakan kan kaaldawan ni Noe. Sa ibong kan katunayan na an mga tawo bago an Baha maraot, an Dios maheherakon na nagdesisyon na an saindang panahon magpadagos pa nin 120 taon. Durante kan kabtang kan panahon na iyan, si Noe nagserbi bilang “sarong parahulit nin katanosan.” (2 Pedro 2:5) Mantang nag-aagi an panahon, minalataw na lubos na an saindang karatan. “Hineling nin Dios an daga asin, uya! iyan laglag, huli ta linaglag nin gabos na laman an dalan kaiyan sa ibabaw nin daga.” (Genesis 6:3, 12) An saindang ‘sokol nin kasalan lubos na’; sa pag-agi nin panahon an saindang salang mga inklinasyon nakaabot sa pinakalubos kaiyan. Kan humiro an Dios sia lubos na may katanosan. Walo sanang tawo an napatunayan na matanos sa pagheling nin Dios, asin ilinigtas nia sinda.

An iyo man sanang kamugtakan maheheling sa pagtratar nin Dios sa Israel. Sa ibong kan saindang paggawe sa bakong fiel asin bikong paagi, an Dios nagpasensia sa sainda sa laog nin ginatos na taon. An rekord nagsasabi: “Si Jehova . . . daing ontok na nagsugo . . . sa saiyang mga mensahero, nin paorootro, huli ta sia nakamate nin pagdamay sa saiyang banwaan . . . Alagad ta padagos na . . . dinuduhagi [ninda] an saiyang mga tataramon patin tinutuya an saiyang mga propeta, sagkod na an kabangisan ni Jehova luminuwas tumang sa saiyang banwaan, sagkod na mayo na nin kaomayan.” (2 Cronica 36:15, 16) An banwaan nakaabot sa punto na bako nang posible an pagrahay. Si Jeremias sana asin pirang iba pa an puedeng iligtas. An Dios dai puedeng apodon na bakong makatanosan kan an kadaklan sa katapustapusi hokoman nia.

Uya Na an Panahon na Humiro an Dios

Sa mga halimbawang ini maheheling ta na pinopogolan nin Dios an paghokom sa presenteng palakaw nin mga bagay sagkod sa hinog na an panahon. Ipinahahayag ini sa pagboot na itinao sa simbolikong parakastigo nin Dios: “‘Tigpasan an saimong matarom na kagot asin gunoa an mga bagikoy kan poon nin ubas kan daga, ta hinog na an mga ubas kaiyan.’ Asin itinigpas kan anghel an saiyang kagot sa daga asin ginuno an poon nin ubas kan daga, asin ihinolog nia idto sa dakulang pugaan nin ubas kan kaanggotan nin Dios.” Mangnoha na an karatan kan katawohan “hinog na,” an boot sabihon, iyan nakaabot na sa punto na mayo nang posibilidad na rumahay. Kun an Dios maggibo na nin paghokom, daing duda na an saiyang pag-interbenir may katanosan.—Kapahayagan 14:18, 19.

Kun iisipon an sinambit sa enotan, malinaw na siertong harani na an paghokom nin Dios tumang sa kinaban huli ta yaon na sa kinaban an mga karakteristiko na nagpagin maninigo sa paghokom nin Dios kaidtong nakaagi. Saen man kita magheling, an daga pano nin kadahasan, siring nanggad kaidtong bago an Baha kan kaaldawan ni Noe. An ugale kan mga tawo orog na nagigin arog kan ilinaladawan sa Genesis 6:5: “An gabos na tendensia kan mga kaisipan kan . . . puso [nin tawo] danay na sa karatan na sana.” Pati an grabeng mga kasalan na nagin dahelan kan paghokom nin Dios tumang sa mga Cananeo lakop na marhay ngonyan.

Nangorogna poon kan Guerra Mundial I, naeksperyensiahan kan katawohan an grabeng mga pagliliwat. Naheling kaiyan an daga na nabasa kan dugo nin minilyon. An guerra, paglaglag sa sarong rasa, terorismo, krimen, asin katampalasanan biglang nangyari sa bilog na kinaban. An gutom, helang, asin inmoralidad yaon sa satong bilog na globo. An gabos na ebidensia nagpaparisa na kita nabubuhay na ngonyan sa tahaw kan maraot na kapag-arakian na manongod kaiyan si Jesus nagsabi: “An kapag-arakian na ini dai noarin man makalilihis sagkod na an gabos na bagay na ini mangyari.” (Mateo 24:34) Pinapano ngonyan kan kinaban an “sokol nin kasalan” kaiyan. “An mga bagikoy kan poon nin ubas kan daga” nahihinog na tanganing anihon.

Panahon Na na Kamo Humiro

Si apostol Juan sinabihan na mantang naghaharani an panahon nin paghokom, duwang klase nin paghinog an mangyayari. Sa sarong kampi, “an naggigibo nin kabikoan, maggibo pa sia nin kabikoan; asin an maramog magin pang maramog.” Alagad sa ibong na kampi, “an matanos maggibo pa nin katanosan, asin an banal magin pang banal.” (Kapahayagan 22:10, 11) An huring pangyayari na ini nangyayari may koneksion sa pambilog na kinaban na pagtotokdo sa Biblia na ginigibo kan Mga Saksi ni Jehova. An katuyohan kan gibohon na iyan iyo na itokdo sa mga tawo an kahagadan sa sainda nin Dios tanganing sinda ibilang na angay na mag-ako kan buhay na daing katapusan. An aktibidad na ini nakaabot na ngonyan sa 233 na kadagaan paagi sa mga 87,000 na kongregasyon.

An Dios bakong maluway. May pagpapasensiang tinawan nia an mga indibiduwal kan panahon na kaipuhan sa ‘pagsulog kan bagong personalidad’ tanganing makalinya sa mga maako kan saiyang mga panuga. (Efeso 4:24) Ngonyan, an Dios naghahalat pa, sa ibong kan danay na naggagrabeng mga kamugtakan sa kinaban. An Mga Saksi ni Jehova sa bilog na kinaban ginigibo an gabos na rasonableng makakaya ninda na ihiras sa mga kataed ninda an kaaraman na minagiya pasiring sa buhay na daing sagkod. (Juan 17:3, 17) Nakaoogma, kada taon labing 300,000 katawo an naghihimate asin binabautismohan.

Mantang tinatanaw an buhay na daing katapusan, ngonyan na an panahon na, bakong maghalat, kundi humiro. Huli ta sa dai na mahahaloy, maheheling ta an kaotoban kan panuga ni Jesus: “An gabos na nabubuhay asin naggigibo nin pagtubod sa sako dai na noarin man magagadan.”—Juan 11:26.

[Nota sa ibaba]

[Retrato sa pahina 6]

An parakastigo nin Dios sinabihan na itigpas an kagot kun an ubas kan daga hinog na

[Retrato sa pahina 7]

An Mga Saksi ni Jehova sa bilog na kinaban tinatabangan an mga tawo na makalinya sa mga maako kan daing sagkod na mga bendisyon nin Dios