Pag-apresyar sa “Balaog na mga Lalaki”
“Magkaigwa kamo nin paggalang sa mga nagpapagal dian sa saindo asin . . . tawan nindo sinda nin orog kisa ordinaryong konsiderasyon sa pagkamoot huli sa saindang gibohon.”—1 TESALONICA 5:12, 13.
1. Segun sa Gibo 20:35, ano an puersa nin pagtao? Iilustrar.
“IGWANG orog na kaogmahan sa pagtao kisa pag-ako.” (Gibo 20:35) Nagigirumdoman daw nindo an huring pakaeksperyensia nindo kan pagigin totoo kan mga tataramon na iyan ni Jesus? Tibaad iyan regalong itinao nindo sa saro na namomotan nindong marhay. Iyan maingat nindong pinili, ta gusto nindo na iyan sarong bagay na pakamamahalon kan saindong namomotan. An dakulang kaogmahan na naheling nindo sa lalauogon kan saindong namomotan—abaa iyan kanakapaogma sa saindong puso! Kun tama an motibo, an pagtao kapahayagan nin pagkamoot, asin an pagpahayag nin pagkamoot may puersa na magtao sa sato nin kaogmahan.
2, 3. (a) Taano ta masasabi na mayo nin mas maogma pa kisa ki Jehova, asin paano an probisyon na “balaog na mga lalaki” makapagagayagaya sa saiyang puso? (b) Ano an habo niatong gibohon sa balaog nin Dios?
2 Kun siring, siisay an magigin mas maogma pa kisa ki Jehova, an Paratao kan “lambang marahay na balaog”? (Santiago 1:17; 1 Timoteo 1:11) An lambang balaog na itinatao nia motibado nin pagkamoot. (1 Juan 4:8) Iyan totoo nanggad manongod sa balaog na itinao nin Dios sa kongregasyon paagi ki Cristo—an “balaog na mga lalaki.” (Efeso 4:8) An probisyon na kamagurangan na maasikaso sa aripompon kapahayagan kan hararom na pagkamoot nin Dios para sa saiyang banwaan. An mga lalaking ini maingat na pinili—dapat na maabot ninda an mga kualipikasyon na sono sa Kasuratan. (1 Timoteo 3:1-7; Tito 1:5-9) Aram ninda na dapat sindang ‘magin maboot sa aripompon,’ huli ta kun siring an mga karnero magkakaigwa nin dahelan na magpasalamat para sa mamomoton na mga pastor na iyan. (Gibo 20:29; Salmo 100:3) Kun naheheling ni Jehova na an saiyang mga karnero pano an puso nin siring na pagpasalamat, segurado na magayagaya man an saiyang puso!—Talinhaga 27:11.
3 Tunay nanggad na habo niatong inaan an halaga nin sarong balaog hale sa Dios; ni bobooton man niato na magin daing apresasyon sa saiyang mga balaog. Sa siring, duwang hapot an minalataw: Paano maninigong mansayon kan kamagurangan an saindang katongdan sa kongregasyon? Asin paano ikapaheheling kan iba pa sa aripompon na inaapresyar ninda an “balaog na mga lalaki”?
‘Kami mga Kapwa Trabahador Nindo’
4, 5. (a) Sa ano iinaagid ni Pablo an kongregasyon, asin taano ini ta angay na ilustrasyon? (b) Ano an ipinaheheling kan ilustrasyon ni Pablo sa kun paano niato maninigong mansayon asin trataron an lambang saro?
4 An “balaog na mga lalaki” pinagkatiwalaan ni Jehova nin sarong sokol nin autoridad sa kongregasyon. Siempre, habo nin kamagurangan na gamiton sa sala an saindang autoridad, alagad aram ninda na, bilang mga tawong bakong sangkap, pasil na marhay na gibohon iyan. Kun siring, ano an maninigong magin pagmansay ninda sa saindang sadiri kun ikokomparar sa iba pa sa aripompon? Estudyare an ilustrasyon na ginamit ni apostol Pablo. Pakapaliwanagan kun taano ta itinatao an “balaog na mga lalaki,” si Pablo nagsurat: “Paagi sa pagkamoot kita magtalubo sa gabos na bagay sa saiya na iyo an payo, si Cristo. Gikan sa saiya an bilog na hawak, paagi sa pagkasorogpon na may pagkaoroyon asin pagpangyaring magtarabangan paagi sa lambang pagsokmolan na nagtatao kan kinakaipuhan, sono sa pagpunsionar kan lambang kabtang sa igong sokol, nagbubunga kan pagtalubo kan hawak para sa pagkosog mismo kaiyan sa pagkamoot.” (Efeso 4:15, 16) Kaya iinaagid ni Pablo an kongregasyon, kaiba an kamagurangan asin an ibang miembro, sa hawak nin tawo. Taano ta angay ining ilustrasyon?
5 An hawak nin tawo kompuesto nin dakol na laen-laen na kabtang alagad saro sana an payo. Minsan siring, mayo sa hawak—ni kalamnan, ni kusog, ni latid—na daing serbi. An lambang kabtang mahalaga asin may ikinakokontribwir sa salud saka gayon kan kabilogan. Kaagid kaiyan, an kongregasyon kompuesto nin dakol na laen-laen na miembro, alagad an lambang miembro—baga man hoben o gurang, makosog o maluya an hawak—may ikakokontribwir sa kabilogan na espirituwal na salud saka gayon kan kongregasyon. (1 Corinto 12:14-26) Mayo nin dapat na makamate na sia saditon tanganing magkaigwa nin importansia. Sa ibong naman, mayo nin maninigong makamate na sia nakalalabi, ta kita gabos—mga pastor saka karnero—kabtang kan hawak, asin sasaro an payo, si Cristo. Sa siring si Pablo nagtatao nin nagpapaogmang paglaladawan kan maninigong magin pagkamoot, pagmakolog, asin paggalang niato para sa lambang saro. An pagmidbid kaini nakatatabang sa kamagurangan na magkaigwa nin mapakumbaba, timbang na pagmansay sa saindang katongdan sa kongregasyon.
6. Maski may autoridad bilang apostol, paano si Pablo nagpaheling nin mapakumbabang espiritu?
6 An “balaog na mga lalaki” na ini dai naghihingoang kontrolon an buhay o pagtubod kan saindang mga kapagtubod. Si Pablo, maski may autoridad bilang apostol, mapakumbabang nagsabi sa mga taga Corinto: “Bako na kami an mga kagurangnan kan saindong pagtubod, kundi kami mga kapwa trabahador para sa saindong kagayagayahan, huli ta paagi sa saindong pagtubod na kamo nagtitindog.” (2 Corinto 1:24) Dai minawot ni Pablo na kontrolon an pagtubod asin pamumuhay kan saiyang mga tugang. An totoo, mayo sia nin naheling na pangangaipo na gibohon iyan, ta sia nagpahayag nin paniwala na sinda dati nang fiel na mga lalaki asin babae na nasa organisasyon ni Jehova huli ta gusto nindang gibohon an tama. Huli kaini, sa pagtaram manongod sa saiya man sana saka sa saiyang kaibaiba sa pagbiahe na si Timoteo, garo man sana sinasabi ni Pablo: ‘Trabaho niamo na makipagtabangan sa saindo na maglingkod sa Dios na may kagayagayahan.’ (2 Corinto 1:1) Abaa kamapakumbabang espiritu!
7. Ano an narerealisar nin mapakumbabang kamagurangan manongod sa saindang katongdan sa kongregasyon, asin ano an paniwala ninda sa saindang mga kapwa trabahador?
7 Arog man kaiyan an trabaho kan “balaog na mga lalaki” ngonyan. Sinda ‘mga kapwa trabahador para sa satong kagayagayahan.’ Narerealisar nin mapakumbabang kamagurangan na bako sinda an dapat na magdesisyon kun gurano an kayang gibohon nin iba sa paglilingkod sa Dios. Aram ninda na minsan ngani puede nindang enkaminaron an iba na dagdagan o paoswagon an saindang ministeryo, an paglilingkod sa Dios maninigong gumikan sa andam na puso. (Ikomparar an 2 Corinto 9:7.) May paniwala sinda na kun magayagaya an saindang mga kapwa trabahador, gigibohon ninda an bilog nindang makakaya. Sa siring, odok sa puso na mawot ninda na tabangan an saindang mga tugang na ‘maglingkod ki Jehova na may paggayagaya.’—Salmo 100:2.
Pagtabang sa Gabos na Maglingkod na May Kagayagayahan
8. Ano an nagkapirang paagi na an kamagurangan makatatabang sa saindang mga tugang na maglingkod ki Jehova na may kagayagayahan?
8 Kamagurangan, paano nindo matatabangan an saindong mga tugang na maglingkod na may kagayagayahan? Puede kamong magparigon kan boot paagi sa halimbawa. (1 Pedro 5:3) Pabayaan na marisa an saindong kaigotan asin kagayagayahan sa ministeryo, asin tibaad mapakosog an boot nin iba na arogon an saindong halimbawa. Tawan nin komendasyon an iba sa saindang mga paghihingoang bilog na kalag. (Efeso 4:29) An mamomoton asin tunay na komendasyon nakatatabang sa iba na makamate na sinda kapakipakinabang asin kaipuhan. Iyan nakaparirigon kan boot kan mga karnero na magmawot na gibohon an pinakamakakaya ninda sa paglilingkod sa Dios. Likayan an negatibong mga pagkokomparar. (Galacia 6:4) An siring na mga pagkokomparar nakadedesganar imbes na makamotibar sa iba na umoswag. Apuera kaiyan, an mga karnero ni Jehova mga indibiduwal—na laen-laen an kamugtakan asin abilidad. Arog ni Pablo, magpahayag nin paniwala sa saindong mga tugang. An pagkamoot “nagtutubod kan gabos na bagay,” kaya marahay na tubodon niato na an satong mga tugang namomoot sa Dios asin boot na panigoan sia. (1 Corinto 13:7) Kun kamo ‘nagpapaheling nin onra sa iba,’ napaluluwas nindo an pinakamarahay nindang kualidad. (Roma 12:10) Masisierto nindo na kun an mga karnero naparigon an boot asin napaginhawa, an kadaklan magibo kan bilog nindang makakaya sa paglilingkod sa Dios, asin sinda makanonompong nin kagayagayahan sa paglilingkod na iyan.—Mateo 11:28-30.
9. Anong pagmansay sa mga kapwa magurang sa kongregasyon an makatatabang sa lambang magurang na maglingkod na may kagayagayahan?
9 An mapakumbabang pagmansay sa saindong sadiri bilang “kapwa trabahador” makatatabang sa saindo na maglingkod na may kagayagayahan asin apresyaron an daing kaparehong mga balaog kan saindong mga kapwa magurang sa kongregasyon. An lambang magurang sa kongregasyon may sadiring mga talento asin abilidad na magagamit nia para sa kapakinabangan kan kongregasyon. (1 Pedro 4:10) An saro tibaad may espesyal na balaog sa pagtotokdo. An saro man tibaad epektibong paraorganisar. An saro pa tibaad pambihira an pagigin madaling dolokon huli sa saiyang init asin pakikidamay. An totoo, mayo nin magurang sa kongregasyon na igwa kan gabos na balaog sa kaparehong sokol. An pagkaigwa daw nin partikular na balaog—halimbawa, an balaog sa pagtotokdo—ginigibo an sarong magurang sa kongregasyon na nakalalabi sa iba? Dai nanggad! (1 Corinto 4:7) Sa ibong na lado, dai kaipuhan na ikauri an balaog nin iba o maghonang kulang kun an abilidad nin saro pang magurang sa kongregasyon nagbubunga nin komendasyon nin iba sa saiya. Girumdoma, kamo mismo may mga balaog na naheheling sa saindo ni Jehova. Asin matatabangan nia kamo na kultibaron an mga balaog na iyan asin gamiton iyan para sa kapakinabangan kan saindong mga tugang.—Filipos 4:13.
‘Magin Makinuyog Asin Magin Mapagpasakop’
10. Taano ta tama sana na kita magpahayag nin pag-apresyar sa “balaog na mga lalaki”?
10 Kun kita nakareresibi nin balaog, tama sana na magpahayag nin pag-apresyar. “Ipaheling nindo na kamo nagpapasalamat,” sabi kan Colosas 3:15. Kumusta man, kun siring, an “balaog na mga lalaki,” an mahalagang marhay na balaog na itinao sa sato ni Jehova? Siempre, kita sa pangenot nagpapasalamat ki Jehova, an buka an palad na Paratao nin Balaog. Alagad kumusta man an “balaog na mga lalaki” mismo? Paano niato ikapaheheling na inaapresyar niato sinda?
11. (a) Paano niato ikapaheheling an satong pag-apresyar sa “balaog na mga lalaki”? (b) Ano an kahulogan kan mga fraseng ‘magin makinuyog’ asin “magin mapagpasakop”?
11 Ikapaheheling niato an satong pag-apresyar sa “balaog na mga lalaki” paagi sa pagigin maliksing himateon an saindang hatol asin mga desisyon na basado sa Biblia. Sinasadol kita kan Biblia: “Magin kamong makinuyog duman sa mga nangengenot dian sa tahaw nindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kagayagayahan asin bakong may pag-agagha, huli ta ini makararaot sa saindo.” (Hebreo 13:17) Mangnoha na kita dapat na bako sanang ‘magin makinuyog’ kundi “magin mapagpasakop” man sa mga nangengenot. An termino sa Griego para sa “magin mapagpasakop” sa literal nangangahulogan “magin kamong mapagpahunod na sakop.” Sa pagkomento sa mga fraseng ‘magin makinuyog’ asin “magin mapagpasakop,” an nag-espesyalisar sa Biblia na si R. C. H. Lenski nagsasabi: “An saro nagkukuyog kun an saro oyon sa ipinagigibo sa saiya, bensido sa pagigin tama saka pagigin kapakipakinabang kaiyan; an saro nagpapahunod . . . kun sarongat an saiyang opinyon.” Kun satong nasasabotan asin oyon kita sa pagdirehir kan mga nangengenot, tibaad pasil an pagkuyog. Alagad ano kun dai niato nasasabotan an dahelan sa likod nin sarong partikular na desisyon?
12. Taano ta maninigo kitang magin mapagpasakop, o mapagpahunod, dawa kun dai niato lubos na nasasabotan an dahelan sa likod nin sarong partikular na desisyon?
12 Digdi kita tibaad kaipuhan na magin mapagpasakop, o mapagpahunod. Taano? Sarong bagay, kaipuhan kitang magtiwala na an mga lalaking ini na kualipikado sa espirituwal pinakaikararahay niato an nasa puso. Total, aram nindang marhay na dapat sindang manimbag ki Jehova para sa mga karnero na ipinaaasikaso sa sainda. (Santiago 3:1) Dugang pa, marahay na girumdomon niato na tibaad dai niato aram an gabos na kompidensial na bagay na nagmotibar sa sainda sa may kabatidan na pagdesisyon.—Talinhaga 18:13.
13. Ano an makatatabang sa sato na magin mapagpasakop pag-abot sa hudisyal na mga desisyon kan kamagurangan?
13 Kumusta man an pagigin mapagpasakop pag-abot sa hudisyal na mga desisyon? Ipamugtak na ini tibaad bakong pasil, nangorogna kun may desisyon na itiwalag an saro na namomotan niato—sarong paryente o dayupot na katood. Digdi na naman, pinakamarahay na magpahunod sa paghusgar kan “balaog na mga lalaki.” Sinda nasa kamugtakan na mas magbasar sa mga katunayan kisa sato, asin tibaad mas dakol an aram ninda manongod sa mga katunayan. An mga tugang na ini parateng nagsasakit nin labi-labi sa paggibo nin siring na mga desisyon; nakapapepensar na paninimbagan an ‘paghokom para ki Jehova.’ (2 Cronica 19:6) Ginigibo ninda an gabos na paghihingoa na magin maheherakon, ta isinasaisip ninda na an Dios “andam na magpatawad.” (Salmo 86:5) Alagad dapat na papagdanayon man nindang malinig an kongregasyon, asin an Biblia nagdidirehir na itiwalag ninda an mga paragibo nin sala na habong magsolsol. (1 Corinto 5:11-13) Sa dakol na kaso inaako mismo kan paragibo nin sala an desisyon. An disiplina tibaad iyo nanggad an kaipuhan nia tanganing makapag-isip-isip. Kun kita na mga namomotan nia mapagpasakop pag-abot sa desisyon na iyan, tibaad paagi kaiyan matabangan niato sia na makinabang sa disiplina.—Hebreo 12:11.
“Tawan Nindo Sinda nin Orog Kisa Ordinaryong Konsiderasyon”
14, 15. (a) Segun sa 1 Tesalonica 5:12, 13, taano ta maninigo sa satong konsiderasyon an kamagurangan? (b) Taano ta masasabi na an kamagurangan ‘nagpapagal dian sa sato’?
14 Mapatutunayan man niato an satong pag-apresyar sa “balaog na mga lalaki” paagi sa pagpaheling nin konsiderasyon sa sainda. Sa pagsurat sa kongregasyon sa Tesalonica, sinadol ni Pablo an mga miembro kaiyan: “Magkaigwa kamo nin paggalang sa mga nagpapagal dian sa saindo asin namamayo sa saindo sa Kagurangnan asin naghahatol sa saindo; asin . . . tawan nindo sinda nin orog kisa ordinaryong konsiderasyon sa pagkamoot huli sa saindang gibohon.” (1 Tesalonica 5:12, 13) “Nagpapagal”—bako daw na ilinaladawan kaiyan an debotong kamagurangan na daing kapasloan na itinatao an saindang panahon asin kosog para sa sato? Pensara, sa pirang segundo, an magabat na pinapasan kan mahal na mga tugang na ini.
15 Sa dakol na kaso sinda mga de pamilyang lalaki na kaipuhan na maglaog sa sekular na trabaho tangani na masustentohan an saindang pamilya. (1 Timoteo 5:8) Kun may mga aki an magurang sa kongregasyon, an mga aking ini nagkakaipo nin panahon asin atension kan saindang ama. Tibaad kaipuhan na tabangan nia sinda sa saindang mga leksion, saka iiskedyul an oras na magamit ninda an saindang enerhiya sa marahay sa lawas na pag-aling-aling. (Eclesiastes 3:1, 4) Pinakamahalaga, inaasikaso nia an espirituwal na mga pangangaipo kan saiyang pamilya, na regular na pinangengenotan an pampamilyang pag-adal sa Biblia, iniibanan sinda sa ministeryo sa langtad, asin iiniiba sinda sa Kristianong mga pagtiripon. (Deuteronomio 6:4-7; Efeso 6:4) Dai niato paglingawan na apuera sa mga paninimbagan na ini na nasa kadaklan sa sato, an kamagurangan may dagdag pang mga obligasyon: pag-andam para sa mga parte sa pagtiripon, mga pagdalaw sa pagpastor, pag-asikaso sa espirituwal na ikararahay kan kongregasyon asin, kun kaipuhan, pagkapot nin hudisyal na mga kaso. An nagkapira may ekstra pang paninimbagan may koneksion sa pansirkitong mga asamblea, pandistritong mga kombension, pagtogdok nin Kingdom Hall, asin mga Hospital Liaison Committee. Totoo nanggad, “nagpapagal” an mga tugang na ini!
16. Sabihon kun ano an mga paagi na dian kita makapaheheling nin konsiderasyon sa kamagurangan.
16 Paano kita makapaheheling nin konsiderasyon sa sainda? An sarong talinhaga sa Biblia nagsasabi: “An tataramon sa tamang kapanahonan kaiyan abaang rahay!” (Talinhaga 15:23; 25:11) Kaya ikapaheheling sa sainda nin mga tataramon nin sinserong pag-apresyar asin pagparigon sa boot na dai niato binabali-wala an saindang pagpapagal. Siring man, maninigo na magin kitang rasonable sa linalaoman niato sa sainda. Sa sarong lado, maninigo na dai kita mag-alangan na humagad sa sainda nin tabang. Tibaad may mga panahon na ‘an sato mismong puso nasa makuring kolog’ asin kaipuhan niato an pagparigon sa boot, paggiya, o hatol na sono sa Kasuratan hale sa mga “kualipikadong magtokdo” kan Tataramon nin Dios. (Salmo 55:4; 1 Timoteo 3:2) Kadungan kaiyan, kaipuhan na girumdomon niato na limitado an panahon na ikatatao sa sato nin sarong magurang sa kongregasyon, ta dai nia puedeng pabayaan an mga pangangaipo kan sadiri niang pamilya o kan iba sa kongregasyon. May “pakikipagkapwa” sa mahihigos na tugang na ini, dai niato bobooton na patawan sinda nin sobra nang mga kahagadan. (1 Pedro 3:8) Imbes, apresyaron niato an ano man na oras asin atension na ikatatao ninda nin rasonable sa sato.—Filipos 4:5.
17, 18. Anong mga pagsakripisyo an ginigibo nin dakol na babae na an agom magurang sa kongregasyon, asin paano niato ikapaheheling na dai niato binabali-wala an fiel na mga tugang na ini?
17 Kumusta man an agom kan mga magurang sa kongregasyon? Bako daw na sinda maninigo man sa satong konsiderasyon? Total, ihinihiras ninda sa kongregasyon an saindang agom. Ini parateng naghahagad nin pagsakripisyo ninda. Kun minsan, an kamagurangan kaipuhan na gamiton an mga oras sa banggi sa pag-asikaso sa mga bagay sa kongregasyon mantang puede kutana na makaibaiba ninda an saindang pamilya. Sa dakol na kongregasyon an fiel na mga Kristiana boluntad na ginigibo an siring na mga pagsakripisyo tangani na maasikaso kan saindang agom an mga karnero ni Jehova.—Ikomparar an 2 Corinto 12:15.
18 Paano niato ikapaheheling na dai niato binabali-wala an fiel na Kristianang mga tugang na ini? Tunay nanggad na sa dai pagigin sobra na kadakol kan hinahagad sa saindang agom. Alagad dai man niato paglingawan an puersa nin simpleng mga tataramon nin pag-apresyar. Sinasabi kan Talinhaga 16:24: “An managom na mga tataramon anira nin tangguli, mahamis sa kalag asin bolong sa mga tolang.” Estudyare an sarong eksperyensia. Pagkatapos nin sarong Kristianong pagtiripon, may mag-agom na nagdolok sa sarong magurang sa kongregasyon asin naghagad na makipag-olay sa saiya manongod sa saindang aking solterito. Mantang kaolay kan magurang sa kongregasyon an mag-agom, pasensiosang naghalat an saiyang agom. Pagkatapos, dinolok kan ina an agom kan magurang sa kongregasyon asin sinabi: “Boot kong pasalamatan ka kan panahon na itinao kan saimong agom sa pagtabang sa sakong pamilya.” An simple, nakaoogma sa boot na mga tataramon na idto nin pag-apresyar totoong nakapahiro sa puso kan agom kan magurang na idto sa kongregasyon.
19. (a) An kamagurangan, bilang sarong grupo, fiel na inootob an anong mga obheto? (b) Kita gabos maninigo na magin determinadong gibohon an ano?
19 An probisyon na kamagurangan na maasikaso sa mga karnero saro sa “marahay na balaog” ni Jehova. (Santiago 1:17) Bako, an mga lalaking ini bakong sangkap; kapareho niato gabos, sinda nasasala. (1 Hade 8:46) Pero, bilang sarong grupo, an kamagurangan sa mga kongregasyon sa bilog na kinaban fiel na inootob an mga obheto na nasa isip ni Jehova para sa sainda—arin na baga, pakarhayon giraray, pakosogon, sararoon, asin protehiran an aripompon. An lambang magurang sa kongregasyon logod na magdesisyon na padagos na mapagpadangat na asikasohon an mga karnero ni Jehova, na paagi kaiyan nagigin sarong balaog, o bendisyon, sa saiyang mga tugang. Asin kita gabos magin determinado na ipaheling an pag-apresyar sa “balaog na mga lalaki” paagi sa pagigin makinuyog asin mapagpasakop sa sainda saka paagi sa pagpaheling nin konsiderasyon sa sainda para sa saindang pagpapagal. Makapagpapasalamat nanggad kita na si Jehova mamomoton na nagtao nin mga lalaki na garo man sana nagsasabi sa saiyang mga karnero: ‘Trabaho niamo na tabangan kamong maglingkod sa Dios na may kagayagayahan’!
Ano an Isisimbag Nindo?
◻ Taano ta angay na ikakokomparar sa sarong hawak an kongregasyon?
◻ Paano matatabangan kan kamagurangan an saindang mga tugang na maglingkod ki Jehova na may kagayagayahan?
◻ Taano kita ta maninigo na magin bako sanang makinuyog kundi mapagpasakop man sa mga nangengenot?
◻ Sa anong mga paagi na makapagpapaheling kita nin konsiderasyon sa kamagurangan?
[Retrato sa pahina 16]
Kamagurangan, tawan nin komendasyon an iba sa saindang mga paghihingoang bilog na kalag
[Retrato sa pahina 17]
Paagi sa saindang maigot na halimbawa sa ministeryo, matatabangan nin kamagurangan an mga miembro nin pamilya asin an iba na maglingkod na may kagayagayahan
[Mga retrato sa pahina 18]
Inaapresyar niato an satong mahigos na kamagurangan!