Paano Mababago ni Jesus an Saindong Buhay?
SI Jesu-Cristo sarong Dakulang Paratokdo na nag-erok sa Palestina kaidtong haros 2,000 na taon na an nakaagi. Kakadikit an aram manongod sa saiyang pagkaniaki. Minsan siring, may igong patotoo na kan sia mga 30 anyos na, pinonan nia an saiyang ministeryo tanganing “magpatotoo sa katotoohan.” (Juan 18:37; Lucas 3:21-23) An apat na disipulo na nagsurat kan pagkasaysay kan saiyang buhay nakasentro sa suminunod na tolo may kabangang taon.
Durante kan saiyang ministeryo, may ipinagboot si Jesu-Cristo sa saiyang mga disipulo na puedeng magin remedyo sa dakol na problema kan kinaban. Ano idto? Si Jesus nagsabi: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan.” (Juan 13:34) Iyo, an solusyon sa dakol na problema kan katawohan iyo an pagkamoot. Saro pang beses, kan hapoton si Jesus kun arin na togon an nakalalabi sa gabos, sia nagsimbag: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakalalabi sa gabos asin enot na togon. An ikaduwa, na arog kaini, iyo ini, ‘Kamotan mo an saimong kataed nin siring sa saimo man sana.’”—Mateo 22:37-40.
Ipinaheling sa sato ni Jesus paagi sa mga tataramon asin gibo kun paano kamotan an Dios asin an kapwa. Estudyaran ta an pirang halimbawa asin helingon kun ano an manonodan ta sa saiya.
An Saiyang mga Katokdoan
Sa saro kan pinakabantog na sermon sa kasaysayan, si Jesu-Cristo nagsabi sa saiyang mga parasunod: “Mayo nin siisay man na makapaglilingkod sa duwang kagurangnan; huli ta ikaoongis nia an saro asin mamomotan nia an ikaduwa, o magigin dayupot sia sa saro asin isisikwal nia an ikaduwa. Dai kamo makapaglilingkod sa Dios asin sa Kayamanan.” (Mateo 6:24) An katokdoan daw ni Jesus manongod sa pag-enot sa Dios sa satong buhay praktikal pa ngonyan, na kadakol kan tawo na naniniwala na kuarta an solusyon sa gabos na problema? Totoo, kaipuhan ta an kuarta tanganing mabuhay. (Eclesiastes 7:12) Pero, kun totogotan ta an “Kayamanan” na magin satong Kagurangnan, “an pagkamoot sa kuarta” an magkokontrol sa sato, magdodominar sa bilog na buhay niato. (1 Timoteo 6:9, 10) An dakol na nahulog sa siod na ini nawaran kan saindang pamilya, kan saindang salud, asin kan saindang buhay pa ngani.
Sa ibong na kampi, an pagsarig sa Dios bilang satong Kagurangnan nagtatao nin kahulogan sa buhay. Bilang an Kaglalang, sia an Burabod nin buhay, asin sa siring, sia sana an maninigo sa satong pagsamba. (Salmo 36:9; Kapahayagan 4:11) An mga nakakanood manongod sa saiyang mga kualidad asin napapamoot sa saiya napahihiro na kuyogon an saiyang mga togon. (Eclesiastes 12:13; 1 Juan 5:3) Sa paggibo kaiyan, pinakikinabang ta an satong sadiri.—Isaias 48:17.
Sa Sermon sa Bukid, tinokdoan man ni Jesus an saiyang mga disipulo kun paano ipaheheling an pagkamoot sa kapwa. Sia nagsabi: “Kun siring, an gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) An tataramon na “mga tawo” na ginamit digdi ni Jesus kabale dawa an mga kaiwal nin saro. Sa sermon man sanang iyan, sia nagsabi: “Padagos na kamotan an saindong mga kaiwal asin ipamibi idtong mga naglalamag sa saindo.” (Mateo 5:43, 44) Bako daw na mareresolberan kan siring na pagkamoot an dakol sa mga problema na inaatubang ta ngonyan? Iyan an saboot kan namomoon sa Hindu na si Mohandas Gandhi. Sia kinotar na nagsasabi: “Kun [kita] magkaoyon na sa mga katokdoan na isinabi ni Cristo sa Sermon sa Bukid na ini, mareresolberan na niato an mga problema . . . kan bilog na kinaban.” An mga katokdoan ni Jesus manongod sa pagkamoot, kun iinaaplikar, makareresolber sa dakol na problema kan katawohan.
An Saiyang mga Gibo
Bako sanang nagtokdo si Jesus nin hararom na mga katotoohan manongod sa kun paano ipaheheling an pagkamoot kundi ginibo man nia an saiyang itinokdo. Halimbawa, inenot nia an kapakanan kan iba kisa kan saiya. Sarong aldaw si Jesus asin an saiyang mga disipulo sibot na marhay sa pagtabang sa mga tawo kaya sinda mayo na nganing panahon na kumakan. Nasabotan ni Jesus an pangangaipo kan saiyang mga disipulo na magpahingalo nin kadikit, asin dinara nia sinda sa sarong lugar na harayo sa mga tawo. Alagad pag-abot ninda duman, nanompongan ninda an sarong kadaklan na naghahalat sa sainda. Ano daw an posibleng nagin reaksion nindo pakaheling sa sarong kadaklan na naglalaom na kamo matrabaho mantang sa pagmate nindo kaipuhan kamong magpahingalo nin kadikit? Bueno, si Jesus “napahiro nin pagkaherak sa sainda” asin “nagpoon na magtokdo sa sainda nin balakid na bagay.” (Marcos 6:34) An pagmakolog na ini sa iba an pirmeng nagpahiro ki Jesus na tabangan sinda.
An ginibo ni Jesus para sa mga tawo labi pa sa pagtokdo sana sa sainda. Nagtao man sia nin praktikal na tabang. Halimbawa, sarong beses pinakakan nia an labing 5,000 katawo na naghinanyog sa saiya sagkod sa hapon nang marhay. Dai nahaloy pakatapos kaiyan, pinakakan nia an saro pang dakulang kadaklan—ngonyan labing 4,000—na tolong aldaw nang naghinanyog sa saiya asin mayo nang natadang makakakan. Sa enot na pangyayari, naggamit sia nin limang tinapay asin duwang sira, asin sa ikaduwa, pitong tinapay asin pira sanang saradit na sira. (Mateo 14:14-22; 15:32-38) Mga milagro? Iyo, sia naggibo nin milagro.
Si Jesus nagpaomay man sa dakol na may kamatean. Binolong nia an mga buta, pilay, daoton, asin bongog. Tara, sia nagbuhay liwat pa ngani nin mga gadan! (Lucas 7:22; Juan 11:30-45) Sarong beses may daoton na nakimaherak sa saiya: “Kun boot mo sana, mapalilinig mo ako.” Ano an reaksion ni Jesus? “Huli kaiyan sia naherak, asin inunat nia an saiyang takyag asin dinootan sia, asin sinabi sa saiya: ‘Boot ko. Luminig ka.’” (Marcos 1:40, 41) Paagi sa siring na mga milagro, ipinaheling ni Jesus an saiyang pagkamoot sa mga nagsasakit nin makuri.
Nadedepisilan daw kamong maniwala sa mga milagro ni Jesus? An nagkapira iyo. Pero, girumdomon na si Jesus naggibo kan saiyang mga milagro sa publiko. Maski an mga nagkokontra sa saiya, na naghingoang hanapan sia nin sala sa lambang pangyayari, dai makanegar na sia naggibo nin milagro. (Juan 9:1-34) Dugang pa, an saiyang mga milagro may katuyohan. Tinabangan kaiyan an mga tawo na mamidbid sia bilang an Saro na isinugo nin Dios.—Juan 6:14.
Sa paggibo nin mga milagro si Jesus dai nagkukua nin atension para sa saiyang sadiri. Imbes, pinamuraway nia an Dios, an Gikanan kan saiyang kapangyarihan. Sa Capernaum sarong beses yaon sia sa harong na pano nin tawo. An sarong lopog gustong paomay alagad dai makalaog. Kaya an saiyang mga katood itinunton sia sa sarong hamak na iinagi sa atop. Kan maheling an saindang pagtubod, pinaomayan ni Jesus an paralitiko. Bilang resulta, an mga tawo “pinamuraway an Dios” asin nagsarabi: “Dai pa kami nakaheling kasuarin man nin arog kaiyan.” (Marcos 2:1-4, 11, 12) An mga milagro ni Jesus nagtao nin kaomawan ki Jehova, an saiyang Dios, asin nakatabang sa mga nangangaipo.
Minsan siring, an milagrosong pagpaomay sa mga may helang bakong pangenot sa ministeryo ni Jesus. An sarong nagsurat kan pagkasaysay kan buhay ni Jesus nagpaliwanag: “An mga ini isinurat tanganing kamo magturubod na si Jesus iyo an Cristo na Aki nin Dios, asin na, huli sa pagtubod, kamo puedeng magkamit nin buhay paagi sa saiyang ngaran.” (Juan 20:31) Iyo, si Jesus nagdigdi sa daga tanganing an mga tawong naniniwala magkaigwa nin buhay.
An Saiyang Atang
‘Si Jesus nagdigdi sa daga?’ an tibaad ihapot nindo. ‘Saen sia hale?’ Si Jesus mismo nagsabi: “Ako naghilig hale sa langit, bakong sa paggibo kan sadiri kong boot, kundi kan boot kaidtong nagsugo sa sako.” (Juan 6:38) Sia nag-eksister na bago nagin tawo bilang Aking bugtong nin Dios. Ano kun siring an boot kan Saro na nagsugo sa saiya sa daga? “An Dios namoot na gayo sa kinaban na itinao nia an saiyang Aking bugtong,” an sabi ni Juan, saro sa mga kagsurat kan mga Ebanghelyo, “tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Paano ini nagin posible?
Ihinahayag kan Biblia kun paanong an kagadanan nagin dai malilikayan na kamugtakan nin katawohan. An enot na tawong mag-agom nag-ako gikan sa Dios nin buhay na may paglaom na mabuhay sagkod lamang. Minsan siring, pinili ninda na magrebelde tumang sa Kaggibo sa sainda. (Genesis 3:1-19) Bilang resulta kan aksion na ini, an enot na kasalan nin tawo, an mga gikan ni Adan asin Eva nagmana kan dai ginustong kagadanan. (Roma 5:12) Tanganing ikatao sa katawohan an tunay na buhay, an kasalan asin kagadanan dapat na haleon.
Mayong sientista na makahahale sa kagadanan paagi sa sarong klase nin inhenieriya henetika. Pero, an Kaglalang kan katawohan may paagi tanganing darahon an makinuyog na mga tawo sa pagkasangkap tanganing sinda mabuhay sagkod lamang. Sa Biblia an probisyon na ini inaapod na pantubos. Ipinabakal kan enot na tawong mag-agom an saindang sadiri asin an saindang mga gikan sa pagkaoripon sa kasalan asin kagadanan. Ibinalidya ninda an buhay bilang sangkap na mga tawo na makinuyog sa Dios sa buhay na independiente sa Dios, na naggigibo kan saindang sadiring mga desisyon sa kun ano an tama asin sala. Tanganing mabalukat an sangkap na buhay nin tawo, may halaga na kaipuhan na ibayad na katumbas kan sangkap na buhay nin tawo na ipinaremata kan satong enot na mga magurang. Huling nagmana nin pagkabakong sangkap, an mga tawo bakong kualipikado na magtao kan halaga na iyan.—Salmo 49:7.
Kaya nag-interbenir si Jehova Dios tanganing tumabang. Ibinalyo nia an sangkap na buhay kan saiyang Aking bugtong sa matris nin sarong daraga, na nangaki ki Jesus. Kaidtong dakol nang dekada an nakaagi, tibaad sinayumahan nindo an ideya na pangangaki nin daraga. Minsan siring, ngonyan an mga sientista nakagibo nin clone na mga mamalya asin nakapaglaog nin mga gene hale sa sarong hayop pasiring sa saro pa. Siisay, kun siring, an tamang makakukuestion sa kakayahan kan Kaglalang na lihisan an ordinaryong proseso nin pangangaki?
Paagi sa pag-eksister nin sangkap na buhay bilang tawo, may magagamit nang halaga na pambalukat sa katawohan hale sa kasalan asin kagadanan. Pero, an omboy na namundag digdi sa daga bilang si Jesus kinaipuhan na dumakula na magin “doktor” na makatatao kan “bolong” na magpapaomay sa mga problema nin katawohan. Ginibo nia ini paagi sa pamumuhay na sangkap, daing kasalan. Bako sanang naheling ni Jesus an labi-labing kamondoan nin katawohan sa irarom nin kasalan kundi naeksperyensiahan nia an pisikal na mga limitasyon nin pagigin tawo. Ini nagpangyari sa saiya na magin orog pa nganing madinamayon na doktor. (Hebreo 4:15) An milagrosong mga pagpaomay na ginibo nia kan sia nabubuhay digdi sa daga nagpatunay na sia igwa kapwa kan kabotan asin kapangyarihan na paomayan an mga may helang.—Mateo 4:23.
Pakatapos nin tolo may kabangang taon na ministeryo digdi sa daga, si Jesus ginadan kan mga nagkokontra sa saiya. Ipinaheling nia na an sangkap na tawo puedeng magin makinuyog sa Kaglalang sa ibong kan dawa pinakamasakit na mga pagbalo. (1 Pedro 2:22) An saiyang iinatang na sangkap na buhay bilang tawo nagin an pantubos na halaga, na nakababalukat sa katawohan hale sa kasalan asin kagadanan. Si Jesu-Cristo nagsabi: “Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” (Juan 15:13) Kan ikatolong aldaw pagkagadan nia, si Jesus binuhay liwat sa espiritung buhay, asin pakalihis nin pirang semana sia suminakat sa langit tanganing iatubang ki Jehova Dios an pantubos na halaga. (1 Corinto 15:3, 4; Hebreo 9:11-14) Sa paggibo kaiyan, ikinaaplikar ni Jesus an merito kan saiyang pantubos na atang sa mga nagsusunod sa saiya.
Gusto daw nindong makinabang sa paaging ini nin pagpaomay sa espirituwal, emosyonal, asin pisikal na mga helang? An paggibo kaiyan nangangaipo nin pagtubod ki Jesu-Cristo. Taano ta dai dumolok sa Doktor mismo? Magigibo nindo iyan paagi sa pag-adal manongod ki Jesu-Cristo asin sa saiyang papel sa pagligtas sa fiel na katawohan. An Mga Saksi ni Jehova maoogma na tabangan kamo.
[Retrato sa pahina 5]
Si Jesus igwa kapwa kan kabotan asin kapangyarihan na paomayan an mga may kamatean
[Retrato sa pahina 7]
Paano nakakaapektar sa saindo an kagadanan ni Jesus?