Kapakipakinabang na Komunikasyon—Sarong Liabe sa Marahay na Relasyon Mag-agom
Kan 1778, ipinatenta ni Robert Barron an doble aksion, de tangil na barat na iyo pa an basehan kan de liabeng barat sa presenteng panahon. An saiyang disenyo ginagamitan nin sarong liabe na kayang iitaas nin sabay an duwang tangil kan barat.
KAAGID kaiyan, an mapangganang relasyon mag-agom nagdedepende sa mag-agom na nagtitinabangan na may pagkakaoyon. Tanganing mabuksan asin maeksperyensiahan an mahalagang marhay na mga kagayagayahan sa marahay na relasyon mag-agom, an sarong kaipuhan iyo an kapakipakinabang na komunikasyon.
Kun Ano an Kalabot sa Kapakipakinabang na Komunikasyon
Ano an kalabot sa kapakipakinabang na komunikasyon? An sarong diksionaryo tinatawan nin kahulogan an komunikasyon na “pagtao o pagrinibayan nin mga ideya, opinyon, o impormasyon paagi sa pagtaram, pagsurat, o senyas.” Kun siring kalabot sa komunikasyon an pagpinahayagan nin mga saboot asin ideya. Asin kalabot sa kapakipakinabang na komunikasyon an mga bagay na nakapakokosog, nakagiginhawa, birtuoso, kaomaw-omaw, asin nakararanga.—Efeso 4:29-32; Filipos 4:8.
An kapakipakinabang na komunikasyon nagigin posible paagi sa kompiansa, pagtitiwala, asin pagsabot sa kada saro. An mga kualidad na ini an ibinubunga kun an relasyon mag-agom minamansay bilang relasyon sagkod na nabubuhay asin kun igwa nin tunay na determinasyon na otobon iyan. Sa pagkomento sa siring na relasyon, an parasurat kan ika-18 siglo na si Joseph Addison nagsurat: “An duwang tawo na pinili an kada saro sa gabos na ibang tawo, na may katuyohan na magin karangahan asin kaalingan kan kada saro, paagi sa aksion na iyan, inobligar an saindang sadiri na magin marahay magpangisi, maboot, madonong, mapagpatawad, mapasensia, asin magayagaya, kun mapadapit sa mga sala asin pagkabakong sangkap nin balang saro, sagkod sa katapusan kan saindang buhay.” Kanigoan kaogma kan pagsasaro na iyan! Asin an arog-mutya na mga kualidad na ini puedeng magin adorno sa saindong relasyon mag-agom, huli ta iyan puedeng mapasaindo paagi sa kapakipakinabang na komunikasyon.
Mga Olang sa Kapakipakinabang na Komunikasyon
An kadaklan na magkailusyon minamansay an pag-agom sa optimistikong paagi, na iyan masiram na pagmate pa ngani. Minsan siring, para sa dakol an masiram na pagmate madaling nawawara, asin an optimismo napapara. An kasegurohan tibaad masalidahan nin mapait na pagkadiskontento, kaanggotan, pag-iiwal, asin makosog na pagkauyam pa ngani. Dangan an relasyon mag-agom nagigin na sanang pagtagal “sagkod na kita pagsuwayon nin kagadanan.” Kun siring, tanganing mapaoswag o mapagdanay an kapakipakinabang na komunikasyon na kaipuhan para sa marahay na relasyon mag-agom, dapat na haleon an nagkapirang olang.
An sarong totoong olang sa kapakipakinabang na komunikasyon puedeng takot sa kun ano an magigin reaksion nin agom sa sarong impormasyon o ipinahayag na kagustohan. Halimbawa, an takot na sia haboan tibaad lumataw pakatapos na maaraman nin saro na sia igwa nin nagpopoon na grabeng kamatean. Paano ipaliliwanag nin saro sa agom na huli sa sarong nakatalaan na prosedimiento biglang maliliwat an saiyang itsura o kakayahan nin pagpunsionar? Sa siring na mga kamugtakan, an onestong komunikasyon asin maingat na pagplano para sa ngapit kaipuhan kisa kasuarin man. An berbal na mga asegurasyon nin nagpapadagos na pagkamoot, kaiba an parateng mga akto nin kapadangatan, magkokomunikar nin personal na interes na makatatabang na mapaoswag an tunay na nakakokontentong relasyon mag-agom. Sa relasyon mag-agom maninigo na pinakamarahay na ipahayag an talinhagang ini: “An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.”—Talinhaga 17:17.
An paghinanakit saro pang olang sa kapakipakinabang na komunikasyon. Angay na may nagsabi na an maogmang relasyon mag-agom iyo an pagsasaro nin duwang marahay na parapatawad. Tanganing tumama sa paglaladawan na iyan, an mag-agom gigibohon an gabos na paghihingoa na sunodon an praktikal na hatol ni apostol Pablo: “Dai nindo pagpasolnopon an saldang na kamo may kaanggotan.” (Efeso 4:26) An pag-aplikar kan hatol na ini imbes na magtanom nin kaanggotan o paghinanakit tunay nanggad na nagkakaipo nin mapakumbabang pagkomunikar. An magkapadis sa marahay na relasyon mag-agom dai pirepirmeng napadadara sa kaanggotan, pag-iiwal, asin pagtanom nin raot nin boot. (Talinhaga 30:33) Naghihingoa sinda na arogon an Dios, na dai nagtatanom nin paghinanakit. (Jeremias 3:12) Tunay nanggad, sinda nagpapatinawadan gikan sa puso.—Mateo 18:35.
An sarong espesipikong olang sa ano man na klase nin komunikasyon iyo an dai paggirong. Puedeng kalabot digdi an pagmurusdot, pag-agrutong, garo robot na mga hiro, asin an saro habo nang magtaram. An agom na siring kaini an hiro nagkokomunikar nin sarong klase nin disgusto. Alagad an pagpahayag nin personal na mga saboot sa prangka asin kawiliwiling paagi mas nakapaooswag na marhay sa relasyon mag-agom kisa pagdadanay na daing girong asin mamondo.
An daing gayo o biyong dai paghinanyog kun an agom nagtataram saro pang olang na dapat haleon tanganing magin marahay an komunikasyon sa dayupot na relasyon mag-agom. Tibaad kita pagal nang marhay o talagang sibot-sibot tanganing magkaigwa kan mental asin emosyonal na kosog na kaipuhan tanganing maingat na hinanyogon an kada saro. Puedeng magkadiskutiran huli sa dai nasabotan na mga areglo na an paghona kan sarong agom malinaw na alagad iiniinsistir man kan saro na ngonyan pa sana nia nadangog. Malinaw nanggad, maluyang komunikasyon an dahelan kan siring na mga problema.
Kun Paano Mapaooswag an Kapakipakinabang na Komunikasyon
Importante nanggad na magtao nin panahon para sa mamomoton, kapakipakinabang na komunikasyon! An nagkapira kadakol na panahon an ginagamit sa atubangan nin TV na dinadalan an buhay nin ibang tawo kaya mayo na sinda nin panahon para sa saindang sadiring buhay. Huli kaini, an paggadan kan telebisyon sa parate kinakaipuhan para sa kapakipakinabang na komunikasyon.
Minsan siring, kun paanong may tamang panahon na magtaram, may panahon man na dai maggirong. An tawong madonong nagsabi: “Para sa gabos na bagay igwa nin itinalaan na panahon, . . . panahon na dai maggirong asin panahon na magtaram.” Tunay nanggad, igwa man nin tamang mga tataramon na dapat sabihon. “An tataramon sa tamang kapanahonan kaiyan abaang rahay!” an sabi nin sarong talinhaga. (Eclesiastes 3:1, 7; Talinhaga 15:23) Kaya aramon kun noarin an pinakamarahay na panahon na sabihon an gusto nindo o ipahayag an nasa puso nindo. Ihapot sa saindong sadiri: ‘An sako daw na agom pagal o pamugtak asin maginhawa an isip? An tema daw na gusto kong sabihon posibleng ponan nin pagkaanggot? Ano an habo kan agom ko sa ginamit kong mga tataramon kan ultimong pag-olayan mi an bagay na ini?’
Marahay na girumdomon na marahayon an reaksion nin mga tawo kun saindang nasasabotan kun paano sinda makikinabang sa pagkooperar o pagsunod sa sarong kahagadan. Kun nagkaigwa nin tension sa pag-oltanan nin mag-agom, an tendensia kan saro sa sainda tibaad magsabi nin, “May pinoproblema ako, asin kaipuhan na husayon niato ini ngonyan mismo!” Siempre, an eksaktong mga sasabihon madepende sa mga kamugtakan, alagad tibaad mas marahay na arog kaini an sabihon, “Mahal, iniisip ko an manongod sa pinag-olayan niato kan nakaagi asin kun paano huhusayon an mga bagay-bagay.” Arin na paagi an mas posibleng aapresyaron kan saindong agom?
Iyo, importanteng marhay kun paano sinasabi an sarong bagay. Si apostol Pablo nagsurat: “An saindo logod na pagtaram danay na igwa nin kabootan, na tinimplahan nin asin.” (Colosas 4:6) Hingoahon na magin maboot sa saindong tono nin boses asin ginagamit na mga tataramon. Tandaan na “an managom na mga tataramon anira nin tangguli, mahamis sa kalag asin bolong sa mga tolang.”—Talinhaga 16:24.
Para sa nagkapirang mag-agom, an pagtinabangan sa mga proyekto sa harong puedeng magin marahay na kamugtakan para sa komunikasyon. An siring na kooperasyon puedeng magpaoswag sa pakamate nin pagtinabangan mantang nagtatao man nin panahon para sa kapakipakinabang na pag-oolay. Para sa ibang mag-agom, an toninong na oras na sinda sana an magkaibanan na dai naghihingoang magtrabaho mas marahay asin mas nakakokontribwir para sa kapakipakinabang na komunikasyon.
Sa parate dakol an manonodan paagi sa pag-obserbar sa kun paano nagkokomunikar sa kada saro an magkabagay na mga mag-agom. Ano an nagpangyari sa sainda na magin siring? Posibleng marhay na an saindang pagkakaoyon asin an pasil na pagkomunikar ninda bunga nin personal na paghihingoa, pagpapasensia, asin mamomoton na konsiderasyon. Minalataw na sinda mismo kadakol na dapat manodan kaidto, ta an marahay na relasyon mag-agom bakong automatiko. Kun siring, importante nanggad na konsideraron an punto de vista kan saindong agom, saboton an saiyang mga pangangaipo, asin likayan an mga situwasyon na posibleng ponan nin tension paagi sa maingat na tataramon. (Talinhaga 16:23) Kun siring, kun kamo may agom, maghingoa na magin kawiliwiling pakiibanan asin madaling hagadan nin tawad. Dakula nanggad an ikatatabang kaiyan na magin marahay an saindong relasyon mag-agom.
Boot ni Jehova Dios na an mga tawo magkaigwa nin maogma, nagdadanay na relasyon mag-agom. (Genesis 2:18, 21) Alagad an liabe yaon sa kamot kan mga pinagsaro sa pag-agom. Duwang nagkakaminootan na tawo na talagang nagtitinabangan an kaipuhan sa pagbukas kan pinto sa mapangganang relasyon mag-agom paagi sa pag-adal na magin tuodan sa kapakipakinabang na komunikasyon.
[Retrato sa pahina 22]
An paggadan kan TV nagtatao nin orog na panahon para sa komunikasyon
[Mga retrato sa pahina 23]
An kapakipakinabang na komunikasyon nakatatabang na mabogkos an mga puso sa nagdadanay na pagkamoot