Gibohon na Nagdadanay na Pagsasaro an Saindong Pag-agoman

“An pinagsaro nin Dios dai puwedeng pagsuwayon nin siisay man.”​—MATEO 19:6.

1. Ano an basihan para sa kapangganahan nin pag-agoman sa tahaw nin tunay na mga Kristiano ngonyan?

AN DAKOL na ribo sa tahaw kan banwaan ni Jehova ngonyan nagkakamit nin nakakokontento asin nagdadanay na pag-aragoman. Alagad, an siring kalakop na kapangganahan bako nanggad pagkanorongod sana. An Kristianong pag-aragoman nag-ooswag kun an mag-agom pareho (1) iginagalang an punto-de-vista nin Dios sa pag-agom asin (2) naghihingoa na mamuhay sono sa mga prinsipyo kan saiyang Tataramon. Total, an Dios mismo an nagpoon kan areglo nin pag-agom. Sia an Saro na ‘pinagkakautangan nin ngaran kan lambang pamilya sa daga.’ (Efeso 3:​14, 15) Mantang aram ni Jehova kun ano an kaipuhan tanganing magin mapanggana an pag-agom, makikinabang kita mismo paagi sa pagsunod sa saiyang giya.​—Isaias 48:17.

2. Ano an mga ibinubunga kan dai pakaaplikar sa mga prinsipyo sa Biblia sa pag-agoman?

² Sa kabaliktaran, an dai pakaaplikar sa mga prinsipyo sa Biblia puwedeng magbunga nin kasakitan sa pag-agom. May mga eksperto na naniniwala na mga dos tersio kan mga nag-aagom ngonyan sa Estados Unidos sa katapustapusi magdidiborsio. Pati an mga Kristiano bakong ligtas sa mga tension asin kasakitan kaining “delikadong mga panahon na masakit pakibagayan.” (2 Timoteo 3:1) An mga tension sa ekonomiya asin mga pangigipit sa pinagtatrabawohan puwedeng makaraot sa arin man na pag-agoman. An ibang Kristiano nadisganar man na marhay huli kan dai pakaaplikar kan saindang agom sa mga prinsipyo sa Biblia. “Namomotan ko si Jehova,” an sabi nin sarong Kristianang agom, “alagad an sakong pag-agom 20 taon nang pano nin problema. An sakong agom paslo asin habong gumibo nin ano man na pagbakle. Garo ako nasisiod.” May nagkapira man na Kristianong agom na lalaki o babae na nagpahayag nin kaparehong mga saboot. Ano daw an diperensia? Asin ano an makakaolang sa pag-agoman na magin na sanang daing girirongan o direktang pagkaongis?

An Pagigin Permanente nin Pag-agoman

3, 4. (a) Ano an pamantayan nin Dios sa pag-agoman? (b) Taano an pagigin permanente kan pag-agoman ta matanos asin kapakipakinabang?

³ Maski sa pinakamarahay na mga kamugtakan, an pag-agom pagsasaro nin bakong sangkap na mga indibiduwal. (Deuteronomio 32:5) Kaya si apostol Pablo nagsabi na “an mga [nag-aagom] magkakaigwa nin kahorasaan sa saindang laman.” (1 Corinto 7:28) An ibang grabeng kamugtakan tibaad pa ngani magresulta sa pagbubulag o diborsio. (Mateo 19:9; 1 Corinto 7:​12-15) Alagad, sa kadaklan na kamugtakan, an mga Kristiano iinaaplikar an hatol ni Pablo: “An agom na babae dai maninigong bumulag sa saiyang agom . . . , asin an agom na lalaki dai maninigong bumaya sa saiyang agom.” (1 Corinto 7:​10, 11) Iyo nanggad, katuyohan kan pag-agom na magin permanenteng bogkos, huli ta si Jesu-Cristo nagpahayag: “An pinagsaro nin Dios dai puwedeng pagsuwayon nin siisay man.”​—Mateo 19:6.

⁴ Para sa saro na nakakamateng nasisiod sa sarong maringis o daing pagkamoot na pag-inagoman, an pamantayan ni Jehova garo baga makolog asin bakong rasonable. Pero bako. An pagigin permanente kan bogkos nin pag-agoman pinahihiro an diosnon na mag-agom na atubangon asin hingoahon na resolberan an saindang mga problema, imbes na bayaan tolos an saindang mga obligasyon sa enot na paglataw nin problema. An sarong lalaki na labi nang 20 taon na may agom siring kaini an pagkasabi kaiyan: “Dai nindo malilikayan an masakit na mga panahon. Dai kamo magigin maogma sa kada saro sa gabos na panahon. Iyan an panahon na talagang importante an kapanugaan.” Siyempre, an mga Kristianong mag-agom nakakamate nin pangenot na obligasyon ki Jehova Dios, an Kagtugdas nin pag-agoman.​—Ikomparar an Eclesiastes 5:4.

Pagkapayo Asin Pagpasakop

5. Ano an saro sa hatol ni Pablo para sa mga agom na lalaki asin babae?

⁵ Kaya, kun minalataw an mga problema, iyan an panahon na humanap nin, bakong nin madudulagan, kundi nin mas marahay na paagi na iaplikar an hatol sa Tataramon nin Dios. Halimbawa, horophoropa an mga tataramon na ini ni Pablo, na yaon sa Efeso 5:​22-25, 28, 29: “Magpasakop an mga agom na babae sa saindang agom nin siring sa Kagurangnan, huli ta an lalaki iyo an payo kan saiyang agom kun paanong si Cristo iyo man an payo kan kongregasyon, mantang sia an paraligtas kan hawak na ini. Sa katunayan, kun paanong an kongregasyon nagpapasakop ki Cristo, siring man an mga babae sa saindang agom sa gabos na bagay. Mga agom na lalaki, padagos nindong mamotan an saindong mga agom na babae, kun paanong si Cristo namoot man sa kongregasyon asin iinatang an saiya man sana dahel kaiyan. Sa paaging ini an mga agom na lalaki kaipuhan na mamoot sa saindang agom siring sa saindang sadiring hawak. An namomoot sa saiyang agom namomoot sa saiya man sana, huli ta noarin man mayong tawo na naongis sa saiyang sadiring laman; kundi pinapakakan nia asin inaataman iyan, arog kan ginigibo man ni Cristo sa kongregasyon.”

6. Paano an Kristianong mga agom na lalaki dapat na magin laen sa mga lalaki sa kinaban?

⁶ An mga lalaki parateng inaabuso an saindang autoridad sa pagigin agom na lalaki asin dinodominar an saindang mga agom. (Genesis 3:16) Alagad, sinadol ni Pablo an Kristianong mga agom na lalaki na magin laen sa mga lalaki sa kinaban, na magin arog-Cristo, bakong maisog na kinokontrol an gabos na detalye sa buhay kan saindang agom. Sierto nanggad, an tawong si Jesu-Cristo nungkang nagin maisog o dominante. Trinatar nia an saiyang mga parasunod na may onra asin paggalang, na nagsasabing: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin makanood sa sako, huli ta ako maboot asin mapakumbaba sa puso.”​—Mateo 11:​28, 29.

7. Paano an sarong lalaki makatatao nin onra sa saiyang agom kun ini kaipuhan na magtrabaho nin sekular?

⁷ An sarong Kristianong agom na lalaki nagtatao nin onra sa saiyang agom siring sa lalagan na mapapasaon. (1 Pedro 3:7) Halimbawa, ipamugtak na kaipuhan siang magtrabaho nin sekular. Hohorophoropon ini kan lalaki, na matinabang asin makonsiderasyon sagkod sa mahihimo. An sarong pangenot na dahelan na an mga babae nakidiborsio iyo an kapabayaan kan saindang agom sa mga aki o sa harong. Kun siring, an Kristianong agom na lalaki maghihingoang tabangan sia sa harong sa makahulogan na mga paagi na mapapakinabangan kan bilog na pamilya.

8. Ano an hinahagad para sa Kristianang mga agom kan pagpasakop?

⁸ Mas pasil para sa mga Kristianang agom na magpasakop sa saindang agom kun sinda tinatratar na may onra. Alagad, ini dai nangangahulogan nin kaherakherak na pan-ooripon. An Dios nagboot na an agom na babae magin, bakong oripon, kundi sarong “komplemento” (“katimbang,” nota sa ibaba), na nagpaparisa nin sarong bagay na angay para sa lalaki. (Genesis 2:18) Sa Malaquias 2:​14, an agom na babae sinasabing “kapadis” nin lalaki. Bilang siring, an mga agom na babae kan mga panahon sa Biblia nagkamit nin dakulang katalingkasan. Mapadapit sa “mahusay na agom na babae,” an Biblia nagsasabi: “Sa saiya an puso kan saiyang kagsadiri nagtiwala.” Iyo nanggad, pinaniwalaan sia kan mga bagay na siring baga kan pankagabsan na pamamahala sa harong, pag-asikaso sa pamamakal nin kakanon, pakipagnegosyar sa mga transaksion dapit sa mga pagsadiri, asin pagpadalagan nin sadit na negosyo.​—Talinhaga 31:​10-31.

9. (a) Paano an matatakton sa Dios na mga babae kan mga panahon sa Biblia nagpaheling nin tunay na pagkamapagpasakop? (b) Ano an makatatabang sa sarong Kristianang agom na magdanay na mapagpasakop ngonyan?

⁹ Minsan siring, an matatakton sa Dios na agom na babae minimidbid an autoridad kan saiyang agom. Halimbawa, si Sara ‘nagkuyog ki Abraham, na inaapod siang “kagurangnan,”’ bakong bilang magalang na pormalidad, kundi odok na pagpaheling kan saiyang pagkamapagpasakop. (1 Pedro 3:6; Genesis 18:12) Boluntad man niang binayaan an saiyang komportableng harong sa siudad nin Ur tanganing mag-istar sa mga tolda kaiba kan saiyang agom. (Hebreo 11:​8, 9) Pero an pagpasakop dai nangahulogan na an agom na babae dai puwedeng magkaigwa nin responsableng paghiro kun kinakaipuhan. Kan si Moises dai nakakuyog sa pagboot nin Dios dapit sa pagpaturi, an saiyang agom, si Zipora, naolang an kapahamakan paagi sa desididong paghiro. (Exodo 4:​24-26) Dakol pa an kalabot kisa sa pagpaoyon sa bakong sangkap na tawo. An mga agom na babae kaipuhan na ‘magpasakop sa saindang agom nin siring sa Kagurangnan.’ (Efeso 5:22) Kun an Kristianang agom nag-iisip manongod sa saiyang relasyon sa Dios, tinatabangan sia kaini na palihison an saradit na sala asin pagkukulang sa saiyang agom, kun paanong kaipuhan man na gibohon iyan kan lalaki sa pagtratar sa saiya.

Komunikasyon​—an Dugo nin Pag-agoman

10. Gurano kahalaga kan komunikasyon sa pag-agoman?

¹⁰ Kan hapoton kun ano an sasarong pinakadakulang dahelan na nagbubulag an mga mag-agom, an sarong abogado sa diborsio nagsimbag: “An kadaihan nin kakayahan na makipag-olay nin sadiosan sa kada saro, na ipahayag an saindang kairairaroming mga kaisipan asin na trataron an kada saro bilang saindang pinakamarahay na katood.” Iyo, an komunikasyon iyo an dugo nin sarong marigon na pag-agoman. Siring sa sinasabi kan Biblia: “Nasusudya an mga plano kun mayo nin pribadong orolay.” (Talinhaga 15:22) An mga agom na lalaki asin babae kaipuhan na magin “pinagtitiwalaan na mga katood,” na igwa nin mainit, dayupot na relasyon. (Talinhaga 2:17) Alagad, dakol na mag-agom an nadedepisilan sa komunikasyon, asin sa siring an paghinanakit naggagrabe sagkod na mangyari an pagputok nin nakalalaglag na kaanggotan. O an mag-agom tibaad magsagin magalang, na minarayo sa emosyonal na paagi sa kada saro.

11. Paano mapapaoswag an komunikasyon sa pag-oltanan kan agom na lalaki asin babae?

¹¹ An sarong kabtang kan problema garo baga na an mga lalaki asin babae parateng igwa nin magkalaen na mga estilo nin pakikikomunikar. An kadaklan na babae garo baga pamugtak na mag-orolay dapit sa mga namamatean, mantang an mga lalaki sa pankagabsan garo baga mas gustong mag-orolay dapit sa mga katunayan. An mga babae mas may inklinasyon na magpaheling nin pakikidamay asin magtao nin emosyonal na suporta, mantang an mga lalaki may tendensiang humanap asin tumao nin mga solusyon. Minsan siring, igwa nin potensial para sa marahay na komunikasyon kun an mag-agom kapwa determinado na magin “listo kun dapit sa pagdangog, maluway kun dapit sa pagtaram, maluway kun dapit sa kaanggotan.” (Santiago 1:19) Magkaigwa nin bisuwal na pakikikomunikar asin talagang maghinanyog. Paluwason an saboot kan kada saro paagi sa makonsiderasyon na mga hapot. (Ikomparar an 1 Samuel 1:8; Talinhaga 20:5.) Imbes na probaran na tumao nin tolos-tolos na solusyon kun an saindong agom nagpapahayag nin sarong problema, maingat na maghinanyog mantang naghihingoa kamong resolberan an mga bagay. Asin mapakumbabang mamibi na magkaibanan, na naghahagad kan paggiya nin Dios.​—Salmo 65:2; Roma 12:12.

12. Paano an Kristianong mga agom makakatubos nin panahon para sa kada saro?

¹² Kun beses an mga tension asin kasakitan sa buhay garo baga nakakaina sa oras o kosog para sa makahulogan na pag-orolay kan mag-agom. Minsan siring, kun boot kan mga Kristiano na papagdanayon na kagalanggalang an saindang pag-inagoman asin ingatan iyan tumang sa karigsokan, sinda dapat na magdanay na dayupot sa kada saro. Kaipuhan na ibilang ninda an saindang pagsasaro na sarong bagay na mahal, mahalaga, asin dapat nindang tuboson an panahon para dian asin para sa kada saro. (Ikomparar an Colosas 4:5.) Sa ibang kamugtakan an solusyon sa pagkua nin panahon para sa maogmang pag-orolay puwedeng arog sana kasimple nin pagsirrado sa TV. An regular na magkaibang pagmerienda makatatabang sa mag-agom na danay na makapagkomunikar sa emosyonal na paagi. Sa siring na mga okasyon puwede sindang ‘mag-olay-olay’ dapit sa manlaenlaen na bagay sa pamilya. (Talinhaga 13:10) Asin madonong nanggad na pataluboon an ugale na pag-olay-olay sa saradit na pagkauyam asin dai pagkasinarabotan bago iyan magin mayor na mga gikanan nin tension!​—Ikomparar an Mateo 5:​23-24; Efeso 4:26.

13. (a) Anong halimbawa an itinao ni Jesus dapit sa pagigin bukas asin sadiosan? (b) Ano an nagkapirang paagi na an mag-agom puwedeng magin dayupot sa kada saro?

¹³ Nagtuga an sarong lalaki: “Masakit para sa sako, sa parate, na ipahayag nanggad an sakong mga punto-de-vista asin na sabihon nanggad [sa agom ko] an talagang namamatean ko.” Alagad, an pagpahayag kan sadiri sarong importanteng liyabe sa pagpatalubo nin kadayupotan. Mangnoha kun gurano nanggad kabukas asin sadiosan si Jesus sa may esperansang magin mga miembro kan saiyang grupong nobya. Sia nagsabi: “Dai ko na kamo inaapod na mga oripon, huli ta an oripon dai nakakaaram sa ginigibo kan saiyang kagurangnan. Kundi inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.” (Juan 15:15) Kaya mansayon an saindong agom bilang katood. Isarig sa saindong agom an saindong mga namamatean. Maghingoang gumibo nin simple, sadiosan na “mga kapahayagan nin pagkamoot.” (Awit ni Salomon 1:2) An bukas na komunikasyon tibaad kun beses garo baga lawi, pero kun an mag-agom kapwa igong naghihingoa, dakol an mahahaman sa paggibo kan saindang pag-agoman na nagdadanay na pagsasaro.

Pagresolber sa mga Dai Pagkakasundo

14, 15. Paano malilikayan an pag-iiwal?

¹⁴ An tunay na mga dai pagkakasundo siertong malataw sa panapanahon. Pero an saindong harong dai kaipuhan na rumaot na magin ‘harong na pano nin iriwal.’ (Talinhaga 17:1) Mag-ingat na dai pag-olayan an sensitibong mga bagay na tibaad madadangog kan mga aki, asin magpaheling nin konsiderasyon sa pagmate kan saindong agom. Kan si Raquel magpahayag nin kasakitan sa saiyang pagigin bawas asin hagadon ki Jacob na tawan sia nin mga aki, si Jacob anggot na nagsimbag: “Ako daw an kasalihid nin Dios, na nag-olang kan bunga nin saimong tulak?” (Genesis 30:​1, 2) Kun may minalataw na mga problema sa harong, atakihon an problema, bakong an persona. Durante nin pribadong orolay, likayan an ‘pagtaram na dai iniisip’ o an dai kinakaipuhan na pagsupla sa kada saro.​—Talinhaga 12:18.

¹⁵ Totoo, tibaad igwa kamo nin makosog na saboot manongod sa saindong punto-de-vista, pero puwede ining ipahayag na mayo nin “malisyosong kapaitan asin kaanggotan asin kaongisan asin sirilyakan asin rilibakan.” (Efeso 4:31) “Pag-olayan an saindong mga problema sa normal na boses,” an sabi nin sarong agom na lalaki. “Kun may minalangkaw nang boses, umontok. Bumalik taud-taod. Pumoon giraray.” An Talinhaga 17:14 nagtatao kan marahay na hatol na ini: “Bago magputok an iriwal, humale ka na.” Hingoahon na pag-olayan giraray an bagay-bagay kun kamo pareho kalmado na.

Magdanay na Maimbod sa Kada Saro

16. Taano an pagsambay ta siring kaseryosong bagay?

¹⁶ An Hebreo 13:4 nagsasabi: “Magin logod kagalanggalang sa gabos an pag-aragoman, asin dai pagdigtaan an higdaan kan mag-agom, huli ta hohokoman nin Dios an mga parapakisaro asin parasambay.” An pagsambay kasalan tumang sa Dios. Iyan nakalalaglag man nin pag-agoman. (Genesis 39:9) Nagsurat an sarong parahatol sa pag-agom: “Oras na iyan madiskobre, an pagsambay minatama sa bilog na pamilya siring sa makosog na bagyo, na ginagaba an mga harong, rinaraot an pagtitiwala asin paggalang sa sadiri, na binubugbog an mga aki.” An pagbabados asin helang na ikinaolakit paagi sa seksuwal na pagdodorog puwedeng ibunga man.

17. Paano puwedeng malikayan o isikwal an pagkahilig sa pagsambay?

¹⁷ An ibang tawo pinatatalubo an pagkahilig sa pagsambay paagi sa pag-ako kan naraot na pagmansay kan kinaban dapit sa sekso siring sa ipinaheheling sa mga libro, telebisyon, asin sine. (Galacia 6:8) Alagad, an mga parasiyasat nagsasabi na an pagsambay sa parate bunga bako sana nin pagmawot sa sekso kundi nin hinohona sanang pangangaipo na patunayan na an saro kaakit-akit pa o nin pagmawot na makamateng mas namomotan. (Ikomparar an Talinhaga 7:18.) Ano man an dahelan, an sarong Kristiano kaipuhan na isikwal an inmoral na mga pantasiya. Sadiosan na ipakipag-olay sa saindong agom an mga namamatean nindo. Kun kinakaipuhan, humagad nin tabang sa mga magurang sa kongregasyon. An paggibo kaiyan makaoolang nanggad sa pagkaholog sa kasalan. Dugang pa, an mga Kristiano kaipuhan na magin maingat sa pakikiiba sa mga bakong kasekso. Tumang sa Makakasuratan na prinsipyo na magin agom nin saro alagad magheling na may horot sa saro pa. (Job 31:1; Mateo 5:28) An mga Kristiano nangorognang maninigong mag-ingat manongod sa pagpapatalubo nin emosyonal na kadayupotan sa mga katrabaho. Papagdanayon an siring na mga relasyon na makikatood pero trabaho sana.

18. Ano an parateng causa nin seksuwal na mga problema sa pag-agoman, asin paano ini puwedeng maresolberan?

¹⁸ An orog pang dakulang proteksion iyo an mainit, bukas na relasyon sa agom. An dakol na parasiyasat nagsasabi na an seksuwal na mga problema sa pag-agoman bihira na pisikal an dahelan pero sa parate bunga nin maluyang komunikasyon. Bihira an mga problema na konektado sa bagay na ini kun an mag-agom bukas na nakikikomunikar asin itinatao an maninigo sa agom bilang kapahayagan nin pagkamoot imbes na obligasyon.a Sa siring na tamang mga kamugtakan, an dayupot na mga relasyon makakaparigon sa bogkos nin pag-agoman.​—1 Corinto 7:​2-5; 10:24.

19. Ano an “sangkap na bogkos nin pagkasararo,” asin ano an puwedeng magin epekto kaiyan sa pag-agoman?

¹⁹ An pagkamoot iyo an “sangkap na bogkos nin pagkasararo” sa laog kan Kristianong kongregasyon. Paagi sa pagpatalubo nin pagkamoot, an sarong diosnon na mag-agom ‘nakakapadagos na magpatiriostios asin magpatarawadtawadan.’ (Colosas 3:​13, 14) An may prinsipyong pagkamoot minamawot an ikararahay nin iba. (1 Corinto 13:​4-8) Pataluboon an siring na pagkamoot. Iyan matabang saindo na maparigon an saindong bogkos nin pag-agoman. Iaplikar an mga prinsipyo sa Biblia sa saindong buhay may agom. Kun gigibohon nindo iyan, an saindong pag-inagoman magigin nagdadanay na pagsasaro asin magtatao nin kaomawan asin onra ki Jehova Dios.

[Nota sa Ibaba]

Paano Nindo Sisimbagon?

◻ Taano an pag-agoman ta maninigong magin permanenteng bogkos?

◻ Ano an punto-de-vista kan Biblia dapit sa pagkapayo asin pagpasakop?

◻ Paano puwedeng paoswagon nin mga mag-agom an komunikasyon?

◻ Paano puwedeng resolberan nin mga mag-agom an dai pagkakasundo sa Kristianong paagi?

◻ Ano an matabang na maparigon an bogkos nin pag-agoman?

[Ritrato sa pahina 12]

Kun an saiyang agom kaipuhan na magtrabaho nin sekular, an Kristianong agom na lalaki dai sia totogotan na magabatan na marhay