Pakusugon Asin Gibuhon na Maugma an Relasyon Bilang Mag-agom

1-3. Ano an nagigin mga problema nin mga mag-agom? (Hilingon an ritrato sa itaas.)

“KUN talagang hihinguwahon saka ipapahiling mo na gusto mong magin mapanggana an pag-ibanan nindong mag-agom, bebendisyunan ka ni Jehova,” an sabi nin sarong lalaki na 38 taon nang maugma sa buhay may agom. Iyo, posible para sa mga mag-agom na maugmang mag-ibanan asin magtinabangan sa masakit na mga panahon.​—Tal. 18:22.

² Pero, normal sana sa mga mag-agom na magkaigwa nin mga ‘kahurasaan sa laman.’ (1 Cor. 7:28) Taano? An pag-atubang sana ngani sa mga problema sa aroaldaw puwede nang makatao nin tensiyon sa mga mag-agom. An mga kulog nin buot, dai pagkakauyon, asin dai pagkaintindihan huli sa bakong perpektong dila puwedeng makaapektar dawa sa mga mag-agom na marahayon an pag-ibanan. (Sant. 3:2, 5, 8) Dakul na mag-agom an nasasakitan man na pagsabayon an pag-asikaso sa saindang mga aki asin an trabaho na nakakaubos kan saindang panahon patin kusog. Huli sa stress asin grabeng kapagalan, may mga mag-agom na nasasakitan na magkaigwa nin panahon tanganing pakusugon an saindang pag-ibanan. Tibaad luway-luway na mawara an pagkamuot asin paggalang ninda sa kada saro huli sa mga problema sa pinansiyal, problema sa salud, o iba pang kadipisilan. Apuwera diyan, an pundasyon kan garo baga matibay na pag-ibanan nin mag-agom puwedeng paluyahon kan ‘mga gibo nin laman,’ arog kan seksuwal na imoralidad, daing pakundangan na paggawi, pagkaungis, iriwal, pag-imon, pagputok nin kaanggutan, asin dai pagkauruyon.​—Gal. 5:19-21.

³ Nakakadagdag pa diyan an makasadiri saka bakong diyosnon na ugali kan mga tawo sa ‘huring mga aldaw’ na nakakadanyar sa relasyon nin mag-agom. (2 Tim. 3:1-4) Ultimo, kaipuhan labanan nin mga mag-agom an determinadong pagsalakay nin sarong maraot na kaiwal. Pinapatanidan kita ni apostol Pedro: ‘An saindong kaiwal na Diyablo, siring sa nagngangarob na leon, naglilibot na naghahanap nin masisiba.’​—1 Ped. 5:8; Kap. 12:12.

4. Paano magigin posible an makusog asin maugmang pag-ibanan nin mag-agom?

⁴ Sarong agom na lalaki sa Japan an nagsabi: “Na-stress akong marhay huli sa problema sa kuwarta. Asin huling dai talaga ako nakikipag-ulay sa sakong agom, nagin tensiyonado man siyang marhay. Tapos, kasuarin pa sana, nagkaigwa siya nin grabeng hilang. Kun beses nag-iiwal kami huling pareho kaming nai-stress.” May mga problema an mga mag-agom na dai malilikayan, pero kayang mapangganahan an mga iyan. Sa tabang ni Jehova, puwedeng magin masarig asin maugma an pag-ibanan nin mga mag-agom. (Basahon an Salmo 127:1.) Pag-ulayan ta an limang espirituwal na bloke sa pagtugdok nin sarong makusog asin nagdadanay na pag-aguman. Dangan pag-uulayan ta kun paano garo baga sesementuhon nin pagkamuot an espirituwal na mga blokeng ini.

IIBA SI JEHOVA SA RELASYON NINDONG MAG-AGOM

5, 6. Ano an puwedeng gibuhon nin mga mag-agom tanganing makaiba si Jehova sa saindang relasyon?

⁵ An pundasyon nin masarig na pag-aguman iyo an kaimbudan asin pagpasakop sa Saro na nag-establisar kaiyan. (Basahon an Parahulit 4:12.) Puwedeng iiba nin mga mag-agom si Jehova sa saindang relasyon paagi sa pagsunod sa mamumuton niyang paggiya. Sinasabi kan Bibliya dapit sa suanoy na banwaan nin Diyos: ‘An saimong talinga makakadangog sa saimong likudan nin tataramon na magtataram, “Iyo ini an dalan. Lakaw kamo diyan,” [enkaso] kamo magpasiring sa tuo [o] magsuki sa wala.’ (Isa. 30:20, 21) Ngunyan, ‘madadangog’ kan mga mag-agom an tataramon ni Jehova paagi sa magkaibanan na pagbasa kan Tataramon nin Diyos. (Sal. 1:1-3) Urog pa nindang mapapakusog an saindang relasyon bilang mag-agom paagi sa nakakaugma asin nakakarepreskong Pampamilyang Pagsamba. An magkaibanan na pamimibi aroaldaw mahalaga man na marhay sa pagpakusog kan relasyon nin mag-agom tanganing makaya ninda an mga pagsalakay kan kinaban ni Satanas.

⁶ “Pag nawawara na an kaugmahan mi huli sa mga problema o dai pagkasinabutan,” an sabi ni Gerhard na taga Alemania, “nakakatabang samo an konseho kan Bibliya na magin mapasensiya saka mapagpatawad. Dai puwedeng mawara an mga kuwalidad na ini sa mapangganang pag-ibanan nin mag-agom.” Kun talagang hinihinguwa nin mga mag-agom na pirming kaiba an Diyos sa relasyon ninda paagi sa pakikikabtang sa espirituwal na mga aktibidad na magkaibanan, nagigin mas harani sinda sa Diyos patin sa kada saro sa sarong dayupot saka maugmang pag-ibanan bilang mag-agom.

MGA AGOM NA LALAKI—MAGIN MAMUMUTON NA PAYO

7. Paano maninigong gamiton nin mga agom na lalaki an saindang pagkapayo?

⁷ An paagi nin paggamit nin agom na lalaki sa pagkapayo niya makakatabang na marhay tanganing magin makusog asin maugma an relasyon nindang mag-agom. An Bibliya nagsasabi: ‘Si Cristo an payo nin lambang lalaki; asin an lalaki iyo an payo nin babayi.’ (1 Cor. 11:3) Sinasabi kan konteksto kaiyan kun paano maninigong gamiton nin mga agom na lalaki an saindang pagkapayo—sa kaparehong paagi kan paggamit ni Cristo kan awtoridad niya sa mga tawo. Si Jesus nungkang nagin maringis o maisog kundi pirming mamumuton, mabuot, makatanusan, mahuyo, asin mapakumbaba.​—Mat. 11:28-30.

8. Paano makukua nin agom na lalaki an pagkamuot asin paggalang kan saiyang agom?

⁸ Dai na kaipuhan hagadon kan Kristiyanong mga agom na lalaki na igalang sinda kan agom ninda. Imbes, padagos sindang ‘[makiiba] sa saindang agom na babayi suno sa pakasabot’ o tawan sinda nin konsiderasyon asin intindihon. Tinatawan ninda nin ‘paggalang an babayi, siring sa lalagan na mapapasaon.’ (1 Ped. 3:7) Sa publiko man o sa pribado, ipinapahiling kan mga agom na lalaki na mahalagang marhay sa sainda an agom ninda paagi sa saindang magalang na pagtaram asin mapagmalasakit na mga gibo. (Tal. 31:28) An siring na mamumuton na pagkapayo makakatabang na makua nin lalaki an pagkamuot saka paggalang kan saiyang agom asin bebendisyunan nin Diyos an pag-aguman ninda.

MGA AGOM NA BABAYI—MAPAKUMBABANG MAGPASAKOP

9. Paano maipapahiling nin sarong agom na babayi an mapakumbabang pagpapasakop?

⁹ An bakong makasadiri asin may prinsipyong pagkamuot ki Jehova matabang sa sato gabos na magpakumbaba sa irarom kan saiyang makapangyarihan na kamot. (1 Ped. 5:6) An sarong importanteng paagi na maipapahiling nin mapagpasakop na agom na babayi an paggalang sa awtoridad ni Jehova iyo an pakikikooperar asin pagsuportar sa agom niya. An Bibliya nagsasabi: ‘Mga agom na babayi, magpasakop kamo sa saindong mga agom na lalaki, siring sa maninigo sa Kagurangnan.’ (Col. 3:18) Totoo, bakong gabos na desisyon nin agom na lalaki magugustuhan kan agom niya. Pero, kun an desisyon niya bako man kontra sa mga ley nin Diyos, an mapagpasakop na agom na babayi magigin andam na makikooperar.—1 Ped. 3:1.

10. Taano ta importante an mamumuton na pagpapasakop?

¹⁰ May kagalang-galang na papel an agom na babayi bilang an “kaibahan” o kapadis kan saiyang agom. (Mal. 2:14) Kun nagdedesisyon an pamilya, nagtatao siya nin kapaki-pakinabang na mga suhestiyon paagi sa magalang na pagsabi kan mga iniisip asin sabuot niya pero danay pa man giraray siyang mapagpasakop. Maingat na dadangugon nin sarong madunong na agom na lalaki an sinasabi kan agom niya. (Tal. 31:10-31) An mamumuton na pagpasakop makakatabang man sa kagaya-gayahan, katuninungan, asin pagkakauruyon kan pamilya, asin nagtatao nin satispaksiyon sa mga mag-agom huling aram ninda na napapaugma ninda an Diyos.​—Efe. 5:22.

PADAGOS NA MAGPATARAWAD-TAWADAN NIN LUBOS

11. Taano ta mahalagang marhay an pagpapatawad?

¹¹ An saro sa importanteng bloke sa pagtugdok nin nagdadanay na pag-aguman iyo an pagpapatawad. Napapakusog an relasyon nin mag-agom kun an mga agom na lalaki asin babayi parehong padagos na ‘nagpapatirios-tios asin nagpapatarawad-tawadan’ nin lubos. (Col. 3:13) Pero, minaluya an relasyon nin mga mag-agom kun dai ninda linilingawan an dating mga hinanakit asin parating ginagamit iyan pag nag-iiwal sinda. Kun paanong napapaluya nin mga gatak an sarong edipisyo, an mga paghinanakit asin pagkaanggot nagpapadipisil para sa mga mag-agom na magpatawad. Sa kabaliktaran, mas minakusog an relasyon nin mag-agom kun pinapatawad ninda an lambang saro, arog kan ginigibo ni Jehova sa sainda.​—Miq. 7:18, 19.

12. Paano an pagkamuot ‘nakakatahob nin kadakul na kasalan’?

¹² An tunay na pagkamuot ‘dai naggigirumdom kan maraot.’ Sa katunayan, ‘an pagkamuot nakakatahob nin kadakul na kasalan.’ (1 Cor. 13:4, 5; basahon an 1 Pedro 4:8.) An buot sabihon, an pagkamuot dai nagbubugtak nin limitasyon kun sagkod pirang beses kita puwedeng magpatawad. Kan maghapot si apostol Pedro kun sagkod pirang beses niya dapat patawadon an sarong tawo, nagsimbag si Jesus: “Sagkod sa 77 beses.” (Mat. 18:21, 22, NW) Ipinapahiling niya na mayo talaga nin limitasyon kun sagkod pirang beses dapat na patawadon nin sarong Kristiyano an iba.​—Tal. 10:12.a

13. Paano ta malalabanan an tendensiyang magin bakong mapagpatawad?

¹³ “Kun habo nin mag-agom na magpatawadan,” an sabi ni Annette, “matalubo an kaanggutan asin kawaran nin tiwala, asin rarauton kaiyan an pag-aguman. Pinapakusog kan pagigin mapagpatawad an bugkos nin pag-aguman asin nagpapadayupot iyan sa saindo.” Tanganing malabanan an tendensiyang magin bakong mapagpatawad, magmaigot na magin mapagpasalamat asin mapagpahalaga. Ugalion na tawan nin sinserong komendasyon an saimong agom. (Col. 3:15) Bilang resulta, makakamtan nindo an katuninungan nin isip, pagkakasaro, asin bendisyon nin Diyos na itinatao niya sa mga tawong mapagpatawad.​—Roma 14:19.

IAPLIKAR AN GOLDEN RULE

14, 15. Ano an Golden Rule, asin ano an praktikal na kahalagahan kaiyan sa relasyon nin mag-agom?

¹⁴ Siguradong gusto mong tratuhon ka na may dignidad asin paggalang. Naaapresyar mo kun dinadangog an mga sinasabi mo asin kinokonsiderar an namamatian mo. Pero may nadangog ka na daw na nagsabi, “Ipapamati ko man saiya an ginibo niya”? Minsan ngani, kun beses, natural sana an siring na reaksiyon, sinasabi sa sato kan Bibliya: ‘Dai ka magsabi: “Kun ano an ginibo niya sakuya, siring man an gigibuhon ko saiya.”’ (Tal. 24:29) Sa katunayan, irinekomendar ni Jesus an pinakamarahay na paagi sa pag-atubang sa masakit na mga sitwasyon. Aram kan dakul an pamantayan na ini sa paggawi kaya parati ining inaapod na Golden Rule: ‘Kun ano an buot nindong gibuhon sa saindo nin mga tawo, iyo man an gibuhon nindo sa sainda.’ (Luc. 6:31) An buot sabihon ni Jesus iyo na dapat tang tratuhon an mga tawo sa paagi na gusto tang tratuhon kita asin dai magbalos nin daing kabuutan sa ipinahiling sa satong daing kabuutan. Sa pag-aguman, ini nangangahulugan na kaipuhan tang itao an mga bagay na linalauman ta man na makua diyan.

¹⁵ Napapakusog nin mga mag-agom an saindang relasyon kun mapagrisa sinda sa namamatian kan agom ninda. “Pinagmamaigutan ming iaplikar an Golden Rule,” an sabi nin sarong agom na lalaki sa South Africa. “Totoo, kun minsan naiiritar kami, pero pinagmamaigutan ming marhay na tratuhon an kada saro sa paagi na gusto ming tratuhon kami—may dignidad asin paggalang.”

16. Ano an dai dapat gibuhon nin mag-agom sa kada saro?

¹⁶ Dai ipang-istorya sa iba an mga kaluyahan kan saimong agom o parating ireklamo an saiyang kakaibang mga ugali​—dawa pa pasuba sana. Tandaan, an relasyon nin mag-agom bakong kompetisyon tanganing maaraman kun siisay an mas makusog, kun siisay an mas makusog magkurahaw, o kun siisay an makakaisip kan pinakamakulog na sasabihon. Totoo, gabos kita may mga kaluyahan, asin kun beses, nakukulgan ta an buot kan iba. Pero mayo nanggad nin makatanusan na dahilan an sarong agom na lalaki o babayi na tuyaon asin menuson, o mas grabe pa diyan, ituklang o kulugan an agom niya.​—Basahon an Talinhaga 17:27; 31:26.

17. Paano makakapamuhay suno sa Golden Rule an mga agom na lalaki?

¹⁷ Dawa ngani sa ibang kultura ibinibilang na tunay na lalaki an mga nandadaog-daog o nangungulog sa saindang agom, an Bibliya nagsasabi: ‘Urog karahay an haloy na maanggot kisa kan makusog, asin an [nakakapugol] kan saiyang espiritu kisa kan minasakop nin sarong banwaan.’ (Tal. 16:32) Kaipuhan mo nanggad na magkaigwa nin panglaog na kusog tanganing magkaigwa nin pagpupugol sa sadiri arog kan pinakadakulang tawo na nabuhay kasuarin man, si Jesu-Cristo. An lalaki na berbal o pisikal na nang-aabuso sa agom niya dai masasabing tunay na lalaki, asin maiwawara niya an relasyon niya ki Jehova. An salmistang si David na saro mismong makusog asin daing takot na lalaki nagsabi: “Maanggot kamo, alagad dai kamo magkasala. Magtaram kamo sa saindong puso, sa saindong higdaan, asin dai kamo maggirong.”—Sal. 4:4, NW.

“ISULOT NINDO AN PAGKAMUOT”

18. Taano ta importanteng padagos na magpahiling nin pagkamuot?

¹⁸ Basahon an 1 Corinto 13:4-7. An pagkamuot an pinakaimportanteng kuwalidad sa relasyon nin mag-agom. “Isulot nindo an mamumuton na mga pagmati nin pagmalasakit, kabuutan, kapakumbabaan, kahuyuan, asin pagpasensiya. Alagad, lain pa sa gabos na bagay na ini, isulot nindo an pagkamuot, huli ta iyan sangkap na bugkos nin pagkasararo.” (Col. 3:12, 14, NW) An pagigin mapagsakripisyo asin arog-Cristong pagkamuot an nagsesemento sa mga bloke sa pagtugdok nin sarong masarig na relasyon nin mag-agom. Pinagdadanay kaiyan na pusog an pag-aguman sa ibong nin nakakairitar na personal na mga kaluyahan, masakiton na mga problema sa salud, nakaka-stress na krisis sa pinansiyal, asin masakit na mga problema sa mga paryente kan agom.

19, 20. (a) Paano mapangganang mapapakusog asin magigibong maugma kan mga mag-agom an saindang pag-aguman? (b) Ano an pag-uulayan ta sa masunod na artikulo?

¹⁹ Totoo, kaipuhan an pagkamuot, kaimbudan, asin udok na paghihinguwa tanganing magin mapanggana an pag-ibanan bilang mag-agom. Imbes na magsuwayan pag may mga problema, dapat na magin determinado an mag-agom na magin mapanggana an relasyon ninda, bako sanang basta magdanay iyan. An mga Kristiyanong mag-agom na maimbod ki Jehova asin sa lambang saro pinapahiro kan saindang pagkamuot sa Diyos asin sa kada saro na resolberan an saindang mga problema, huli ta ‘an pagkamuot dai nanggad nasusudya.’​—1 Cor. 13:8; Mat. 19:5, 6; Heb. 13:4.

²⁰ Lalo nanggad na dipisil na magkaigwa nin sarong makusog asin maugmang pag-aguman sa “delikadong mga panahon” na ini na kinabubuhayan ta. (2 Tim. 3:1, NW) Alagad sa tabang ni Jehova, posible iyan. Pero, kaipuhan pa man giraray labanan kan mga mag-agom an lakop na pagruro kan moral kan kinaban. Sa masunod na artikulo, pag-uulayan ta kun ano an magigibo kan mga agom na lalaki asin babayi tanganing pasarigon an espirituwal na depensa kan relasyon ninda bilang mag-agom.