Mga Hapot Hale sa mga Parabasa

An ‘pagtatanda’ daw na sinambit sa 2 Tesalonica 3:14 sarong pormal na prosesong pankongregasyon, o iyan daw sarong bagay na ginigibo kan mga Kristiano bilang indibiduwal sa paglikay sa mga bakong toltol?

An isinurat ni apostol Pablo sa mga taga Tesalonica nagpapaheling na an kamagurangan sa kongregasyon an igwa nin malinaw na papel sa siring na ‘pagtatanda.’ Minsan siring, pakatapos kaiyan an indibiduwal na mga Kristiano ipinapadagos iyan, na ginigibo iyan na nasa isip an espirituwal na mga obheto. Masasabotan na marhay niato ini paagi sa pag-estudyar sa hatol ni Pablo sa orihinal na kamugtakan kaiyan.

Si Pablo nagtabang na establisaron an kongregasyon sa Tesalonica, na tinabangan an mga lalaki asin babae na magturubod. (Gibo 17:1-4) Kan huri nagsurat sia hale sa Corinto tanganing komendaran asin parigonon an boot ninda. Si Pablo nagtao man nin kinakaipuhan na hatol. Sinadol nia sinda na ‘mamuhay na matoninong, dai makilabot sa iba, asin gumibo sa saindang sadiring kamot.’ An nagkapira bakong arog kaiyan an iginagawe, kaya sinabi pa ni Pablo: “Pinakasasadol niamo kamo, mga tugang, sadolon nindo an mga bakong toltol, magtaram na may pagranga sa mga kalag na nagmomondo nin makuri, suportaran an maluya.” Malinaw na may mga “bakong toltol”a sa tahaw ninda na kaipuhan na hatolan.—1 Tesalonica 1:2-10; 4:11; 5:14.

Pakalihis nin pirang bulan, ipinadara ni Pablo an saiyang ikaduwang surat sa mga taga Tesalonica, na may idinugang na mga komento manongod sa maabot na presensia ni Jesus. Si Pablo nagtao man nin dugang pang giya manongod sa kun paano dapat trataron an mga bakong toltol na ‘dai nagtatrabaho kundi nag-aatom sa mga bagay na daing labot sa sainda.’ An saindang gawe sarongat sa halimbawa ni Pablo bilang mahigos na trabahador asin sa saiyang malinaw na pagboot manongod sa pagtrabaho tanganing sustentohan an sadiri. (2 Tesalonica 3:7-12) Si Pablo nagboot na dapat gumibo nin aksion. An aksion na ini nangyari pagkatapos na kan ginibo kan kamagurangan sa pagsadol o paghatol sa bakong toltol. Si Pablo nagsurat:

“Ngonyan kami nagboboot sa saindo, mga tugang, . . . na kamo bumulag sa lambang tugang na naglalakaw nin bakong toltol asin bakong oyon sa tradisyon na inako nindo sa samo. Sa saindong kabtang, mga tugang, dai kamo umontok sa paggibo nin tama. Alagad kun an siisay man dai minakuyog sa samong tataramon sa surat na ini, tandaan nindo an tawong ini, dai na kamo makiiba sa saiya, tangani siang mapasopog. Alagad ta dai sia nindo ibilang na kaiwal, kundi padagos nindo siang hatolan bilang tugang.”—2 Tesalonica 3:6, 13-15.

Kaya kabale sa dugang pang aksion an pagbulag sa mga bakong toltol, na tinatandaan sinda, dai na nakikiibaiba sa sainda, pero sinasadol sinda bilang mga tugang. Sa anong mga kamugtakan gigibohon kan mga miembro kan kongregasyon an aksion na iyan? Bilang tabang tanganing klarohon ini, aramon ta an tolong situwasyon na bakong pinanonongdan digdi ni Pablo.

1. Aram ta na an mga Kristiano bakong sangkap asin may mga pagkukulang. Pero, an pagkamoot tanda kan tunay na Kristianismo, na naghahagad sa sato na magin mapagsabot asin mapagpatawad sa mga sala nin iba. Halimbawa, an sarong Kristiano tibaad may bihirang pagputok nin kaanggotan, siring kan nangyari sa pag-oltanan ni Bernabe asin Pablo. (Gibo 15:36-40) O dahelan sa kapagalan, an saro tibaad makataram nin makolog asin malanit na mga tataramon. Sa siring na mga pangyayari, paagi sa pagpaheling nin pagkamoot asin pag-aplikar kan hatol sa Biblia, puede tang tahoban an sala, na padagos na namumuhay, nakikiasosyar, asin nagtatrabaho kaiba kan satong kapwa Kristiano. (Mateo 5:23-25; 6:14; 7:1-5; 1 Pedro 4:8) Malinaw nanggad, bakong arog kaining klase nin mga pagkukulang an sinasabi ni Pablo sa 2 Tesalonica.

2. Dai pinanonongdan ni Pablo an sarong situwasyon na dian personal na pinipili nin sarong Kristiano na limitaran an pakikiasosyar sa saro na an gawe-gawe o aktitud bakong marahay—halimbawa, saro na garo baga labi-labi an pagkabangkag sa pag-aling-aling o materyal na mga bagay. O tibaad limitaran nin sarong magurang an pakikiasosyar kan saiyang aki sa mga aki na daing paggalang sa autoridad nin magurang, nagkakawat sa magaspang o peligrosong paagi, o dai isinasaboot an Kristianismo. Iyan personal na mga desisyon sana kaoyon kan satong mababasa sa Talinhaga 13:20: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.”—Ikomparar an 1 Corinto 15:33.

3. Sa laen nanggad na pagkaseryoso, si Pablo nagsurat sa mga taga Corinto manongod sa saro na naggigibo nin magabat na kasalan asin dai nagsosolsol. An siring na dai nagsosolsol na mga parakasala kaipuhan na haleon sa kongregasyon. An “maraot” na tawo kaipuhan na itao ki Satanas, sabi ngani. Pakatapos kaiyan, an maimbod na mga Kristiano dai dapat na makiasosyar sa siring na mga maraot; sinadol ni apostol Juan an mga Kristiano na dai ngani sinda pagtaratarahon. (1 Corinto 5:1-13; 2 Juan 9-11) Minsan siring, ini man bakong kapareho kan hatol kan 2 Tesalonica 3:14.

Laen sa nasambitan na tolong situwasyon an may labot sa mga “bakong toltol” na ipinaliwanag sa 2 Tesalonica. Isinurat ni Pablo na an mga ini ‘mga tugang’ pa man giraray, na dapat sadolon asin trataron bilang siring. Sa siring, an problema sa “bakong toltol” na mga tugang bako man na sa personal sanang bagay sa pag-oltanan nin mga Kristiano ni dapit sa igong pagkaseryoso na kaipuhan na aksionan kan kamagurangan paagi sa pagtitiwalag, siring kan ginibo ni Pablo may koneksion sa inmoral na situwasyon sa Corinto. An mga “bakong toltol” dai nagkasala nin magabat, arog kan lalaking itiniwalag sa Corinto.

An mga “bakong toltol” sa Tesalonica nagkasala nin dakulang pagsuway sa Kristianismo. Habo sindang magtrabaho, magsalang huli ta an paghona ninda harani na an pagbalik ni Cristo o huli ta sinda hugakon. Dugang pa, sinda nakariribok na gayo paagi sa ‘pag-atom sa mga bagay na daing labot sa sainda.’ Posible na paorootro na sindang hinatolan kan kamagurangan sa kongregasyon, kaoyon kan konseho ni Pablo sa saiyang enot na surat asin kan iba pang konseho hale sa Dios. (Talinhaga 6:6-11; 10:4, 5; 12:11, 24; 24:30-34) Pero sinda nagpadagos sa dalan na nagdara nin katuyawan sa kongregasyon asin puedeng makaolakit sa ibang Kristiano. Kaya an Kristianong magurang sa kongregasyon na si Pablo, minsan ngani dai nginangaranan an mga indibiduwal, hayag na inapod an atension sa saindang pagkabakong toltol, na ihinahayag an saindang salang dalan.

Ipinaaram man nia sa kongregasyon na angay para sa sainda bilang indibiduwal na mga Kristiano na “tandaan” an bakong toltol. Nangahulogan ini na maninigong tandaan kan mga indibiduwal idtong mga an gawe-gawe kapareho kan dalan na manongod dian hayag na pinatanidan an kongregasyon. Si Pablo nagkonseho na sinda “bumulag sa lambang tugang na naglalakaw nin bakong toltol.” Sierto na iyan dai puedeng mangahulogan nin biyong pagrayo sa siring na tawo, huli ta kaipuhan nindang ‘padagos na hatolan sia bilang tugang.’ Sinda padagos na magkakaigwa nin Kristianong relasyon sa mga pagtiripon asin puedeng sa ministeryo. Puede nindang laoman na an saindang tugang mahimate sa sadol asin babayaan an saiyang nakariribok na gawe-gawe.

Sa anong sentido na sinda ‘mabulag’ sa saiya? Minalataw na ini sa sosyal na mga kamugtakan. (Ikomparar an Galacia 2:12.) An pagpondo ninda sa pagkaigwa nin sosyal na pakikiasosyar asin pag-aling-aling kaiba nia puedeng magpaheling sa saiya na dai gusto kan mga tawong may prinsipyo an saiyang gawe-gawe. Dawa kun sia dai napasopog asin nagliwat, minsan paano an iba harayong gayo an posibilidad na manodan an saiyang gawe-gawe asin magin arog sa saiya. Kadungan kaiyan, an indibiduwal na mga Kristianong ini maninigo na magkonsentrar sa positibong mga bagay. Si Pablo nagkonseho sa sainda: “Sa saindong kabtang, mga tugang, dai kamo umontok sa paggibo nin tama.”—2 Tesalonica 3:13.

Malinaw nanggad, an hatol na ini kan apostol bakong basehan sa pagmenus o paghusgar sa satong mga tugang na medyo nadadarinas o napapasala. Imbes, obheto kaiyan na tabangan an saro na nakariribok an iginagawe na kontrang marhay sa Kristianismo.

Si Pablo dai nagtao nin detalyadong mga susundon na garo naghihingoang gumibo nin komplikadong prosedimiento. Alagad malinaw na an kamagurangan maninigo ngunang hatolan asin hingoahon na tabangan an saro na bakong toltol. Kun sinda dai magin mapanggana asin an tawong iyan nagpapadagos sa paagi na nakariribok asin may posibilidad na makaolakit, puede nindang ikonklusyon na an kongregasyon maninigo na mapatanidan. Puede sindang mag-areglo nin pahayag dapit sa kun taano an siring na pagkabakong toltol ta dapat na likayan. Dai sindang sasambiton na ngaran, alagad an saindang nagpapatanid na pahayag makatatabang na protehiran an kongregasyon huli ta an mga naghihimate magibo nin ekstrang pag-iingat na limitaran an sosyal na mga aktibidad kaiba nin siisay man na malinaw na nagpapaheling kan siring na pagkabakong toltol.

Logod, pag-abot nin panahon an bakong toltol mapapasopog sa saiyang gawe-gawe asin mapahihirong magbago. Mantang naheheling kan kamagurangan asin iba pa an pagbabago, puede sindang magdesisyon bilang indibiduwal na taposon an paglimitar ninda sa personal na pakikiibaiba sa saiya sa sosyal na paagi.

Kun siring, bilang sumaryo: An kamagurangan sa kongregasyon an nangengenot sa pagtabang asin paghatol kun may naglalakaw nin bakong toltol. Kun dai nia naheheling an sala kan saiyang gawe kundi padagos na nagigin maraot na impluwensia, an kongregasyon puedeng patanidan kan kamagurangan paagi sa sarong pahayag na naglilinaw kan pagmansay kan Biblia—baga man iyan pakikipag-date sa daing pagtubod, o ano man na salang dalan. (1 Corinto 7:39; 2 Corinto 6:14) An mga Kristiano sa laog kan kongregasyon na sa siring na paagi napatatanidan puedeng magdesisyon bilang indibiduwal na limitaran an ano man na pakikiibaiba sa sosyal na paagi sa mga malinaw na naglalakaw sa bakong toltol na dalan alagad mga tugang pa man giraray.

[Nota sa Ibaba]

[Mga retrato sa pahina 31]

An Kristianong kamagurangan sinasadol an mga bakong toltol alagad ta minamansay sinda bilang mga kapagtubod