Impluwensia nin mga Kapantay—Iyan daw Puedeng Magin sa Bentaha Nindo?

Kita gabos namundag na may pundamental na kamawotan na rekonoseron kan satong mga kapantay. Mayo nin gustong haboan, isikwal. Sa siring, sa nagkakalaenlaen na sokol, may impluwensia sa sato an satong mga kapantay.

AN KAPANTAY tinatawan nin kahulogan na “saro na kapareho nin iba sa posisyon; . . . saro na kabilang sa kaparehong grupo sa sosyedad, nangorogna basado sa edad, grado, o prestihio.” An impluwensia man nin mga kapantay iyo an puersa kan satong mga kapantay sa sato, kaya, aram ta man sa dai, inaarog niato an saindang kaisipan o hiro-hiro. An impluwensia nin mga kapantay parateng may negatibong kahulogan. Pero, arog kan maheheling niato, puede niatong gibohon iyan na sa bentaha niato.

Impluwensia sa Gabos na Edad

An impluwensia nin mga kapantay bako sanang sa mga hoben; apektado kaiyan an gabos na edad. Risang-risa an impluwensia kaiyan kun kita naghahapot nin mga arog kan: “Ginigibo iyan nin iba, taano ta ako dai puede?” “Taano ta kaipuhan na ako pirmeng mapalaen?” “Ano daw an iisipon o sasabihon nin iba?” “An gabos kong katood may ka-date asin kinakasal, alagad ako dai. May diperensia daw ako?”

Minsan ngani apektado an gabos na edad kan impluwensiang umarog, iyan may tendensiang magin mas makosogon sa panahon nin pagkahoben. Sinasabi kan The World Book Encyclopedia na “an kadaklan na hoben napapalabot na marhay sa saindang grupo nin mga kapantay—an boot sabihon, an saindang mga amigo asin kamidbid. An mga tinedyer na ini grupo nin mga kapantay ninda, imbes na mga magurang ninda, an inaasahan na mag-aprobar, asin tibaad bagohon ninda an saindang gawe-gawe tanganing makamit an pag-aprobar na iyan.” An mga tinedyer, dugang pa kaiyan, “naghohona na normal an saindang pagdakula kun sinda rinerekonoser asin nagugustohan kan saindang mga kapantay.” Sa katuyohan na iyan sinda “nababangkag sa mga bagay na sa paghona ninda nakaaapektar sa saindang popularidad, arog baga kan saindang estilo nin paggubing, abilidad sa pamomoon, asin kapangganahan sa pakiki-date.”

Tibaad madiskobre nin mga mag-agom na an saindang mga desisyon manongod sa kun anong klaseng harong an babakalon o aarkilahan, kun anong modelo nin kotse an gagamiton, kun baga maaki o dai, asin dakol pang ibang bagay impluwensiado nin mga kapantay—kun ano an inaako sa saindang komunidad, kan saindang kairibaiba o grupong etniko. An nagkapirang pamilya nagkakautang pa ngani nin grabe tangani sanang makipantay sa materyal na paagi sa pagtaraed asin mga kapantay. Iyo, an satong mga pasohan, an satong mga kaisipan, asin an satong mga desisyon parate na nagpapaheling kan pairarom na puersa nin impluwensia nin mga kapantay. Huli sa puersa kaiyan, puede daw niatong atubangon an impluwensia nin mga kapantay sa paaging may bentaha, tanganing makatabang sa sato sa direksion na gusto niatong dumanan? Iyo nanggad!

Pagkinabang sa Nakararahay na Impluwensia nin mga Kapantay

Aram nin mga doktor asin iba pang propesyonal sa salud kun gurano kahalaga na palibotan an saindang mga pasyente nin positibong mga tawo asin iba pang impluwensia na marahay sa salud. An siring na palibot puedeng magin pan-engganyar sa pagkaomay. Halimbawa, an mga tawo na naputolan nin takyag parateng natatabangan sa halawig na proseso nin pisikal na pagparahay asin emosyonal na pagkaomay kan marahay na halimbawa saka pagparigon sa boot nin iba na nag-agi sa kaagid na pagdusa. Malinaw nanggad, an biyong pagkasibot sa nakararahay na mga kamugtakan na may kaibang optimista, positibong mga modelo sarong paagi na pakinabangan an tamang klase nin impluwensia nin mga kapantay.

An prinsipyong ini totoo man sa Kristianong kongregasyon, ta an positibong impluwensia nin mga kapantay saro sa mga dahelan na pinagbotan ni Jehova an saiyang banwaan na regular na magtiripontipon. Sinasadol kita nin Dios na ‘dagkahon an lambang saro sa pagkamoot asin sa marahay na mga gibo asin magparinigonan nin boot.’ (Hebreo 10:24, 25) An siring na pagparigon sa boot mahalagang marhay huli sa dakol na negatibo asin nakadadanyar na impluwensia sa kinaban ngonyan. Bilang bunga kan mga impluwensiang ini, an mga Kristiano kaipuhan na ‘maghingoa nin maigot’ tanganing magdanay na makosog sa espirituwal. (Lucas 13:24) Sa siring, kaipuhan asin inaapresyar niato an mamomoton na pagsuportar nin mga kapagtubod. Dugang pa, an nagkapira tibaad kaipuhan na tagalan an mga “tonok sa laman,” tibaad helang o pagkabaldado. (2 Corinto 12:7) An iba tibaad nasasakitan na haleon an maraot na mga ugale o depresyon, o tibaad nadedepisilan sindang maasikaso an mga pangangaipo sa buhay. Kun siring, madonong na palibotan niato an satong sadiri nin mga tawo na nagdadanay na dayupot ki Jehova Dios asin naoogmang maglingkod sa saiya. An siring na mga kapantay bubuhayon an satong boot asin tatabangan kita na fiel na “makatagal sagkod sa katapusan.”—Mateo 24:13.

Kun siring, paagi sa pagpili kan tamang mga kapantay makokontrol niato an impluwensia ninda sa sato. Saro pa, an de kalidad na espirituwal na kakanon asin praktikal na paggiya na itinatao sa Kristianong mga pagtiripon dinudugangan nin puersa an personal na pagparigon sa boot na inaako niato sa satong mga kapantay.

Siempre, bakong pirmeng pasil an pagduman sa Kristianong mga pagtiripon. An nagkapira tibaad kakadikit o mayo nin pagsuportar na nakukua sa saindang agom, an iba tibaad may mga aking bubulosan, asin tibaad problema man an transportasyon para sa iba pa. Alagad isip-isipa: Kun dai nindo itinotogot na olangon kamo kan mga balakid na ini, an saindong halimbawa tibaad makamotibar sa iba na tibaad napapaatubang sa kaagid na mga kamugtakan. Sa ibang pagtaram, kamo asin an ibang kapareho nindo nagtatao bako sanang nin marahay na halimbawa kundi nin nakararahay man na klase nin impluwensia nin mga kapantay—asin iyan mayo man lamang ni kadikit na gira nin pamimirit.

Sa katunayan, si apostol Pablo, na kinaipuhan mismong umatubang sa dakol na kasakitan asin balakid, nag-enkaminar sa mga Kristiano na arogon an marahay na halimbawa nia asin kan iba pang maygurang na Kristiano. Sabi nia: “Sararo kamong magin mga paraarog sa sako, mga tugang, asin itorohok an saindong mata sa mga naglalakaw sa paagi na kaoyon kan halimbawa na naheling nindo sa samo.” (Filipos 3:17; 4:9) An enot na mga Kristiano sa Tesalonica marahay na halimbawa ni Pablo an pinagheling. Manongod sa sainda si Pablo nagsurat: “Kamo nagin mga paraarog sa samo asin sa Kagurangnan, mantang inako nindo an tataramon sa irarom nin dakulang kahorasaan na igwa kan kagayagayahan nin banal na espiritu, mala ta kamo nagin halimbawa sa gabos na nagtutubod sa Macedonia asin sa Acaya.” (1 Tesalonica 1:6, 7) An satong positibong aktitud asin halimbawa puedeng magkaigwa nin kaagid na epekto sa mga nakakaibaiba niato.

Likayan an Negatibong mga Impluwensia

Kun gusto niatong likayan an nakararaot na impluwensia nin mga kapantay, dapat na labanan niato an impluwensia kan ‘mga naglalakaw oyon sa laman.’ (Roma 8:4, 5; 1 Juan 2:15-17) Ta kun dai, irarayo kita kan nakadadanyar na impluwensia nin mga kapantay ki Jehova asin sa saiyang madonong na hatol. Sinasabi kan Talinhaga 13:20: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.” May naiisip daw kamo na maraot an inabotan huli sa nakararaot na impluwensia nin mga kapantay? Halimbawa, an nagkapirang Kristiano nadara sa materyalismo, inmoralidad, o pag-abuso sa droga saka inomon na de alkohol huli sa impluwensia kan saindang mga kapantay.

Dawa sa laog kan Kristianong kongregasyon, puede kitang mapairarom sa nakararaot na impluwensia nin mga kapantay kun pipilion niatong dayupot na mga kaibaiba an mga maluya sa espirituwal. (1 Corinto 15:33; 2 Tesalonica 3:14) An mga siring parate na daing hilig na pag-orolayan an espirituwal na mga bagay; tibaad pag-olog-ologon pa ngani ninda an mga naoogma sa siring na orolay. Kun an mga ini an pipilion niato na dayupot na mga kaibaiba, tibaad mapirit kita nin impluwensia nin mga kapantay na magin kaagid kaiyan, asin dai mahahaloy tibaad maheling niato na an satong kaisipan asin aktitud kapareho na kan sa sainda. Tibaad magpoon na ngani kitang magin negatibo an kaisipan manongod sa mga tunay an pagtubod asin nagmamaigot na umoswag sa espirituwal.—1 Timoteo 4:15.

Abaa kamas madonong na kultibaron an pakikikatood sa mga nagmamaigot na panigoan si Jehova, na ikinaoogmang marhay an espirituwal na mga bagay! An siring na mga kaibaiba matabang sa sato na ipabanaag “an kadonongan hale sa itaas.” Iyan “enot sa gabos malinig, dangan matoninong, makatanosan, andam na magkuyog, pano nin pagkaherak asin marahay na mga bunga, . . . bakong parasaginsagin.” (Santiago 3:17) Ini dai nangangahulogan na an mga tawong espirituwal an kaisipan espirituwal na mga bagay sana an kayang ipakipag-olay. Al kontraryo! Isip-isipa na sana an laen-laen na interesanteng tema na kinokonsiderar sa mga publikasyon kan Watch Tower na arog kan magasin na Awake! Talagang mayo nin katapusan an nakararahay na mga topikong mapag-oolayan, asin sa pagpaheling nin interes sa mahiwas an pagkaralaenlaen na tema, ipinababanaag niato an pagkamoot sa buhay asin sa ginibo ni Jehova.

Kun paanong an matibay na parakawat nin tenis pinaooswag an saiyang abilidad paagi sa pakikikawat sa iba pang matibay magkawat, an tamang magin mga kaibaiba pinaooswag kita sa mental, sa emosyonal, asin sa espirituwal. Sa ibong na lado, an sala na magin mga kaibaiba puedeng magdara sa sato sa dalan nin pagsaginsagin paagi sa pag-enkaminar sa sato na magkaigwa nin duwang klaseng buhay. Abaa kamas marahay na magkaigwa nin malinig na konsensia kaiba an paggalang sa sadiri!

An Nagkapirang Nakinabang

An kadaklan na tawo dai man gayo nadedepisilan na manodan an mga doktrina sa Biblia asin an moral saka espirituwal na mga kahagadan kaiyan. Minsan siring, an puedeng magin depisil iyo an paggibo kan mga bagay na ini. Arog kan ipinaheheling kan minasunod na mga halimbawa, an nakararahay na impluwensia nin mga kapantay makatatabang sa sato na bilog na kalag na maglingkod ki Jehova.

An sarong Saksi na nasa bilog na panahon na ministeryo kaiba an saiyang agom na babae na nagsabi na an mga halimbawa kan saiyang mga kapantay nakaapektar sa saiyang mga pasohan sa buhay. Kan sia nagdadakula, kinaipuhan niang tioson an nakararaot na mga impluwensia. Alagad an pinili niang magin mga katood idtong mga nagparigon kan boot nia na magin regular sa ministeryo asin sa pag-atender sa Kristianong mga pagtiripon. An pagdanay sa mga kaibaibang ini nakatabang sa saiya sa dalan pasiring sa espirituwal na pagkamaygurang.

An saro pang Saksi nagsurat: “Pagkakasal mi mag-agom, nagbalyo kami sa sarong kongregasyon na duman an sarong mag-agom na kaedad mi mga regular payunir. An halimbawa ninda nakatabang sa paglaog mi sa bilog na panahon na ministeryo. Dangan kami man naghingoa na pakosogon an espiritu nin pagpayunir sa kongregasyon. Bilang resulta, dakol an uminiba sa samo bilang payunir.”

An pakiibaiba sa mga may teokratikong pasohan puedeng mas magpapasil kan pagkuyog ki Jehova. Saro pa ining kapakipakinabang na epekto nin nakararahay na impluwensia nin mga kapantay. An sarong Saksi na nagpoon sa bilog na panahon na ministeryo bilang hoben na lalaki asin sa huri nagin nagbibiaheng paraataman ngonyan naglilingkod sa saro kan mga sangang opisina kan Watch Tower Society. Nagsurat sia: “An nagkapira sa kaenot-enote asin pinakamamahal na marhay na mga memorya ko sa sakong pagkaniaki iyo an pagsongko sa harong mi nin bilog na panahon na mga lingkod. Pirmeng may lugar para sa saro pang tukawan sa samong lamesang kakanan. An sarong paraataman sa sirkito tinawan ako nin bag sa paghuhulit kan ako dies anyos. Pinakamamahal ko an bag na iyan sagkod ngonyan.”

Hinohorophorop an mga taon nia nin pagtinedyer, idinugang kan Saksing ini: “An dakol na hoben na lalaki sa kongregasyon gustong makikabtang sa mga aktibidad kan kongregasyon, asin an saindang halimbawa nakadagka sa iba sa samo na mawoton man iyan.” An nakararahay na mga kapantay nakatabang sa hoben na ini na dumakula, siring sa sarong supang, tanganing magin marahay, garo-kahoy na Kristiano. Mga magurang, ano iniimbitaran nindo sa saindong harong an mga puedeng magkaigwa nin positibo, nakapakokosog na impluwensia sa saindong mga aki?—Malaquias 3:16.

Siempre, bakong kita gabos puedeng makikabtang sa bilog na panahon na ministeryo arog kan mga indibiduwal na nasambitan pa sana. Alagad kita gabos puedeng makanood na kamotan si Jehova ‘sa bilog niatong puso, kalag, asin isip.’ (Mateo 22:37) An pinipili niatong mga kapantay may dakulang kabtang sa pagpatalubo niato kan pagkamoot na iyan asin, paagi kaiyan, sa satong mga esperansa para sa buhay na daing katapusan.

An salmista nagtao nin simple alagad epektibong pormula para sa tunay na kapangganahan sa buhay: “Maogma an tawo na dai naglakaw sa hatol kan mga maraot, asin sa dalan nin mga parakasala dai nagtindog, patin sa tukawan nin mga mapagduhagi dai nagtukaw. Kundi an saiyang kaogmahan yaon sa ley ni Jehova, asin sa saiyang ley sia nagbabasa sa maluya sanang tingog aldaw asin banggi. Asin sia nanggad magigin siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapapakarhay.”—Salmo 1:1-3.

Abaa kamakangangalas na garantiya! Dawa kita bakong sangkap asin nasasala, magigin mapanggana an satong buhay kun kita mapagiya ki Jehova asin kun biyo kitang makikinabang sa itinao nin Dios na burabod na iyan nin nakararahay na impluwensia nin mga kapantay—an “bilog na kasararoan nin [satong] mga tugang sa kinaban.”—1 Pedro 5:9.

[Retrato sa pahina 24]

An kongregasyon nagtatao nin nakararahay na klase nin impluwensia nin mga kapantay

[Retrato sa pahina 25]

Mga magurang, enkaminaron an saindong mga aki na makiasosyar sa nakapakokosog na mga kapantay