An Impluwensia nin Kairiba Asin an Saindong Pribilehio na Maghulit

¹ An impluwensia nin kairiba sarong mapuersang impluwensia​—para sa ikararahay o ikararaot. An mga kapwa lingkod ni Jehova may positibong impluwensia na nagdadagka sa sato sa marahay na Kristianong mga gibo. (Heb. 10:24) Minsan siring, an bakong Saksi na mga miembro kan pamilya, katrabaho, kaeskuela, kataed, o iba pang kamidbid puedeng impluwensiahan kita na sunodon an dalan na kontra sa Kristianong mga prinsipyo. Sinda tibaad magtaram nin ‘maraot sa [satong] marahay na gawe dian ki Cristo.’ (1 Ped. 3:16) Paano niato mapagdadanay an satong determinasyon na padagos na maghulit sa ibong kan negatibong impluwensia nin kairiba na tibaad mapaatubang sa sato?

² Mga Miembro kan Pamilya: Kun beses, an agom na lalaki asin ama na bakong saro sa Mga Saksi ni Jehova tibaad habo na an saiyang agom asin mga aki makikabtang sa pampublikong ministeryo. Ini an nagin situwasyon sa sarong pamilya sa Mejico. An agom asin pitong aki nin sarong lalaki nakanood kan katotoohan. Kan primero sia nagkokontra huli ta habo nia na an saiyang pamilya maghulit asin mag-alok nin mga babasahon sa Biblia sa harong-harong. Naniniwala sia na ini nagpapababa na marhay sa saindang dignidad. Minsan siring, an saiyang agom asin mga aki nanindogan nin marigon sa saindang desisyon na maglingkod ki Jehova asin regular na makikabtang sa ministeryo. Pag-abot nin panahon, nagpoon na maheling kan lalaki an halaga kan pag-ako sa areglo nin Dios para sa paghuhulit, asin sia man nagdusay kan saiyang sadiri ki Jehova. Nag-15 taon bago nia inako an katotoohan, alagad ginibo daw kutana nia iyan kun an pamilya nia dai naghingoa sa pribilehio ninda na maghulit?​​—Luc. 1:​74; 1 Cor. 7:16.

³ Mga Katrabaho: An saindong mga paghihingoa na magpatotoo sa mga katrabaho tibaad bakong marahay an pag-ako nin nagkapira. Isinaysay nin sarong tugang na babae na kan lumataw sa opisina an orolay manongod sa katapusan kan kinaban, sia pinag-olog-olog huli ta isinuherir nia na basahon ninda an Mateo kapitulo 24. Minsan siring, pakalihis nin nagkapirang aldaw, an saro sa saiyang mga katrabaho nagsabi sa saiya na binasa kaini an kapitulo asin sia naghanga. Nakapasakamot nin sarong publikasyon, asin naggibo nin mga areglo para sa pag-adal sa Biblia nindang mag-agom. An enot na pag-adal uminabot nin sagkod alas dos nin aga. Pakatapos kan ikatolong pag-adal, nagpoon na sindang umatender sa mga pagtiripon, asin dai nahaloy pakatapos kaiyan nag-ontok na sinda sa paninigarilyo asin nagpoon nang makikabtang sa ministeryo. Mangyayari daw kutana ini kun an satong tugang na babae dai naghingoa na ihiras an saiyang paglaom sa iba?

⁴ Mga Kaeskuela: Bakong pambihira sa mga hoben na Saksi na makaeksperyensia nin impluwensia nin kairiba sa eskuelahan asin matakot na an ibang hoben memenoson sinda huli sa pakikikabtang sa paghuhulit. An sarong Kristianang tinedyer sa Estados Unidos nagsabi: “Takot akong magpatotoo sa ibang mga hoben huli ta takot akong pagngisihan.” Kaya linikayan nia an mga oportunidad na magpatotoo sa kairiba nia sa eskuelahan asin sa teritoryo. Paano nindo mapatatalubo an kosog na mapaglabanan an impluwensia nin kairiba? Magtiwala ki Jehova, na hinihingoang kamtan an saiyang huyom nin pag-oyon. (Tal. 29:25) Ipag-orgolyo an abilidad nindo sa paggamit kan Tataramon nin Dios sa saindong ministeryo. (2 Tim. 2:15) An hoben na kinotar pa sana nagpoon na mamibi ki Jehova, na inaarang sa saiya na tabangan sia na kultibaron an pagmawot na makaolay an mga kaeskuela nia. Nagpoon siang magpatotoo nin impormal sa eskuelahan, nagkaigwa nin marahay na mga resulta, asin dai nahaloy nakikipag-olay na sa gabos na kamidbid nia. Nagkonklusyon sia: “An mga hoben na idto nangangaipo asin gusto nin paglaom para sa ngapit, asin ginagamit kita ni Jehova tangani na tabangan sinda.”

⁵ Mga Kataed: Tibaad may mga kataed kita o iba pang kamidbid na nagpapaheling nin pagkauyam sa sato huli sa kun siisay kita asin kun ano an paniniwala niato. Kun natatakot kamo sa iniisip ninda, hapoton an saindong sadiri: ‘Aram daw ninda an katotoohan na minagiya pasiring sa buhay na daing katapusan? Ano an magigibo ko tangani na mataros an saindang puso?’ Naobserbaran nin sarong paraataman sa sirkito na nagkakaigwa nin mararahay na resulta kun nagpapatotoo sa mga kataed nin padikitdikit asin regular. Makiolay ki Jehova para sa kinakaipuhan na kosog asin kadonongan na makapadagos sa paghanap sa mga sadiosan an puso.​​—Fil. 4:13.

⁶ An pagpadaog niato sa negatibong impluwensia nin kairiba tibaad makapaogma sa mga parakontra, alagad an paggibo daw kaiyan magigin para sa pinakaikararahay ninda​—o niato? Si Jesus kinontra kan mga tawo sa saiyang sadiring komunidad. Sia nagtios pa ngani nin makolog na mga tataramon kan mga tugang nia sa ina. Alagad aram nia na matatabangan nia sana sinda paagi sa pagdadanay na maimbod sa dalan na itinao sa saiya nin Dios. Sa siring, si Jesus “nagtios nin siring na panlilibak nin mga parakasala tumang sa saindang sadiring ikararahay.” (Heb. 12:​2, 3) Dapat na gibohon man niato iyan. Magin determinado na aprobetsaran an saindong pribilehio na ihulit an mensahe kan Kahadean. Paagi sa paggibo kaiyan, “ililigtas mo an saimo man sana sagkod idtong naghihinanyog sa saimo.”​—1 Tim. 4:16.