Ano an Hinahagad sa Sato ni Jehova Ngonyan?
“An sarong tingog hale sa panganoron [nagsabi]: ‘Ini an sakong Aki, an namomotan, na sakong inoyonan; maghinanyog kamo sa saiya.’”— MATEO 17:5.
1. Kasuarin inotob kan Ley an katuyohan kaiyan?
ITINAO ni Jehova sa nasyon nin Israel an Ley, kaiba an dakol na kabtang kaiyan. Mapadapit kaiyan, si apostol Pablo nagsurat: “An mga iyan legal na mga kahagadan dapit sa laman asin ipinaotob sagkod sa itinalaan na panahon na itanos an mga bagay.” (Hebreo 9:10) Kan giyahan kan Ley an natatada nin mga Israelita na akoon si Jesus bilang an Mesiyas, o Cristo, naotob kaiyan an katuyohan kaiyan. Sa siring, si Pablo nagpahayag: “Si Cristo iyo an katapusan kan Ley.”—Roma 10:4; Galacia 3:19-25; 4:4, 5.
2. Sairisay an sakop kan Ley, asin kasuarin sinda nakabutas dian?
2 Nangangahulogan daw ini na bako na kitang sakop ngonyan kan Ley? An totoo, an dakulang mayoriya kan katawohan nungkang nagin sakop kan Ley, siring sa ipinaliwanag kan salmista: “Sinasabi [ni Jehova] an saiyang tataramon ki Jacob, an saiyang mga susundon asin an saiyang hudisyal na mga desisyon ki Israel. Dai nia ginibo an siring sa ibang nasyon; asin kun dapit sa saiyang hudisyal na mga desisyon, sinda dai nakaaram kaiyan.” (Salmo 147:19, 20) Kan establisaron nin Dios an bagong tipan basado sa atang ni Jesus, maski an nasyon nin Israel bako nang obligado na kuyogon an Ley. (Galacia 3:13; Efeso 2:15; Colosas 2:13, 14, 16) Kun siring, kun bako na kitang sakop kan Ley, ano an hinahagad ni Jehova sa mga nagmamawot na maglingkod sa saiya ngonyan?
Kun Ano an Hinahagad ni Jehova
3, 4. (a) Ano sa pundamental an hinahagad sa sato ni Jehova ngonyan? (b) Taano ta maninigo niatong sunodon nin estrikto an mga lakad ni Jesus?
3 Durante kan ultimong taon kan ministeryo ni Jesus, an saiyang mga apostol na si Pedro, Santiago, asin Juan uminiba sa saiya sa sarong halangkaw na bukid, na posibleng sarong parte kan Bukid nin Hermon. Duman ninda naheling an sarong makahulang bisyon ni Jesus na nasa kahangahangang kamurawayan asin nadangog an mismong tingog nin Dios na nagpahayag: “Ini an sakong Aki, an namomotan, na sakong inoyonan; maghinanyog kamo sa saiya.” (Mateo 17:1-5) Sa pundamental, iyan an hinahagad sa sato ni Jehova—maghinanyog sa saiyang aki asin sunodon an saiyang halimbawa asin mga katokdoan. (Mateo 16:24) Sa siring, si apostol Pedro nagsurat: “Si Cristo nagtios para sa saindo, na winalatan kamo nin modelo tanganing sunodon nindo nin estrikto an saiyang mga lakad.”—1 Pedro 2:21.
4 Taano ta maninigo niatong sunodon nin estrikto an mga lakad ni Jesus? Huli ta paagi sa pag-arog sa saiya, inaarog ta si Jehova Dios. Personalmenteng midbid ni Jesus an Ama, huling nakaibanan nia sia sa langit sa laog nin dai mabilang na mga taon bago nagdigdi sa daga. (Talinhaga 8:22-31; Juan 8:23; 17:5; Colosas 1:15-17) Mantang nasa daga, may kaimbodan na irinepresentar ni Jesus an saiyang Ama. Sia nagpaliwanag: “Siring sa pagkatokdo sa sako kan Ama itinataram ko an mga bagay na ini.” Sa katunayan, eksaktong-eksakto an pagkaarog ni Jesus ki Jehova kaya nasabi nia: “Sia na nakaheling sa sako nakaheling man sa Ama.”—Juan 8:28; 14:9.
5. Anong ley an nakasasakop sa mga Kristiano, asin kasuarin nagpunsionar an ley na iyan?
5 Ano an kalabot sa paghinanyog ki Jesus asin pag-arog sa saiya? Nangangahulogan daw iyan nin pagigin sakop nin sarong ley? Si Pablo nagsurat: “Ako mismo bakong sakop nin ley.” An boot sabihon nia digdi iyo an “daan na tipan,” an tipan nin Ley na ipinakipagtipan sa Israel. Talagang rinekonoser ni Pablo na sia “sakop kan ley ki Cristo.” (1 Corinto 9:20, 21; 2 Corinto 3:14) Kan matapos an daan na tipan nin Ley, nagpoon man na magpunsionar an sarong “bagong tipan” kaiba an “ley kan Cristo” na obligadong kuyogon kan gabos na lingkod ni Jehova ngonyan.—Lucas 22:20; Galacia 6:2; Hebreo 8:7-13.
6. Paano puedeng iladawan “an ley kan Cristo,” asin paano niato iyan kinukuyog?
6 Dai ipinasurat ni Jehova “an ley kan Cristo” sa pormang kodigo, na inaareglar iyan sa laen-laen na kategoriya, arog kan ginibo sa daan na tipan nin Ley. An bagong ley na ini para sa mga parasunod ni Cristo mayo nin mahiwas an sakop na lista nin detalyadong mga reglamento. Minsan siring, sa saiyang Tataramon, prineserbar nanggad ni Jehova an apat na kompletong pagkasaysay kan buhay asin mga katokdoan kan saiyang Aki. Dugang pa, pinasabngan nin Dios an nagkapirang enot na parasunod ni Jesus na magtao nin nasusurat na mga instruksion mapadapit sa personal na paggawe, mga aktibidad na pankongregasyon, paggawe sa laog nin pamilya, asin iba pang mga bagay. (1 Corinto 6:18; 14:26-35; Efeso 5:21-33; Hebreo 10:24, 25) Kun satong iinooyon an satong buhay sa halimbawa asin mga katokdoan ni Jesu-Cristo asin hinihimate an hatol kan pinasabngan na mga kagsurat kan Biblia kan enot na siglo, kita nagkukuyog sa “ley kan Cristo.” Hinahagad ini ni Jehova sa saiyang mga lingkod ngonyan.
An Kahalagahan nin Pagkamoot
7. Paano idinoon ni Jesus an kahulogan kan saiyang ley durante kan ultimong Paskua kaiba kan saiyang mga apostol?
7 Mantang mahalaga an pagkamoot sa irarom kan Ley, iyan an mismong pinakasentro, o pinakamahalagang karakteristiko, kan ley kan Cristo. Idinoon ni Jesus an bagay na ini kan makipaghelingan sia sa saiyang mga apostol tanganing selebraron an Paskua kan 33 C.E. Segun sa sumaryo ni apostol Juan sa nangyari kan bangging idto, kabale sa odok sa pusong mga tataramon ni Jesus an 28 pagsambit sa pagkamoot. Idinoon kaini sa saiyang mga apostol an kahulogan, o intension, kan saiyang ley. Makahulogan nanggad, pinonan ni Juan an saiyang pagsaysay sa mga nangyari kan importanteng bangging idto paagi sa pagsabi: “Huli ta naisihan na nia bago pa kan kapiestahan kan paskua na nagdatong na an saiyang oras sa paghale digdi sa kinaban pasiring sa Ama, si Jesus, na namoot sa saiyang mga sadiri digdi sa kinaban, namoot sa sainda sagkod sa katapusan.”—Juan 13:1.
8. (a) Ano an nagpapaheling na igwa kaidto nin nagpapadagos na diriskutiran sa tahaw kan mga apostol? (b) Paano tinokdoan ni Jesus nin leksion sa kapakumbabaan an saiyang mga apostol?
8 Namotan ni Jesus an saiyang mga apostol, minsan ngani garo baga daing nangyari sa paghingoa nia na tabangan sindang daogon an saindang labi-labing kamawotan na magkaigwa nin kapangyarihan asin posisyon. Dakol na bulan bago sinda nagdatong sa Jerusalem, “pinagdiskutiran ninda kun siisay an mas dakula.” Asin kan bago sinda magduman sa siudad para sa Paskua, nagdiriskutiran liwat dapit sa posisyon. (Marcos 9:33-37; 10:35-45) Na ini nagpapadagos na problema ipinaririsa kan nangyari dai nahaloy pagkalaog kan mga apostol sa kuarto sa itaas tanganing magkairibanan na selebraron an magigin ultimong Paskua ninda. Kan oras na idto mayo nin nag-aprobetsar kan oportunidad na gibohon an nagin nang kostumbre, mapag-istimar na paglilingkod na paghanaw sa bitis kan iba. Tanganing tokdoan sinda nin leksion sa kapakumbabaan, si Jesus mismo an naghanaw kan saindang mga bitis.—Juan 13:2-15; 1 Timoteo 5:9, 10.
9. Paano inatubang ni Jesus an situwasyon na nangyari pakatapos kan ultimong Paskua?
9 Apisar kan leksion na iyan, pakatapos na selebraron an Paskua asin ponan ni Jesus an Memorial kan saiyang nagdadangadang na kagadanan, mangnoha an nangyari na naman. An sabi kan pagkasaysay sa Ebanghelyo ni Lucas: “Nagkaigwa sinda nin mainit na diriskutiran kun baga siisay sa sainda an garo baga pinakadakula.” Imbes na anggotan an mga apostol, may kabootan na hinatolan sinda ni Jesus manongod kan pangangaipo na magin laen sa gutom sa kapangyarihan na mga namamahala sa kinaban. (Lucas 22:24-27) Dangan itinao nia an puedeng apodon na pundasyon kan ley kan Cristo, na sinasabi: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan.”—Juan 13:34.
10. Anong togon an itinao ni Jesus sa saiyang mga disipulo, asin ano an kalabot dian?
10 Kan huri kan bangging idto idinoon ni Jesus kun sagkod saen maninigong makaabot an arog-Cristong pagkamoot. Sia nagsabi: “Ini an sakong togon, na kamo magkaminorootmootan siring kan pagkamoot ko sa saindo. Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” (Juan 15:12, 13) Boot sabihon daw ni Jesus na an saiyang mga parasunod maninigo na andam na magadan para sa mga kapagtubod kun hinahagad kan situwasyon? Iyan an pagsabot ni Juan, na yaon mismo sa okasyon na ini, huli ta kan huri nagsurat sia: “Paagi kaini namidbid niato an pagkamoot, huli ta an sarong iyan [si Jesu-Cristo] nagtao kan saiyang kalag para sa sato; asin kita may paninimbagan man na itao an satong kalag para sa satong mga tugang.”—1 Juan 3:16.
11. (a) Paano niato inootob an ley kan Cristo? (b) Anong halimbawa an itinao ni Jesus?
11 Kaya, kun siring, dai niato inootob an ley kan Cristo paagi sana sa pagtokdo sa iba manongod sa saiya. Dapat man kitang mamuhay asin gumawe nin arog ki Jesus. Totoo, naggamit si Jesus nin magayon, piniling marhay na mga tataramon sa saiyang mga diskurso. Pero, nagtokdo man sia paagi sa halimbawa. Minsan ngani si Jesus kaidto sarong makapangyarihan na espiritung linalang sa langit, inaprobetsaran nia an oportunidad na maglingkod para sa intereses kan saiyang Ama digdi sa daga asin na ipaheling kun paano kita maninigong mamuhay. Sia mapakumbaba, maboot, asin makonsiderasyon, na tinatabangan an mga nagagabatan asin inaapi. (Mateo 11:28-30; 20:28; Filipos 2:5-8; 1 Juan 3:8) Asin sinadol ni Jesus an saiyang mga parasunod na magkaminorootmootan, siring kan pagkamoot nia sa sainda.
12. Taano ta masasabi na dai pinasasadit kan ley kan Cristo an pangangaipo na kamotan si Jehova?
12 Ano an kabtang kan pagkamoot ki Jehova—an pinakadakulang togon sa Ley—sa ley kan Cristo? (Mateo 22:37, 38; Galacia 6:2) Ikaduwa? Bako nanggad! An pagkamoot ki Jehova asin pagkamoot sa satong mga kapwa Kristiano dai mapagsusuhay. An saro dai puedeng tunay na mamotan si Jehova kun dai man namomotan an saiyang tugang, ta si apostol Juan nagsabi: “Kun an siisay man nagsasabi: ‘Namomoot ako sa Dios,’ pero naoongis sia sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai makahihimong mamoot sa Dios, na dai nia naheheling.”—1 Juan 4:20; ikomparar an 1 Juan 3:17, 18.
13. Ano an nagin epekto kan pagkuyog kan mga disipulo sa bagong togon ni Jesus?
13 Kan itao ni Jesus sa saiyang mga disipulo an bagong togon na magkaminorootmootan siring kan pagkamoot nia sa sainda, ilinadawan nia an magigin epekto kaini. “Paagi kaini an gabos makaaaram na kamo an sakong mga disipulo,” an sabi nia, “kun kamo nagkakaminorootmootan.” (Juan 13:35) Segun ki Tertuliano, na nabuhay pakaagi nin labing sanggatos na taon pagkagadan ni Jesus, iyan mismo an nagin epekto kan sa tugang na pagkamoot kan enot na mga Kristiano. Kinotar ni Tertuliano an bakong mga Kristiano na nagsasabi dapit sa mga parasunod ni Cristo: ‘Helinga nindo kun gurano an pagkaminorootmootan ninda asin kun gurano sinda kaandam pa ngani na magadan para sa lambang saro.’ Tibaad ihapot niato sa satong sadiri, ‘Ipinaheheling ko daw an siring na pagkamoot sa mga kapwa Kristiano na nagpapatunay na ako saro sa mga disipulo ni Jesus?’
Kun Paano Niato Pinatutunayan an Satong Pagkamoot
14, 15. Ano an tibaad magpadepisil sa pagkuyog sa ley kan Cristo, alagad ano an makatatabang sa sato sa paggibo kaiyan?
14 Mahalagang marhay na an mga lingkod ni Jehova magpaheling nin arog-Cristong pagkamoot. Alagad nadedepisilan daw kamong kamotan an mga kapwa Kristiano na nagpapaheling nin paslong mga karakteristiko? Bueno, siring sa naheling niato, maski an mga apostol nagdiriskutiran asin naghingoang suportaran an saindang sadiring intereses. (Mateo 20:20-24) An mga taga Galacia nagpasuruhay man. Pakatapos na idoon na an pagkamoot sa kataed nakaotob kan Ley, si Pablo nagpatanid sa sainda: “Alagad, kun kamo padagos na nagkikinagatan asin naghihinalonan, mag-ingat kamo na dai kamo magkagaradanan.” Pakatapos na ipaheling an kalaenan kan mga gibo kan laman sa mga bunga kan espiritu nin Dios, idinagdag ni Pablo an konseho: “Dai kita magin egotista, na nagpupukaw nin pagdaraogan, na nagpapauroriurihan.” Dangan nagsadol an apostol: “Padagos na magturowangan sa pagabat sa lambang saro, asin sa siring maotob nindo an ley kan Cristo.”—Galacia 5:14–6:2.
15 Paagi sa paghagad na kuyogon an ley kan Cristo, sobra daw an hinahagad sa sato ni Jehova? Minsan ngani tibaad depisil na magin maboot sa mga, sabi ngani, nagkakagat sa sato asin rinorotang kita sa emosyon, kita inoobligar na ‘magin mga paraarog sa Dios, bilang mga aki na namomotan na marhay, asin padagos na maglakaw sa pagkamoot.’ (Efeso 5:1, 2) Kaipuhan kitang padagos na magheling sa halimbawa nin Dios, na ‘nagpapamidbid kan saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.’ (Roma 5:8) Paagi sa pagsadiring boot na tumabang sa iba, kabale an mga nagmaltrato sa sato, makakamtan ta an satispaksion sa pakaaram na satong inaarog an Dios asin kinukuyog an ley kan Cristo.
16. Paano niato pinatutunayan an satong pagkamoot sa Dios asin ki Cristo?
16 Maninigo niatong girumdomon na pinatutunayan ta an satong pagkamoot paagi sa satong ginigibo, bako sanang kan satong sinasabi. Maski si Jesus sarong beses nadepisilan na akoon an sarong aspekto kan kabotan nin Dios huli kan gabos na imbuelto. “Ama, kun boot mo, halea an kopang ini sa sako,” an ipinamibi ni Jesus. Alagad tolos na idinagdag nia: “Minsan siring, mangyari logod, bakong an boot ko, kundi an boot mo.” (Lucas 22:42) Sa ibong kan gabos na tinios ni Jesus, ginibo nia an kabotan nin Dios. (Hebreo 5:7, 8) An pagkuyog prueba kan satong pagkamoot asin nagpapaheling na minimidbid niato na an dalan nin Dios an pinakamarahay. “Ini iyo an boot sabihon kan pagkamoot sa Dios,” sabi kan Biblia, “na kuyogon niato an saiyang mga togon.” (1 Juan 5:3) Asin sinabihan ni Jesus an saiyang mga apostol: “Kun kamo namomoot sako, ootobon nindo an sakong mga togon.”—Juan 14:15.
17. Anong espesyal na pagboot an itinao ni Jesus sa saiyang mga parasunod, asin paano niato naaaraman na aplikado iyan sa sato ngonyan?
17 Apuera sa pagboot sa saiyang mga parasunod na magkaminorootmootan, anong espesyal na togon an itinao sa sainda ni Cristo? Ipinagboot nia na gibohon ninda an paghuhulit na dian nia sinda sinanay. Si Pedro nagsabi: “Pinagbotan nia kami na maghulit sa mga tawo asin magtao nin lubos na pagpatotoo.” (Gibo 10:42) Espesipikong ipinagboot ni Jesus: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20; Gibo 1:8) Ihinayag ni Jesus na an siring na mga instruksion magigin aplikado man sa saiyang mga parasunod ngonyan sa “panahon kan katapusan,” ta sinabi nia: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Daniel 12:4; Mateo 24:14) Siempre, kabotan nin Dios na kita maghulit. Pero, iniisip nin nagkapira na sobra na man para sa Dios na hagadon sa sato na gibohon ini. Alagad iyo daw talaga?
Kun Taano ta Tibaad Garo Baga Masakit
18. Ano an maninigo niatong girumdomon kun kita nagsasakit huli sa paggibo kan hinahagad ni Jehova?
18 Siring sa naheling niato, hinagad ni Jehova sa mga tawo na sumunod sa laen-laen na kahagadan sa bilog na kasaysayan. Asin kun paanong laen-laen an ipinagibo sa sainda, iyo man an klase kan mga pagbalo na inagihan ninda. Inagihan kan namomotan na Aki nin Dios an pinakamasakit na mga pagbalo, na sa kahurihurihi ginadan sa pinakamaringis na paagi huli sa paggibo kan hinagad nin Dios. Alagad kun nagsasakit kita huli sa paggibo kan hinahagad sa sato ni Jehova, maninigo niatong girumdomon na bako sia an dahelan kan mga pagbalo sa sato. (Juan 15:18-20; Santiago 1:13-15) An pagrebelde ni Satanas nag-introdusir nin kasalan, pagsakit, asin kagadanan, asin sia an nagmukna kan mga kamugtakan na parateng nagpadepisil na marhay sa paggibo kan hinahagad ni Jehova sa saiyang mga lingkod.—Job 1:6-19; 2:1-8.
19. Taano ta sarong pribilehio an paggibo kan hinahagad sa sato nin Dios paagi sa saiyang Aki?
19 Paagi sa saiyang Aki, ipinagboot ni Jehova na sa panahon na ini kan katapusan, an Saiyang mga lingkod gumibo nin lakop sa dagang proklamasyon na an solamenteng remedyo sa gabos na pagsakit nin tawo iyo an pamamahala kan Kahadean. Hahaleon kan gobyernong ini nin Dios an gabos na problema sa daga—guerra, krimen, kadukhaan, paggurang, helang, kagadanan. Poponan man kan Kahadean an sarong mamuraway na daganon na paraiso, na dian maski an mga gadan bubuhayon liwat. (Mateo 6:9, 10; Lucas 23:43; Gibo 24:15; Kapahayagan 21:3, 4) Kanigoan na pribilehio na ipahayag an maogmang bareta dapit sa siring na mga bagay! Kun siring, malinaw nanggad na mayo nin problema sa ipinagigibo sa sato ni Jehova. May naatubang kitang pagtumang, alagad si Satanas na Diablo asin an saiyang kinaban an dahelan kaini.
20. Paano niato makakayang atubangon an ano man na angat na iinaatubang kan Diablo?
20 Paano niato mapapangganahan an ano man na angat na iinaatubang ni Satanas? Paagi sa pagsaisip kan mga tataramon na ini: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” (Talinhaga 27:11) Si Jesus nagtao ki Jehova nin isisimbag sa pagduhagi ni Satanas paagi sa pagbaya sa seguridad kan langitnon na buhay tanganing gibohon an kabotan kan saiyang Ama digdi sa daga. (Isaias 53:12; Hebreo 10:7) Bilang tawo, tinagalan ni Jesus an lambang pagbalo sa saiya, maski an kagadanan sa hariging pasakitan. Kun susunodon niato sia bilang satong Arogan, makakaya man niato na tagalan an mga sakit asin gibohon an hinahagad sa sato ni Jehova.—Hebreo 12:1-3.
21. Ano an saboot nindo manongod sa pagkamoot na ipinaheling ni Jehova asin kan saiyang Aki?
21 Kanigoan na pagkamoot an ipinaheling sato nin Dios asin kan saiyang Aki! Huli sa atang ni Jesus, an makinuyog na katawohan igwa kan oportunidad na mabuhay sagkod lamang sa Paraiso. Kaya dai niato pagtogotan an ano man na bagay na makapalibog kan satong paglaom. Imbes, personal niatong isapuso an pinagin posible ni Jesus, siring kan ginibo ni Pablo, na nagsabi: “[An] Aki nin Dios . . . namoot sa sako asin itinao an saiyang sadiri para sa sako.” (Galacia 2:20) Asin ipaheling logod niato an odok sa pusong pagpasalamat sa satong mamomoton na Dios, si Jehova, na nungkang naghahagad nin sobra sa sato.
Ano an Isisimbag Nindo?
◻ Ano an hinahagad sa sato ni Jehova ngonyan?
◻ Durante kan saiyang ultimong banggi sa kaibanan kan saiyang mga apostol, paano idinoon ni Cristo an kahalagahan nin pagkamoot?
◻ Paano niato mapatutunayan na namomotan ta an Dios?
◻ Taano ta sarong pribilehio an paggibo kan hinahagad sa sato ni Jehova?
[Retrato sa pahina 23]
Anong leksion an itinokdo ni Jesus paagi sa paghanaw kan mga bitis kan saiyang mga apostol?
[Retrato sa pahina 25]
Sa ibong kan pagtumang, an paghiras kan maogmang bareta sarong nakaoogmang marhay na pribilehio