Pagkamuot Asin Hustisya sa Laog kan Kristiyanong Kongregasyon (Ikaduwa sa Apat na Kabtang)

1. Sa anong duwang bagay kita makakasigurado?

NAMUMUTAN kan Diyos na Jehova an mga nagsasamba sa saiya. Puon pa kaidto namumutan niya na sinda, asin padagos niya sindang mamumutan. Mamumuton man siya sa hustisya. (Sal. 33:5) Kaya makakasigurado kita sa duwang bagay: (1) Nakukulgan si Jehova pag tinatratar nin bakong makatanusan an saiyang mga lingkod. (2) Sisiguraduhon niya na matatawan sinda nin hustisya. Sa inot na artikulo kan seryeng ini,b naaraman niyato na an Katugunan na itinao nin Diyos sa Israel paagi ki Moises nakabasar sa pagkamuot. Dinagka kaiyan an mga tawo na magpahiling nin hustisya sa gabos, lalo na sa mga daing kalaban-laban. (Deut. 10:18) Ihinahayag kan Katugunan na iyan na nagmamakulog na marhay si Jehova sa mga nagsasamba sa saiya.

2. Anong mga hapot an sisimbagon niyato?

² An Katugunan ni Moises natapos kan 33 C.E. kan establisaron an Kristiyanong kongregasyon. Buot sabihon daw kaiyan an mga Kristiyano mayo na nin katugunan na maprotektar sa sainda, saro na nakabasar sa pagkamuot asin nagsusuportar sa hustisya? Igwa nanggad! An mga Kristiyano nagkaigwa nin bagong katugunan. Sa artikulong ini, pag-uulayan nguna niyato kun ano an katugunan na iyan. Dangan sisimbagon niyato an mga hapot na ini: Taano ta masasabi niyato na an katugunan na ini nakabasar sa pagkamuot? Taano ta masasabi niyato na nagsusuportar iyan sa hustisya? Sa irarom kan katugunan na ini, paano dapat trataron kan mga may awtoridad an iba?

ANO AN “KATUGUNAN KAN CRISTO”?

3. Ano an minakompuwesto sa “katugunan kan Cristo” na sinambit sa Galacia 6:2?

³ Basahon an Galacia 6:2. An mga Kristiyano nasa irarom kan “katugunan kan Cristo.” Dai man nagsurat si Jesus nin lista nin mga tugon para sa saiyang mga parasunod, pero tinawan niya sinda nin mga instruksiyon, pagbuot, asin prinsipyo na magiya sa sainda. An “katugunan kan Cristo” kompuwesto kan gabos na itinukdo ni Jesus. Tanganing mas masabutan an katugunan na ini, pag-ulayan niyato an minasunod.

4-5. Sa anong mga paagi nagtukdo si Jesus, asin kasuarin siya nagtukdo?

⁴ Sa anong mga paagi nagtukdo si Jesus? Inot, tinukduan niya an mga tawo paagi sa tataramon. An saiyang mga tataramon mapuwersa huling itinukdo kaiyan an katotoohan mapadapit sa Diyos, an tunay na kahulugan kan buhay, asin na an Kahadian nin Diyos iyo an solusyon sa gabos na pagsakit nin tawo. (Luc. 24:19) Nagtukdo man si Jesus paagi sa halimbawa. Paagi sa saiyang pamumuhay, ipinahiling niya kun paano dapat na mamuhay an saiyang mga parasunod.—Juan 13:15.

⁵ Kasuarin nagtukdo si Jesus? Nagtukdo siya durante kan saiyang ministeryo sa daga. (Mat. 4:23) Tinukduan niya man an saiyang mga parasunod dai nahaloy pagkabuhay liwat sa saiya. Halimbawa, nagpahiling siya sa sarong grupo nin mga disipulo—na tibaad labing 500—asin itinao sa sainda an pagbuot na “gumibo . . . nin mga disipulo.” (Mat. 28:19, 20; 1 Cor. 15:6) Bilang payo kan kongregasyon, padagos na tinukduan ni Jesus an saiyang mga disipulo pagbalik niya sa langit. Halimbawa, kan mga 96 C.E., giniyahan ni Cristo si apostol Juan tanganing tawan nin pampakusog asin konseho an linahidan na mga Kristiyano.—Col. 1:18; Kap. 1:1.

6-7. (a) Sain nakasurat an mga katukduan ni Jesus? (b) Paano niyato sinusunod an katugunan kan Cristo?

⁶ Sain nakasurat an mga katukduan ni Jesus? Nakasurat sa apat na Ebanghelyo an dakul sa mga sinabi asin ginibo ni Jesus mantang siya nasa daga. An gabos na iba pang kabtang kan Kristiyanong Griegong Kasuratan urog pang nakakatabang sa sato na masabutan an kaisipan ni Jesus sa mga bagay-bagay huling isinurat iyan nin mga lalaking pinasabngan kan banal na espiritu asin igwa kan “pag-iisip ni Cristo.”—1 Cor. 2:16.

⁷ Leksiyon: An mga katukduan ni Jesus kapaki-pakinabang sa gabos na aspekto nin buhay. Kaya sakop kan katugunan kan Cristo an mga ginigibo ta sa harong, sa trabaho o eskuwelahan, asin sa kongregasyon. Nanunudan niyato an katugunan na ini paagi sa pagbasa kan Kristiyanong Griegong Kasuratan asin paghurop-hurop kaiyan. Sinusunod niyato an katugunan na ini paagi sa pamumuhay kauyon kan mga instruksiyon, pagbuot, asin prinsipyo na nasa ipinasabong na kasuratan na iyan. Pag sinusunod niyato an katugunan kan Cristo, sinusunod niyato an satong mamumuton na Diyos, si Jehova, na iyo an Gikanan kan gabos na itinukdo ni Jesus.—Juan 8:28.

KATUGUNAN NA NAKABASAR SA PAGKAMUOT

8. Ano an pundasyon kan katugunan kan Cristo?

⁸ Pag an harong marahay an pagkagibo asin nakatugdok sa masarig na pundasyon, namamatian kan mga nakaistar diyan na ligtas sinda asin tiwasay. Sa kaagid na paagi, pag an katugunan marahay asin nakabasar sa masarig na pundasyon, namamatian kan mga nagsusunod diyan na sinda ligtas asin tiwasay. An katugunan kan Cristo nakabasar sa pinakamarahay na pundasyon—an pagkamuot. Paano niyato nasabi iyan?

9-10. Anong mga halimbawa an nagpapahiling na si Jesus pinahiro nin pagkamuot, asin paano niyato siya maaarog?

⁹ Inot, pagkamuot an nagpahiro ki Jesus sa gabos niyang ginibo. An pagkahirak, o mamumuton na pagmalasakit, sarong kapahayagan nin pagkamuot. Pinahiro si Jesus nin siring na pagkahirak na magtukdo sa dakul na tawo, magpaumay nin mga may hilang, magpakakan sa mga nagugutom, asin magbuhay nin gadan. (Mat. 14:14; 15:32-38; Mar. 6:34; Luc. 7:11-15) Dawa ngani nangaipo iyan nin dakul na panahon asin kusog, gikan sa buot na ininot ni Jesus an mga pangangaipo kan iba kisa kan sa saiya. Urog sa gabos, nagpahiling siya nin dakulang pagkamuot paagi sa pagtao kan saiyang buhay para sa iba.—Juan 15:13.

¹⁰ Leksiyon: Maaarog niyato si Jesus paagi sa pag-inot sa mga pangangaipo kan iba kisa kan sa sato. Maaarog man niyato siya paagi sa pagpahiling nin mamumuton na pagmalasakit sa mga tawo sa satong teritoryo. Pag pinapahiro kita nin siring na pagmalasakit na ihulit asin itukdo an maugmang bareta, sinusunod niyato an katugunan kan Cristo.

11-12. (a) Ano an nagpapahiling na nagmamakulog na marhay si Jehova sa sato? (b) Paano niyato maaarog an pagkamuot ni Jehova?

¹¹ Ikaduwa, ipinahiling ni Jesus an pagkamuot kan saiyang Ama. Sa panahon kan saiyang ministeryo, ipinahiling ni Jesus na nagmamakulog na marhay si Jehova sa saiyang mga parasamba. Halimbawa, itinukdo ni Jesus an minasunod: An lambang saro sa sato mahalagang marhay sa satong Ama sa langit. (Mat. 10:31) Gustong-gusto ni Jehova na akuon giraray an sarong nawarang karnero na nagsusulsol asin minabalik sa kongregasyon. (Luc. 15:7, 10) Pinatunayan ni Jehova an saiyang pagkamuot sa sato paagi sa pagtao kan saiyang Aki bilang pantubos para sa sato.—Juan 3:16.

¹² Leksiyon: Paano niyato maaarog an pagkamuot ni Jehova? (Efe. 5:1, 2) Minamansay niyato na mahalagang marhay an lambang tugang ta, asin maugma niyatong inaako giraray an “nawawarang karnero” na minabalik ki Jehova. (Sal. 119:176, An Marahay na Bareta Biblia) Pinapatunayan niyato na namumutan ta an satong mga tugang paagi sa pagtao kan satong panahon asin kusog tanganing tabangan sinda, lalo na pag kaipuhan ninda iyan. (1 Juan 3:17) Pag ipinapahiling niyato an satong pagkamuot sa iba, sinusunod ta an katugunan kan Cristo.

13-14. (a) Arog kan mababasa sa Juan 13:34, 35, ano an ipinagbuot ni Jesus sa saiyang mga parasunod na ipahiling ninda, asin taano ta bagong tugon ini? (b) Paano niyato sinusunod an bagong tugon?

¹³ Ikatulo, ipinagbuot ni Jesus sa saiyang mga parasunod na magpahiling nin mapagsakripisyong pagkamuot. (Basahon an Juan 13:34, 35.) An tugon ni Jesus bago, huling hinahagad kaiyan sa sato na magpahiling nin sarong klase nin pagkamuot na bakong kahagadan sa Katugunan na itinao nin Diyos sa Israel: Kamutan an mga kapagtubod siring kan pagkamuot sa sato ni Jesus. Nangangaipo iyan nin mapagsakripisyong pagkamuot.c Dapat niyatong kamutan an satong mga tugang nin urog pa sa pagkamuot ta sa satong sadiri. Dapat ta sindang kamutan sagkod sa punto na andam kitang itao an satong buhay para sa sainda, arog kan ginibo ni Jesus para sa sato.

¹⁴ Leksiyon: Paano niyato sinusunod an bagong tugon? Sa simpleng pagtaram, paagi sa pagsasakripisyo para sa satong mga tugang. Andam kitang gibuhon bako sana an pinakadakulang sakripisyo—an pagtao kan satong buhay—kundi andam man kitang gumibo nin saradit na pagsasakripisyo. Halimbawa, pag regular niyatong ihinahatod sa pagtiripon an sarong may edad nang tugang dawa bakong kumbenyente sa sato, o gikan sa buot kitang nagpapahunod tanganing mapaugma an sarong tugang, o nagli-leave kita sa trabaho para magtabang sa pag-ayuda, sinusunod niyato an katugunan kan Cristo. Paagi kaiyan, nakakatabang man kita tanganing an satong kongregasyon magin sarong lugar na diyan mamamatian kan lambang indibidwal na siya ligtas asin tiwasay.

KATUGUNAN NA NAGSUSUPORTAR SA HUSTISYA

15-17. (a) Paano mahihiling sa paggawi ni Jesus an pagpapahalaga niya sa hustisya? (b) Paano niyato maaarog si Jesus?

¹⁵ Sa Bibliya, an “hustisya” iyo an paggibo nin sarong bagay na ibinibilang nin Diyos na tama asin an paggibo kaiyan na daing ipinapaurog. Taano ta masasabi niyato na an katugunan kan Cristo nagsusuportar sa hustisya?

¹⁶ Inot, pag-isipan kun paano mahihiling sa paggawi ni Jesus an pagpapahalaga niya sa hustisya. Kan panahon niya, an Judiong mga lider nin relihiyon ikinakaungis an bakong mga Judio, minemenos an ordinaryong mga Judio, asin dai irinerespeto an mga babayi. Alagad pantay-pantay an pagtrato ni Jesus sa gabos asin dai siyang ipinapaurog. Inako niya an mga bakong Judio na nagdulok sa saiya huli sa pagtubod. (Mat. 8:5-10, 13) Naghulit siya na mayong pagpalain-lain sa gabos, sa mayaman asin dukha. (Mat. 11:5; Luc. 19:2, 9) Dai niya nuarin man trinatar nin daing hirak o maringis an mga babayi. Sa kabaliktaran, may respeto asin mabuot siya sa mga babayi, pati sa mga minemenos o hinahamak kan iba.—Luc. 7:37-39, 44-50.

¹⁷ Leksiyon: Maaarog niyato si Jesus paagi sa pagtratar sa iba na daing ipinapaurog asin paghulit sa gabos na andam na magdangog—ano man an saindang estado sa buhay o relihiyon. Inaarog kan Kristiyanong mga lalaki an saiyang halimbawa paagi sa pagpahiling nin respeto sa mga babayi. Pag ginigibo niyato an mga bagay na iyan, sinusunod niyato an katugunan kan Cristo.

18-19. Ano an itinukdo ni Jesus mapadapit sa hustisya, asin anong mga leksiyon an nanudan niyato sa mga itinukdo niya?

¹⁸ Ikaduwa, pag-isipan an itinukdo ni Jesus mapadapit sa hustisya. Itinukdo niya an mga prinsipyo na makakatabang sa mga parasunod niya na trataron nin makatanusan an iba. Halimbawa, pag-isipan an Golden Rule. (Mat. 7:12) Gabos kita gustong tinatratar nin makatanusan. Kun siring, dapat man niyatong trataron nin makatanusan an iba. Kun gigibuhon niyato iyan, puwede sindang mapahiro na trataron man kita nin makatanusan. Pero paano kun trinatar kita nin bakong makatanusan? Tinukduan man ni Jesus an saiyang mga parasunod na magtiwala na ‘tatawan ni Jehova nin hustisya idtong mga nag-aagrangay sa saiya aldaw-banggi.’ (Luc. 18:6, 7) An mga tataramon na iyan sarong panuga: Aram kan satong makatanusan na Diyos an mga kasakitan na inaatubang niyato sa huring mga aldaw na ini, asin itatao niya sa sato an hustisya sa itinalaan niyang panahon.—2 Tes. 1:6.

¹⁹ Leksiyon: Pag sinusunod niyato an mga prinsipyo na itinukdo ni Jesus, tatrataron niyato nin makatanusan an iba. Asin kun biktima kita nin inhustisya sa kinaban ni Satanas, mararanga kita huling aram niyato na papangyarihon ni Jehova na matawan kita nin hustisya.

PAANO DAPAT TRATARON KAN MGA MAY AWTORIDAD AN IBA?

20-21. (a) Paano dapat trataron kan mga may awtoridad an iba? (b) Paano makakapahiling nin mapagsakripisyong pagkamuot an agom na lalaki, asin paano dapat trataron nin sarong ama an saiyang mga aki?

²⁰ Sa katugunan kan Cristo, paano dapat trataron kan mga may awtoridad an iba? Huling pagkamuot an pundasyon kan katugunan na iyan, dapat na tawan nin dignidad kan mga may awtoridad an mga nasa pangangataman ninda asin trataron sinda sa mamumuton na paagi. Dapat nindang tandaan na gusto ni Cristo na magpahiling kita nin pagkamuot sa gabos niyatong ginigibo.

²¹ Sa laog kan pamilya. Dapat na kamutan kan agom na lalaki an saiyang agom “kun paanong iyan man an ginigibo kan Cristo sa kongregasyon.” (Efe. 5:25, 28, 29) Dapat na arugon kan agom na lalaki an mapagsakripisyong pagkamuot ni Cristo paagi sa pag-inot sa mga pangangaipo asin kapakanan kan saiyang agom kisa kan sa sadiri niya. May mga lalaki na tibaad nadidipisilan na magpahiling nin arog kaiyan na pagkamuot. Tibaad huli iyan ta nagdakula sinda sa pamilyang dai nagpapahiling nin pagkamuot asin bakong makatanusan an pagtratar sa iba. Tibaad dipisil sa sainda na itanos an bakong magayon na mga kinatudan, pero dapat na gibuhon ninda an mga pagbabagong ini tanganing masunod an katugunan kan Cristo. Kun an agom na lalaki nagpapahiling nin mapagsakripisyong pagkamuot sa saiyang agom, makukua niya an paggalang kaini. An ama na tunay na namumutan an saiyang mga aki nungkang kukulgan an mga ini paagi sa mga tataramon o gibo. (Efe. 4:31) Imbes, ipinapahiling niya an saiyang pagkamuot asin pag-uyon sa mga paagi na mamamatian kan saiyang mga aki na ligtas sinda asin tiwasay. Nakukua kan siring na ama an pagkamuot asin tiwala kan saiyang mga aki.

22. Arog kan mababasa sa 1 Pedro 5:1-3, kiisay an mga “karnero,” asin paano sinda dapat trataron?

²² Sa kongregasyon. Dapat na isaisip kan mga elder na an mga “karnero” bako nindang sadiri. (Juan 10:16; basahon an 1 Pedro 5:1-3.) An mga tataramon na “aripumpon nin Diyos,” “sa atubangan nin Diyos,” asin “sadiri nin Diyos” nagpapagirumdom sa mga elder na sadiri ni Jehova an mga karnero. Gusto niya na trataron nin may pagkamuot asin pagpadangat an saiyang mga karnero. (1 Tes. 2:7, 8) An mga elder na ginigibo sa mamumuton na paagi an saindang responsabilidad bilang pastor nakakamtan an pag-uyon ni Jehova. Mamumutan asin igagalang man sinda kan mga tugang.

23-24. (a) Ano an papel kan mga elder sa pag-asikaso sa mga kaso nin magabat na pagkakasala? (b) Sa pag-asikaso sa arog kaiyan na mga kaso, ano an kaipuhan na isaisip kan mga elder?

²³ Ano an papel kan mga elder sa pag-asikaso sa mga kaso nin magabat na pagkakasala? An papel ninda lain kan sa mga hukom asin kamagurangan sa Katugunan na itinao nin Diyos sa Israel. Sa Katugunan, inasikaso kan nombradong mga lalaki bako lang an mga bagay na konektado sa pagsamba ki Jehova kundi pati man an mga kasong sibil asin kriminal. Pero sa katugunan kan Cristo, an papel kan mga elder iyo na asikasuhon an mga aspekto kan pagkakasala na konektado sa pagsamba ki Jehova. Minimidbid ninda na an sekular na mga awtoridad an tinawan nin Diyos kan responsabilidad na asikasuhon an mga kasong sibil asin kriminal. Kaiba diyan an awtoridad na magpataw nin penalidad arog nin multa o pagpreso.—Roma 13:1-4.

²⁴ Paano inaasikaso kan mga elder an espirituwal na aspekto kan magabat na pagkakasala? Ginagamit ninda an Kasuratan tanganing analisaron an mga bagay-bagay asin gumibo nin mga desisyon. Isinasaisip ninda na pagkamuot an pundasyon kan katugunan kan Cristo. Pinapahiro nin pagkamuot an mga elder na pag-isipan: Ano an kaipuhan na gibuhon tanganing tabangan an siisay man sa kongregasyon na biktima nin maraot na gibo? Kun mapadapit sa nagkasala, papahiruon nin pagkamuot an mga elder na pag-isipan: Nagsusulsol daw siya? Matatabangan mi daw siya na mapakarhay an saiyang relasyon ki Jehova?

25. Ano an tutukaron sa masunod na artikulo?

²⁵ Nagpapasalamat nanggad kita na sakop kita kan katugunan kan Cristo! Pag gabos kita naghihinguwang marhay na sunudon iyan, nakakatabang kita na an satong kongregasyon magin sarong lugar na diyan mamamatian kan lambang indibidwal na siya namumutan, pinapahalagahan, asin ligtas. Pero nabubuhay pa man giraray kita sa kinaban na an ‘mga maraot na tawo lalo pang nagigin maraot.’ (2 Tim. 3:13) Dapat na magdanay kitang alerto. Paano maipapahiling kan Kristiyanong kongregasyon an hustisya nin Diyos pag inaasikaso an dapit sa seksuwal na pang-aabuso sa aki? Sisimbagon iyan sa masunod na artikulo.