Pamumuhay Sono sa Ley kan Cristo

“Padagos na magturowangan sa pagabat sa lambang saro, asin sa siring maotob nindo an ley kan Cristo.”​—GALACIA 6:2.

1. Taano ta puedeng sabihon na an ley kan Cristo makosogon na puersa para sa ikararahay ngonyan?

SA Rwanda, an mga Saksi ni Jehova na Hutu asin Tutsi isinapeligro an saindang buhay sa pagprotehir sa lambang saro sa etnikong garadanan na bago pa sanang uminagi nin madahas sa nasyon na iyan. An mga Saksi ni Jehova sa Kobe, Hapon, na nagadanan nin mga kapamilya sa mapanlaglag na linog nadanyaran na marhay kan kawaran sa sainda. Pero, sinda listong naghiro sa pagligtas sa ibang biktima. Iyo, an nakaoogmang mga halimbawa hale sa bilog na kinaban nagpapaheling na an ley kan Cristo nagkakaepekto ngonyan. Iyan makosogon na puersa para sa ikararahay.

2. Paano dai nasabotan kan Kakristianohan an ley kan Cristo, asin paano niato inootob an ley na iyan?

² Kadungan kaiyan, an sarong hula sa Biblia manongod sa delikadong “huring mga aldaw” na ini naootob. An dakol igwa nin “porma nin diosnon na debosyon” alagad “nagpapainda sa kapangyarihan kaiyan.” (2 Timoteo 3:​1, 5) Nangorogna sa Kakristianohan, an relihion sa parate pormalidad sana, bakong nasa puso. Iyan daw huli ta depisilon na mamuhay sono sa ley kan Cristo? Bako. Si Jesus dai matao sa sato nin ley na dai kayang sunodon. Dai sana nasasabotan kan Kakristianohan an ley na iyan. Dai nia nasunod an ipinasabong na mga tataramon na ini: “Padagos na magturowangan sa pagabat sa lambang saro, asin sa siring maotob nindo an ley kan Cristo.” (Galacia 6:2) Satuyang ‘inootob an ley kan Cristo’ paagi sa pagturowangan sa pagabat sa lambang saro, bakong sa pag-arog sa mga Fariseo asin daing katanosan na pagdagdag sa mga pasan kan satong mga tugang.

3. (a) Ano an nagkapirang pagboot na kaiba sa ley kan Cristo? (b) Taano ta sala na magkonklusyon na an Kristianong kongregasyon dai maninigong magkaigwa nin mga susundon apuera kan direktang mga pagboot ni Cristo?

³ Kaiba sa ley kan Cristo an gabos na pagboot ni Cristo Jesus​—baga man paghuhulit asin pagtotokdo, pagpadanay sa mata na dalisay asin simple, paghihingoa na mapagdanay an pakipagkatoninongan sa satong kataed, o paghale kan karigsokan sa kongregasyon. (Mateo 5:​27-​30; 18:​15-​17; 28:​19, 20; Kapahayagan 2:​14-​16) Tunay nanggad, an mga Kristiano obligadong otobon an gabos na pagboot sa Biblia na para sa mga parasunod ni Cristo. Asin bako sana iyan. An organisasyon ni Jehova, saka an indibiduwal na mga kongregasyon, kaipuhan na mag-establisar nin kaipuhan na mga susundon asin paagi tangani na mapagdanay an marahay na areglo. (1 Corinto 14:​33, 40) Tara, dai ngani makapagtitiripon an mga Kristiano kun mayo sinda nin mga susundon kun noarin, saen, asin paano gigibohon an siring na mga pagtiripon! (Hebreo 10:​24, 25) An pakikikooperar sa rasonableng mga susundan na ibinugtak kan mga tinawan nin autoridad sa organisasyon kaiba man sa pag-otob sa ley kan Cristo.​—Hebreo 13:17.

4. Ano an nagmomotibar na puersa sa likod nin dalisay na pagsamba?

⁴ Minsan siring, dai itinotogot nin tunay na mga Kristiano na an saindang pagsamba magin daing kahulogan na pagkaareglar nin mga ley. Sinda dai naglilingkod ki Jehova huli sana ta sinasabihan sinda nin sarong indibiduwal o organisasyon na gibohon iyan. Imbes, an nagmomotibar na puersa sa likod kan saindang pagsamba iyo an pagkamoot. Isinurat ni Pablo: “An pagkamoot kan Cristo itinutulod kami.” (2 Corinto 5:​14, nota sa ibaba) Pinagbotan ni Jesus an saiyang mga parasunod na magkaminorootmootan. (Juan 15:​12, 13) An mapagsakripisyo sa sadiring pagkamoot iyo an basehan kan ley kan Cristo, asin iyan nagtutulod o nagmomotibar sa tunay na mga Kristiano sa gabos na lugar, kapwa sa pamilya asin sa kongregasyon. Helingon niato kun paano.

Sa Pamilya

5. (a) Paano maootob nin mga magurang an ley kan Cristo sa harong? (b) Ano an kaipuhan nin mga aki sa saindang mga magurang, asin anong mga kaolangan an kaipuhan na mapangganahan nin mga magurang tangani na ikatao iyan?

⁵ Si apostol Pablo nagsurat: “Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon asin iinatang an saiya man sana dahel kaiyan.” (Efeso 5:25) Kun an agom na lalaki inaarog si Cristo asin tinatrato an saiyang agom na babae na may pagkamoot asin pagsabot, inootob nia an mahalagang marhay na aspekto kan ley kan Cristo. Dugang pa, si Jesus hayag na nagpaheling nin kapadangatan sa mga aki, na kinukugos sinda, dinuduotan sinda kan saiyang mga kamot, asin binebendisyonan sinda. (Marcos 10:16) An mga magurang na nag-ootob kan ley kan Cristo nagpapaheling man nin kapadangatan sa saindang mga aki. Totoo, may mga magurang na nadedepisilan na arogon an halimbawa ni Jesus sa bagay na ini. An iba bako talagang mapagpahayag kan saboot. Mga magurang, dai pagtogotan an siring na mga bagay na makaolang sa saindo sa pagpaheling sa saindong mga aki kan pagkamoot na namamatean nindo para sa sainda! Bakong igo na maaraman nindo na namomotan nindo an saindong mga aki. Iyan kaipuhan man na maaraman ninda. Asin dai ninda iyan maaaraman sagkod na dai kamo nakanonompong nin mga paagi na ipaheling an saindong pagkamoot.​—Ikomparar an Marcos 1:11.

6. (a) An mga aki daw nagkakaipo nin mga susundon na ibinugtak kan mga magurang, asin taano ta siring an simbag nindo? (b) Anong pundamental na dahelan kan mga susundon sa harong an kaipuhan na masabotan nin mga aki? (c) Anong mga peligro an nalilikayan kun nangingibabaw sa harong an ley kan Cristo?

⁶ Kadungan kaiyan, an mga aki nagkakaipo nin mga susundan, na nangangahulogan na an saindang mga magurang kaipuhan na magbugtak nin mga susundon asin kun beses ipaotob an mga susundon na ini paagi sa disiplina. (Hebreo 12:​7, 9, 11) Dawa pa, an mga aki kaipuhan na luway-luway na tabangan na masabotan an pundamental na dahelan kan mga susundon na ini: namomotan sinda kan saindang mga magurang. Asin kaipuhan na makanood sinda na an pagkamoot iyo an pinakamarahay na dahelan na sinda kumuyog sa saindang mga magurang. (Efeso 6:​1; Colosas 3:​20; 1 Juan 5:3) An pasohan nin mapagmansay na magurang tokdoan an mga aki na gamiton an saindang “kakayahan na mangatanosan” tangani na sa huri makasadiri na sindang gumibo nin marahay na mga desisyon. (Roma 12:1; ikomparar an 1 Corinto 13:11.) Sa ibong na lado, dai man maninigo na magin dakolon an susundon o maisogon an disiplina. Sabi ni Pablo: “Kamong mga ama, dai nindo pagpaanggoton an saindong mga aki, tanganing dai sinda panluyahan nin boot.” (Colosas 3:21; Efeso 6:4) Kun nangingibabaw sa harong an ley kan Cristo, mayo nin lugar para sa disiplinang itinatao na may daing pagpopogol na kaanggotan o sa nakakokolog na pagtuyatuya. Sa siring na harong, an mga aki nakamamateng ligtas asin naparirigon, bakong nagagabatan o minemenus.​—Ikomparar an Salmo 36:7.

7. Sa anong mga paagi makatatao nin halimbawa an mga erokan na Bethel pag-abot sa pagbugtak nin mga susundon sa harong?

⁷ An iba na nakasongko sa mga erokan na Bethel sa bilog na kinaban nagsasabi na an mga iyan marahay na mga halimbawa nin pagkatimbang kun dapit sa mga susundon para sa sarong pamilya. Minsan ngani kompuesto nin mga adulto, an siring na mga institusyon nagpupunsionar na kaparehong marhay nin mga pamilya.a An pagpunsionar kan Bethel komplikado asin nagkakaipo nin dakol-dakol na susundon​—mas dakol nanggad kisa sa ordinaryong pamilya. Minsan siring, an kamagurangan na nangengenot sa mga erokan na Bethel, opisina, asin imprentahan naghihingoa na iaplikar an ley kan Cristo. Ibinibilang nindang asignasyon sa sainda na bako sanang organisaron an trabaho kundi suportaran man an espirituwal na pag-oswag asin “an kagayagayahan ni Jehova” sa tahaw kan saindang mga katrabaho. (Nehemias 8:10) Kun siring, sinda naghihingoa na gibohon an mga bagay sa positibo asin nakapakokosog na paagi saka nagmamaigot na magin rasonable. (Efeso 4:​31, 32) Bakong makangangalas na an mga pamilya sa Bethel midbid sa saindang magayagayang espiritu!

Sa Kongregasyon

8. (a) Ano an maninigo na magin perming pasohan niato sa kongregasyon? (b) Sa irarom nin anong mga kamugtakan na an iba naghagad o nagprobar na gumibo nin mga susundon?

⁸ Sa kongregasyon pasohan ta man na parigonon an lambang saro sa espiritu nin pagkamoot. (1 Tesalonica 5:11) Kaya an gabos na Kristiano maninigong magmaan na dai dugangan an mga pagabat sa iba paagi sa pangangahas na ipirit an saindang mga ideya kun dapit sa personal na kagustohan. Kun beses, an iba minasurat sa Watch Tower Society na naghahagad nin opisyal na desisyon sa mga bagay na arog baga kan maninigong magin punto-de-vista ninda dapit sa espesipikong mga pelikula, libro, asin pati kawatan. Pero, an Sosyedad dai autorisado na siyasaton na marhay an siring na mga bagay asin magtao nin mga paghusgar dapit dian. Sa kadaklan na kaso, ini mga bagay na maninigong desisyonan kan kada indibiduwal o payo nin pamilya, basado sa saiyang pagkamoot sa mga prinsipyo sa Biblia. An iba may tendensiang gibohon na mga susundon an mga suhestion asin susundan na tao kan Sosyedad. Halimbawa, sa luwas na Marso 15, 1996 kan An Torrengbantayan, igwa nin marahayon na artikulo na nagparigon sa boot nin mga magurang sa kongregasyon na regular na songkoon sa pagpastor an mga miembro kan kongregasyon. An katuyohan daw mag-establisar nin mga susundon? Bako. Minsan ngani an mga nakasusunod sa mga suhestion nakanonompong nin dakol na pakinabang, an ibang magurang mayo sa posisyon na gibohon iyan. Kaagid kaiyan, an artikulong “Mga Hapot Hale sa mga Parabasa” sa luwas na Abril 1, 1995 kan An Torrengbantayan nagpatanid tumang sa pagrayo kan atension sa dignidad kan okasyon nin bautismo paagi sa pagpalabilabi, arog baga nin daing kontrol na mga parti o pagkaigwa nin mga selebrasyon. An iba pinalabihan an maygurang na hatol na ini, na naggibo pa ngani nin susundon na sala an pagpadara nin nakaparirigon sa boot na kard sa okasyon na ini!

9. Taano ta mahalaga na likayan niato an pagigin sobra kaparatatsar asin parahusgar sa lambang saro?

⁹ Isipon man na tanganing mangibabaw sa tahaw niato an “sangkap na ley para sa katalingkasan,” kaipuhan na akoon niato na bakong parareho an gabos na Kristianong konsensia. (Santiago 1:25) Maninigo daw niatong ikaanggot kun an mga tawo igwa nin indibiduwal na mga kagustohan na dai naglalapas sa Makakasuratan na mga prinsipyo? Dai. Makakapabaranga an paggibo niato kaiyan. (1 Corinto 1:10) Si Pablo, kan pinatatanidan kita tumang sa paghusgar sa kapwa Kristiano, nagsabi: “Sa saiyang sadiring kagurangnan sia nagtitindog o napupukan. Sa katotoohan, sia patitindogon, huli ta mapatitindog sia ni Jehova.” (Roma 14:4) Namemeligro kitang mapaanggot an Dios kun kita magtataram tumang sa lambang saro manongod sa mga bagay na maninigong ipabaya sa indibiduwal na konsensia.​—Santiago 4:​10-12.

10. Sairisay an iinasignar na magbantay sa kongregasyon, asin paano niato sinda maninigong suportaran?

¹⁰ Girumdomon man niato na an kamagurangan iinasignar na magbantay sa aripompon nin Dios. (Gibo 20:28) Sinda yaon tanganing tumabang. Maninigo na dai kita mag-alangan na humagad nin hatol sa sainda, huli ta sinda mga estudyante kan Biblia asin pamilyar sa ikinapaliwanag na sa mga babasahon kan Watch Tower Society. Kun an kamagurangan nakaheheling nin gawe na posibleng gumiya pasiring sa paglapas kan mga prinsipyo sa Kasuratan, sinda daing takot na nagtatao kan kinakaipuhan na sadol. (Galacia 6:1) An mga miembro kan kongregasyon nagkukuyog sa ley kan Cristo paagi sa pakikikooperar sa namomotan na mga pastor na ini, na nangengenot sa tahaw ninda.​—Hebreo 13:7.

Iinaaplikar kan Kamagurangan an Ley kan Cristo

11. Paano iinaaplikar kan kamagurangan an ley kan Cristo sa kongregasyon?

¹¹ An kamagurangan galagang otobon an ley kan Cristo sa kongregasyon. Nangengenot sinda sa paghuhulit kan maogmang bareta, nagtotokdo hale sa Biblia tanganing maabot an mga puso asin, bilang mamomoton, maboot na mga pastor, nagtataram sa “mga kalag na nagmomondo nin makuri.” (1 Tesalonica 5:14) Linilikayan ninda an mga aktitud na bakong sa Kristiano na yaon sa kadakol na relihion kan Kakristianohan. Totoo, an kinaban na ini marikas na nalalapa, asin kapareho ni Pablo, an kamagurangan tibaad mahadit para sa aripompon; alagad ta nagdadanay sindang timbang mantang inaaksionan ninda an siring na mga kahaditan.​—2 Corinto 11:28.

12. Kun an sarong Kristiano patabang sa sarong magurang sa kongregasyon, paano puedeng sumimbag an magurang?

¹² Halimbawa, tibaad boot nin sarong Kristiano na konsultahon an sarong magurang sa kongregasyon manongod sa sarong importanteng bagay na dai direktang nasasambitan sa Kasuratan o nagkakaipo nin pagturotimbang sa laen-laen na prinsipyong Kristiano. Tibaad inalok sia nin paglangkaw kan puesto sa trabaho na mas dakula an sueldo alagad mas magabat an responsibilidad. O an daing pagtubod na ama nin sarong hoben na Kristiano tibaad may mga hinahagad sa saiyang aki na puedeng makaapektar sa saiyang ministeryo. Sa siring na mga situwasyon an magurang sa kongregasyon naglilikay na tumao nin personal na opinyon. Imbes, posible na bubukasan nia an Biblia asin tatabangan an indibiduwal na mangatanosan sa angay na mga prinsipyo. Tibaad gamiton nia an Watch Tower Publications Index, kun igwa, sa paghanap kan isinabi kan “fiel asin madonong na oripon” sa temang iyan sa mga pahina kan An Torrengbantayan asin iba pang publikasyon. (Mateo 24:45) Ano kun pakatapos kaiyan an Kristiano gumibo nin desisyon na sa pagheling kan magurang garo baga bakong madonong? Kun an desisyon dai direktang naglalapas sa mga prinsipyo o ley sa Biblia, maheheling kan Kristiano na mimidbidon kan magurang an diretso kan indibiduwal na gumibo kan siring na desisyon, sa pakaaram na “an lambang saro magpapasan kan saiyang sadiring pasan.” Minsan siring, maninigong girumdomon kan Kristiano na “an ano man na itinatanom nin tawo, iyan man sana an saiyang aanihon.”​—Galacia 6:​5, 7.

13. Imbes na tumao nin direktang mga simbag sa mga hapot o tumao kan sadiri nindang mga opinyon, taano ta tinatabangan nin kamagurangan an iba na mangatanosan sa mga bagay-bagay?

¹³ Taano ta arog kaini an ginigibo kan eksperyensiadong magurang? Kisuerra sa duwang dahelan. Enot, sinabihan ni Pablo an sarong kongregasyon na bako siang ‘an kagurangnan kan saindang pagtubod.’ (2 Corinto 1:24) An magurang sa kongregasyon, sa pagtabang sa saiyang tugang na mangatanosan sa Kasuratan asin gumibo kan sadiri niang desisyon na basado sa kaaraman, inaarog an aktitud ni Pablo. Minimidbid nia na may mga limitasyon an saiyang autoridad, kun paanong minidbid ni Jesus na may mga limitasyon an saiyang autoridad. (Lucas 12:​13, 14; Judas 9) Kadungan kaiyan, an kamagurangan listong nagtatao nin nakatatabang, direkta pa nganing sadol na Makakasuratan kun kaipuhan. Ikaduwa, sinasanay nia an saiyang kapwa Kristiano. Si apostol Pablo nagsabi: “An matagas na kakanon para sa mga maygurang, duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin sala.” (Hebreo 5:14) Huli kaini, tangani na tumalubo sa pagkamaygurang, kaipuhan na gamiton niato an satong kakayahan nin pagmansay, na dai perming nagsasarig sa iba na iyo an magtao sa sato kan mga simbag. An magurang sa kongregasyon, paagi sa pagtokdo sa saiyang kapwa Kristiano kun paano mangangatanosan sa Kasuratan, sa paaging ini nakatatabang sa saiya na umoswag.

14. Paano ikapaheheling nin mga maygurang na sinda nagtitiwala ki Jehova?

¹⁴ Makatutubod kita na si Jehova Dios paagi sa saiyang banal na espiritu iimpluwensiahan an puso nin tunay na mga parasamba. Sa siring, an maygurang na mga Kristiano pinupukaw an puso kan saindang mga tugang, na pinakikiolayan sinda, arog kan ginibo ni apostol Pablo. (2 Corinto 8:​8; 10:​1; Filemon 8, 9) Aram ni Pablo na sa pangenot an mga bakong matanos, bakong an mga matanos, an nagkakaipo nin detalyadong mga ley tangani na sinda magtoltol. (1 Timoteo 1:9) Sia nagpahayag, bakong nin pagsuspetsa o pagdiskompiar, kundi nin pagtubod sa saiyang mga tugang. Sa sarong kongregasyon sia nagsurat: “Kami may kompiansa sa Kagurangnan mapadapit sa saindo.” (2 Tesalonica 3:4) An pagtubod, pagtiwala, asin kompiansa ni Pablo segurado na dakula an nagibo sa pagmotibar sa mga Kristianong idto. Arog man kaiyan an pasohan nin mga magurang sa kongregasyon asin nagbibiaheng mga paraataman. Abaa kanakagiginhawa kan fiel na mga lalaking ini, mantang mamomoton nindang pinapastoran an aripompon nin Dios!​—Isaias 32:​1, 2; 1 Pedro 5:​1-3.

Pamumuhay Sono sa Ley kan Cristo

15. Ano an nagkapirang hapot na puede niatong ihapot sa satong sadiri tanganing helingon kun baga iinaaplikar niato an ley kan Cristo sa satong relasyon sa satong mga tugang?

¹⁵ Kita gabos kaipuhan na dayaday na siyasaton an satong sadiri tanganing helingon kun baga kita namumuhay sono sa asin nagsusuportar sa ley kan Cristo. (2 Corinto 13:5) An totoo, kita gabos makikinabang sa paghapot: ‘Ako daw nakapakokosog o paratatsar? Ako daw timbang o labi-labi? Ako daw nagpapaheling nin konsiderasyon sa iba o nag-iinsister sa sadiri kong mga diretso?’ An Kristiano dai nagpoprobar na diktahan kun ano an maninigo o dai maninigong gibohon kan saiyang tugang sa mga bagay na dai man espesipikong nasasambitan sa Biblia.​—Roma 12:​1; 1 Corinto 4:6.

16. Paano niato matatabangan an mga igwa nin negatibong pagmansay sa saindang sadiri, sa siring inootob an sarong mahalagang marhay na aspekto kan ley kan Cristo?

¹⁶ Sa delikadong mga panahon na ini, mahalaga na kita maghanap nin mga paagi na magparinigonan nin boot. (Hebreo 10:​24, 25; ikomparar an Mateo 7:​1-5.) Kun pinagmamasdan niato an satong mga tugang na lalaki asin babae, bako daw na an saindang marahay na mga kualidad mas mahalaga sa sato kisa sa saindang mga kaluyahan? Para ki Jehova, an lambang saro mahalagang marhay. Makamomondo, bakong gabos arog kaiyan an pagmate, minsan manongod sa saindang sadiri. Dakol an naheheling sana an saindang personal na mga depekto asin pagkabakong sangkap. Tanganing maparigon an boot kan mga siring​—asin kan iba pa—​puede daw niatong pagmaigotan na kaolayon an saro o duwa katawo sa kada pagtiripon, na ipinaaaram sa sainda kun taano ta pinahahalagahan niato an saindang presensia asin an importanteng tabang ninda sa kongregasyon? Kanigoan na kagayagayahan na pagianon an pagabat sa sainda sa paaging ini asin sa siring maotob an ley kan Cristo!​—Galacia 6:2.

Nagkakaepekto an Ley kan Cristo!

17. Sa anong laen-laen na paagi nindo naheheling na nagkakaepekto an ley kan Cristo sa saindong kongregasyon?

¹⁷ Nagkakaepekto an ley kan Cristo sa Kristianong kongregasyon. Naheheling niato iyan aroaldaw​—kun an mga kapwa Saksi galagang nagdadara kan maogmang bareta sa iba, kun sinda nagririnangahan asin nagpaparinigonan nin boot, kun sinda naghihingoa na maglingkod ki Jehova sa ibong kan pinakamasakit na mga problema, kun an mga magurang nagmamaigot na padakulaon an saindang mga aki na kamotan si Jehova paagi sa magayagayang puso, kun an mga paraataman nagtotokdo kan Tataramon nin Dios na may pagkamoot asin init, na dinadagka an aripompon na magkaigwa nin malaad na kaigotan na maglingkod ki Jehova sagkod lamang. (Mateo 28:​19, 20; 1 Tesalonica 5:​11, 14) Kun kita bilang mga indibiduwal pinapag-eepekto an ley kan Cristo sa satong buhay, kanigoan an kagayagayahan kan puso ni Jehova! (Talinhaga 23:15) Boot nia na an gabos na namomoot sa saiyang sangkap na ley mabuhay sagkod lamang. Sa maabot na Paraiso, makaheheling kita nin panahon na an katawohan sangkap na, panahon na mayo nin mga paralapas nin ley, asin panahon na napopogolan na an lambang tendensia kan satong puso. Kanigoan kamamuraway na balos para sa pamumuhay sono sa ley kan Cristo!

[Nota sa Ibaba]

Ano sa Paghona Nindo?

◻ Taano ta dai nasabotan kan Kakristianohan an ley kan Cristo?

◻ Paano niato mapaeepekto an ley kan Cristo sa pamilya?

◻ Tanganing ikaaplikar an ley kan Cristo sa kongregasyon, ano an dapat niatong likayan, asin ano an dapat niatong gibohon?

◻ Paano makukuyog kan kamagurangan an ley kan Cristo sa saindang gawe sa kongregasyon?

[Retrato sa pahina 23]

An saindong aki nangangaipong gayo nin pagkamoot

[Retrato sa pahina 24]

Abaa kanakagiginhawa kan satong mamomoton na mga pastor!