Ginibo Ninda an Kabotan ni Jehova

Sarong Gikan sa Boot na Dolot sa Pagpaoswag kan Dalisay na Pagsamba

NAHELING mismo kan mga Israelita an nagliligtas na kapangyarihan ni Jehova. Naheling ninda na binanga sa milagrosong paagi an Dagat na Pula, na nagtogot sa sainda na magbalyo sa marang daga asin makadulag sa hukbo nin Egipto. Sa ibong na kampi, napagmasdan ninda sa salbado nang distansia mantang an iyo man sanang katubigan tuminahob sa mga naglalapag sa sainda. Ilinigtas ni Jehova an saindang buhay!—Exodo 14:21-31.

Pero makamomondo, binali-wala kan nagkapirang Israelita an ginibo kan saindang Dios. Mantang si Moises nasa Bukid nin Sinai, itinao ninda an saindang bulawan na mga alahas ki Aaron asin naghagad na gumibo sia nin idolo tangani na sambahon ninda. Kan makabalik, nanompongan ni Moises an kadaklan na ini nin mga rebelde na nagkakarakan, nag-iirinom, nagbabarayle, asin naghuhuruhod sa sarong bulawan na ogbon na baka! Sa pagdirehir ni Jehova mga 3,000—posibleng an pangenot na mga pundador kan pagrebelde—an ginadan. Kan aldaw na idto, an banwaan nin Dios nakanood nin mahalagang leksion manongod sa pangangaipo na itao ki Jehova an eksklusibong debosyon.—Exodo 32:1-6, 19-29.

Dai nahaloy pakalihis kan pangyayaring ini, si Moises nag-andam na gibohon an pagboot nin Dios na magtogdok nin tabernakulo, sarong aroalsang tolda nin pagsamba. An proyektong ini nin pagtotogdok mangangaipo nin mamahalon na materyales asin ekspertong mga trabahador. Saen kukuanon an mga ini? Asin ano an manonodan niato sa pagkasaysay na ini sa Biblia?

Kontribusyon na Materyales Asin mga Abilidad

Paagi ki Moises, pinagbotan ni Jehova an mga Israelita: “Kumua kamo . . . nin kontribusyon para ki Jehova. An lambang gusto an puso magdara kaiyan bilang kontribusyon ki Jehova.” Anong klaseng kontribusyon? Kabilang sa mga bagay na ilinista ni Moises an bulawan, pirak, tanso, mga ilo, tela, anit, kahoy, asin mahal na marhay na mga tampok.—Exodo 35:5-9.

An mga Israelita igwa nin labi kisa kaipuhan tanganing magibo an siring na buka an palad na kontribusyon. Girumdomon, kan sinda naghale sa Egipto, sinda nagdara nin mga bagay na bulawan asin pirak, saka dakol na gubing. Tunay nanggad, “hinubaan ninda an mga Egipcio.”a (Exodo 12:35, 36) Kaidto, an mga Israelita boluntad na itinao an saindang mga alahas tanganing gibohon na idolo para sa falsong pagsamba. Ipaheheling daw ninda ngonyan na sinda kapareho kagalaga sa pagtao nin dolot sa pagpaoswag kan tunay na pagsamba?

Mangnoha na si Moises dai nagsabi nin eksaktong kantidad na maninigong itao nin kada saro, ni nangonsensia o nansupog man sia tanganing motibaron an pagtao. Imbes, nakiolay sana sia sa “lambang gusto an puso.” Malinaw na dai nagsaboot si Moises na kaipuhan na piriton an banwaan nin Dios. Kompiado sia na itatao kan balang saro an bilog niang makakaya.—Ikomparar an 2 Corinto 8:10-12.

Minsan siring, an proyekto sa pagtotogdok mangangaipo nin labi kisa donasyon na materyales sana. Sinabihan man ni Jehova an mga Israelita: “An gabos na madonong an puso dian sa saindo pumadigdi asin gumibo kan gabos na ipinagboot ni Jehova.” Iyo, an proyektong ini nin pagtotogdok nangaipo nin ekspertong trabaho. Tunay nanggad, “lambang klase nin paggibo nin kamot”—kabale na an pagpanday nin kahoy, pagpanday nin metal, asin paggibo nin alahas—kakaipuhanon tanganing mahaman an proyektong ini. Siempre, si Jehova an naggigiya sa mga talento kan mga trabahador, asin an kaomawan para sa kapangganahan kan proyekto tamang mapasaiya.—Exodo 35:10, 30-35; 36:1, 2.

An mga Israelita galagang naghimate sa pangagdang itao kapwa an saindang kayamanan asin an saindang abilidad. An pagkasaysay kan Biblia nagsasabi: “Sinda nagdaratong, an gabos na pinahiro kan saiyang puso, asin sinda nagdara, an gabos na pinukaw kan saiyang espiritu, nin kontribusyon ki Jehova para sa paggibo sa tolda nin katiriponan asin para sa gabos na paglilingkod dian asin para sa banal na mga gubing. Asin sinda nag-arabot, an mga lalaki kaiba an mga babae, an lambang gusto an puso.”—Exodo 35:21, 22.

Leksion Para sa Sato

Ngonyan an dakulaon na gibohon na paghuhulit kan maogmang bareta kan Kahadean nin Dios nahahaman paagi sa boluntaryong mga donasyon. Sa kadaklan, ini kuarta. Sa nagkapirang kaso, ginagamit kan Kristianong mga tugang na lalaki asin babae an saindang abundang eksperyensia sa pagtabang sa pagtogdok nin mga Kingdom Hall, Assembly Hall, asin mga pasilidad sa sangang opisina. Dangan yaon an mga gibohon sa labing sanggatos na erokan na Bethel sa bilog na kinaban, gibohon na kalabot an dakol na laen-laen na abilidad. An gabos na gusto an puso na nagtao kan siring na dolot makasesegurado na dai lilingawan ni Jehova an saindang kahigosan!—Hebreo 6:10.

Aplikado man iyan sa kabtang kan kada saro sa sato sa Kristianong ministeryo. An gabos sinasadol na tuboson an panahon na magkaigwa nin maigot na kabtang sa paghuhulit. (Mateo 24:14; Efeso 5:15-17) An nagkapira ginigibo ini bilang bilog na panahon na mga paraebanghelyo, o payunir. Huli sa mga kamugtakan, an iba dai kayang magtao nin panahon sa ministeryo na arog kadakol kan sa payunir. Minsan siring, nakapaoogma man sinda ki Jehova. Kapareho kan pagkontribwir para sa tabernakulo, dai sinasabi nin eksakto ni Jehova an kantidad na maninigong itao nin kada saro. Pero an talagang hinahagad nia iyo na an kada saro sa sato maglingkod sa saiya sa bilog niatong puso, kalag, isip, asin kosog. (Marcos 12:30) Kun ginigibo niato iyan, masesegurado niato na babalosan nia kita huli sa gikan sa boot na dolot na ginibo niato sa pagpaoswag kan tunay na pagsamba.—Hebreo 11:6.

[Nota sa Ibaba]