Kaipuhan Niato an Organisasyon ni Jehova
MAY nadangog na daw kamong nagsabi na, “Nagtutubod ako sa Dios alagad sa organisadong relihion dai”? An kaagid na mga punto de vista parateng ipinahahayag nin mga indibiduwal na dati gustong-gustong magparasimba alagad nagin desganado dahelan ta dai ikinatatao kan saindang relihion an espirituwal na mga pangangaipo ninda. Minsan ngani nadedesganar sa relihiosong mga organisasyon sa pankagabsan, dakol an nag-iinsistir na gusto pa man giraray nindang sumamba sa Dios. Minsan siring, an paniwala ninda mas marahay na sambahon sia sa saindang sadiring paagi kisa gibohon iyan sa kaibanan nin sarong iglesia o iba pang organisasyon.
Ano an sinasabi kan Biblia? Boot daw nin Dios na an mga Kristiano asosyado sa sarong organisasyon?
An Enot na mga Kristiano Nakinabang sa Pagigin Organisado
Kan Pentecostes 33 C.E., ibinubo ni Jehova an saiyang banal na espiritu, bakong sa pipirang napapasuway na nagtutubod, kundi sa sarong grupo nin mga lalaki asin babae na nagtiripon “sa sarong lugar,” arin na baga, sa sarong kuarto sa itaas sa siudad nin Jerusalem. (Gibo 2:1) Kan panahon na idto, an Kristianong kongregasyon, na nagin internasyonal na organisasyon, naestablisar. Ini nagin tunay na bendisyon para sa enot na mga disipulong idto. Taano? Enot, sinda tinawan nin importanteng asignasyon—an paghuhulit kan maogmang bareta kan Kahadean nin Dios na pag-abot nin panahon makakaabot “sa bilog na ineerokan na daga.” (Mateo 24:14) Sa kongregasyon an mga bagong nakombertir makakanood sa eksperyensiadong mga kapagtubod kun paano gigibohon an paghuhulit.
Dai nahaloy an mensahe kan Kahadean luminakop sagkod sa luwas nin Jerusalem. Sa pag-oltanan nin 62 asin 64 C.E., ginibo ni apostol Pedro an saiyang enot na surat sa mga Kristiano na “wararak sa Ponto, Galacia, Capadocia, Asia, asin Bitinia,” gabos yaon sa presenteng aldaw na Turkiya. (1 Pedro 1:1) Igwa man nin nagturubod sa Palestina, Libano, Siria, Chipre, Grecia, Creta, asin Italia. Siring kan isinurat ni Pablo sa mga taga Colosas kan 60-61 C.E., an maogmang bareta “ikinahulit sa gabos na linalang sa sirong nin langit.”—Colosas 1:23.
An ikaduwang pakinabang sa pag-asosyar sa organisasyon iyo an pagparigon sa boot na ikatatao nin mga Kristiano sa lambang saro. Sa pakikiasosyar sa kongregasyon, an mga Kristiano makadadangog nin nakaiinspirar na mga pahayag, iribang makakapag-adal kan Sagradong Kasuratan, makapag-eestorya nin mga eksperyensia na nakapakokosog sa pagtubod, asin makakaayon sa mga kapagtubod sa pamimibi. (1 Corinto, kapitulo 14) Asin an maygurang na mga lalaki puedeng “pastoran an aripompon nin Dios.”—1 Pedro 5:2.
Bilang mga miembro kan kongregasyon, an mga Kristiano nagkamiridbidan man asin nagkaminorootmootan. Imbes na magabatan sa saindang pakikiasosyar sa kongregasyon, an enot na mga Kristiano naparigon asin napakosog kaiyan.—Gibo 2:42; 14:27; 1 Corinto 14:26; Colosas 4:15, 16.
An saro pang rason na kinaipuhan an sararong pambilog na kinaban na kongregasyon, o organisasyon, iyo na tanganing paoswagon an pagkasararo. An mga Kristiano nakanood na “magtaram na may pagkaoroyon.” (1 Corinto 1:10) Mahalagang marhay ini. An mga miembro kan kongregasyon magkakalaen an edukasyon asin kamugtakan sa sosyedad. Magkakalaen an saindang lenguahe, asin risang-risa an pagkakalaen ninda nin personalidad. (Gibo 2:1-11) Kun beses, igwa nin totoong dai pagkakaoyon nin opinyon. Minsan siring, an mga Kristiano natabangan na resolberan an siring na dai pagkakaoyon sa laog kan kongregasyon.—Gibo 15:1, 2; Filipos 4:2, 3.
An seryosong mga problema na dai maresolberan nin lokal na kamagurangan ikinonsulta sa maygurang na nagbibiaheng mga paraataman, arog ki Pablo. An mahalagang marhay na mga bagay may labot sa doktrina ikinonsulta sa sarong sentral na namamahalang grupo na yaon sa Jerusalem. An namamahalang grupo sa primero kompuesto kan mga apostol ni Jesu-Cristo alagad kan huri iiniba an kamagurangan na lalaki kan kongregasyon sa Jerusalem. Rinekonoser kan lambang kongregasyon an tao nin Dios na autoridad kan namamahalang grupo asin kan mga representante kaiyan na organisaron an ministeryo, magnombra nin mga lalaki sa mga katongdan nin paglilingkod, asin gumibo nin mga desisyon dapit sa mga bagay may labot sa doktrina. Kan an sarong isyu maresolberan kan namamahalang grupo, inako kan mga kongregasyon an desisyon asin “ipinaggayagaya ninda an pagparigon sa boot.”—Gibo 15:1, 2, 28, 30, 31.
Iyo, si Jehova may ginamit na organisasyon kan enot na siglo. Alagad kumusta man ngonyan?
Kaipuhan Niato an Organisasyon Ngonyan
Arog kan mga kapareho ninda kan enot na siglo, an Mga Saksi ni Jehova ngonyan sineseryoso an sugo na ihulit an maogmang bareta kan Kahadean. An sarong paagi na ginigibo ninda ini iyo an pagwaras nin mga Biblia asin pantabang sa pag-adal kan Biblia, na nagkakaipo nin organisasyon.
An Kristianong mga publikasyon dapat na maingat na ipreparar, berepikaron tanganing magin tama, imprentahon, dangan ihatod sa mga kongregasyon. An indibiduwal na mga Kristiano man dapat na magboluntaryo na darahon an mga babasahon sa mga gustong magbasa kaiyan. An mensahe kan Kahadean nakaabot sa minilyon sa paaging ini. An mga parahayag kan maogmang bareta nagmamaigot na gibohon an saindang paghuhulit sa aregladong paagi, na sinesegurado na mayong kabtang kan teritoryo an pirepirmeng nagigibo mantang an iba napapabayaan. Ini gabos nagkakaipo nin organisasyon.
Mantang “an Dios daing ipinaoorog,” an mga Biblia asin babasahon sa Biblia dapat na itradusir. (Gibo 10:34) Sa presente, an magasin na ini makukua sa 132 na lenguahe, asin an kaiba kaiyan, an Awake!, ipinupublikar sa 83 na lenguahe. Iyan nagkakaipo nin marahay an pagkaorganisar na mga grupo nin paratradusir sa bilog na kinaban.
An mga miembro kan kongregasyon nag-aako nin pagparigon sa boot kun sinda nag-aatender sa Kristianong mga pagtiripon asin asamblea. Dian sinda nakadadangog nin nakaaanimar na mga pahayag sa Biblia, iribang nag-aadal kan Kasuratan, nagriribayan nin nakapakokosog na mga eksperyensia, asin minaiba sa mga kapwa parasamba sa pamimibi. Asin kapareho kan saindang mga tugang kan enot na siglo, napakokosog an saindang pagtubod sa mga pagsongko kan mamomoton na nagbibiaheng mga paraataman. Sa siring, an mga Kristiano ngonyan “sarong aripompon, sarong pastor.”—Juan 10:16.
Siempre, an Mga Saksi ni Jehova bakong sangkap, ni an enot na mga kapareho ninda. Sa ibong kaiyan, sinda nagtatarabangan na may pagkasararo. Bilang resulta, an paghuhulit kan Kahadean nagigibo sa bilog na daga.—Gibo 15:36-40; Efeso 4:13.
[Ritrato sa pahina 31]
An mga Kristiano ngonyan “sarong aripompon, sarong pastor”