Bareta kan mga Parabalangibog kan Kahadean
Pagtabang sa Gabos na Klase nin Tawo sa Netherlands
SI Abraham sarong tawo na pambihira an pagtubod. “Kan sia apodon,” sabi ni apostol Pablo, kinuyog ni Abraham an tingog nin Dios asin “luminuwas, minsan ngani dai aram kun saen sia maduman.” Pakatapos na ibalyo an saiyang enterong pamilya, si Abraham “nag-erok bilang dayo sa daga kan panuga” sa laog kan natada pang sanggatos na taon kan saiyang buhay.—Hebreo 11:8, 9.
Siring man ngonyan, inako kan dakol na Saksi ni Jehova an angat nin pagbalyo sa ibang nasyon tanganing maglingkod kun saen mas dakula an pangangaipo. An iba nag-adal nin ibang lenguahe tanganing makapatotoo sinda sa mga dayong nag-imigrar sa saindang nasyon. Siring sa ipinaheheling kan minasunod na mga halimbawa, an marahay na aktitud na ini nagbukas nin “sarong dakulang tata na pasiring sa gibohon” sa Netherlands, kun saen an sarong milyon sa 15 milyones na habitante hale sa ibang kadagaan.—1 Corinto 16:9.
◻ Si Bahram, sarong dating instruktor sa Kung Fu, hale sa sarong nasyon sa Tahaw na Sirangan. Nagkua sia nin kopya kan Biblia asin nagkapirang publikasyon kan Watch Tower. Mayo pang sambulan, narealisar ni Bahram na saiya nang nanompongan an katotoohan. Naponan an pag-adal sa saiya asin sa saiyang agom, alagad may problema—an nagtotokdo sa sainda sa Biblia dai tataong magtaram kan saindang lenguahe. Sinda nagkomunikar paagi sa mga mustra, na nagtataram “paagi sa mga kamot asin bitis,” an natatandaan ninda. Pag-abot nin panahon, si Bahram asin an saiyang agom nakahanap nin kongregasyon kun saen an saindang propiong lenguahe an ginagamit, asin pakalihis kaiyan marikas an saindang pag-oswag. Si Bahram ngonyan saro nang bautisadong Saksi.
◻ An sarong Holandes na mag-agom na payunir rinani an sarong Indonesiano na nagtitindog sa atubangan nin sarong supermarket. Maogma siang nasorpresa kan kaolayon sia kan mag-agom sa saiyang sadiring lenguahe. Dangan naggibo nin mga areglo na dalawon sia sa saiyang harong. Naaraman na nag-erok sia sa Rusya sa laog nin labing 20 taon, na durante kaiyan sia nagin ginekologo. Sinabi nia na sia ateista, alagad inadmitir nia na kada magpaaki sia nin sarong omboy, dai nia mapogolan na magngalas, “Kanigoan kasangkap an hawak nin tawo! Kanigoan na milagro!” Uminoyon sia na mag-adal sa Biblia asin dai nahaloy naniwala sia na igwa nin Kaglalang na may pagmakolog sa katawohan. (1 Pedro 5:6, 7) Ngonyan saro na siang bautisadong tugang asin naglilingkod kaiba kan kongregasyon na Indonesiano sa Amsterdam.
◻ Sa Rotterdam, saro sa pinakadakulang pier sa kinaban, an sarong grupo nin mga payunir nagin eksperto sa paghuhulit sa laen-laen na grupo nin lenguahe na nagduduong aroaldaw. Bilang resulta kan aktibidad kan entusiastikong grupong ini nin mga parahulit, nagkapirang marinero, kabale an sarong kapitan, opisyal na marinero, asin sarong dating bantay, an nag-ako kan katotoohan. Ngonyan sinda nagtatabang na man na ilakop an maogmang bareta kan Kahadean nin Dios sa bilog na kinaban.—Mateo 24:14.
Arog sa iba pang parte kan kinaban, an Mga Saksi ni Jehova sa Netherlands determinado na gibohon an saindang kabtang sa pagbalangibog kan daing katapusan na maogmang bareta sa gabos na nasyon, tribo, tataramon, asin banwaan.—Kapahayagan 14:6.