An Satong Mahalagang Marhay na Mana—Ano an Kahulogan Kaiyan Para sa Saindo?
“Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan pagtugdas kan kinaban.”—MATEO 25:34.
1. Anong klaseng mga pamana an inako nin mga tawo?
AN GABOS na tawo igwa nin mga minana. Para sa nagkapira tibaad kaiba sa mana an pamumuhay na may materyal na kaginhawahan. Para sa iba iyan sarong buhay nin kadukhaan. Sa nagkapirang kaso, an naenot na mga henerasyon, dahel sa naeksperyensiahan o nadangog ninda, nagwalat nin pamanang makosogon na pagkaongis sa ibang grupong etniko. Minsan siring, may sarong bagay na igwa kita gabos. Kita gabos nag-ako sa enot na tawo, si Adan, nin pamana na kasalan. An pamana na iyan sa kahurihurihi nagbubunga nin kagadanan.—Eclesiastes 9:2, 10; Roma 5:12.
2, 3. Anong mana an sa primero pa sana ginibo nang posible ni Jehova para sa mga aki ni Adan asin Eva, asin taano ta dai sinda nag-ako kaiyan?
2 Si Jehova, bilang mamomoton na langitnon na Ama, sa primero pa sana tinawan na an katawohan nin laen nanggad na mana—sangkap na buhay na daing sagkod sa Paraiso. An enot niatong mga magurang, si Adan asin Eva, tinawan nin sangkap, daing kasalan na kapinonan. Itinao ni Jehova Dios sa katawohan an planetang Daga bilang regalo. (Salmo 115:16) Saiyang itinao an tatamnan nin Eden bilang sampol kan magigin kamugtakan kan enterong globo asin ibinugtak sa atubangan kan satong enot na mga magurang an makangangalas, kawiliwiling asignasyon. Sinda mangangaki, saindang aatamanon an daga asin an gabos na laen-laen na tinanom asin hayop dian, asin pahihiwason an mga linderos kan Paraiso sa bilog na globo. (Genesis 1:28; 2:8, 9, 15) Makikikabtang digdi an saindang mga aki. Kanigoan kamakangangalas na pamanang ikatatao sainda!
3 Minsan siring, tanganing kamtan ninda an gabos na ini, si Adan asin Eva patin an saindang mga aki kaipuhan na magkaigwa nin marahay na relasyon sa Dios. Utang ninda ki Jehova an pagkamoot asin pagkuyog, alagad dai napahalagahan ni Adan asin Eva an itinao sa sainda nin Dios asin sinuway an saiyang togon. Nawara ninda an saindang Paraisong erokan asin an mamuraway na mga paglaom na ibinugtak nin Dios sa atubangan ninda. Kun siring, an mga ini dai ninda ikapamamana sa saindang mga aki.—Genesis 2:16, 17; 3:1-24.
4. Paano niato makakamit an mana na iwinara ni Adan?
4 Salamat sana ta si Jehova naggibo nin probisyon tanganing an mga aki ni Adan asin Eva magkaoportunidad na mag-ako kan mana na iwinara ni Adan. Paano? Sa itinalaan na panahon nin Dios, an saiya mismong Aki, si Jesu-Cristo, itinao an saiyang sangkap na buhay bilang tawo para sa mga aki ni Adan. Paagi kaini sinda gabos binakal ni Cristo. Minsan siring, an mana dai automatikong napapasainda. Kaipuhan na sinda igwa nin aprobadong kamugtakan sa atubangan nin Dios, na puede nindang kamtan paagi sa paggibo nin pagtubod sa nakatutubos nin kasalan na halaga kan atang ni Jesus asin pagpaheling kan pagtubod na iyan paagi sa pagkuyog. (Juan 3:16, 36; 1 Timoteo 2:5, 6; Hebreo 2:9; 5:9) An saindo daw na pamumuhay nagpapaheling nin pagpapahalaga sa probisyon na iyan?
Pamana na Itinao Paagi ki Abraham
5. Paano si Abraham nagpaheling nin pagpapahalaga sa saiyang relasyon ki Jehova?
5 Mantang ginigibo nia an saiyang katuyohan para sa daga, trinatar ni Jehova si Abraham sa sarong espesyal na paagi. Pinagbotan nia an fiel na tawong iyan na humale sa saiyang nasyon asin bumalyo sa sarong daga na ipaheheling mismo nin Dios sa saiya. Si Abraham gikan sa boot na nagkuyog. Pag-abot duman ni Abraham, sinabi ni Jehova na an mga aki ni Abraham, bakong si Abraham mismo, an maako kan daga bilang pamana. (Genesis 12:1, 2, 7) Ano an nagin reaksion ni Abraham? Sia andam na maglingkod ki Jehova saen man asin gurano man an ipagboot nin Dios tanganing an saiyang mga aki mag-ako kan pamana sa sainda. Si Abraham naglingkod ki Jehova sa sarong daga na bako nia sa laog nin 100 na taon, sagkod na sia nagadan. (Genesis 12:4; 25:8-10) Iyan man daw kutana an gigibohon nindo kaidto? Si Jehova nagsabi na si Abraham “katood” nia.—Isaias 41:8.
6. (a) Ano an ipinaheling ni Abraham paagi sa saiyang pagigin andam na iatang an saiyang aki? (b) Anong mahalagang marhay na pamana an ikatatao ni Abraham sa saiyang mga aki?
6 Dakol na taon an hinalat ni Abraham na magkaigwa nin aki, si Isaac, na namotan niang marhay. Kan an aki malinaw na soltero na, pinagbotan ni Jehova si Abraham na kuanon an aki asin idolot sia bilang atang. Dai aram ni Abraham na an ipaheheling nia iyo an gigibohon mismo nin Dios sa pagtao kan saiyang Aki bilang pantubos; pero, sia nagkuyog asin idodolot na kutana si Isaac bilang atang kan pogolan sia kan anghel ni Jehova. (Genesis 22:9-14) Sinabi na ni Jehova na an saiyang mga panuga ki Abraham maootob paagi ki Isaac. Huli kaini, si Abraham malinaw na may pagtubod na, kun kinakaipuhan, kayang buhayon liwat nin Dios si Isaac, minsan ngani dai pa noarin man ginibo an siring na bagay bago kaidto. (Genesis 17:15-18; Hebreo 11:17-19) Huling dai isinayuma ni Abraham minsan an saiyang aki, si Jehova nagpahayag: “Paagi sa saimong banhi an gabos na nasyon sa daga magbebendisyon nanggad kan saindang sadiri.” (Genesis 22:15-18) Ipinaheling kaini na an Banhi na nasambitan sa Genesis 3:15, an Mesiyanikong paraligtas, madatong paagi sa linahe ni Abraham. Kanigoan kahalagang pamana na ikatatao!
7. Paano si Abraham, Isaac, asin Jacob nagpaheling nin pagpapahalaga sa pamana sa sainda?
7 Dai aram ni Abraham an kahulogan kan ginigibo kaidto ni Jehova; ni kan saiyang aking si Isaac ni kan saiyang makoapong si Jacob, na nagin “mga kapwa nia paramana sa iyo man sanang panuga.” Alagad sinda gabos may kompiansa ki Jehova. Dai ninda iinasosyar an saindang sadiri sa arin man kan mga siudad na kahadean sa daga huli ta may hinahalat sinda na orog karahay—“an siudad na may tunay na mga pundasyon, na an paratogdok asin kaggibo kan siudad na iyan iyo an Dios.” (Hebreo 11:8-10, 13-16) Pero, bakong gabos na aki ni Abraham nagpahalaga sa dakulang kahalagahan kan pamana na makakamtan paagi ki Abraham.
Nagkapira na Nagbasangbasang sa Pamana
8. Paano ipinaheling ni Esau na dai sia nagpahalaga sa dakulang kahalagahan kan pamana sa saiya?
8 Si Esau, an matuang aki ni Isaac, dai nagpahalaga sa saiyang diretso bilang panganay. Dai sia nagpahalaga sa sagradong mga bagay. Kaya sarong aldaw kan nagugutom si Esau, ipinabakal nia an saiyang diretso bilang panganay sa saiyang tugang, si Jacob. Karibay nin ano? Nin sarong kakanon na tinapay asin ginagang lenteha! (Genesis 25:29-34; Hebreo 12:14-17) An nasyon na dian maootob an mga panuga nin Dios ki Abraham naggikan ki Jacob, na an ngaran sinalidahan nin Dios nin Israel. Anong mga oportunidad an binuksan para sa sainda kan partikular na pamana na iyan?
9. Dahel sa espirituwal na pamana sa sainda, anong pagliligtas an naeksperyensiahan kan mga aki ni Jacob, o ni Israel?
9 Durante nin sarong taggutom, si Jacob asin an saiyang pamilya buminalyo sa Egipto. Duman duminakol nanggad sinda, alagad sinda nagin man mga oripon. Minsan siring, dai liningawan ni Jehova an saiyang tipan ki Abraham. Sa itinalaan na panahon nin Dios, ilinigtas nia an mga aki ni Israel sa pagkaoripon asin pinaisi sinda na dadarahon nia sinda sa “daga na nagbobolos nin gatas asin tangguli,” an daga na ipinanuga nia ki Abraham.—Exodo 3:7, 8; Genesis 15:18-21.
10. Sa Bukid nin Sinai, ano pa an pambihirang mga nangyari may koneksion sa pamana sa mga aki ni Israel?
10 Kan an mga aki ni Israel pasiring na sa Dagang Panuga, tinipon sinda ni Jehova sa Bukid nin Sinai. Duman sinabihan nia sinda: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri hale sa gabos na ibang banwaan, huli ta sadiri ko an bilog na daga. Asin kamo mismo magigin kahadean nin mga saserdote asin banal na nasyon para sa sako.” (Exodo 19:5, 6) Pakatapos na an banwaan boluntad asin sararo na uminoyon digdi, itinao ni Jehova sa sainda an saiyang Ley—sarong bagay na dai nia ginibo sa arin man na ibang banwaan.—Salmo 147:19, 20.
11. Ano an nagkapira sa mahalagang marhay na mga bagay na kabale sa espirituwal na mana kan mga aki ni Israel?
11 Kanigoan na espirituwal na mana kan bagong nasyon na iyan! Nagsamba sinda sa iyo sanang tunay na Dios. Ilinigtas nia sinda sa Egipto asin naheling mismo ninda an makangingirhat na mga pangyayari kan an Ley itao sa Bukid nin Sinai. An saindang mana orog pang nadagdagan mantang inaako ninda paagi sa mga propeta an dugang pang “sagradong mga tataramon nin Dios.” (Roma 3:1, 2) Pinili sinda ni Jehova na magin saiyang mga saksi. (Isaias 43:10-12) An Mesiyanikong Banhi sa nasyon ninda maluwas. An Ley sia an pinanongdan, ipinamidbid sia, asin maninigong tumabang sa sainda na masabotan an pangangaipo ninda sa saiya. (Galacia 3:19, 24) Dugang pa, sinda tatawan nin oportunidad na maglingkod kaibanan kan Mesiyanikong Banhi na iyan bilang kahadean nin mga saserdote asin sarong banal na nasyon.—Roma 9:4, 5.
12. Minsan ngani naglaog sinda sa Dagang Panuga, ano an dai naeksperyensiahan kan mga Israelita? Taano?
12 Inootob an saiyang panuga, giniyahan ni Jehova an mga Israelita pasiring sa Dagang Panuga. Alagad arog kan ipinaliwanag ni apostol Pablo kan huri, huli sa kadaihan ninda nin pagtubod, an daga na idto dai nagin totoong “lugar nin kapahingaloan.” Bilang sarong banwaan, sinda dai naglaog sa “kapahingaloan nin Dios” huli ta dai sinda nakamansay asin naghiro kaoyon sa katuyohan kan aldaw nin kapahingaloan mismo nin Dios, na nagpoon pagkalalang ki Adan asin Eva.—Hebreo 4:3-10.
13. Dahel sa dai pagpahalaga sa espirituwal na mana ninda, ano an iwinara kan Israel bilang nasyon?
13 Puede kutanang nakompleto kan Israel sa laman an bilog na kabilangan kan mga makakaibanan kan Mesiyas sa saiyang langitnon na Kahadean bilang kahadean nin mga saserdote asin banal na nasyon. Alagad dai ninda pinahalagahan an mahalagang marhay na mana ninda. Solamente sarong natatada kan mga Israelita sa laman an nag-ako sa Mesiyas kan sia dumatong. Bilang resulta, solamente sarong sadit na kabilangan an iiniba sa ihinulang kahadean nin mga saserdote. An Kahadean hinale sa Israel sa laman asin ‘itinao sa nasyon na nagpapaluwas kan mga bunga kaiyan.’ (Mateo 21:43) Anong nasyon iyan?
Sarong Mana sa Kalangitan
14, 15. (a) Kasunod kan pagkagadan ni Jesus, paano pinonan kan mga nasyon na bendisyonan an saindang sadiri paagi sa “banhi” ni Abraham? (b) Ano an inaako kan mga miembro kan “Israel nin Dios” bilang pamana?
14 An nasyon na tinawan kan Kahadean iyo an “Israel nin Dios,” an espirituwal na Israel, na kompuesto nin 144,000 na pinaniaki nin espiritung mga parasunod ni Jesu-Cristo. (Galacia 6:16; Kapahayagan 5:9, 10; 14:1-3) An nagkapira sa 144,000 mga Judio sa laman, alagad an kadaklan hale sa mga nasyon na Hentil. Sa paaging iyan an panuga ni Jehova ki Abraham, na paagi sa saiyang “banhi” an gabos na nasyon bebendisyonan, nagpoon na maotob. (Gibo 3:25, 26; Galacia 3:8, 9) Sa enot na kaotoban na iyan, an mga tawo kan mga nasyon linahidan nin banal na espiritu asin pinaniaki ni Jehova Dios bilang espirituwal na mga aki, mga tugang ni Jesu-Cristo. Sa siring, sinda man nagin sekondaryong kabtang kan “banhi” na iyan.—Galacia 3:28, 29.
15 Bago sia nagadan, iinintrodusir ni Jesus sa magigin Judiong mga miembro kan bagong nasyon na iyan an bagong tipan, na gigibohon na balido paagi sa saiya mismong dugo. Basado sa saindang pagtubod sa nagpapagin balido na atang na iyan, an mga dinara sa tipan na iyan gigibohon na “sangkap nin daing kasagkoran.” (Hebreo 10:14-18) Sinda ‘ikapahahayag nang matanos’ asin mapatatawad na an saindang mga kasalan. (1 Corinto 6:11) Sa siring, sa sentidong iyan sinda kapareho ni Adan bago sia nagkasala. Minsan siring, an mga ini dai mag-eerok sa sarong daganon na paraiso. Si Jesus nagsabi na aandaman nia sinda nin lugar sa langit. (Juan 14:2, 3) Binubutasan ninda an daganon na mga oportunidad ninda tanganing magkaigwa nin ‘mana na nakatagama sa kalangitan para sa sainda.’ (1 Pedro 1:4) Ano an gigibohon ninda duman? Nagpaliwanag si Jesus: “Ako nakikipagtipan sa saindo . . . para sa sarong kahadean.”—Lucas 22:29.
16. Anong makangangalas na asignasyon nin paglilingkod an naghahalat sa linahidan na mga Kristiano?
16 Gikan sa kalangitan, an mga mamamahala kaiba ni Cristo matabang, kabilang sa iba pang bagay, na haleon sa daga an gabos na gira nin rebelyon tumang sa soberaniya ni Jehova. (Kapahayagan 2:26, 27) Bilang sekondaryong kabtang kan espirituwal na banhi ni Abraham, makikikabtang sinda sa pagtao kan bendisyon na sangkap na buhay sa mga tawo kan gabos na nasyon. (Roma 8:17-21) Kanigoan kahalagang pamana an yaon sainda!—Efeso 1:16-18.
17. Anong mga aspekto kan saindang mana an yaon na sa linahidan na mga Kristiano mantang nasa daga pa?
17 Alagad an mana kan linahidan na mga parasunod ni Jesus bakong gabos sa ngapit pa. Sa paagi na daing ibang makagigibo, tinabangan sinda ni Jesus na mamidbid si Jehova, an iyo sanang tunay na Dios. (Mateo 11:27; Juan 17:3, 26) Paagi sa tataramon asin halimbawa, itinokdo nia sainda kun ano an kahulogan kan ‘pagtitiwala ki Jehova’ asin kun ano an kalabot sa pagkuyog ki Jehova. (Hebreo 2:13; 5:7-9) Pinaniwalaan sinda ni Jesus nin kaaraman sa katotoohan may labot sa katuyohan nin Dios asin inasegurar nia sinda na an banal na espiritu gigiyahan sinda na magkaigwa nin orog pang pakasabot dian. (Juan 14:24-26) Idinoon nia sa saindang isip asin puso an importansia kan Kahadean nin Dios. (Mateo 6:10, 33) Pinaniwalaan man sinda ni Jesus kan asignasyon na magpatotoo asin gumibo nin mga disipulo sa mga tawo sa Jerusalem, Judea, Samaria, asin sa kaporoporohi kan daga.—Mateo 24:14; 28:19, 20; Gibo 1:8.
Sarong Mahalagang Marhay na Mana Para sa Dakulang Kadaklan
18. Sa anong paagi na naootob na ngonyan an panuga ni Jehova na an gabos na nasyon magbebendisyon kan saindang sadiri paagi sa “banhi” ni Abraham?
18 Posibleng marhay na an bilog na kabilangan kan espirituwal na Israel, an “sadangoton na aripompon” na iyan nin mga magmamana kan Kahadean, napili na. (Lucas 12:32) Sa laog nin dakol nang dekada ngonyan, tinawan ni Jehova nin atension an pagtipon sa sarong dakulang kadaklan nin iba pa hale sa gabos na nasyon. Sa siring, an panuga ni Jehova ki Abraham na paagi sa saiyang “banhi” an gabos na nasyon magbebendisyon kan saindang sadiri naootob na sa dakulang kabtang. Nakagagayagaya na an mga binendisyonan na ini nagtatao man nin sagradong paglilingkod ki Jehova asin rinerekonoser na an saindang kaligtasan nakadepende sa pagtubod sa Kordero nin Dios, si Jesu-Cristo. (Kapahayagan 7:9, 10) Inako na daw nindo an maboot na imbitasyon ni Jehova na magin kabtang kan maogmang grupo na iyan?
19. Anong mana an inaasahan kan mga nasyon na binebendisyonan na ngonyan?
19 Anong mahalagang marhay na mana an iinaalok ni Jehova sa mga bakong kabilang sa sadangoton na aripompon? Dai, bako iyan na pamana sa kalangitan. Iyan an mana na ikinatao kutana ni Adan sa saiyang mga aki—an paglaom na sangkap na buhay na daing sagkod sa sarong paraiso na luway-luway na malakop sa globo. Iyan magigin sarong kinaban kun saen “an kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:4) Kun siring, sa saindo nagtataram an ipinasabong na Tataramon nin Dios: “Magtiwala ka ki Jehova asin gumibo ka nin marahay; mag-erok ka sa daga, asin gumawe kang may pagigin fiel. Siring man magkaigwa nin labi-labi nanggad na pagkakontento dian ki Jehova, asin itatao nia sa saimo an mga kahagadan kan saimong puso. Asin dai na mahahaloy, asin ta an maraot mawawara na . . . Alagad an mga mahoyo mismo makasasadiri kan daga, asin manonompongan nanggad ninda an saindang nangongorog na na dakulang kaogmahan sa nagsosopay na katoninongan. An mga matanos mismo magmamana kan daga, asin sinda mag-eerok dian sagkod lamang.”—Salmo 37:3, 4, 10, 11, 29.
20. Paano nakakamtan kan “ibang karnero” an dakol sa espirituwal na mana kan linahidan na mga Kristiano?
20 An “ibang karnero” ni Jesus may mana sa daganon na rona kan langitnon na Kahadean. (Juan 10:16a) Maski ngani dai sinda mapapaduman sa kalangitan, an dakol sa espirituwal na mana na yaon sa mga linahidan itinatao man sainda. Paagi sa iribang grupo kan linahidan, “an fiel asin madonong na oripon,” nabuksan sa ibang karnero an pakasabot sa mahalagang marhay na mga panuga na yaon sa Tataramon nin Dios. (Mateo 24:45-47; 25:34) Bilang sarong grupo, an mga linahidan asin ibang karnero nakamimidbid asin nagsasamba sa iyo sanang tunay na Dios, si Jehova. (Juan 17:20, 21) Bilang sarong grupo, nagpapasalamat sinda sa Dios sa nakatutubos nin kasalan na halaga kan atang ni Jesus. Sinda iribang naglilingkod bilang sarong aripompon sa pangengenot nin sarong Pastor, si Jesu-Cristo. (Juan 10:16b) Sinda gabos kabtang nin sarong mamomoton, lakop sa globong kasararoan nin magturugang. Parareho sinda igwa kan pribilehio na pagigin mga Saksi ni Jehova asin kan saiyang Kahadean. Iyo, kun kamo sarong nagdusay asin bautisadong lingkod ni Jehova, an gabos na ini kaiba sa espirituwal na mana nindo.
21, 22. Paano niato gabos ikapaheheling na pinahahalagahan tang marhay an satong espirituwal na mana?
21 Gurano kahalaga an espirituwal na mana na ini para sa saindo? Pinahahalagahan daw nindo iyan nin igo tangani na gibohon an kabotan nin Dios na magin pinakaimportante sa saindong buhay? Bilang ebidensia kaiyan, kinukuyog daw nindo an hatol kan saiyang Tataramon asin kan saiyang organisasyon na magin regular sa pag-atender sa gabos na pagtiripon kan Kristianong kongregasyon? (Hebreo 10:24, 25) Mahalagang marhay daw para sa saindo an mana na iyan kaya kamo nagpapadagos sa paglilingkod sa Dios sa ibong nin kasakitan? An saindo daw na pagpapahalaga dian igo an kosog tanganing pasarigon kamo na labanan an ano man na sugot na gumawe sa paagi na tibaad magresulta sa pagkawara nindo kaiyan?
22 Logod na pahalagahan na marhay niato gabos an espirituwal na mana na itinao nin Dios sa sato. Mantang itinotorohok ta an satong mga mata sa Paraiso sa ngapit, makikabtang kita nin lubos sa espirituwal na mga pribilehio na itinatao ni Jehova sa sato ngonyan. Paagi sa talagang pagsentro kan satong buhay sa satong relasyon ki Jehova, kita nagtatao nin nakakokombensir na ebidensia sa kun gurano man nanggad kahalagang marhay para sa sato kan mana niato na itinao nin Dios. Logod na magin kabilang kita sa mga nagpapahayag: “Papahalangkawon taka, O sakuyang Dios na Hade, asin pag-oomawon ko an saimong ngaran sa panahon na daing katapusan, sagkod lamang pa ngani.”—Salmo 145:1.
Paano Nindo Ipaliliwanag?
• Kun si Adan nagin maimbod sa Dios, anong mana an ikinatao kutana nia sa sato?
• Paano minansay kan mga aki ni Abraham an pamana na yaon sa sainda?
• Ano an kaiba sa mana kan linahidan na mga parasunod ni Cristo?
• Ano an mana kan dakulang kadaklan, asin paano ninda ikapaheheling na talagang pinahahalagahan ninda iyan?
[Mga Ritrato sa pahina 20]
An mga aki ni Abraham nag-ako kan panuga na sarong mahalagang marhay na pamana
[Mga Ritrato sa pahina 23]
Pinahahalagahan daw nindo an saindong espirituwal na mana?