Pamumuhay na Yaon an mga Peligro
“Mayo nin ano man na bagay na magigibo nindo sa ordinaryong aldaw—kaiba an pagtorog—na daing peligro na magin an huring bagay na magigibo nindo.”—Magasin na Discover.
AN BUHAY ibinaing sa paglakaw sa lugar na tinalbongan nin mga bomba, huli ta an danyos o kagadanan puedeng umabot ano man na oras, na sa parate daing patanid. An mga dahelan nin peligro nagkakalaenlaen sa mga nasyon. Kaiba dian an mga aksidente sa trapiko, guerra sibil, gutom, AIDS, kanser, helang sa puso, asin kadakol pang iba. Halimbawa, sa parte nin Aprika sa timog kan Sahara, an AIDS nagin an numero unong dahelan nin kagadanan, na sa dai pa sana nahahaloy na taon “guminadan nin 2.2 milyones katawo, mas dakol nin 10 beses kisa nagadan sa gabos na guerra sibil sa Aprika,” an sabi kan U.S.News & World Report.
Mientras tanto, an kinaban naggagastos nin binilyon na kuarta sa pagpalawig nin buhay asin pag-ina sa peligro nin helang asin pagkabaldado. An dakol kan mga ideyang pinalalakop, siring baga kan marahay sa salud na mga ugale sa pagkakan asin pag-inom patin pisikal na ehersisyo, puedeng magbunga nin nagkapirang kapakipakinabang na resulta. Minsan siring, igwa nin sarong gikanan nin mapagtitiwalaan na impormasyon manongod sa gabos na mahalagang aspekto nin pamumuhay na puedeng makatabang sa saindo na kamtan an mas ligtas, mas tiwasay na buhay. An gikanan na iyan iyo an Biblia. Igwa iyan nin mga giya para sa pag-asikaso sa laen-laen na bagay na nakaaapektar sa satong salud asin ikararahay. Siempre, dai tinotokar nin detalyado kan Biblia an gabos na problema. Pero, talagang nagtatao iyan nin marahayon na mga prinsipyo tangani na giyahan kita sa mga bagay na arog baga nin mga ugale sa pagkakan, marahay na pisikal na salud, nasa isip na aktitud, sekso, paggamit nin alkohol, tabako, asin an pan-aling-aling daang mga droga, patin kadakol pang iba.
An buhay para sa dakol pinagagabatan man nin mga kadaihan nin kasegurohan sa pinansial. Magin sa bagay na ini sinusukorohan kita kan Biblia. Bako sanang talagang ineenkaminar kaiyan an madonong na pagmansay sa kuarta asin pagmanehar nin kuarta kundi ipinaheheling man kaiyan kun paano magigin mas marahay na empleyado o among. Sa simpleng pagtaram, an Biblia sarong marahay na giya, bako sanang para sa pinansial na seguridad asin pisikal na ikararahay, kundi para sa buhay mismo. Boot daw nindong maheling kun gurano kapraktikal kan Biblia ngonyan? Kun siring ipadagos tabi nindo an pagbasa.