Estorya nin Buhay
Pinangangatamanan ni Jehova sa Gabos na Aldaw kan Sakong Buhay
ISINAYSAY NI FORREST LEE
Kinompiskar pa sana kan mga pulis an samong mga ponograpo asin an samong mga babasahon sa Biblia. An Guerra Mundial II nagtao nin sarahotan sa mga paratumang na kombensiron an bagong gobernador-heneral kan Canada na ideklarar na ilegal an aktibidad kan Mga Saksi ni Jehova. Nangyari ini kan Hulyo 4, 1940.
DAI natatakot sa nangyari sa samo, nagkua kami nin dakol pang babasahon sa sinasarayan kaiyan asin ipinadagos an samong paghuhulit. Pirme kong gigirumdomon an mga tataramon ni Tatay kan pangyayaring idto: “Dai kita basta-basta minapondo. Pinagbotan kita ni Jehova na maghulit.” Kan panahon na idto, ako mabagsik na dies anyos. Alagad maski ngonyan, an determinasyon ni Tatay asin an saiyang kaigotan para sa ministeryo dayaday na pagirumdom pa man giraray kun paano pinangangatamanan kan satong Dios, si Jehova, an mga maimbod sa saiya.
Kan sunod na papondohon kami kan mga pulis, bako sanang kinua ninda an samong mga babasahon kundi ikinarsel man ninda si Tatay, na nabayaan si Nanay na nagsosolo kaiba an apat na aki. Nangyari iyan kan Setyembre 1940 sa Saskatchewan. Dai nahaloy pagkatapos pinahale ako sa eskuelahan huli sa pagsunod sa sakong konsensia na sinanay sa Biblia asin dai pagsaludo sa bandera o pag-awit kan himno nasyonal. An pagpadagos ko sa pag-eskuela paagi sa surat nagtao sa sako nin hunodhunod na iskedyul, asin nakikabtang ako nin mas lubos sa paghuhulit.
Kan 1948 inapodan an mga payunir, bilog na panahon na mga ministro kan Mga Saksi ni Jehova, na bumalyo sa sirangan na baybayon nin Canada. Kaya nagpayunir ako sa Halifax, Nova Scotia, asin sa Cape Wolfe, Prince Edward Island. Kan suminunod na taon, inako ko an imbitasyon na magtrabaho nin duwang semana sa sangang opisina kan Mga Saksi ni Jehova sa Toronto. An duwang semanang idto nagin labing anom na nakakokontentong taon nin paglilingkod. Sa kahurihurihi, namidbid ko si Myrna, na kapareho ko namomoot ki Jehova, asin kami nagpakasal kan Disyembre 1955. Nag-erok kami sa Milton, Ontario, asin dai nahaloy nabilog an sarong bagong kongregasyon duman. Sirong kan samong harong an nagin Kingdom Hall.
Pagmawot na Pahiwason an Samong Ministeryo
Kan suminunod na mga taon, nagkaigwa kami nin anom na haros sunod-sunod na aki. An samong aking si Miriam an primero. Dangan suminunod si Charmaine, Mark, Annette, Grant, asin ultimo si Glen. Sa parate minapuli ako hale sa trabaho na inaabotan ko an saradit ming aki na nakatukaw sa salog sa palibot kan alisabwan, mantang binabasa sa sainda ni Myrna an Biblia, na ipinaliliwanag an mga pagkasaysay sa Biblia asin itinatadom sa saindang puso an tunay na pagkamoot ki Jehova. Huli sa saiyang mamomoton na suporta, an gabos ming aki nagkaigwa nin hustong kaaraman sa Biblia sa hoben na edad.
An kaigotan ni Tatay para sa ministeryo nagwalat nin dai mapaparang impresyon sa sakong isip asin puso. (Talinhaga 22:6) Sa siring, kan 1968, kan inimbitaran an mga pamilya nin Mga Saksi ni Jehova na bumalyo sa Amerika Sentral asin del Sur tanganing tumabang sa paghuhulit, an samong pamilya nagmawot na simbagon an pangapodan. Kan panahon na idto an samong mga aki nasa 5 sagkod 13 an edad, asin mayo sa samo an tatao ni sarong termino sa Kastila. Sa pagsunod sa itinaong instruksion, nagbiahe ako pasiring sa manlaenlaen na nasyon tanganing aramon an kamugtakan nin pagbuhay. Pagpuli ko, bilang pamilya mapagngayongayo ming inestudyaran an samong mga mapagpipilian asin nagdesisyon kami na magbalyo sa Nicaragua.
Paglilingkod sa Nicaragua
Kan Oktubre 1970 kami nasa bagong harong mi na, asin sa laog nin tolong semana tinawan na ako nin sadit na kabtang sa programa sa sarong pagtiripon kan kongregasyon. Biyo akong nasakitan sa sakong kabtang sa sakong tikapong marhay na Kastila asin nagtapos ako sa pag-imbitar sa bilog na kongregasyon sa samong harong para sa cerveza sa Sabado nin 9:30 n.a. An boot kong sabihon servicio, an termino para sa paglilingkod sa langtad, alagad, an totoo, inimbitaran ko an gabos para sa serbesa. Tunay nanggad na sarong angat an pag-adal kan lenguahe!
Kan primero, isinusurat ko sa sakong kamot an sarong pag-atubang asin ineensayo ko iyan mantang pasiring sa pinto. Sinasabi ko: “Kaiba kan libro an libreng pag-adal sa Biblia.” An sarong tawo na nag-ako kan alok nagsabi pagkatapos na kinaipuhan niang magduman sa samong pagtiripon tanganing maaraman kun ano an gusto kong sabihon sa saiya. An tawong ini nagin saro sa Mga Saksi ni Jehova. Abaang patotoo ini na an Dios an saro na nagpapatubo kan mga banhi nin katotoohan sa mapakumbabang mga puso, siring kan rinekonoser ni apostol Pablo!—1 Corinto 3:7.
Pakatapos nin mga duwang taon sa kabiserang siudad nin Managua, hinagad sa samo na bumalyo sa timog na kabtang nin Nicaragua. Duman nagtabang kami sa kongregasyon nin Rivas asin sa kataraed na napapasuway na grupo nin mga tawong interesado. Si Pedro Peña, sarong fiel na maedad nang Saksi, iniibanan ako kun dinadalaw mi an mga grupong ini. An saro nasa islang hale sa bulkan sa Danaw nin Nicaragua, na igwa nin saro sanang pamilya nin Mga Saksi ni Jehova.
Minsan ngani an pamilyang ini tikapong marhay sa materyal, sinda naggibo nin dakulang paghihingoa tanganing ipaheling an saindang pag-apresyar sa samong pagdalaw. Kan bangging umabot kami, may pagkakan na inandam para sa samo. Nagdanay kami sa laog nin sarong semana, asin an dakol sa mahal na mga tawo duman na namomoot sa Biblia ihiniras sa samo an saindang kakanon. Napalukso an samong puso ta 101 an nag-atender sa pampublikong pahayag sa Biblia kan Domingo.
Naniniwala ako na an nangangataman na kapangyarihan ni Jehova risang-risa kan, sa saro pang pangyayari, dadalawon mi kaidto an sarong grupo nin interesadong mga tawo sa kabukidan na harani sa linderos nin Costa Rica. Kan aldaw na kami pahale na, nag-abot si Pedro tanganing hapiton ako, alagad ako nakahigda huli sa malaria. “Dai ako makakaiba, Pedro,” an sabi ko. Dinudutaan kan saiyang kamot an sakong angog, sia nagsimbag: “Grabe an kalintura mo, alagad kaipuhan mong umiba! Naghahalat an mga tugang.” Dangan sinabi nia an saro sa pinakaodok sa puso na pamibi na nadangog ko.
Pagkatapos, sinabi ko: “Kua na sana nin fresco (inomon na hale sa prutas). Andam na ako sa laog nin dies minutos.” Duwang pamilyang Saksi an nag-eerok sa lugar na dinalaw mi, asin marahayon an pag-ataman ninda sa samo. Kan suminunod na aldaw naghulit kami kaiba ninda, minsan ngani nanluluya pa ako huli sa kalintura. Kanigoan kanakapakokosog na maheling an labing sanggatos katawo na nag-atender sa pan-Domingong pagtiripon niamo!
Nagbalyo na Naman
Kan 1975 namundag an ikapito ming aki, si Vaughn. Kan suminunod na taon, kinaipuhan ming bumalik sa Canada huli sa pinansial na kadahelanan. Dai nagin pasil na bayaan an Nicaragua huling namatean mi talaga an nangangataman na kapangyarihan ni Jehova durante kan kami yaon duman. Kan kami humale, labi nang 500 sa teritoryo kan samong kongregasyon an nag-aatender sa mga pagtiripon.
Bago kaidto, kan an samong aki na si Miriam asin ako nombrahan na espesyal payunir sa Nicaragua, hinapot ako ni Miriam: “Tatay, kun kaipuhanon nindong pumuli sa Canada, totogotan daw nindo ako na magdanay digdi?” Mayo akong intension na humale, kaya sinabi ko: “Siempre!” Kaya kan kami maghale, si Miriam nawalat tanganing ipadagos an saiyang bilog na panahon na ministeryo. Kan huri, naagom sia ni Andrew Reed. Kan 1984 nag-atender sinda sa ika-77 klase nin Gilead, an paadalan para sa mga misyonero kan Mga Saksi ni Jehova, na kaidto nasa Brooklyn, Nueva York. Si Miriam ngonyan naglilingkod kaiba kan saiyang agom sa Republika Dominikana, na inootob an sarong pagmawot na itinadom sa saiya kan marahayon na mga misyonero sa Nicaragua.
Mientras tanto, an mga tataramon ni Tatay na, “dai kita basta-basta minapondo,” naglalaad pa sa sakong puso. Kaya kan 1981 kan makadamot kami nin igong kuarta tanganing makabalik sa Amerika Sentral, nagbalyo na naman kami, sa Costa Rica na. Mantang naglilingkod duman, inimbitaran kami na magtabang sa pagtogdok kan saindang bagong mga pasilidad kan sangang opisina. Minsan siring, kan 1985, an samong aki na si Grant nangaipo nin medikal na atension, kaya nagbalik kami sa Canada. Si Glen nagdanay sa Costa Rica tanganing magtrabaho sa proyekto sa pagtogdok kan sangang opisina, mantang si Annette asin si Charmaine naglingkod bilang espesyal payunir. Kaming mga naghale sa Costa Rica nungkang naglaom na dai na kami mabalik.
Pag-atubang sa mga Kasakitan
Maliwanag asin masaldang an pagpopoon nin aldaw kan Setyembre 17, 1993. An samong pinakamatuang aking lalaki, si Mark, asin ako nag-aatop. Magkataed kaming nagtatrabaho asin nag-oolay-olay manongod sa espirituwal na mga bagay, siring kan napagkatodan mi na. Sa dai maaraman na paagi nawaran ako nin panimbang asin nahulog sa atop. Kan ako makaagimadmad, an naheheling ko sana maliwanag na mga ilaw asin mga tawo na nakaputi. Idto kuartong pan-emerhensia kan ospital.
Huli sa sinasabi kan Biblia, an enot kong reaksion: “Daing dugo, daing dugo!” (Gibo 15:28, 29) Kanigoan kanakapaparigon giraray na madangog si Charmaine na nagsasabi: “Ayos na, Tatay. Uya kami gabos.” Naaraman ko kan huri na naheling kan mga doktor an sakong dokumento medikal, asin an paggamit nin dugo nungkang nagin isyu. Nabari an sakong liog asin biyo akong naparalisado, na dai ngani makahangos sa sadiri ko sana.
Mantang dai nakakahiro, kinaipuhan ko na pangatamanan ni Jehova nin orog kisa kasuarin pa man. An tracheotomy, na ginibo tanganing ikalaog an sarong tubo para sa artipisyal na paghangos, nakabagat sa pag-agi nin aire pasiring sa sakong cuerdas vocales. Dai ako makataram. Kinaipuhan kan mga tawo na basahon an sakong mga ngabil tanganing masabotan an gusto kong sabihon.
Marikas na luminangkaw an mga gastos. Huling an sakong agom asin kadaklan sa sakong mga aki nasa bilog na panahon na ministeryo, iniisip-isip ko kun baga kakaipuhanon nindang bayaan an paglilingkod na ini tanganing maasikaso an pinansial na mga paninimbagan na ini. Minsan siring, si Mark nakakua nin trabaho na sa tolong bulan sana nakatabang na mabayadan an dakol sa mga gastos na ini. Bilang resulta, an gabos nakapadagos sa bilog na panahon na ministeryo apuera samong mag-agom.
Ginatos na kard asin surat hale sa anom na laen-laen na nasyon an nakadukot sa mga lanob kan sakong kuarto sa ospital. Pinangangatamanan nanggad ako ni Jehova. An kongregasyon nagtabang man sa sakong pamilya paagi sa pagpakakan sa sainda durante kan kabtang kan lima may kabangang bulan na ako nasa kuarto nin sigidong pangataman. Aroaldaw, iniibanan ako sa hapon nin sarong Kristianong magurang sa kongregasyon, na binabasahan ako nin Biblia asin mga publikasyon sa Biblia, siring man nagsasaysay nin nakaparirigon sa boot na mga eksperyensia. Duwang miembro nin pamilya an nag-aandam para sa kada pagtiripon sa kongregasyon sa kaibanan ko, kaya nungka kong nalipasan an mahalagang marhay na espirituwal na kakanon.
Mantang nasa ospital pa ako kaidto, ginibo an probisyon na ako makaatender sa programa sa sarong espesyal na aldaw nin asamblea. An mga tawohan sa ospital nag-areglo para sa sarong rehistradong nars asin sarong tekniko sa artipisyal na paghangos na ibanan ako sa bilog na aldaw. Abaa kadakulang kaogmahan na makaibahan giraray an sakong Kristianong mga tugang na lalaki asin babae! Nungka kong malilingawan an maheling an ginatos na nakalinya, na naghahalat kan saindang turno na taratarahon ako.
Pagpapadanay nin Espirituwalidad
Mga sarong taon pakalihis kan aksidente, nakapuli ako sa harong kaiba kan sakong pamilya, minsan ngani nangangaipo pa ako nin 24 oras kada aldaw na pag-ataman nin nars. An sarong van na espesyal na sinangkapan nagpangyari na ako makaatender sa mga pagtiripon, na bihira kong paltahan. Pero, aadmitiron ko, kaipuhan an determinasyon tanganing makaduman. Poon kan ako makapuli, naatenderan ko an gabos na pandistritong kombension.
Sa kahurihurihi, kan Pebrero 1997, nabawi ko an sakong kakayahan na magtaram sa limitadong sokol. An nagkapira sa sakong mga nars mapag-apresyar na naghihinanyog mantang ihinihiras ko sa sainda an sakong paglaom na basado sa Biblia. An sarong nars nabasa na sa sako an bilog na librong Jehovah’s Witnesses—Proclaimers of God’s Kingdom siring man an iba pang publikasyon kan Watch Tower. Nakikikomunikar ako sa mga tawo paagi sa sarong bala na ginagamit ko sa komputer. Minsan ngani mapagalon an paaging ini nin pagmakinilya, nakakokontento na makapagdanay na kalabot sa ministeryo.
Grabe an tinitios kong kolog sa mga nerbios. Alagad garo baga kun ihinihiras ko sa iba an mga katotoohan sa Biblia o nadadangog kong binabasa ini sa sako, nakakamate ako nin kaginhawahan. Kun minsan, naghuhulit ako sa tinampo kaiba an sakong mapagsuportar na agom, na nag-iinterpretar para sa sako kun kaipuhan ko nin tabang. Sa nagkapirang beses, nakapag-auxiliary payunir ako. An paglilingkod bilang sarong Kristianong magurang sa kongregasyon nagtatao sa sako nin kagayagayahan, nangorogna kun dinodolok ako kan mga tugang sa mga pagtiripon o dinadalaw ako sa sakong harong asin natatabangan ko sinda saka naparirigon an saindang boot.
Aadmitiron ko na pasil atakehon nin depresyon. Kaya kun ako namomondo, ipinamimibi ko tolos na magkaigwa ako nin kagayagayahan. Namimibi ako banggi-aldaw na padagos akong pangatamanan ni Jehova. An surat o pagdalaw nin saro pirmeng nakalilinga sa sako. An pagbasa nin magasin na Torrengbantayan o Awake! nakapapano man nin nakaparirigon na mga ideya sa sakong isip. An laen-laen na mga nars kun minsan binabasa sa sako an mga magasin na ini. Poon kan ako maaksidente, nadangog ko na nin pitong beses an pagbasa kan bilog na Biblia sa mga cassette tape. Ini kabilang sa manlaenlaen na paagi na pinangatamanan ako ni Jehova.—Salmo 41:3.
An pagbabago sa sakong mga kamugtakan nagtao sa sako nin dakol na panahon na maghorophorop kun paano kita tinotokdoan kan satong Kaharohalangkaweng Paratokdo, si Jehova, para sa buhay. Tinatawan nia kita nin tamang kaaraman dapit sa saiyang kabotan asin katuyohan, nin makahulogan na ministeryo, hatol manongod sa sekreto sa kaogmahan nin pamilya, asin pakamansay tanganing maaraman kun ano an dapat gibohon kun napapaatubang sa kasakitan. Binendisyonan ako ni Jehova nin fiel asin marahayon na agom. An sakong mga aki maimbod man na nagsuportar sa sako, asin kagayagayahan ko na sinda gabos nakikabtang sa bilog na panahon na ministeryo. Sa katunayan, kan Marso 11, 2000, an samong aki na si Mark asin an saiyang agom, si Allyson, naggradwar sa ika-108 klase kan Paadalan nin Gilead asin idinestino sa Nicaragua. Naatenderan mi mag-agom an saindang gradwasyon. Masasabi ko nin onesto na binago nin kasakitan an sakong buhay alagad an sakong puso dai.—Salmo 127:3, 4.
Nagpapasalamat ako ki Jehova sa kadonongan na itinao nia tanganing ikapasa ko sa sakong pamilya an espirituwal na mana na inako ko. Ako napakokosog asin naparirigon an boot na maheling an sakong mga aki na naglilingkod sa saindang Kaglalang na an aktitud kaagid kan sa sakong ama, na nagsabi, “Dai kita basta-basta minapondo. Pinagbotan kita ni Jehova na maghulit.” Tunay nanggad, si Jehova pinangatamanan ako asin an sakong pamilya sa gabos na aldaw kan samong buhay.
[Ritrato sa pahina 24]
Kaiba ni Tatay, kan sakong mga tugang na lalaki, asin kan sakong mga tugang na babae, kataed kan samong harong na de rueda, na ginamit durante kan mga aldaw nin pagpapayunir. Ako nasa too
[Ritrato sa pahina 26]
Kaiba kan sakong agom, si Myrna
[Ritrato sa pahina 26]
Sarong dai pa sana nahahaloy na retrato kan samong pamilya
[Ritrato sa pahina 27]
Naghuhulit pa ako sagkod ngonyan paagi sa surat