Estorya nin Buhay
An Pagpadakula sa Walong Aki sa mga Dalan ni Jehova Nagin Sarong Kadepisilan Asin Kagayagayahan
ISINAYSAY NI JOYCELYN VALENTINE
Kan 1989 an sakong agom nagduman sa ibang nasyon tanganing magtrabaho. Nanuga sia na papadarahan nia ako nin kuarta tanganing maataman ko an walo kong aki. Mga semana an luminihis, alagad mayo akong bareta sa saiya. Luminihis an dakol na bulan alagad mayo pa man giraray ako nin bareta sa sakong agom. Padagos kong pinapakosog liwat an sakong sadiri, ‘Oras na magin trangkilo na an situwasyon nia, mapuli na sia.’
HULING mayo nin kuartang pansustento sa sakong pamilya, nagin desesperado na ako. Durante kan mga bangging dai ako napapatorog, hinahapot ko an sakong sadiri na dai makapaniwala, ‘Paanong nagibo nia ini sa saiyang pamilya?’ Pag-abot nin panahon, inako ko an makolog na katotoohan na inabandonar na kami kan sakong agom. Ngonyan, mga 16 na taon na poon kan bayaan nia kami, dai pa man giraray sia nagbabalik. Bilang resulta, pinadakula ko an sakong mga aki na mayo an tabang nin agom. Ini nagin depisil, alagad an pakaheling na an sakong mga aki maogmang inaako an mga dalan ni Jehova nagtao sa sako nin labi-labing kagayagayahan. Minsan siring, bago ko isaysay kun kumusta an nagin kamugtakan niamo bilang sarong pamilya, iestorya ko nguna saindo an manongod sa pagpadakula sa sako.
Paghanap nin Paggiya kan Biblia
Namundag ako kan 1938 sa isla nin Jamaica sa Caribe. Minsan dai noarin man nagin miembro nin sarong iglesia si Tatay, ibinilang nia an saiyang sadiri na matatakton sa Dios. Sa banggi parate niang hinahagad sa sako na basahan ko sia kan libro sa Biblia na Salmo. Dai nahaloy, natuom ko na an dakol na salmo. Si Nanay miembro nin sarong lokal na iglesia, asin kun minsan iiniiba nia ako sa relihiosong mga pagtiripon.
Sa mga pagtiripon na idto, an sabi sa samo dinadara nin Dios sa langit an marahay na mga tawo asin sagkod lamang na sinosolo sa kalayo sa impierno an maraot na mga tawo. Sinabi man sa samo na si Jesus an Dios asin na namomotan nia an mga aki. Medyo naribaraw ako asin natakot ako sa Dios. Nag-isip-isip ako, ‘Paanong an Dios na namomoot sa sato pinapadusahan an mga tawo sa kalayo?’
An pagparaisip-isip kan kalayo sa impierno nagbunga nin mga pangum-um ko. Pag-abot nin panahon, nag-adal ako sa Biblia paagi sa surat na an isponsor iyo an Seventh-Day Adventist Church. Itinokdo ninda na an maraot na mga tawo dai man papasakitan sagkod lamang kundi, imbes, sosoloon sa kalayo sagkod na magin abo. Garo mas rasonable ini, asin nagpoon ako na mag-atender sa saindang relihiosong mga pagtiripon. Alagad naribaraw ako sa saindang mga katokdoan, asin dai ikinatanos kan sakong nanodan an salang mga punto de vista ko manongod sa moralidad.
Kaidto, an mga tawo inaako sa pankagabsan na sala an pakikisaro. Pero, ako asin an dakol na iba pa naniwala na idto sanang dakol an kadorog an mga parapakisaro. Sa siring, dai nagkakasala an duwang indibiduwal na bakong kasal na an seksuwal na aktibidad sa pag-oltanan sana nindang duwa. (1 Corinto 6:9, 10; Hebreo 13:4) An paniniwalang iyan nakakontribwir sa sakong pagigin daing agom na ina nin anom na aki.
Pag-oswag sa Espirituwal
Kan 1965, si Vaslyn Goodison asin Ethel Chambers nag-istar sa kaharaning komunidad nin Bath. Sinda mga payunir, o bilog na panahon na mga ministro kan Mga Saksi ni Jehova, asin sarong aldaw sinda nakipag-olay sa sakong ama. Inako nia an saindang alok na pag-adal sa Biblia. Kun ako nasa harong sa panahon kan saindang pagdalaw, kinakaolay man ninda ako. Minsan grabe an pagsuspetsa ko sa mga Saksi ni Jehova, nagdesisyon ako na makipag-adal sa sainda sa Biblia tanganing patunayan na sinda sala.
Kadakol akong ihinahapot sa sainda durante kan pag-adal, asin iyan gabos sinisimbag kan mga Saksi na ginagamit an Biblia. Sa tabang ninda, naaraman ko na an gadan mayo nin pakaaram asin dai nagdudusa sa impierno. (Eclesiastes 9:5,10) Nanodan ko man an manongod sa paglaom na buhay na daing katapusan sa Paraiso digdi sa daga. (Awit 37:11, 29; Kapahayagan 21:3, 4) Minsan nagpondo an sakong ama sa saiyang pag-adal sa Biblia, nagpoon akong mag-atender sa mga pagtiripon kan lokal na kongregasyon kan Mga Saksi ni Jehova. Huli sa pagigin matoninong asin areglado kan mga pagtiripon na idto nakanood ako nin orog pa manongod ki Jehova. Nag-atender man ako sa mga pansirkitong asamblea asin mga pandistritong kombension, na darakulang pagtiripon na inorganisar kan mga Saksi. An pagkalantad kong ini sa Biblia nagpangyari na tumalubo sa sako an makosog na kamawotan na sambahon si Jehova sa inaakong paagi. Minsan siring, may nakaolang sa sako.
Kan panahon na idto, kasaroan ko an ama kan tolo sa sakong anom na aki. Nanodan ko sa Biblia na kinokondenar nin Dios an pagkaigwa nin seksuwal na relasyon sa bakong agom, asin nakokonsensia na ako. (Talinhaga 5:15-20; Galacia 5:19) Mantang nagrararom an sakong pagkamoot sa katotoohan, naghimuyawot ako na ioyon an sakong buhay sa ley nin Dios. Sa katapustapusi, nagdesisyon na ako. Sinabihan ko an kasaroan ko na magsalang magpakasal kami o taposon na an samong relasyon. Minsan ngani dai inako kan sakong kasaroan an sakong mga tinutubod, ikinasal kami kan Agosto 15, 1970, limang taon poon kan enot na makipag-olay sa sako an mga Saksi. Kan Disyembre nin 1970, sinimbolisaran ko an sakong pagdusay ki Jehova paagi sa bautismo sa tubig.
Kun mapadapit sa ministeryo, nungka kong malilingawan an enot na aldaw na ako nakikabtang sa gibohon na paghuhulit. Ninenerbios ako asin dai ko aram kun paano poponan an pakipag-olay sa Biblia. An totoo, nakaginhawa ako kan tinapos tolos kan enot na kagharong an samong pag-oolay. Pero, dai nahaloy, dai na ako ninenerbios. Sa katapusan kan aldaw, ogmahon ako, huli ta nakaolay ko sa halipot an nagkapirang tawo manongod sa Biblia asin napasakamotan ko sinda kan nagkapira niatong publikasyon na basado sa Biblia.
Pagpapadanay kan Pamilya na Makosog sa Espirituwal
Kan 1977 walo na an aki niamo. Determinado akong gibohon an pinakamakakaya ko tanganing matabangan an sakong kasararo sa harong na maglingkod ki Jehova. (Josue 24:15) Kaya nagmaigot akong marhay tanganing mapamayohan an regular na pampamilyang pag-adal sa Biblia. Kun beses, huli sa labi-labing kapagalan, napapatorog ako mientras na binabasa nin makosog kan saro sa mga aki ko an sarong parapo, asin kinakaipuhan na pukawon ako kan mga aki. Alagad dai nakaolang an pisikal na kapagalan sa samong pag-adal kan Biblia bilang pamilya.
Parate man akong namimibi kaiba an sakong mga aki. Pag-abot tolos ninda sa tamang edad, tinokdoan ko sinda na magsadiring mamibi ki Jehova. Sinegurado ko na an lambang saro sa sainda namimibi nin personal bago magtorog. Saro-saro na iniibanan ko sa pagpamibi an balang aki na akion pa tanganing magsadiring mamibi.
Sa primero, nagkontra an sakong agom sa pag-iba ko kan mga aki sa mga pagtiripon kan kongregasyon. Minsan siring, nainaan an saiyang pagkontra huli sa posibilidad na sia mismo an maataman sa mga aki mientras na ako nasa mga pagtiripon. Sa banggi, gustong-gusto nia na magluwas asin makaibaiba an saiyang mga amigo, alagad an ideya na kaibanan nia an walong aki sa pagluwas dai nakaakit sa saiya! Sa huri, tinatabangan nia na ngani ako na mapreparar an mga aki tanganing makaatender sa Kingdom Hall.
Dai naghaloy, an mga aki natuod na sa pag-atender sa gabos na pagtiripon kan kongregasyon asin pakikikabtang sa pampublikong ministeryo. Durante kan saindang bakasyon sa eskuelahan kun tig-init, parate sindang nakikiiba sa paghuhulit sa mga payunir, o bilog na panahon na mga ministro, sa kongregasyon. Tinabangan kaini an sakong hoben na mga aki na magkaigwa nin odok sa pusong pagkamoot sa kongregasyon asin sa gibohon na paghuhulit.—Mateo 24:14.
Mga Panahon nin Pagbalo
Tanganing rumahay an pagbuhay kan pamilya, an sakong agom nagpoon na magduman sa ibang nasyon tanganing magtrabaho. Napaparayo sia sa pamilya sa laog nin halawig na mga panahon alagad minapuli man sia nin regular. Minsan siring, kan 1989, huminale sia asin dai na nagpuli. Siring kan nasambitan ko sa kapinonan, nalunosan ako kan pagkawara kan sakong agom. Sa laog nin dakol na banggi ako naghihibi asin odok na namimibi ki Jehova para sa karangahan saka pakatagal, asin namatean ko na sinimbag nia an sakong mga pamibi. An mga kasuratan siring kan Isaias 54:4 asin 1 Corinto 7:15 nagtao sa sako kan katoninongan nin isip asin kan kosog na makapagpadagos sa normal na buhay. Sa Kristianong kongregasyon, sinuportaran man ako sa emosyonal asin sa materyal kan mga paryente asin kan mga katood. Nagpapasalamat akong marhay ki Jehova asin sa saiyang banwaan para sa saindang tabang.
Nagkaigwa pa nin ibang mga pagbalo sa samo. Sarong beses saro sa sakong mga aking babae an hinale sa kongregasyon huli sa gawe-gawe na bakong sono sa Kasuratan. Namomotan kong marhay an gabos kong aki, pero an kaimbodan ko ki Jehova iyo an pinakamahalaga. Kaya durante kan panahon na idto, kami kan iba pang mga aki ko estriktong nagkuyog sa pagdirehir kan Biblia kun paano magawe sa mga natiwalag. (1 Corinto 5:11, 13) Tinatsaran kaming marhay kan mga tawo na dai nakakasabot sa samong paninindogan. Minsan siring, kan makabalik na sa kongregasyon an sakong aking babae, sinabihan ako kan saiyang agom na napahanga sia sa samong marigon na paninindogan sa mga prinsipyo sa Biblia. Sia ngonyan naglilingkod ki Jehova kaiba an saiyang pamilya.
Pag-atubang sa Pinansial na mga Problema
Kan bayaan kami kan sakong agom, mayo ako nin regular na ginaganar, asin mayo nang inaakong pinansial na suporta an pamilya gikan sa saiya. An situwasyon na ini nagtokdo sa samo na magin kontento sa simpleng buhay asin na orog na pahalagahan an espirituwal na mga kayamanan kisa sa materyal na mga pinag-aaabot. Mantang an mga aki nakakanood na magkaminorootmootan asin magtinarabangan, sinda nagin dayupot sa lambang saro. Kan magtrabaho na an mga matua, gikan sa boot nindang sinustentohan an saindang nguhod na mga tugang. An sakong pinakamatuang aking babae, si Marseree, tinabangan an saiyang kangudhan na tugang na babae, si Nicole, na makatapos sa pag-eskuela sa sekondarya. Dugang pa, nahimo kong magkaigwa nin sadit na groseriya. An kadikit na ginaganar nakatabang sa sako na maasikaso an nagkapirang pangangaipo niamo sa materyal.
Dai kami noarin man pinabayaan ni Jehova. Sarong beses, sinabi ko sa sarong tugang na Kristiana na dai itinotogot kan samong pinansial na kamugtakan na makaatender kami sa pandistritong kombension. Sia nagsimbag: “Tugang na Val, pagkadangog mong may kombension, mag-impake ka na! Si Jehova an bahala sa saindong mga pangangaipo.” Sinunod ko an saiyang sadol. Si Jehova nagtao nin probisyon, asin iyan padagos niang ginigibo. Dai noarin man nagpalta sa asamblea o kombension an samong pamilya huli sa kakulangan nin kuarta.
Kan 1988, dinestroso nin grabe kan Bagyong si Gilbert an Jamaica, asin binayaan niamo an samong harong tanganing magpahipli sa sarong mas ligtas na lugar. Kan medyo kumalma an bagyo, naghale kami kan sakong aking lalaki sa lugar nin pailihan tanganing helingon an samong harong na ngonyan naraot na. Mantang naghahanap sa mga gamit na natada, nakaheling ako nin sarong bagay na gusto kong isalbar. Bigla, an doros naghahagubuhob giraray, alagad dai ko pa man giraray binubutasan an bagay na isinalbar ko. “Nanay, ibaba po nindo an telebisyon na iyan. Ano po, agom kamo ni Lot?” (Lucas 17:31, 32) Nakaagimadmad ako huli sa komentong iyan kan sakong aking lalaki. Binutasan ko an telebisyon na basa-basa sa oran, asin pareho kaming nagdalagan tanganing makarayo sa peligro.
Nagtatakig ako ngonyan mantang nagigirumdoman ko na isinapeligro ko an sakong buhay huli sa sarong telebisyon. Alagad naoogma an puso ko kun naiisip ko an ikinomento kan sakong aking lalaki sa pangyayaring idto na nagpapaheling nin pagigin puka sa espirituwal. Huli sa pagsasanay sa Biblia na inako nia gikan sa Kristianong kongregasyon, natabangan nia akong malikayan an grabeng kapahamakan sa pisikal asin tibaad patin sa espirituwal.
Dinestroso kan bagyo an samong harong asin mga rogaring, asin pinanluyahan man kami nin boot huli kaiyan. Dangan nagdatong an samong Kristianong mga tugang. Pinarigon ninda an samong boot na atubangon an samong kapierdihan na may pagtitiwala ki Jehova asin magpadagos na aktibo sa ministeryo, asin tinabangan ninda kami na itogdok liwat an samong harong. Nakapahirong marhay sa samuya an mamomoton asin mapagsakripisyong aktong iyan na ginibo kan mga boluntaryong Saksi gikan sa Jamaica asin sa ibang nasyon.
Pag-enot ki Jehova
Pagkatapos niang mag-eskuela, an sakong ikaduwang aki, si Melaine, naglingkod bilang payunir. Dangan inako nia an imbitasyon na maglingkod bilang payunir sa saro pang kongregasyon, na nangahulogan na kaipuhan niang bayaan an saiyang trabaho. Minsan ngani an trabahong iyan nagpangyari na makatao sia nin dakulang pinansial na suporta sa samong pamilya, kami nagtiwala na aatamanon kami ni Jehova kun an balang saro sa samo eenoton an interes kan Kahadean. (Mateo 6:33) Sa huri, an sakong aking lalaki, si Ewan, inimbitaran man na maglingkod bilang payunir. Sinusuportaran nia sa pinansial an pamilya, alagad sinadol niamo sia na akoon an imbitasyon asin minawot niamo an bendisyon sa saiya ni Jehova. Nungka kong dinesganar an sakong mga aki sa pagpahiwas kan saindang paglilingkod na pan-Kahadean, asin kaming nawalat sa harong dai noarin man natikapo. Imbes, nadagdagan an samong kagayagayahan, asin kun beses, natatabangan pa niamo an iba na nangangaipo.
Ngonyan, labi-labi an sakuyang kagayagayahan na maheling an sakong mga aki “na naglalakaw sa katotoohan.” (3 Juan 4) An saro sa sakong aking babae, si Melaine, sa ngonyan iniibanan an saiyang agom sa pagbiahe kaini bilang paraataman sa sirkito. An sakuyang aking babae na si Andrea asin an saiyang agom naglilingkod bilang mga espesyal payunir, asin iniibanan nia an saiyang agom kun sinosongko kaini an mga kongregasyon bilang kasalihid na paraataman sa sirkito. An sakong aking lalaki, si Ewan, saka an saiyang agom naglilingkod bilang mga espesyal payunir, asin sia sarong magurang sa kongregasyon. An saro ko pang aking babae, si Ava-Gay, naglilingkod kaiba kan saiyang agom sa sangang opisina kan Mga Saksi ni Jehova sa Jamaica. Si Jennifer, Genieve, asin Nicole naglilingkod kaiba kan saindang mga agom asin mga aki bilang aktibong mga miembro kan saindang kanya-kanyang kongregasyon. Si Marseree kaiba ko sa harong, asin kaming duwa nag-aatender ngonyan sa Kongregasyon nin Port Morant. Dakula nanggad an mga bendisyon sa sako, huli ta an gabos na walo kong aki nagpapadagos sa pagsamba ki Jehova.
Nagkakaproblema na ako sa salud mantang ako naggugurang. Tinitios ko ngonyan an artritis reumatiko, alagad naoogma pa man giraray ako sa paglilingkod bilang payunir. Minsan siring, kaining mga nakaagi, nagin depisil na marhay para sa sako an paglakaw sa mabulod na lugar na iniistaran ko. Nadepisilan akong ipagpadagos an sakong ministeryo. Prinobaran ko na magbisikleta asin mas napasilan ako kaini kisa paglakaw. Kaya nagbakal ako nin segunda manong bisikleta asin iyan na an ginagamit ko. Sa primero, nasasakitan an sakong mga aki na paghelingon an saindang inang may artritis na nagbibisikleta. Pero, ogmahon sinda na maheling ako na padagos na naghuhulit siring kan mawot kan sakong puso.
Nagtatao sa sako nin dakulang kagayagayahan na maheling an mga tawong inadalan ko na maogmang nag-aako kan katotoohan sa Biblia. Pirme kong ipinapamibi na tabangan logod ni Jehova an sakong bilog na pamilya na magdanay na maimbod sa saiya sa panahon na ini kan katapusan asin padagos sa panahon na daing sagkod. Inoomaw asin pinapasalamatan ko si Jehova, an Dakulang “Paradangog nin pamibi,” sa pagtabang nia sa sako na mapangganahan an kadepisilan sa pagpadakula sa sakong walong aki sa saiyang mga dalan.—Salmo 65:2.
[Ritrato sa pahina 10]
Kaiba ko an sakong mga aki, an saindang mga agom, asin an sakong mga makoapo
[Ritrato sa pahina 12]
Naggagamit na ako ngonyan nin bisikleta tanganing magibo an sakong ministeryo