Kun Paano Tinabangan nin Aking Lalaki an Saiyang Ama
SI James, na taga Inglaterra, labi pa sanang 30 anyos, may grabeng diperensia sa isip asin autism na bakong gayong grabe. Pero, sa laog nin dakol na taon sia nag-aatender sa mga pagtiripon kan Mga Saksi ni Jehova kaiba kan saiyang ina asin tugang na babae. Minsan siring, an saiyang ama nungkang nagpaheling nin dakulang interes sa saindang tinutubod. Sarong banggi pakatapos kan pagtiripon na itinampok an sarong demonstrasyon na ipinaheheling kun paano iimbitaran an sarong kamidbid sa Memorial kan kagadanan ni Cristo, si James dalidaling naglaog sa saiyang kuarto. Nahahadit, nagsunod sa saiya an saiyang ina asin nanompongan sia na natatarantang naghahanap sa lumang mga isyu kan mga magasin na Torrengbantayan asin Awake! Pinili nia an saro na may rineprodusir na imbitasyon kan Memorial sa likod na pahina asin dalidaling nagrani sa saiyang ama. Itinokdo nia nguna an retrato dangan itinokdo an saiyang ama asin nagsabing “Ika po!” Napangalas na naghelingan an saiyang ina asin ama patin narealisar ninda na iniimbitaran ni James an saiyang ama sa Memorial. Sinabi kan saiyang ama na tibaad makaatender sia.
Kan banggi kan Memorial, si James nagpasiring sa aparador kan saiyang ama, puminili nin pantalon, dinara iyan sa saiyang ama, asin nagmustra na isulot iyan kan saiyang ama. Nagsimbag an saiyang ama na dai sia maiba sa pagtiripon. Huli kaini, si James asin an saiyang ina nagduman sa Kingdom Hall na sinda sana.
Minsan siring, paghaloyhaloy, si James nag-oorog na habong makikooperar kun pinagmamaigotan kan saiyang ina na andamon sia sa pag-atender sa mga pagtiripon kan kongregasyon, na mas gustong mawalat sa harong kaiba kan saiyang ama. Dangan sarong Domingong aga, nagsayuma na naman si James na magkooperar kan pinagmamaigotan kan saiyang ina na andamon sia para sa pagtiripon. Sa pagkabigla niang marhay, an ama ni James nagdolok saiya asin nagsabi, “James, kun ako maatender sa pagtiripon ngonyan, maiba ka man?” Nagkabuhay an lalauogon ni James. Kinugos nia an saiyang ama asin nagsabing “Iyo po!” asin an tolo nagpasiring sa Kingdom Hall.
Magpoon kan aldaw na idto, an ama ni James padagos nang nag-aatender sa gabos na pagtiripon kun Domingo asin dai nahaloy sinabi nia na tanganing sia umoswag, kaipuhan man niang umatender sa iba pang mga pagtiripon. (Hebreo 10:24, 25) Ginibo nia ini, asin pakalihis nin duwang bulan sia nagpoon nang regular na mag-adal sa Biblia. Marikas an saiyang pag-oswag, na ginigibo tolos an kinakaipuhan na mga pagbabago sa saiyang buhay, asin dai nahaloy nagpoon na siang makikabtang sa gibohon na paghuhulit kan Kahadean. Sarong taon pakalihis na sia nagpoon na mag-adal sa Biblia, idinusay nia an saiyang buhay ki Jehova asin sinimbolisaran ini paagi sa pagpabautismo sa tubig. Sa presente sia naglilingkod bilang ministeryal na lingkod sa saiyang kongregasyon. An bilog na pamilya ngonyan naglilingkod nin sararo ki Jehova.