“Madia Kamo sa Sako, . . . Asin Pagiginhawahon Ko Kamo”
Kinakaipuhan an Marikas na Pagpahiwas Huli sa Pambihirang Pagdakol
“MADIA kamo sa sako, . . . asin pagiginhawahon ko kamo,” an sabi ni Jesu-Cristo. (Mateo 11:28) Abaa kanakaoogmang pangagda hale sa Payo kan Kristianong kongregasyon! (Efeso 5:23) Kun hohorophoropon niato an mga tataramon na iyan, dai niato puedeng dai apresyaron an mahalagang marhay na gikanan nin kaginhawahan—an pakikiasosyar sa satong espirituwal na mga tugang na lalaki asin babae sa Kristianong mga pagtiripon. Tunay nanggad na minaoyon kita sa salmista na nag-awit: “Kanigoan karahay asin kanigoan kaogma na an magturugang mag-ontok na sararo!”—Salmo 133:1.
Tunay nanggad, an mga kaibaiba niato sa mga pagtiripon na iyan sa pagsamba an pinakamarahay, asin an espirituwal na kamugtakan sa palibot ligtas asin nakaoogma. Kun siring, may marahay na dahelan na nagsabi an sarong hoben na Kristiana: “Yaon ako sa eskuelahan sa bilog na aldaw, asin nakakakapoy iyan sa sako. Alagad an mga pagtiripon garo sarong oasis sa desierto, na dian nagiginhawahan ako tanganing makayang atubangon an masunod na aldaw sa eskuelahan.” An sarong hoben na taga Nigeria nagsabi: “Nanompongan ko na an dayupot na pakikiasosyar sa iba na namomoot ki Jehova an nakatatabang sa sako na magdanay na dayupot sa saiya.”
An lokal na Kingdom Hall kan Mga Saksi ni Jehova nagseserbi nanggad na sentro kan tunay na pagsamba sa komunidad. Sa kadaklan na lugar, ginigibo an mga pagtiripon sa Kingdom Hall nin kisuerra duwang beses kada semana, asin ineenkaminar an mga inaadalan sa Biblia na mag-atender sa pinakamadaling panahon na mapupuede tanganing makinabang sa nakapagiginhawang pakikiasosyar duman.—Hebreo 10:24, 25.
Sarong Apretadong Pangangaipo
Minsan siring, mahalagang mangnohon na bakong gabos na Saksi ni Jehova igwa nin presentableng Kingdom Hall. An pambihirang pagdakol kan mga parabalangibog kan Kahadean sa bilog na kinaban nagbunga nin apretadong pangangaipo. Rinibong Kingdom Hall an kaipuhan pa man giraray, nangorogna sa nagpoprogreso pa sanang mga nasyon.—Isaias 54:2; 60:22.
Sa pag-ilustrar: Igwa nin sampulo sanang Kingdom Hall para sa 290 kongregasyon sa kabisera kan Republika Demokratika nin Congo. Kaipuhan na marhay kan nasyon na iyan an dakol na Kingdom Hall. Nagtitiripon sa luwas an kadaklan kan mga kongregasyon sa Angola huli ta limitado sana an kabilangan nin mga Kingdom Hall. Igwa nin kaparehong pangangaipo sa dakol na iba pang nasyon.
Poon kan 1999, kun siring, ginibo an sarong organisadong paghihingoa tanganing tumabang sa pagtogdok nin mga Kingdom Hall sa mga nasyon na may limitadong kuarta. Tanganing makatabang sa pag-asikaso sa mga proyekto nin pagtogdok sa mga nasyon na iyan, an eksperyensiadong mga Saksi nagboluntaryo kan saindang serbisyo. Kun pinagsasaro an siring na mga paghihingoa asin an espiritu nin pagigin gikan sa boot saka an pagkaigwa nin lokal na mga boluntaryo, an mga resulta nakaparirigon na marhay sa boot. Nakikinabang man an lokal na mga Saksi sa pagsasanay na inaako ninda. An gabos na ini nakatatabang na ikatao an mga pangangaipo sa pagtogdok nin mga Kingdom Hall sa sadiri nindang mga nasyon.
Sa siring itinatao an praktikal na pagtabang sa pagtogdok nin Kingdom Hall sa paaging nakakabagay sa kamugtakan na ginagamit an lokal na mga pamamaagi asin materyales. An pasohan bako sanang ikatao an dakulaon na pangangaipo nin mga Kingdom Hall kundi magporma man nin sarong sistema nin mantension na angay sa lokal na mga kamugtakan.—2 Corinto 8:14, 15.
Nakapagiginhawang mga Pag-oswag
Ano an epekto kan mga paghihingoang ini na magtao nin mga lugar nin pagsamba? Sa kapinonan nin 2001, an sarong report hale sa Malawi nagsabi: “An nagibo sa nasyon na ini talagang makangangalas. Sa masunod na duwang bulan, matatapos mi an dugang pang mga Kingdom Hall.” (Retrato 1 asin 2) Sa Togo nahimo kan mga boluntaryo na makatogdok nin dakol na simple sanang mga Kingdom Hall kan nakaagi pa sanang mga bulan. (Retrato 3) An marahayon na trabahong nagibo kan gikan sa boot na mga boluntaryo nakatatabang man sa pagtao nin presentableng mga Kingdom Hall sa Mejico, Brazil, asin iba pang mga nasyon.
Naririsa kan mga kongregasyon na kun may Kingdom Hall na itinotogdok, narerealisar kan lokal na mga tawo na an Mga Saksi ni Jehova magdadanay dian. Dakol an garo baga nagduduwaduwang makiasosyar sa mga Saksi sagkod na magkaigwa sinda nin sarong presentableng lugar nin pagsamba. An Kongregasyon nin Nafisi sa Malawi nagbabareta: “Ngonyan na igwa na kami nin presentableng Kingdom Hall, nagreresulta iyan sa sarong marahayon na patotoo. Kun siring, pasil na makapoon nin mga pag-adal sa Biblia.”
An mga miembro kan Kongregasyon nin Krake sa Benin nagtios nin grabeng pag-olog-olog kan nakaagi huli ta an dating Kingdom Hall primitibo kun ikokomparar sa nagkapirang simbahan. (Retrato 4) Ngonyan an kongregasyon igwa na nin magayon na bagong Kingdom Hall na nagrerepresentar sa tunay na pagsamba sa simple sana pero may dignidad na paagi. (Retrato 5) An kongregasyon na ini igwa nin 34 parahayag kan Kahadean na may promedyong nag-aatender na 73 sa mga pagtiripon kun Domingo, alagad 651 an nag-atender sa dedikasyon kan Kingdom Hall. An kadaklan sa sainda mga taga duman na paborable an nagin impresyon kan maheling na nakaya kan mga Saksi na magtogdok nin tiriponan sa halipot sanang panahon. Hinohorophorop an nakaaging mga pag-oswag mapadapit digdi, an sangang opisina kan Zimbabwe nagsurat: “Sa laog nin sarong bulan na pagtogdok nin bagong Kingdom Hall, parateng nadodoble an kabilangan kan mga nag-aatender.”—Retrato 6 asin 7.
Daing duda na an dakol na bagong Kingdom Hall nakatatabang na magkaigwa nin mga lugar para sa espirituwal na kaginhawahan kan nagdusay na mga Kristiano sagkod interesadong mga tawo. “Nakamamate kami nin dakulang kagayagayahan,” an sabi kan sarong Saksi sa Ucrania pakatapos na gamiton kan lokal na kongregasyon an bagong Kingdom Hall kaiyan. “Naheling mismo kan samong mga mata kun paano tinatabangan ni Jehova an saiyang banwaan.”
[Kahon/Mga ritrato sa pahina 10, 11]
Pinahahalagahan an Buka an Palad na Pagsuportar
Napapalukso an puso kan Mga Saksi ni Jehova na maheling an marikas na pag-oswag na nagibo tanganing ikatao an apretadong pangangaipo nin bagong mga Kingdom Hall sa bilog na globo. An dagos-dagos na pag-aumento sa kabilangan kan mga parasamba ki Jehova sa manlaenlaen na nasyon naghahagad na magtogdok nin dakol na bagong Kingdom Hall sa ngapit. Tara, sa promedyo, durante kan 2001 taon nin paglilingkod, 32 na bagong kongregasyon an nabilog kada semana! An mga kongregasyon na iyan nangangaipo nin lugar na pagtitiriponan asin sasambahan.
Tibaad lumataw an hapot na, ‘Paano niato sinusustentohan an mga proyekto na arog kan pagtogdok nin bagong mga Kingdom Hall, nangorogna sa mga nasyon na an mga tugang limitado an mapagkukuanan nin panggastos?’ An simbag imbuelto an pagsuportar nin Dios sagkod pagigin buka an palad nin mga tawo.
Inootob an saiyang panuga, ibinububo ni Jehova an saiyang banal na espiritu sa saiyang mga lingkod, na pinapangyayari sinda na “maggibo nin marahay, magin mayaman sa marahay na mga gibo, magin matinao, andam na manhiras.” (1 Timoteo 6:18) Pinahihiro kan espiritu nin Dios an Mga Saksi ni Jehova na suportaran an paghuhulit kan Kahadean sa gabos na paagi—na idinudusay an saindang panahon, kosog, personal na pagtrabaho, asin iba pang rekurso sa Kristianong aktibidad.
An espiritu nin pagigin buka an palad an nagmomotibar sa mga Saksi asin iba pang nagtatabang sa pagpahiwas asin pagtogdok sa pinansial na paagi. Apuera sa pagtabang na mabayadan an regular na mga gastos kan lokal na kongregasyon, nagkokontribwir sinda sa gibohon na pagtogdok sa ibang parte kan kinaban.
Sa kada kongregasyon, igwang mga kahon na may malinaw na nakasurat na “Contributions for the Worldwide Work—Matthew 24:14.” Puedeng iholog dian kan mga indibiduwal an gikan sa boot na mga donasyon kun gusto ninda. (2 Hade 12:9) Pinahahalagahan an gabos na donasyon, dakula asin sadit. (Marcos 12:42-44) Ginagamit an pondong ini sa laen-laen na paagi segun sa pangangaipo, pati sa pagtogdok nin mga Kingdom Hall. An siring na mga pondo dai ginagamit sa pagbayad sa sueldohan na mga ehekutibo huling mayo kaiyan an Mga Saksi ni Jehova.
Nagigibo daw kan mga kontribusyon para sa pambilog na kinaban na gibohon an katuyohan kaiyan? Iyo nanggad. An sangang opisina sa Liberia—sarong nasyon na nadanyaran nin guerra sibil—nagbabareta na an mayoriya kan lokal na mga Saksi napapaatubang sa kadaihan nin trabaho asin grabeng problema sa pinansial. Paano makakukua nin presentableng mga lugar nin pagsamba an banwaan ni Jehova sa nasyon na ini? “Gagamiton an mga kontribusyon kan buka an palad na mga tugang sa ibang mga nasyon tanganing gastosan an gibohon,” an sabi kan sangang opisina. “Kanigoan kadonong asin kamamomoton na areglo!”
An lokal na mga tugang nagkokontribwir man, sa ibong kan saindang limitadong kabuhayan. An nasyon nin Sierra Leone sa Aprika nagbabareta: “Sinusuportaran kan lokal na mga tugang an paghihingoa asin naoogma sindang magtrabaho mismo asin magtao nin ano man na pinansial na kontribusyon na makakaya ninda sa pagsuportar kan pagtogdok nin mga Kingdom Hall.”
Sa katapustapusi, an paghihingoang ini sa pagtogdok nagtatao nin kaomawan ki Jehova. An mga tugang sa Liberia entusiastikong nagsabi: “Ipapaheling sa mga tawo kan pagtogdok nin presentableng mga lugar nin pagsamba sa bilog na nasyon na an tunay na pagsamba magdadanay asin magtatao nin dignidad saka magigin samno sa dakulang ngaran kan satong Dios.”